ضجيج الموتىٰ (زهـرة).

"الجزء الثاني"

صفن بوجهي شويه ودار وجهه وگعد ع المصطبة القريبة وطلع جگارته وعيونه حمر..
-شبيك ما تحچي؟
-زهره.. ماكو شي مهم وداعتچ مشاكل بالبيت ومتشتتين مو اكثر
گعدت يمه وباوعتله بإبتسامة
-زين ممكن اعرف هالمشاكل؟
- هو اني لو اگدر اگلچ بس صعبة حيل.. ماگدر احچي اتمنى تتفهميني
-رائد لو تحچي لو لتضل تلمح اني كلشي يصير وياي احچيلك بعد شكو؟ بيناتنا مسافة وتستحي تحچي لو شنو؟
- لا مو هيچ اهوو شلون راح احچيلچ وانتي بس تردين تتعاركين
- تدري بيه كلش زين هاي نبرة صوتي واسلوبي مدا اتعارك
- اوك..سهلة من نطلع احچيلچ بالطريق..بس لا ترجعين بالباص نتمشى واحچيلچ هسه روحي اقري ورانا امتحان..
باوعتلي بنظرة غريبة ودرت وجهي وگمت رحت اقرا وحدي على ما دگ الجرس ورحت للامتحان طبعًا ما متوترة ولا اتوتر ابد ولا افكر بالامتحان..ماعرف ليش أتعجب على ذوله الي شايلين هم ويقلقون..طبعًا هاي المدرسة اغلبها عرب للاجئين والمدرسين نص عرب ونص اجانب بس أهلية..العيشة هنا صعبة كلش بالأخص للاجئ الي عايش بوطنه مهما چانت عيشته صعبة احسن منا بألف مره..خلفله على خالي هنا متمكن يساعدنا بالايجار والاقساط مال كهرباء والمدرسة ولگه شغل لأمي والا چان احنه مشردين بالشوارع..خلصت امتحان وطلعت اول وحده رحت للكافتريا جوعانه دا اكل شفت أسامة ورشا واگفين يضحكون ابتسمت لرشا من بعيد گلبت وجهه وراحت لغير مكان ماعرف ليش هيچ تتعامل وياي عبالك حاطه عيني عليها لو اني بواگة زلم.. ضليت بين درس وبين فرصة لحد ما داريد ارجع للبيت..رحت على شعبة " B " مال رائد..لگيته هناك
- هلو رائد يلا امشيلنا
- ها زهره اصبريلي هسه جاي وراچ
- راح اطلع اني اگولهم لا ينتظروني لأن راح امشي.
- ماشي انتظريني بالباب
طلعت بره طلعت الموبايل واتصلت على امي اگلها طالعه ويه رشا.. صح احنه هنا بأمريكا بس امي بعدها مترسخة بالها هاي العادات القديمة وميصير اطلع ويه ولد برأيها يعني طلعت من الطريق..المهم اتصلت مره مرتين الثالثه يلا جاوبت
- هلا يمه اگلچ..راح اتأخر اليوم طالعه ويه رشا ونرجس عدنا طلعه
- وين رايحات
- هنا بالمطعم الجديد الي انفتح يم المدرسة شويه بعيد
- منيلچ فلوس
- رشا عازمتنا
-ماشي بس مو تتأخرين
- لا والله ما اتأخر قبل المغرب ارجع
- ماشي عود ارمش عليچ قريب المغرب
وسدته
...
اجه رائد ورحت للباص گتلهم اليوم ارجع مشي لا تنتظروني..
- اي احچي خيرك..
-ماعرف منين ابدي
- اي شي يجي بالك احچي لا تفكر هواي قبل لا تگول
- يعني شگلچ
-احچي بشكل مباشر مو شلعت گلبي

- انتي تعرفين بأنو امي بقت بالعراق وابويه اتزوج مغربية وجابها هنا مو؟

- ادري بي متزوج بس ماعرف مغربية عبالي عراقية

-المهم مرت ابوي مسويه علاقة ويه اثنين غيره واحد صغير واحد چبير هذا الصغير بعمرها يومية تجيبه للبيت من كلنا نطلع لدوام وذاك الثاني مستفادة براسه لأن رجل أعمال وزنگين