ضجيج الموتىٰ (زهـرة).

"الجزء السابع "

...
واحنه بالسيارة..نايمه ورايحة بسبات عميق وفجأة اگعد على صوت مريم تگول.. گومي زهره وصلنا
- امي وين؟
- نزلت صارلي ساعه اگعدچ دنزلي الرجال يريد يروح
- هسه گايمه
....
نزلت وبالگوه امشي عبالك سكرانة..باوعت لأمي وگتله.. يمه هسه وين راح نروح؟
- لبيت حبوبتچ غير
- ها شوكت نوصل تعبت من المشي
- هسه انتي شمشيتي متگليلي..
- اي بس تعبانه..ونعسانه كلش
- هسه نوصل ما ضل شي
نطت مريم تگول.. كافي تلغين راسي ديوجعني
.. نوب ردت احچي وامي قاطعتنا وتگول كافي سكتو..
اخيرًا وصلنا لبيت بيبيتي مبين صغير اول ما دخلنا لگينه بيبي گاعده مدري شتخيط وعيونها رايحة.. شكلها متغير كلش وكبرانه عن آخر مرة شفتها بصراحة ما حسيت انو اني مشتاقه لهل مكان هواي لأن اني عشت طفولتي ومراهقتي بغداد قبل لا نسافر واليوم اول مره ادخل الناصرية بس من شفت بيبي اجت بالي كل الذكريات العشتها بطفولتي بدون وعي نزلت دموعي.. ورحت شبگتها وامي وراي استلمتها من سلام وهلاهل اني عفتهم يسولفون رحت داسوي چاي واوديلهم.. دگ موبايلي هاي فاطمة صديقتي بالمدرسة بأمريكا جاوبته
- الو ها فطومة
- ولچ وينچ سمعت رجعتي للعراق
- اي والله شفتي الحظ
- والله هنيالچ اني اريد اخلص دراسة وارجع اشتاقيت لأمي واخواني..
- انتي عاد اهلچ هنا وتشتاقيلهم اني شعندي حياتي فارغة اريد اطلع اتونس نوب نحبست هنا
- ليش
- يمعوده بالناصرية وين اكو مكان يونس نوب يمي بيبيتي وامي هنا حركتي متقيدة اكثر خاف چان ما عاجبني اطلع وياكم مرات وره المدرسة لساعات وارجع هسه حتصير طلعتي الوحيدة بس لجامعة
- صدگ على طاري الجامعة تدرين نجحتي..
- شوكت طلعت النتائج؟
- اليوم الصبح
- ليش ما گتولي لعد؟
- ولچ رائد خابرچ وراسلچ ما جاوبتي فگلي حتى اگلچ.. انقبلتي هندسة
- والله ما مصدگه يربي معقولة كلشي ما قريت
- حبيبتي تستاهلين الفرحة
- فدوه اروحلچ على هالخبر الحلو رايحة ابشر امي
- اخذي راحتچ حبي
.... سديته منها ورحت ركض لأمي وگتلها يمه نجحت وانقبلت هندسة..
- شوكت ولچ شو ماگتيلي
- هسه هسه فاطمة خابرتني وگلتلي
...
چان تگول بيبتي الف مبروك
- يا جامعة تردين تدخلين؟
- يمه شبيچ علساس يمنا جامعة هارفارد.. جامعة ذي قار اكو غيرها..
- شبيها لازم معاجبتچ
- اي والله ما عاجبتني بس من لا چاره
- انتي گلتيها من لا چاره يعني گعدي وانچبي
- يمه شنو الفايده ادرس واتعب على روحي كل هالسنين تالي اشيل الشهادة واضمها بالكنتور؟
- منا لأربع سنين كلشي متغير
- ما يتغير شي الوضع نفسه
- دگولي يالله..
- يالله.. عمي صارلنا سنين نگول يالله ميتغير شي نضحك على نفسنا..
- دگومي بدلي وارتاحي وعوفچ من هالحچي يصير خير منا لمن تتخرجين..
- وين غرفتي؟
- انتي ومريم بغرفة وحده هناك يم الحمام..
وبالصالة اني وبيبيتچ ننام
- هو هذا البيت الي خبصتينا بي توقعته ڨيلا..طلع مطبخ وغرفة وصالة..
خزرتني بعينها وسكتت چان تگول بيبي..
- يمه هذا الموجود وبالگوه دبرته.. دينار دينار جمعت فلوسه
- بيبي انتي على راسي وخلفله عليچ بس اني احچي ويه امي الي عافت أمريكا واجت هنا بكل قواها العقلية
- انتي هم عذريها ضاگ بيها الحال وماتگدر تبقى بعد..
.....
عفتهم ورحت للغرفة دخلت ما بيها چرباية فراش بالگاع ومخاديد وبطانيات بس الفراش شويه بيه روح مبين جديد.. لگيت مريم دتگلب بالموبايل سئلتها شدسوين ما جاوبتني..
وره شويه سدت الموبايل وگالتلي يعني احنه راح نبقى هنا هيچ؟
- اي ليش وين رايحة امالچ بعيد
- ماراح نرجع لامريكا خلصص!
- مادري بس ممكن نرجع كسياحة وهم مو هسه اقل شي فد سنتين.. لأن گاعدين ع الحديدة وورانا جامعة ومصاريف هواي
- خرب هيچ عيشة..
- شگد ما تحچين مراح يتغير شي..
....
فتحت موبايلي ولگيت رسائل هواي من رائد جاوبته هلا.. وسديت الموبايل ونمت..
......
ما گعدت الا الساعة الـ ١٢ بليل.. لگيت رائد مجاوب وحارگ الموبايل.. جاوبته رائد تعبانه هاليومين وجايه من سفر انطيني مجال اتنفس.. مرت الايام على نفس الحال يوم يشبه شي ماكو شي جديد ابعد مكان ممكن نروحله السوگ ويه امي.. او اذا نريد نغير جو نطلع من الغرفة للصالة.. بيبيتي عدها راتب رعاية إجتماعية وعايشين بيه والا چان متنا من الجوع.. بنهاية شهر الـ ٩ بسنة ٢٠١٩ وبعد عدة محاولات فاشلة اخذت اوراقي ورحت اسجل بالجامعة صمطني الحر ورجعت گالولي على غير يوم لأن محد موجود رجعت ضايجة.. هاي كل مره اروح نفس الجواب منهم والله كرهت روحي والساعة السوده الي خلتني بالعراق..
رجعت مطنگرة والدنيا طالعه من عيني امي تحچي وياي ما جاوبها گبل دخلت للحمام سبحت وطلعت..امي بالمطبخ دتسوي الغده وبيبيتي گاعده يمها وتباوع بالتلفزيون.. مطلعتها ع الاخبار وتحچي ويه امي تگلها شوفي هاي خطيه راشين بنيه بالمي وواگعه هي وعبايتهه..
- ليش شمسويه
- مادري والله
...
اني تدخلت بعد ما قريت الشريط بيبيتي ما تقره زين.. گتلهم هاي طالعين مظاهرات الشهادات العليا ديله شوفوا.. هاي ارقى طبقة بالمجتمع ويعاملوهم هيچ اني بنعال ما يشتروني يمه شجابنا هنا مالچ نيه نرجع؟
- اني لو عندي فلوس اروح ما چان رجعت من الأساس
- وتالي شلون مستقبلنا ويين؟ شوفت عينچ هاي شهادات علينا ومجاستير وتعبانين على روحهم سنين وهيچ يعاملوهم!
- حبيبتي گولي يالله..

قاطعتها وگتلها..
هم گالت گولي يالله.. يمه لا تخليني اكفر رحمة للحسين.. ادري شراح تگولين يصير خير منا لمن اتخرج..
....
عفتهم ورحت لغرفتي مخنوگه واحس بالگوه عايشة.. رائد صارله شهرين ما يحچي وياي طبعًا ابوه اتوفى بالسجن بنفس السنة الي انسجن بيها بظروف غامضة واخذوا الورث وهسه حاليًا همه بألمانيا هو وأخوه.. اشتاقيتله؛ فتحت الموبايل دزيتله رسالة ما تاخذني يمك بس اشم الهوه هههههه..
شفته ما فاتح نت سديته ونمت..
..
گعدت ثاني يوم الصبح ماعرف شسوي ايامي فارغة بشكل گاضيتها افلام ومسلسلات ومرات اگلب بالفيس.. فتحت الموبايل اول ما گعدت من النوم لگيت الدنيا مگلوبة على هاي البنيه الي وگعت بمظاهرات البارحة.. وشفت ديحشدون على مظاهرة يوم ١٠/١ شاركت وياهم بالحملة رغم اني بداخلي متأكدة ماراح يصير شي بس نحاول..
بنفس اليوم رحت اسجل بالجامعة لأن ما ضل شي وصدگ سجلت وأخيرًا.. رجعت للبيت فرحانه وضايجة بنفس الوقت عبالك مسجلة بجامعة واشنطن..
يتبع