الملعونة

الجزء الثاني

امي بدت تستلم بدت تضعف بدت تتلاشى ..
كلما اباوعلهة قلبي ينشلع من مكانة بس شنو بيدي عليهة

و من كثر ما يضربهة ابوي كدام الي يسوة و الي ما يسوة ما بقة واحد يحترمهة و يحسبلهة حساب حتة الجهال كامت تصيحلهة باسمهة ..

الوضعية صارت تعبانة حيل عمي ما لكة واحد يردة فكام يضرب بامي شوكت ما يعجبة و الله بس الي جان يخلصهة من ايدة ..

خصوصا اذا مرتة وسوست بعقلة و دوتة يكعد يضرب بيهة لحد ما يطلع منهة دم و مرات جنت اشوفة من يخنكهة بيدية لحد ما تسكت اخر انفاسهة يالله يعوفهة ..

جانت توصل للموت و ترجع روحهة .. مناظر حتة المجرم ما يتحملهة ..

ماكو واحد بهذا البيت عانى بكد امي و بكدي لان اني جنت الجبيرة و مطلعة على الي جان يصير ..

امي بدت تتغير امي بدت تتحول الى شخص غريب تصرفاتهة كامت تخوفني احاول ما الاحظ كل التفاصيل بس ما اكدر .. والله ما اكدر حاولت حاولت هواي و تعبت بس ما اكدر اتجنبهة مثل خواتي ما اكدر اهملهة مثل ابوي ما اكدر اكرهة مثل بيبيتي .. اني مو مثلهم ..

تريد تعرفون يعني شلون تغيرت امي .. يعني مثلا اجي اكعد يمهة و اباوعلهة تباوع للاركان و تحجي بشفايفهة بدون صوت بس تضل تحجي

و مرات جنت اشوفهة تضحك وحدهة و محد وياهة بالغرفة تضحك بس جنت احس انو هي تضحك وي شي اني ما اكدر اشوفة ..

اكثر من مرة شفتهة و هي تشخبط على وجهة بالمكياج و تبتسم ابتسامة تخوف .. عيونهة مفتوحات و بيهن نظرة تخوف ما ترمش حتى تباوع للمراية بدون ما ترمش او تحرك عيونهة الي يشوفهة يكول ميتة بس ايديهة تتحرك ..

حالة امي بدت تزود و ماكو احد في البيت ملاحظ هلشيء غيري اني الشعور الي جنت احس بي جان يكتلني كل يوم .. ضعف و قلة حيلة  ، خوف منهة ، غضب من معاملتهم لامي ، كره لكل واحد جان يسيء الهة بيدة او بلسانة ، خوف من انو افقد امي ..

حالتهة تتطور كل يوم للاسوء كل ساعة اجي الكاهة تسوي شي يخوف .. مرة جنت برة العب وية خواتي و من طبيت ليجوة اشرب ماي لكيتهة واكفة بركن المطبخ .. وجهة للحايط و ظهرهة صاير بوجهي

سمعت صوت منهة و هي مدري شجاي تسوي اشوف ايديهة يتحركن بسرعة : " ماما .. شجاي تسوين "

يا ربي لو ادري ما سألتهة دارت وجهة ببطء بدون ما تحرك جسمهة و ابتسمت ابتسامة خلت قلبي يطلع من مكانة : " اششششش .. "

جسمي كلة كام يرجف لكيتة لازم دبدوب بيدهة و دچچ بي بالسجينة و الحشوة مال الدب يوكع من بين ايديهة ...

خفت عفتهة و طلعت برة بس قلبي بعد يرجف من المنظر الي شفت بي امي .. لا لا هاي مو امي وجهة يخوف و عيونهة بيهن نظرة تموت من الخوف ..