#سر_نوفمبر بقلم الكاتبةMariam Ali

الحلقة14

#سر_نوفمبر
الحلـقة 14

ضوت شاشة رهف بإشعار من الفيس بوك
فـ فتحت هاتفها ولقت رسالة صوتية من مراد
ناضت من جنبهم واتجهت لدارها وفتحت الرسالة بفضول
فكان صوت مراد وكان الواضح انه طالع في الشارع وهو يقول " رهف وينك مش مدوره اليوم اني في الطريق شوية ونوصل نكلـ..."
وسكت لما طلع فجأة كلاكس قوي وبعدها بثانية كأنه صوت تكسير مرش
عقدت حواجبها وعاودت تسمع في التسجيل بعد قوّت الصوت
اتصلت بيه بصوابع يرجفو وبعد ثواني نزلت الهاتف من علي وذنها بخوف بعد ما قرت كلمة "contacting" يعني ماعنداش نت ، يعني التليفون مسكر !
عاودت اتصلت وطلعتلها نفس الكلمة
ناضت من سريرها بإستعجال وطلعت من الدار وقالت بخوف : عندك رقم جارتنا جميلة ؟
شبحتلها امها بعد كانت تتفرج وقالت : لالا ، علاش ؟
ابتلعت رهف ريقها وحطت يدها ع جبهتها وهي تفكّر لن تفكرت حازم
فرجهت لدارها بسرعة واتصلت بيه ، فرد عليها
حازم : ايوا
رهف وهي تتكلم بسرعة وهي ماشية جاية في دارها بخوف : الو حازم بالله عندك رقم مراد ولد جيرانا ؟
حازم بإستغراب : ايه عندي ، علاش ؟
رهف : بالله ابعتهولي بسرعة
حازم : خيرك شن فيه ؟
رهف : غر ابعته فيسع تو نعاودلك بعدين نقولك
حازم بإصرار  : رهف شن صاير ؟
رهف عيطت عليه بإنهيار : حاززم ابعته الهم ما تقلقنيش قتلك تو نعاودلك ونحكيلك !
حازم : باه سكري تو نبعتهولك في رسالة
سكرت رهف الخط وربعت يديها وهي ماشية جاية في دارها وتعاود تسمع في التسجيل الصوتي لن قطع عليها صوت رسالة حازم فاتصلت بيه بسرعة والغريب ان الهاتف كان يرن !
رد مالك في الرنة الرابعة ففتحت هي عيونها مجرد ما فتح الخط وحست بقلبها بيطلع من مكانه لما قال : الو ؟
رهف قعمزت ع سريرها لما سمعت صوته وغمضت عيونها وتنهدت براحة وقالت : الحمدالله يارب
مراد بإستغراب : مني معاي ؟
رهف فتحت عيونها وقالت : وينك شن صاير فيك ؟
مراد بإستغراب : رهف ؟ منين حصلتي رقمي ؟
رهف : من حازم جارنا ، انت شن صاير فيك طمني ؟
مراد : في شنو ؟
رهف عقدت حواجبها : بعتلي رسالة صوتية وفي الاخير سكتت لما سياره كلكست وصارت دوشة
سكت مراد قبل ما يقول : اااه تفكرت ، السيارة يلي جنبي خشت فيها سيارة طالعة من التقاطع
رهف : خلعتني الله يخلع ضروسك خيرك ماتردش لما اتصلت بيك ؟
مراد : امتى ؟
رهف : بكري شوية علي المسنجر
مراد : تم عليا اشتراك النت
رهف تنهدت للمرة التانية فقال هو : قصدك تسحابيني اني يلي درت حادت ؟
رهف : ايه لأنك سكتت لما كلكست السيارة
مراد : نسحابها بتخش فيا تلفتت لقيت سيارة متقية بعدها درست شفت الراجل شن صاير فيه ولما جيت بنبعتلك تاني لقيت اشتراكي تام
رهف : شن صار فيه الراجل ؟
مراد : بسيطة جاته السيارة تعكرشت من اليمين لكن هو مصارله شي زي الجن
رهف : باهي الحمدالله الحديد يتعوّض
مراد سكت ثواني قبل ما يقول : صار تسحابيني اني يلي مشيت فيها
رهف : والله الا تحسرمت قلبي طاح في بطني
مراد : خفتي عليا ؟
رهف بكل صراحة : خفت شن بنكدب عليك ؟ بالدات حوادث السيارات ما نودهمش حتى لعدوي
مراد : يعني انتِ تيامو  ؟
رهف بهزوة : لا طبعاً
مراد : يوم ندير حادت تو نشوفوك كان مجيتيش تبكي واني في الغيبوبة وتقوليلي يا مراد نوض اني نحبك
رهف : الحمدالله انك مش ح ادير حادث
مراد : نخلوه اخر حل
رهف عقدت حواجبها : اخر حل لشنو ؟
مراد : اخر حل باش تقوليلي تيامو 
رهف بإستغراب وهزوة : قصدك انت تافه لدرجة ادير حادث باش نجي اني ونقولك نحبك ؟
مراد : كانك تحبيني لو درت حادث ؟ من غدوا تلقيني مولع سيارتي وللسريع
أبتسمت رهف بسعادة وقالت : يلا مدامك امورك تمام وصحتك كويسة يلا تصبح ع خير معناها
مراد : وانتِ من اهله
سكرت رهف الخط وتفكرت كلمته وضحكت وحطت ايدها علي فمها
*******************************************
ومرو الأيام الى عشية هداكا اليوم :
خشـت لجين لإمها في المطبخ ولقتها تجهز في الصفر ، اتكت لجين ع الرخامة وقالت لـإمها بإستغراب : من بيجينا ؟
زهرة وهي تحط في الحلويات في المترد : نصيب بكري اتصلت بيا قالت خاطري ضايق وخاطري نجي نهدرز عليكم
لجين عقدت حواجبها وقالت بإنزعاج : قوليلها حني بروحنا خلوقنا ضايقات اخطينا ترا
شبحتلها امها وقالت بأسلوب توبيخ : تحشمي المرا نفيص ساعة ومروحة والناس لبعضها معاش تقولي هكي
ربعت لجين يديها وقالت : مانحبهاش
امها : ماطلبش حد منك تحبيها غر اسكتي بس 
سمعو صوت طقطيق الباب ، فقالت رهف يلي كانت في الصالة : تو نفتح اني
وناضت فتحت ، سمعت لجين صوت نصيب يلي كانت تسلّم ع رهف وخشت بيها للصالة
طلعت زهرة ووراها بنتها وسلمو كذلك وقعمزو وزهرة تسأل علي احوال نصيب وتقول : شن اخبارك شن امورك ؟
نصيب بتذمر : الحمدالله اهو حال التعب والمرض
عقدت زهرة حواجبها مع ابتسامة لطيفة : شنو يامرا بالك تتوحمي ؟
نصيب ابتسمت ابتسامه غير مريحة وقالت بنوع من الخجل المصطنع : ايه
حست لجين بخيبة أمل ثانية من حازم وبان الضيق علي ملامحها
فقالت زهرة امها : مبروك مبروك ربي ينوضك بالسالم
وتلفتت زهرة لـ لجين الحزينة وقالت : اهو ع الاقل أدوم يحصل حد يونسه
ابتسمت لجين بمجاملة لإمها وشافت لنصيب وقالت : مبروك
وقالت بعدها رهف : الف مبروك
نصيب بإبتسامة نصر شبحت لـ لجين وقالت : الله يبارك فيك والعقبا ليك نفرحو بعرسك ونشوفو صغارك
لجين بمجاملة : انشالله يارب
زهرة : قداش ليك ؟
نصيب : ليا سبوع تعبانة ومش طايقة حازم ولا شكله ، رفعني امس للمصحة قالولي تلاته اسابيع
زهرة : باهي ربي يتمم علي خير
نصيب : انشالله يارب
ناضت من جنبهم لجين واتجهت لدارها ، وبعد ثواني لحقتها رهف وخشت وراها وين ما لقتها مقعمزة ع سريرها وتبكي وحاضنة رجليها لصدرها 
قعمزت مقابلها رهف وقالت : لجين
شبحتلها بعيونها الحمر لجين وقالت : كداب !
رهف : قاعد هامك ؟
لجين هزت راسها بالنفي ومسحت دموعها وقالت : لا
رهف بإستغراب : امالا علاش تبكي توا ؟
لجين وهي عاقدة حواجبها بإنزعاج ووجها احمر وعيونها يلمعو  : لأني صدقته! نبكي واجعتني روحي واني يلي نسحاب روحي غالية عنده ويحبني ويبيني وشاريني طلعت ولا حاجة ، كان يفوّت عليا في الكساد ومعبي بيا فراغ وقته بس ياريتني كنت نعرف شن في قلبه بس !
رهف عارضت كلامها وقالت : معاش تقولي هكي ، هو تعلّق بيك وواضح الموضوع من شبحاته ليك ره ، القصة ومافيها هو عارف ان الدنيا ما توقف ع حد ، مرّات الظروف ما تكونش مناسبة انها تجمعك بالشخص يلي حبيته ، وتسيبو ويمشي كل حد في طريقه ، هل بتوقف حياتنا بعد ما سيبنا ؟ طبعاً لا ! بنكملو ايامنا بطريقة طبيعية صح من الأول ح تكون صعب بس بعدين عادي الوقت يداوي
شبحتلها لجين وهي مش مقتنعة بكلامها وتلفتت يسارها بإنزعاج
فكملت رهف حتى تقنعها وقالت : هو كمّل حياته لأنكم استحالة تتزوجو
لجين شبحت لـ اختها وقالت : يلي يحب يحاول ع الاقل قبل ما يمشي
رهف : هو حاول بس الله غالب
لجين : مرة بس !
رهف : لأن الظروف مش مناسبة ، هو كان يشبح حتى لولده ، سيوره ويجي يلي مستعد يحاول سبعين مرة
لجين بحزن : ما اعتقدش
رهف : لا اعتقدي ، لازم تحطي في دماغك انك ربّك ديما كاتبلنا الاحسن غر حني ما ندروش
لجين تنهدت وقالت : انشالله يارب
رهف حطت ايدها علي ركبة اختها وقالت : هي نوضي اغسلي وجهك وقعمزي معانا ما تبينيلهاش انك زعلانة او مقهورة
هزت لجين راسها بالإيجاب فناضت رهف من جنبها وطلعت من الدار ، خشت للمطبخ صبت العصير وطلعت بالصفرة وحطتها فوق الطاولة وقعمزت جنب امها فقالت نصيب : الحق يا ابلة زهرة اني جاية بنكلمك في موضوع
يتبع ...
Mariam Ali