سراب 🌌... للكاتبة 💕جوجي محمد 💕
Part 1...👇🏻👇🏻
منصور : هداية هدااية يا بنتي تعالي
هداية : شوي بابا
منصور : ابسرعة تعالي
هداية : انعم بابا شن فيه
منصور : اسمعي
هداية : اااه بابا الصوت عاالي اطفيي
منصور : غير زيدي اسمعي
هداية : اااه راسي اطفيه
هداية طاحت من السرير :ااي وهو منبه الفجر ااه راسي 🤕 ناضت هداية توضت وصلت وولت اتكت على السرير ثواني وسمعت فونها يشرين ...
هداية : ووه نضنا عاد .. وشدت فونها وتلقاه رقم غريب
هداية : تيي برا ارقد عليا وقت اتصالات هوا ..ودارت فونها ع الصامت ورقدت...
نوصفلكم العيله ❤ في الاول الاب منصور يخدم في شركة نفط .. عصبي بس يحب بناتة هلبا ومدلعهم ع الاخير ...الام فوزية دكتورة نساء حنونة ع الاخير وتبكي على ابسط شي ... هنادي الكبيرة في خواتها 26 سنة طويلة ونقشها ع العسلي وعيونها واسعات مخطوبة من محمود ولد جيرانهم دلوعة ودمها عسل حنينة على خواتها واعقل وحدة فيهم 😍عندها زوز مشاكل بس انها مغرورة هلبا و عندها فوبيا من الدم(هيموفوبيا) و هداية 24 سنة تشبه لأختها هنادي حتى هيا نقشها ع العسلي ... على قد ما اتدلعت هنادي هي غلبتها في الدلع 😂 عنايدية وراسها كاسح كان قالت حاجة لازم اديرها لاكن طيووبة وحنينة هلبااا ... متتصوروش قداش قلبها مليان طيبة وحنية ...حساسة و بكاية على ابسط شي.... مش مخطوبة ولا مرتبطة... معمرهاش حاولت ترتبط لأنها عارفة روحها كان تعلقت بي حد مستحيل ترخيه وكان كبدت على حد بتكرها في عيشتة 😂♥️والصغيره هند 19 سنه طويله و بيضه وعيونها رصاصياات وشعرها طوييل و اسود 💛 اصغر وحده في العيله دلوعت امها وبوها وخواتها مازالت مش مقتنعة بالحجاب وخواتها وخوتها يقولولها خلاص كبرتي لازم تتحجبي وهي مرة تلبسه وعشرة لا 😂 وعندهم زوز خوت اوالاد ... الكبير اسمه رواد 28 سنه... يشبه محمد رمضان المصري عصبي هلبا لاكن قلبه حنين 😍 والثاني ايمن 22 سنه بشرتة بيضة طويل وجسمة رياضي يقتتل 🤤😍 وشعره اسود وعيونه عسليات... حالة العيلة المادية كويسة وخدمة بوهم زادت خلتهم فلوس ..بس هما عيلة متواضعة و محترمة زي اي عيلة ليبية تانية 🇱🇾...
(( الرواية كلها من نسج الخيال مافيهاش حاجة حقيقية ))
في الصبح
فوزيه : هنادي ... هدااية نوضوا حوش عمكم بيجو
هنادي : اممم باهي ماما خمس دقايق
فوزية : هيا نوضوا توا باش تكملوا الضمان بسرعة
هداية : ماما نبي نررقد
خشت امهم ونحت عليهم النصولات
هداية: حي عليا صقققع
فوزية : صقع في نص الصيف ياكدابة
هدايه والله صقعانة
فوزية : هياا نوضوا خلاص عاااد
هنادي : ماما غير خمسة دقاايق بسس
فوزيه : والله انادي بوكم راه
هداية : لا لا إلا بابا نضنا نضنا
ناضت هداية خشت للتواليت دارت دوش ع السريع وطلعت فطرت وتضم في الكوجينة وهنادي وهند مره يضموا ومرة يتعاركوا...
هند: هدااااية خليني نكمل عليك الكوجينه وبري مع هنادي
هداية: هههه وخيرها هنادي معاك
هند : مرة شادة فونها ومرة تكلم في خطيبها و مخليتني اندير في الدنيا كلهااا
هنادي : اتعالي ياابكايه تعاالي😂
هداية: ههههه
هند : اقلبي وجهك عليا معاش ضامه معااك
هنادي : بالله برو ملحوا انضم بروووحي
هند : انتي تغسلي في الماعين ولا تلعبي بالرغوة
هداية : هههه خزي انا ديما اندير في رغوة لما نغسل في الماعين
هند : ووه مفضااك
هداية قامت الرغوة ولوحتها على هند وقعدوا يضحكوا ويلوحوا في الرغوة ع بعضهم 😅 ولما هند كيف بتطلع من الكوجينه زلقت با الرغوة وانضرب راسها على الرخامه والدم عبى الكوجينه 😱هداية طاحت على ركابها وقعدت تعيط😢 ولحقت عليهم هنادي وأول ماشافت الدم داخت....جي رواد يجري وشاف هاكي الكوجينة تعووم بالدم ..... يتبع
اول رواية ليااا 🥺 رأيكم🐼🌸 ... دعم وتفاعل بليز 💕
