الملعونة

الجزء الثامن عشر

و هل ستلازمني لعنة حبك
ام سأخسرها كما اخسر كل شيء

تأليفي
.............. ............... ...............

قنعتهة  تظل يمنة هذا اليوم و بالعافية يالله قبلت تظل ..

الصراحة فرحت لان بقت يمنة و ما قصرت وياهة بكد الشعراية ..

بليل كعدت من النوم على صوت حركة .. طبعا اني نومي كلش خفيف اكعد على اتفه صوت ..

شلت راسي من الفراش باوعت للساعة الساعة بالوحدة و نص بليل .. باوعت لفراش امي فارغ ..

: " ياا عزا صخام الصخمني امي وين راحت يا ربي "

طلعت ادور بالبيت افتريت البيت كلة ماكو يا رربي وين راحت هاي ..

طلعت ركض للشارع لكيتهة واكفة بالشارع الدنيا ظلمة و بس صوت الكلاب بالشارع تعوي ..

اباوع يا رربي امي ماكو الدنيا كلش ظلمة و كلشي ما ينشاف  رجعت جبت عباتي و اجيت طلعت بالباب اباوع ما شوف شي ..

لا يالله وين راحت .. : " ياا يمة قلبي " حطيت ايدي على صدري من سمعت صوت سوالف و ضحك صوت يخوف مو صوت انسان عادي ..

يا رربي شنو هذا .. مشيت ورة البيت و رجلية يرجفن يا ربي سترك يا ربي سترك يا ربي سترك ..

ياا هاي امي واكفة تأشر بيديهة و تضحك بصوت يهز الجسم و تسولف بصوت خشن مدري شنو من كلام مو مثل كلامنا الي نحجي بي ..

اطرافي ما احس بيهن من الخوف من شفتهة ظليت صافنة عليهة .. لا اكدر اتقرب يمهة و لا اكدر اعوفهة تمشي ..

رجعت ركض لغرفة ابوي : " بوية .. بوية .. بوية الحك امي بالشارع واكفة ورة البيت و مدري ويامن تحجي بصوت يخوف "

: " عمة بعينج و بعين امج امشي كدامي وين راحت "

اباوع لابوي انخرع وجهة صار اصفر و يدور عليهة مثل المخبل : " وج لارا وينهة ما هي مو كلتي ورة البيت .. احجي ولج لارا "

: " بوية والله ما ادري والله جانت هنا واكفة و تحجي بصوت يخوف والله شفتهة بعيوني "

رجعنة كلبنة البيت عليهة ما هي لا بالحمام و لا بالغرف و لا بأي مكان .. النوب الجو كلش مو حلوو مطر و رعيد و الكاع كلهة طين لا يا ربي هاي وين اختفت ..