ضجيج الموتىٰ (زهـرة).

" الجزء الثالث "

رجعت للبيت تعبان اول ما طبيت اسمع صياح وعياط هم مرت ابوي خرب شوكت الله ياخذها ونخلص..داروح للحمام اسبح لگيت اخوي محمد بالطريق
- رائد خير شكو شصاير هالمرة هستوني اجيت

- واني هستوني طبيت ومادري شسالفه

- ابوي هنا

- خاب گتلك هستوني طبيت مادري

- تريد تسبح؟

- اي بس لا لاحگني للحمام

- لا، بس خلص بسرعه اريد اسبح وراك

- ميخالف..
...
طبيت للحمام هستوني اسد الباب وسمعت ابوي يصيح على مرته بكلمات ما مفهومة من گد ما الصوت عالي..
غلست وكملت سبح دا اطلع وچان الگه محمد بوجهي..
- لكك تعال الحگني هاي المره تخربطت ودتنزف من حلگهه وخشمهه وابويه عافها وطلع..

- شسويلها قابل اول مره

- لا بس هالمرة مبينة متأذية حيل خلي ناخذها للمستشفى لا توگع براسنا وهذا ابوي تسودن كلش

- أخذها انت اني اريد أقره و انام وراي امتحانات ماعندي وقت..

- دضل ضل اني رايح

- روح الله وياك..

رحت ذبيت ملابسي بالغسالة وگبل للغرفة سمعت صوت الباب ينفتح هاي اكيد اخوي ديطلع گمت شفته شوف المره شصاير بيها مدمايه خرب اني وين گاعد شهالوحوش هاي..

عفتهم ورجعت للغرفة فتحت الموبايل زهره راده عليه واخيرًا.. اتصلت عليها ما جاوبت اتصلت مره لخ رفضته هاي شبيها..سديت الموبايل وگعدت اقرا.. الله كريم منا لصبح..
........
زهرة..
يممه اني طالعه هسه

- وين طالعه بهالليل

- رشا وحدها بالبيت أهلهم طالعين وتريدني يمها اليوم لأن خايفة

- وانتي شبسرعه صدگتي يمكن هذا كمين.. انتي مو تگولين اسلوبها مو حلو وياي

- يمه يا كمين لخاطر الله عوفي سوالف المسلسلات هاي.. ماكو شي والبنيه خابرتني تبچي خطيه عايفيها وحدها..

- اصبري خلي اجي وياچ

-اهووو يممه گتلچ ماكو شي شنو سالفتچ قابل وين هي مو بعيدة تره

-حتى يطمأن گلبي اجي وياچ اوصلچ لباب البيت

- ماشي تعالي
اخذت موبايلي وطلعت على صفحهه كتبت رسالة لرشا..
"شوفي امي لحت تجي وياي واني گتلهه اهلها طالعين فأريدچ توگفين بالباب وما تخلين واحد من اهلچ يطلع لا تفضحينا.. "
ما شافت الرسالة گلبي ضل يدگ خرب اذا امي عرفت گبل ترجعني للبيت وبعد ما تصدگني واذا عرفت بسالفة رشا بعد نديح..
صعدت بالسيارة واني متوترة.. وره خمس دقايق تقريبًا جاوبت..
" هاا ماشي همزين گتيلي راح اطلع انتظرچ"..