الملعونة

الجزء الرابع عشر

كعدت العصرية لكيت اخواني يباعون تلفزيون و نايمين بمكاناتهم .. طبيت غسلت و مشطت شعري و رحت ..

كعدت اخواني من النوم علما كعدوا  سويت چاي و كعدنة نشرب چاي و كعك و اني بعدني على صفنتي : " لارا .. شبيج صافنة ؟؟ "

وعيت على صوت ميس : " هاا .. لا ما بية شيء بس افكر "
: " بشنو .. شبيج دايخة ؟ "
: " لا هيج .. اكلج ميس ام محمد انطتني الفلوس خو ما محتاجة شيء "
: " لا سلامتج حبيبتي "

توني اريد اكمل صفنتي سمعت الباب ندكت .. و احنة كمنة نطافر وحدة تشيل الصينية وحدة ترتب الصالة و اني طلعت افتح الباب اشوف منو ..

فتحت الباب : " منو .. تفضل "
طبن نسوان تلاثة سافرات بلا عبي و الكشخة و العطر و المكياج .. استحيت من شفتهن همزين الله اليوم مشطت و بدلت .. بعدني صافنة عليهن شفت وحدة هاي اعرفهة شكلهة مألوف ..

عزة هاي مو سرى اخت علي !!

حجت وحدة من عدهن مبين عليهة مرية جبيرة : " هذا بيت ابو لارا "
: " اي خالة تفضلي "

طببتهن للاستقبال و قلبي لايج هذني شيردن يا ربي بس لا مشكلة والله ما عايزة مشاكل ..

قلبي يفور و يتبدة اريد اعرف شيردن رحت قدمتلهن ماي المرة الجبيرة شربت شوية .. وحدة بيهن مبين عمرهة اربعين سنة هيج شي ..

كالتلي : " مااا اريد " و تباوعلي جنهة تريد تتقيأ بوجهي باشمئزاز ..

قدمت لسرى ماي اخذت و شربت و كالتلي : " شكرا حبيبتي " ..

عفتهن و طلعت خذلنهن ربع ساعة و راحن .. رحت ركض لمرت ابوي اريد اعرف شحجن وياهة ..

: " ها خالة منو ذني و شيردن  ؟؟ "
: " هذني نسوان من بغداد اجن يخطبنج تعرفين ام عبد الله الي بيتهم برأس الشارع ذولي كرايبهم يصيرون بيت خالة للولد الي اجو يخطبونج الة "

: " خالة هذا الموضوع لا صار و لا حصل و ذني النسوان ما اجن و لا شفناهن .. و لا تجيبين طاري لابوي "

: " ليش يابة شتردين بعد شفتيهن كشختهن و عطرهن شفتيهن شلون طاكات و مثقفات .. لو تدورين سوالف مكسرة مثل اختج مريم "

: " احترمي نفسج و لزمي حدودج اذا اكو وحدة سوالفهة مكسرة فهي انتي .. "

: " اني الج لارا اذا ما تزوجتي لهذا الولد غصبا ما عليج و توافقين و رجلج فوك راسج ما يطلع اسمي احلام.. اصبري الي لارا و شوفي شسوي بيج "