الملعونة

الجزء السابع

الى متى يا أنا ستظل تعاني ؟
الى متى ستظلم و عن حقك تتنازل ؟

           ،،،،،,,,,،،،،،,,,,،،،،،,,,,،،،،،,,,,،،،،،,,,,،،،،،,,,,،،،،،

كعدت الصبح و باوعت لجسمي مخطط من الضرب و خطوط صاير لونهة احمر و مورمة و خطوط زركة .. ضليت اباوعلهن و ابچي ما احس بالامان .. فقدت كل شيء حتى طفولتي ..

عيوني كل الناس الي تشوف عيوني تكول حلوات و لونهن مميز .. بس كلما اباوع لروحي بالمرآية ما اشوف شي بيهن غير الضياع و طريق نهاية مجهولة ..

بدت بهاي الأيام امي مثل الي تكرهني او تعاديني شوية بدت تصير عدائية بتصرفاتهة وياي .. و اني كلما احاول اعرف الغلط الي سويتة حتة خلاها تعاملني هيج .. ما الكة شي غير سالفة الدرج هذه ..

مثلا شنو ؟ أني راح اسولفلكم امي شلون زادت غرابتهة يعني .. مثلاً كامت من تشوفني تضل فاتحة عيونهة على حيلهن و تخزر بية و تصك سنونهة ..

و مرة جنة كاعدين على الغدة : " ماما .. انطيني الماي .. ماما انطيني الماي عطشانة .. ماما شبيج اريد ماي " .... : " تريدين ماي .. هاك اشرب و انت هم و انت هم و انت هم ... يالله هاج شربي "

فرت السراحية مال الماي هيج بالهوة و كالت اسماء غريبة و انوب انطتنياهة .. : " تريديني اشرب ويامن تحجين منو ذولة الي شربوا ؟ "

ضلت تباوعلي و تضحك ضحكة شريرة .. اني عفت الاكل و كمت حتى ماي ما شربت .. و امي سوت اشياء اكثر من هيج ..

مرة طبيت للمطبخ شفتهة شايلة سچينة بيدهة : " ماما شجاي تسوين .. هااا " دارت وجهة علكيف و فتحت عيونهة و خلت السجينة بوجهي .. : " ماما شبيج ليش تسوين هيج ؟؟ "

كامت تحرك بالسچينة بوجهي مثل تريد تچك واحد بيهة و ضلت تسوي هيج و تتقرب علية .. و اني عفته والله شردت ..

و كامت كلما تشوفني تضل تخزر بية بشرر و تشيل السچينة و تضل تچكك هيج ..

مرة شفتهة تحمرت و لبست ملابس نوم و طلعت برة و من طلعت شفت وراهة شي يمشي مثل الدخان .. لسة ذاكرة ذاك الشكل بس بيومهة متت خوف و ضليت احاول قدر الامكان انجنبهة ..

امي تصرفاتهة مو طبيعية و تخوف و اغرب من الغرابة .. و ما الهة تفسير بس مع ذالك اني جنت متأملة بأنو راح يجي يوم و تتحسن حالتهة و ترجع زينة و احسن من الاول ..