ضجيج الموتىٰ (زهـرة).

"الجزء التاسع "

زهره..
گمت ما اطلع لا للمظاهرات ولا للجامعة رائد ماعندي تواصل وياه الا نادرًا.. بعد ما تأجلت المظاهرات على يوم ١٠/٢٥.. علمود الزيارة وبعد ما راحولنه ١٦٥ شهيد!
من ضمنهم ساره طالب وزوجها الي اغتالوهم بالبصرة قصتهم كلشش اثرت بيه وخلت عندي حافز انو بمجرد ترجع المظاهرات ارجع لو على جثتي..
اغتالوهم بليلة ظلمة چانت ساره بيها خايفة وختلت وره الثلاجة بس الملثمين لحگوها وضربوها اربع طلقات براسها وصدرها..
ولحگها زحف حسين وهو مابي نفس ومات يم رجلها وهو ينزف گدام عيون بتهم الي ما يتجاوز عمرها ٥ سنوات!
هذا مو مشهد من فلم بوليسي هاي جزء قليل كلش من الي صار بمظاهرات سلمية بالعراق.. كل ذنبهم چانوا يوثقون الاحداث بكامرتهم ويعالجون الجرحى!
من شفتهم يقتلون الخوش اوادم والي گلبهم ع الوطن گلت لازم احنه ناخذ دورهم.. ونمثلهم مادام بينا نفس.. ما نگطع طريقهم..
....
١٠/٢٤  بليل الساعة ١١..
خابرني رائد واني نعسانه اريد انام گبل جاوبته
- هاا لك وين مختفي
- زهره شديصير يمكم
- والله مدا اطلع وماعرف كلشي..لو ما النت ولا عبالك اكو مظاهرات.. وهسه بس ترجع يگطعو هنيالك انت..
- دنچبي هسه راجع اني بألمانيا تره
- وتريد ترجع شگد بطران
- لچ جماعتي هنا بالگوه طلعوا من حلگ الموت شنو فضلي عليهم اعوفهم واتونس هناك!
- رائد بالبداية أحييك على ضميرك الحي.. بس اكيد يعذروك انت اذا اجيت راح تخسر دراستك وسنة تضيع عليك ويمكن تخسر حياتك وشبابك هم
- شبيچ زهره صدگ هيچ تفكرين شهالانانية لو كلنا هيچ نفكر چان ضل كلمن گاعد بيته وبقينا مدمغين للرايح والجاي..
- بكيفك بعد انت الي تشوفه صح براحتك.
- اي اكيد براحتي
- شوكت تجي
- باچر اني بنص بغداد
- توصل بالسلامة عود خابرني اطمئن عليك..
- زهره قبل لا اروح ما حن گلبچ عليه تره بعدني احبچ
- اكثر من مره حچينا بهالموضوع وتعرف موقفي
- اي خلص براحتچ.. بيباي
- بيباي
......
سديته منه واني گلبي وجعني لأن جاوبته بنتر ومبين انجرح مني بس ماكو غير هالاسلوب حتى ما اخلي يتأمل.. احس روحي حقيره كلش هو أول واحد ساعدني من اجيت لامريكا وكلشي ماعرف.. اعرفه من ٣ سنوات طيب كلش بس اني ماريد احب عندي عقدة..
.....
ضجت ونمت..
گعدت الصبح حتى مالي خلگ اروح للدوام..
خابرتني صديقتي نور.. هاي مسعفة بالتحرير.. واخوها اتصوب ذاك اليوم ورجع للمظاهرات
خابرتني تبچي
- شبيچ نويره ليش تبچين؟
- حيدر استشهد
- لا حول ولا قوة الا بالله شوكتت!
جاوبتني بالگوه بخنگه وصوتها يگطع..
- قبل ساعه اتصوب برصاصة براسه من چان ديشيل صديقه ولچ اباوع لعيونه گام يطلع منها دم لچ موتني وهو يحاول يحچي ويغص بدمه وجهه صار اصفر والدم ينزف اخذناه للمستشفى ما طول ساعه واستشهد
- والله ماعرف شگلچ حيل صعبه الله يرحمه ويعينچ

- شيعيني ولچ حيلي انهد هو الي چان ياخذني وياه ويشجعني ومتحمس ولچ راح بعد ما شوفه

ضليت ساكتة ماعرف شگول وهي تبچي بحرگه
گتلها اگدر اجي يمچ؟
گالت اي تعالي..
سديته منها
وغصه بگلبي
اريد اروح حتى لو اهلي ما يدرون ماگدر اشوف الشباب بهالحال واني گاعده هنا مثل الصخلة..ضميري يأنبني.. بس اهلي مشكلة امي قافلة كلش ما تخليني اروح..
رحت للمطبخ طلعت الطحين والحليب والزيت واللحم وگلت اسوي فطائر واوديلهم.. حتى ماعندي فلوس اشتريلهم احتياجاتهم.. ضليت تقريبًا ٣ ساعات بيها لحد ما خلصتها امي عبالها داسويها النا.. گالت ها شعجب الله هداچ