الملعونة

الجزء التاسع

لا تختار شخصاً جميلاً

..... بل اختار من يجعل حياتك جميلة .....

..................؛...................؛...................

رجعت لبيتنة و انطيت لمسواك لمرت ابوي و ساعدتني بطبخ الغدة .. رجعوا اخواني من المدرسة و تغدينة و نمنة الظهر ...

كعدت العصر و لكيت ابوي جاي من الدوام سويتلة استكان چاي و ماعون كيك و اخذت و رحت لغرفتة : " هااا بابا جبتلك چاي يخبل "

: " اي والله عاشت ايدج جيبي خلشربة قبل لا اطلع " حطيت الصينية يمة و كعدت : " هاا كولي شعندج محتاجة فلوس لو شنو ؟ "

: " هاا لا بابا ما محتاج شي .. بس اكو شغلة اريد اخذ موافقتك عليهة " هو حط الاستكان و باوعلي : " شنو هي هاي الشغلة "

: " بابا ام محمد هاي ام السوبر ماركت .. مريضة و تعبانة و تكول حاجي ابوج يقبل تكعدين بالمحل بمكاني حتلو بس الصبحية .. و اني ما عندي بس حمودي و هو يدرس بالجامعة و ما يلحك يكعد بالمحل "

: " اي و شنو تنطيج فلوس لو هيج نخوة "
: " لا بابا كالتلي انطيج راتب 150 الف بالاشهر و اني اكول اخواتي الصبح بالمدرسة و ما عدنة شي .. و راح احاچي مرت عمي تخلي امير و سجاد يضلون يمهة الصبحية حتى ما يضوجون خالتي  .. ها شتكول ؟؟ "

: " لا يضلون هنا يمهة شعدهة .. قابل روحي اشتغلي يمهة و الراتب بس الچ اشتري بي هدوم و تونسي بي "

: " صدك بابا .. يعني انت قابل .. بعد قلبي فديتك .. شتريد اطبخلك على العشاء اي شي تطلبة اطبخة "
: " الله يرضة عليچ روحي .. طبخي الي يعجبج اني اليوم معزوم يم واحد صديقي "

طرت من الفرح مو يكول راح اشتغل .. صراحة فرحت ..
احنا منطقتنة شعبية يعني عادي اذا مرة تشتغل ما ينتقدوهة او شي .. فلهذا السبب وافق ابوي اشتغل و اكيد وافق لان يدري بأم محمد خوش مرة و تدير بالهة علية ..

: " هاا لارا تعالي شكالج ابوچ قبل تشتغلين لو لا "
: " وج خاالة قبل ابوي قبل .. ما مصدكة "
: " اي عود روحي اشتغلي بهذني شواربچ  و هدومچ المجرودات حتى تصيرين مضحكة بالمنطقة "
: " ها چا شلون "
: " امشي روحي جيبي البكرة و الملقط من الجرارة و تعالي بسرعة طيارة خلحفلج وجهج ما دام اكو شمس بالدنيا "