#سر_نوفمبر
الحلـقة 17
لجين : مش نكرهه لكن هكي معاش عندي بيه جو
رهف : اريح
لجين تنهدت وقالت : يلا ربي يهنيه
رهف اتكت ع سريرها بعد ما كانت مقعمزة
ناضت لجين من مكانها واتجهت للدولاب وفتحاته ، خدت حوايجها حتى ادوّش وطلعت من الدار وسكرت وراها الباب
شافت رهف لهاتفها واستغربت من اختفاء مراد اليوم ، من الصبح معاش اتصل
قالت في نفسها " يمكن هو يبي يشوفني هل ندوره ونسأل عليه او لا ، عنده الحق ديما هو يلي يبعت "
واتصلت بيه ، فرد هو من اول رنه
ابتسمت رهف لما فتح الخط وقالت : شورك في ايدك
مراد : كيف جيت بنتصل اني
رهف : هدا علاش رديت فيسع
مراد بعتاب : قولي القلوب عند بعضها يا متصحرة
رهف : القلوب عند بعضها
مراد : تعرفي مع ان تكون اول حب لبنت مليحة هلبا لكن عيبها انّك ح تكون فار تجارب لأنها ماتعرفش تتعامل معاك
رهف بإستغراب : علاش مليحة هلبا ؟
مراد : قصدي حني الشباب لما نلقو بنت فاتت العشرين سنة وماعمرهاش دارت علاقة وترفض في الشباب معناها عندها في مخيلتها شروط صعبة او تراجي في موضوع قوي باش توافق ، يعني ديما البنت يلي عمرها فوق العشرين ومادارتش صاحب ووافقت علي شخص الشخص هدا ح يشبحوله انه محظوظ لأنه قدر يعبيلها عينها ويكون اول شخص يخش حياتها
رهف عقدت حواجبها : بجديات تفكرو هكي ؟
مراد : اغلبنا هكي
رهف : مانبيش نصدمك بالسبب الحقيقي
مراد : اصدمي
رهف : مش كل بنت محور حياتها انها تلقى حبيب او ادير علاقة ، يعني انت تسحاب البنت من لما عمرها سبطعاش تبي تهدرز وتراجي يجيها حد ويعبرها ؟ وكانها وصلت مثلاً التنين وعشرين من غير ما ادير علاقة معناها ماجاهاش موضوع مليح ولو واقفت عليك معناها انت الموضوع المليح ؟ غلط ره ، فيه هلبا بنات مش مفكرين في الحب وكل يلي يخممو فيه قرايتهم ومستقبلهم ، وفيه يلي كل همها انها تختم القرآن قبل ، وفيه يلي تطلع من الجامعة وشايله الموضوع من راسها لأن حلمها تحضر ماستر ، وفيه يلي تبي تتزوج من غير علاقة لأن عندها ميول ديني وصح ليدها الناس هادي ، ف تفكيركم غلط للأسف
مراد : توا انتِ تخايلي روحك ولد !
رهف : باه
مراد : بجديات تخايلي روحك ولد تمام ؟ ومشيتي درتي علاقة مع بنت كانت عاجباتك
رهف : باه ؟
مراد : وصارحاتك ان كان فيه حد قبلك
رهف : اوك ؟
مراد : شن شعورك ؟
رهف : عادي ماهو حتى اني كان فيه بنت قبلها يعني
مراد : مش ح تقدري تحسي الشعور لأنك مش ولد ! تعرفي فكرة ان حبيبتك كانت تعرف حد قبلك بروحها تحرق الدم بغض النظر انها كانت تحبه او لا المهم كانت تسهر معاه وتهدرز عليه وتضحك معاه وتتلاقا معاه
رهف : كل الناس عندها ماضي ، انك موجود في الحاضر متعها لأنه هو الأهم
مراد : عارف حتى اني الكلام هدا ، لكن ديما مكانة الحبيب الأول مغرية لينا حني الاولاد ره منلاخير حتى بعد الكلام يلي حكيتيه قاعدة ما تغيرتش قناعتني
رهف : اني عندي الحبيب الأخير اهم من الأول
مراد : للبنت !
رهف : كيف يعني ؟
مراد : انتِ ك بنت مش هامك انّك تكوني الحبيبة الأولى ، تبي تكوني الأخيرة
رهف : ايه صح
مراد : عكسنا حني
رهف : باه تخيل انت كنت الاول ، بعدين جي جيش بعدك شن الفايدة ؟
مراد : تعرفي لو الراجل كان الحب الأول في حياة البنت يلي يبيها تي والله ماهو مسيبها ولما ياخدها والكلام هدا اني نراهن فيه بلحيتي
رهف : الراجـل
مراد : ايه يبي رجولية الكلام هدا ، المهم عندك امتحان غدوا ؟
رهف : ايه
مراد : قريتي كملتي ؟
رهف : مزال بنراجع
مراد : خلاص راجعي ومرّات غدوا نخطم عليك في الكلية
رهف عقدت حواجبها : بتجي ؟
مراد : ايه انشالله
رهف : اوك خلاص نتلاقو غدوا امالا
مراد : سلامات
سكرت رهف الخط وفتحت شيتاتها حتى تراجع
وبعد ساعة من المراجعة حطت راسها حتى ترقد
بعد دقايق من محاولتها في النوم فشلت فقررت انها تفتح هاتفها لعلى وعسى مراد فاتح
فلقاته مسكر
ركبت تقرا في محادثتهم ، وتسمع في الرسايل الصوتية متع مراد
طلعت من المحادثة بعد ما قرت تهدريز يومين فاتو وخشت علي حسابه
فتحت صورته وقعدت تتأمل فيه وهي مبتسمة
" زعما لو عرف بقصتي ح يكمل معاي ؟ "
سألت نفسها في خاطرها
هدا الحاجز الوحيد بينهم ، السر الصغير هذا
يوم ينكشف يا بيها يثبت مراد صدقه وحبّه ليها
يا بيها يتخلّى عليها ويتحجج بيه !
السر الوحيد يلي ما يدري عليه حد الا عيلتها ، يمكن ح يكون يوماً ما اختبار لي علاقتهم
وسكرت هاتفها بعد ثواني ورقدت
*************************************
تاني يوم الصبح ، الساعة 11:10 :
طلعت رهف من القاعة وهي تراجع مع وعد كالعادة في الممر
وعد : ياودي غلط غلط انتِ حليتي بالجزئية الملغية !
رهف بإنفعال وهي تتصفح في وراقي المذكرة بسرعة : تي شن غلط هما ينحلو بنفس القانون
وعد : قداش ما تسكري في راسك يا رهف
رهف سكرت مذكرتها وشبحت لصاحبتها : بالله اسكتي خلاص سكريلي عمري ما راجعت معاك ولقيت روحي مجاوبة
وعد : وفي الاخير تطلعي مصفيتيها في التسعينات واني يلي ع الحافة
رهف شبحت لصاحبتها : مصحّك حتى انتِ درجاتك كويسة
قعمزو تحت المظلة الخشبية فقالت وعد : بنمشي لبنت خالتي شوي وبناخد فطور ونجيك
رهف : اوك
ناضت وعد ، وبعد دقايق اتصل مراد فردت رهف : الو
مراد : وينك ؟
رهف : انت وين ؟
مراد : نفس المكان امتع يومها
رهف تلفتت وقالت : اهو نشوف فيك ، اني في المظلة يلي بعدها
مراد شبحلها وسكر الخط ، وماهي الا ثواني وجي قعمز وقال : صباح الخير
رهف بدون اي تعابير شبحتله ورجعت نزلت عيونها علي يديها يلي كانت اطربق في صوابعها : صباح النور
مراد عقد حواجبه : خيره القنين ؟
رهف تنهدت وحطت ايدها ع خدها واتكت عليها علي الطاولة وقالت : مجاوبتش كويس اليوم
مراد : الاسئلة صعبة ؟
رهف : ملخبطة واني ماقريتش كويس
مراد : عادي نصفي هو ، تعوضي في الفاينل
رهف بحزن : انشالله خير
مراد شبح ليديها يلي كانت اطربق فيهم وتعاود وقاللها : ارحمي صوابعك
رهف بطلت طربيق وقالت : خلاص بطلت
مراد : نجيبلك حاجة تاكليها ؟ شكلك مش فاطرة
رهف : لالا مخاطريش
مراد : بجديات ؟
رهف : والله ما نبي
مراد تلفت يمينه وقعد يشبح لثواني ورجع شافلها وقال مع ابتسامة : مستاحشك
رهف ابتسمت بلطف وقالت : حتى اني
مراد : انوضو نتمشو ولا مخاطركش ؟
رهف بتذمّر : والله مخاطري صاحبتي سيبتلي شنطتها وترحالها عندي
مراد : وين مشت هي ؟
رهف تلفتت للمبنى يلي جنبهم وقالت : بتشوف قريبتها او حاجة هكي
ورجعت شبحتله وقالت : شن جو الخدمة ؟
مراد : اهو ماشي
رهف سكتت فرجع تلفت هو للحيط يلي كان يفصله اربعة متر تقريباً عليه وقال : تعال قعمز معانا
تلفتت رهف فلقت معز متكي ع الحيط ويدخن وقف وقال لمراد بنوع من التهديد : تكلم فيا خونا ؟
رهف تلفتت القدام وقالت لمراد : خلاص اسكت فوته
مراد من غير ما يرد علي رهف قال : اي نكلّم فيك !
لوّح معز الدخان وقال : شن حسّك تقول ؟
مراد بإنزعاج : نقول عيونك ما تفلتهمش فينا خير
معز : مدايرلي فيها راجل غر بالتلبليب ، تعال وريني عضلاتك يا بطل
حسّت رهف ان معز كان يحاول يستفز مراد ، ونجح لما وقف مراد وهو يشحله نظرات تحدي
تلفتت رهف لمعز وقالت بغضب : معز شن ادير ؟
شبحلها مراد وعقد حواجبه : تعرفيه ؟
يتبع ...
Mariam Ali
أنت تقرأ
#سر_نوفمبر بقلم الكاتبةMariam Ali
Romanceكاتبة روايات#كروموسوم #بحر النسيان #معشوقتي #نقطة ضعف
