مجنونه ملكت قلبي❤

الفصل ال 41

اسر: ههههههه
مازن: ههههههه.... هذا لاشيء مقارنه بما فعلته وسام... خصوصي عندما وضعت له الشطه بالشاى
يزن: ههههههه... لا اصدق... ما كل هذا... هل انت متأكد انها فعلت هذا بمحمد
محمد بضيق: ماخلاص بقا يا مازن
مازن: ههههههه... لا استنى استنى اقوله لما....
محمد بغضب: ماااااازن
مازن بخوف: خلاص مايبقاش قلب اسود كدا
-شويه ودخل ادهم
ادهم: محدش شاف البنات.. بدور على دعاء مش لاقيها
اسر: شوفها مع نور
ادهم: خلت الخدامه تروح تناديها قالتلى محدش في الاوضه
مازن باستغراب: ازاى... انا لسه سايبها وراحتلهم
محمد بقلق: انا هرن على وسام واشوف
-رن محمد على وسام والشباب عملوا نفس الشيء... شويه وسمعوا التليفونات بترن من فوق... مشيوا ورا الصوت لحد ما وصلوا لاوضه نور... خبطوا مرة واتنين ونادوا... مفيش رد.... فتحوا الباب ولقيوا التليفونات بس... وهما مش موجودين... القلق اكلهم اكتر
محمد بتشويش: هيكونوا راحوا فين
مازن بخوف: مش عارف
يزن: سوف اذهب لأرى اذا كانوا مع نغم
ادهم: حسنا
مازن: طيب ما نسأل الحرس اللى برا لو شافوهم وهما خارجين ولا حاجه
اسر: وهيخرجوا يروحوا فين وقرايه فاتحه نغم انهاردا
مازن: يعنى احنا هنخصر حاجه...يالا
-طلعوا يسألوا الحرس وقالولهم انهم طلعوا من شويه
محمد بغضب: راحوا فين يعنى
الحارس بخوف: والله ما نعرف يا فندم... هما طلعوا من البوابه بس... بس مانعرفش راحوا فين... و ما نقدرش نسألهم عن وجهتهم
-اتنفس محمد بغضب بيحاول ما يتعصبش عليه
ادهم بهدوء وحزن: اهدى يا محمد... اكيد هنلاقيهم..(وللحارس).. هو في كاميرات هنا.!؟
الحارس بإيماء: ايوة يا فندم
محمد بسرعه: وريهالى
-اخدهم الحارس للاوضه المخصصه لكاميرا المراقبه وشافوا اللى حصل بترقب... وشافوا لحظه خطفهم... قلب كل واحد انقبض على حبيبته... فضلو يفكرا عشان ينقذوهم من الورطه دى... بس حسوا انهم عاجزين ومش عارفين يعملوا اى.... شويه ووالد نور جالهم والقلق باين عليه ويزن معاه
والد نور بخوف: بنتى فين... نور فين
مازن بهدوء: ماتقلقش يا عمى هنلاقيها بإذن الله
محمد: اهدى يا عمى... متخافش.. بنتك بخير.. لان اللى خطفها اكيد مش هيأذيها
والد نور: يارب
ادهم: احنا هنحاول نلاقيها هى وباقي البنات دلواقتى... مش هنسحيب حته غير لما ندور فيها
-هز والد نور راسه... ومشيوا الشباب بعد ما خلوا يزن يفضل معاهم عشان يخلى بالهم منهم.... مشيوا وكل واحد ركب عربيته يدور في حته وكلموا الحراس يدوروا عليهم... ومحمد خلاهم يحطوا لجنه في كل حته ويدوروا عليهم... ومايسيبوش عربيه تطلع من مصر غير لما يفتشوها كويس.
---------------
-قاعدين على الارض نايمين اثر المخدر... صحيت دنيا... وكانت حاسه براسها بتلف... فضلت تبص حواليها بدوخه... لقيت البنات معاها في الوضه ونايمين... او بالاصح متخدريين... وايديهم ورجليهم مربوطه... حاولت تنادى عليهم بس صوتها مش طالع
دنيا وبتهز نور اللى كانت الاقرب ليها: نور... نوور... فوقي... نور
نور بتألم: اااه... احنا فين... ااه... رااسي... هموت من الصداع
-شويه واخدت بالها من ايديها ورجلها المربوطه والبنات نايمين ونفس الموضوع
نور بفزع وخوف: احنا فين... ومال وسام ودعاء
-شويه وافتكرت اللى حصل... بصت لدنيا بسرعه
دنيا بصدمه: هو احنا مخطوفين
-هزت دنيا راسها
دنيا بتعب: فوقي وسام ودعاء الاول
-فوقت نور وسام ودعاء
دعاء: اااه... اى اللى حصل... واحنا فين
نور: مش عارفه
وسام: انا دايخه اوى كدا ليه
دنيا: مش لوحدك
-شويه وسمعوا صوت الباب بيتفتح بالمفتاح وبيدخل منه مراد
مراد بابتسامه: شايف انكم صحيتوا... صباح الخير
دعا بغضب: وهيجى من فين الخير... انت مين وعايز اى
مراد: اى دا... معقوله مش فاكرانى يا دعاء... انا مراد.. اللى خطفت وسام قبل كدا
دعاء بصدمه: مراد... بس ازاى وليه... وسام قالتلى انك اتغيرت وبقيت احسن... ليه تقلب تانى
مراد ببرود: مش شغلك
وسام بغضب مكبوت: والمرة دى سيادتك عايز اى... وخطفتنى انا وصحابي ليه
مراد: نفس سبب خطفك كل مرة
وسام: طيب خطفت صحابي ليه... انت موضوعك معايا مش معاهم
مراد: اممم... انا ما كنتش عايز اخطفهم... خطفهم جى صدفه.. ماكنتش عارف اخطفك لانهم حواليكى اربعه وعشرين ساعه... مالاقيتش حل غير انى اخطفهم معاكى
وسام بغضب: انت بجد حيواااان
مراد: ههههههههه... براحه على نفسك مش كدا.... اسيبكم بقا دلواقتى واتمنى الاوضه تكون على ذوقكم
-مشي مراد وقفل الباب وراه تانى
نور: وانا اللى كنت فضلته عن اللى اسمه محمد دا وحبيت تغييرة
دنيا: فعلا بجد... لدرجه انى اتمنيت انه يبقي مكان محمد
دعاء بتشويش: انا مش فاهمه حاجه... اى سبب خطف مراد لينا... واى علاقه محمد... وليه كارهينه كدا... انا مش فاهمه بجد
-بصت البنات لبعض بتوتر
دعاء بشك: هو في اى.!؟
وسام بتوتر: بصراحه يا دعاء... هو....
دعاء بخوف: وسام... في اى
-حكت وسام لدعاء اللى حصل.. من اول سفرها لنيويورك لخطفها من محمد.. وهروبها منه.. وخطوبتها منه لانه ابتزها
دعاء بصدمه: ياااه... بقا كل دا يحصل وانا اخر من يعلم
نور بصدمه: ثانيه واحده... هو انتى وافقتى عشان ابتزك بدعاء وماتقوليليش
دنيا بغضب: انتى ازاى تخبي علينا حاجه زى دى
دعاء بغضب: وانتى ماقولتليش ليه لما هو ابتزك بخطوبتى.. كنتى قوليلي يا وسام وانا هرفض على طول... انا لايمكن ارفض سعادتى تتبنى على سعادتك
وسام: خلاص يا دعاء موضوع وخلص
دعاء: لا مخلصش... اول ما نطلع من المخروبه دى هفسخ خطوبتى ويبقي سيبي محمد
وسام بتسرع: لا لا لا... اوعى تسيبه... خلاص... مشاكلنا اتحلت..(وبكسوف).. وانا دلواقتى مخطوباله بإرادتى
دنيا بخبث: امممم.. الظاهر ان في حجات كتير حصلت واحنا غافليين عنها
بصتلها وسام بشر.... دنيا: هههههههه... خلاص خلاص هسكت
نور: طيب بعد ما كل الموضيع اتعرفت والمشاكل اتحلت... هنخرج من هنا ازاى
-وسام ابتسمت بشر
نور بخوف: ناويه على اى... انا مش مطمنه للابتسامه دى
وسام بنفس الابتسامه: هنهرب
دنيا بفرح: الله...(وبهيام).. طول عمرى نفسي اتخطف وحبيبي يجى ينقذنى و يضرب اللى خطفنى... اااه...(بغضب)... بس للاسف... وقعت مع اللى اسمه اسر...مش فاهمه رجاله اى دى.... دا اخرة يموت صرصار.
نور: ههههههه... والله عندك حق... حتى مازن... بيخاف من چيسي(القطه).. ههههههه... بجد الرجاله ماتو في الحرب
دعاء: ههههههه... يعينى عليكم... هو حالكم صعب للدرجادى
وسام: ههههههه.... سيبيهم يطلعوا اللى جواهم شويه
دنيا: ماشي يا حيوانه منك ليها.... هاا.. هنهرب ازاى
وسام بغرور: نسبه لكثرة مرات خطفي... فا انا اللى هفيدكم
نور بغضب: اخلصي
وسام: ههههههه... حاضر
وسام: حد معاه تليفون الاول
نور: لا
دنيا: سيبته في الاوضه بيشحن
دعاء: نسيته
وسام:امممم...ومش معايا برضوا...يبقي بصوا... اول حاجه المفروض دلواقتى اننا نشوف الاوضه حوالينا ونلاقي مكان نهرب منه... ثانيا نلاقي حاجه نفك بيها ايدينا ورجلينا دول
دعاء: طيب ما نفك نفسنا الاول بعدين نبقي نشوف مخرج
وسام: وافرضي دخل علينا واحنا مفكوكين ومش لاقيين مكان نخرج منه... وقتها اى العمل
دنيا بصدمه: وساام... انتى عندك عقل من امتى
وسام: ههههههه... من بدرى وحياتك... بس كنت بطلعه في المواقف الطارئه.. اللى هى زى دى
نور: ههههههه... طيب انا مش شايفه اى مخرج غير الباب دا
دنيا: اه وانا
دعاء: والعمل يا فيلسوفه.. مع انى خايفه من ثقتى الزايدة فيكى دى
وسام بثقه: متخافيش ثقي فيا
دعاء بخوف: عارفه... لو ماكنتيش قولتيها كان ممكن تكون في ذرة ثقه.. انما بعد الجمله دى.. الثقه ادمرت خلاص
-كشرت وسام ودنيا ونور ضحكوا على منظرها
وسام: بس يا جزم.... وللاسف ماعندناش فرصه غير اننا نخرج من الباب
دنيا: انتى مجنونه... نطلع من الباب ازاى... افرضي حد شافنا
وسام: وقتها نلاقي حل.. بس ان شاء الله محدش يشوفنا
نور: يالا طيب... هنفك نفسنا ازاى
دنيا: تعالى طيب كدا قربي عليا افكك بسنانى ووسام تعمل نفس الموضوع مع دعاء
-وفعلا حاولت البنات تفك نفسها
------------------
-في الناحيه التانيه... اتجمعوا بعد ما تدورا في كل حته ومافيش اثر...قعدوا بتعب
مازن وهو بينهج: هااا... عرفتوا حاجه
-كلهم هزو راسهم بمعنى لاء
اسر بغضب: طب وبعدين... هنفضل كدا حاطين ايدينا على خدنا زى النسوان.. وهما الله اعلم كويسين ولا لا
ادهم بحزن: اهدى...ان شاء الله هنلاقيهم
محمد بهدوء قاتل وشرود: اعرف بس مين اللى عمله وهيكون اخر يوم في عمرة
- في اللحظه دى تليفونه رن.. كأنه بيجاوبه على سؤاله... رفع محمد التليفون لقي رقم غريب
محمد باستغراب: الو
.....: اى يا صحبي... ليك واحشه... مش تسأل طيب
محمد قام من مكانه بغضب: هو انت اللى عملتها
مراد: ههههههه... هو انا فاضي لحد غيرك... واه انا
محمد ببرود: عايز اى وتسيبها
مراد بخبث: انت.... لو عايزها كويسه وخايف عليها تعالالى انت لوحدك.. ومن غير بوليس او حراسه او اى حاجه
محمد: واعرف من فين انها كويسه هى والبنات وانك ماعملتش حاجه
مراد: والله براحتك...عايز تيجى اهلا وسهلا...مش عايز...برضوا براحتك...بس ساعتها ماتزعلش لو ماسمعتش خبرها تانى
محمد بدون تفكير: تمام... اجيلك تسيبها هى والبنات... ساامع
مراد: موافق... هبعتلك عربيه تاخدك
محمد ببرود: وانا مستنيها
-قفل محمد واول ما رفع راسه لقي الشباب بيبصوله بخوف وأمل
مازن: عرفت مين.!؟
محمد بهدوء: مراد
ادهم بغضب: لااا.. دا زودها اوى... انا مش هسكت اكتر من كدا
محمد: اهدى يا ادهم... البنات بخير.... مايقدرش يعملهم حاجه... وغير كدا هايستفاد اى لما يأذيهم... هو عايز وسام بس... مش هما
اسر: طب خطفهم ليه
محمد بشرود: مش عارف
ادهم: وهتعمل اى
محمد: هيبعتلى عربيه دلواقتى.. وعايزنى اركبها واروحله بيها من غير ما حد يعرف
مازن بجديه: احنا جايين معاك
اسر: ايوة احنا مش هنسيبك
محمد: لا... مش عايز اعرض حد فيكم للخطر...انا هروحله وهو هيسيب البنات تمشي... وكل واحد هترجعله حبيبته... انا بس طالب منكم تاخدوا بالكم من وسام
ادهم: انت اتجننت... صح.!؟.. لو فاكر اننا هنسيبك تروح لحيوان زى دا لوحدك.. تبقي غلطان... احنا هنروح معاك... وانسي اننا نسيبك
-فرح محمد من جواه من خوف صحابه عليه... واصرارهم منعه من الرفض... فا وافق بالنهايه
محمد بابتسامه: ماشي
-شويه جات تلات عربيات.. نزل منها رجاله لابسين اسود ولابسين اقنعه ومسلحين
1: اللى اسمه محمد يتفضل معانا
محمد: انا
ادهم ووفف قدام محمد: احنا جايين معاه
1: ممنوع يا فندم... مراد بيه طلب محمد لوحده
مازن بغضب: انت ماسمعتش.. قالك اى..!؟ احنا هنيجى معاه
- بص الحارس لزميله... راح كلم مراد وقاله على اللى بيحصل
2: بيقولك مافيش مشكله... هاتهم
1: تمام.. فتشوهم
-فتشوا محمد ومازن واسر وادهم... واخدوا تليفوناتهم وقفلوها.. وغطوا وشوشهم و ربطوا ايديهم ورا ضهرهم بكلابشات... وركب كل اتنين في عربيه مع الحراس
--------------------
-خلصوا فك نفسهم
دنيا بتعب: اااه... اخيرا.... ودلواقتى
نور: نهرب اكيد... ولا عجباكى القعده هنا
دعاء: والنبي اجلو خناقكم دا لوقت تانى
وسام: يالا بينا دلواقتى
-راحت وسام للباب.. وفتحت مقبض الباب براحه بس شويه واملهم اتحول ليأس لما لقيوا الباب مقفول
وسام بيأس: مقفول... هنعمل اى دلواقتى
نور: اكيد مش بعد ما وصلنا للنقطه دى هنستسلم... لازم نعمل حاجه
دعاء: هنعمل اى يعنى
-فضلت نور تدور حواليها لحد ما لقيت عصايه خشب... مسكتها
نور: حد بصرخ
دنيا بأستغراب: نصرخ... ليه
نور بتوضيح: لما هيسمعوا صريخ اكيد هيبعت حارس تبعه... ااقوم انا ضارباه على راسه وواقع مغمى عليه او ميت.. على حسب
وسام: ههههههه... الهندى جاب فايدة الحمد لله
نور: ههههههه... بس اقعدوا وحطوا الحبل على رجليكم وحطوا ايديكم ورا ضهركم عشان ما يشكش... وحاولو تشغلوه.. عشان يدخل الاوضه
وسام بتحيه عسكريه: تمام يا فندم
دعاء: ههههههه
-عملت البنات زى ما قالتلهم نور ونور مسكت العصايه ووقفت ورا الباب بخوف
نور: مين هيصرخ
دعاء: احنا مربوطين صرخى انتى
- وسام ودنيا ايدو(وافقوا) كلام دعاء... زفرت نور بغضب... وهديت وواخده نفس وصرخت بكل قوتها..شويه وسمعت صوت خطوات جايه... استخبت لحد ما الباب اتفتح وظهر منه حارس ضخم
الحارس بغضب: في اى... وبتصرخوا ليه
-نور شاورتلهم عشان يدخلوة جوا
وسام بتوتر: اصل اصل..
الحارس بغضب: اى
دنيا بتسرع: فااار... ايوة... شوفنا فار
الحارس: وفينه دا
دعاء: هناااك... مستخبي هناك اهو
-دخل الحارس بغضب.
الحارس: مافيش حاج...
-ماكملش كلامه لان نور ضربته على راسه
نور بخوف: اغمى عليه ولا مات
دنيا بعد ما شافت نبضه: متخافيش... اغمى عليه بس.... ويالا قبل ما يفوق
-جات البنات عشان تمشي... فتحوا الباب براحه يتأكدو من امان الطريق... لسه هيطلعو.. بس سمعوا خطوات جايه
دنيا: استنوا... في حد جى
-دخلوا الاوضه تانى بخوف... وفتحوا الباب براحه بعد ما صوت الرجلين بعدت عن الباب... بصوا ناحيه الرجاله اللى مدينهن ضهرهم لقيوهم ماسكين ادهم واسر ومحمد ومازن
دعاء: دول اى اللى جابهم
وسام: اكيد اللى اسمه مراد دا كلمهم عشان يجوا وهددهم بينا
نور: طيب ودلواقتى.؟ هنمشي ونسيبهم كدا..!!
دنيا: انا بالنسبه ليا موافقه اسيب اسر وامشي عادى.. هههه
دعاء: حتى هنا يا دنيا
دنيا: ههه.. اه يستاهل
وسام: حرام عليكى الراجل جى ينقذك زى ما انتى حابه
دنيا بغرور: ما طلبتش منه
نور: يالا طيب نلحقهم... اكيد مش هنسيبهم ونمشي
وسام: بس كدا ممكن الحارس دا يفوق ويفضحنا
دعاء: نربطه ونقفل بوءه
نور: فكرة... يالا طيب
-------------
-دخلوهم الحرس اوضه و ايديهم مربوطه بكلابشات..وقعدوهم على الارض وربطوا رجلهم بحبال..والشباب مستسلمين ليهم عشان ما يضروش البنات...شويه ومراد دخل وعلى وجهه ابتسامه خبث
مراد: اهلا باللى مش بيسأل
محمد ببرود: انا جيت اهو زى ما طلبت... عايز اشوف البنات اطمن عليهم وتسيبهم يمشوا... ومشي الشباب
مازن: قولتلك مش رايحين مكان... احنا هنفضل معااك
مراد: ههههههه.... مش مشكله... خليكم عادى.. وبالنسبه للبنات... امممممم... مش عارف بفكر اخليهم😉
محمد بعصبيه: يعنى اى... هو لعب عيااال ولا اى
مراد: سميها زى ما تحب... بعد اذنكم بقا... ورايا شغل اهم منكم
-خرج مراد وساب محمد في قمه غضبه
اسر: هنعمل اى دلواقتى
محمد بغضب: معرفش
-برا الاوضه
نور بهمس: مين هيدخل
دنيا بنفس الهمس: اكيد مش انا
وسام: ما تبصليش..انسي ان انا ادخل الاول
- كلهم بصوا لدعاء
دعاء باستغراب: اى
- شويه وفهمت نظراتهم
دعاء: لااااا...انسو
وسام: يالا يا دودو...عشان خاطرى
دنيا: يالا يا دعاء مش انتى دايما بتقولى انا شبح في نفسي...فين الشبحنه دى وقت الجد
نور: واكيد شبحنا مش هيخلينا نتعرض للمخاطر
دعاء بغضب: وهو يتعرض عادى
وسام: متخافيش...واقفين وراكى...ادخلى يالا شوفي هى الاوضه دى ولا مش هى..واذا كان في حد جوا ولا لا
دعاء بغضب: حاااضر..بس حسك عينك انتى وهى الف ادور عليكم مالاقيكمش
وسام بأبتسامه: عيب عليكى ودى تيجى
دعاء: منك بالذات اتوقعها
وسام: ههههههه....طيب يالا دلواقتى ادخلى
- فتحت دعاء الباب... وشويه و الشباب لقيوا الباب بيتفتح بحذر و دعاء بتدخل راسها بحذر...
دعاء بفرح للبنات: ايوة هنا
- شويه ودخلت باقي البنات... استغرب الشباب منهم
اسر باستغراب: انتو جيتو هنا ازاى... وكنتو فين اساسا
-كل واحده راحت تفك ايدين خطيبها
دنيا: مش مهم جينا ازاى... المهم اننا انقذناكم من المصيبه اللى اتحطيتوا فيها
وسام بعد ما يأست تفك ايد محمد لانها كلابشات: ااااه... اي دا... في حد يربط ايد حد بكلابشات... خايف تهربوا مثلا
محمد بسخريه: لا وانتى الصادقه... خايف حد يخطفنا
- بصتله وسام بغضب
محمد: ههههههه... خلاص هسكت.... فكى رجلى الاول وبعدين نلاقي حل لايدى
-عملت وسام زى ماقالها وكذلك البنات
وسام: وبعدين ياعم الفهيم... هتعمل اى
-فضل محمد يدور في الاوضه على حاجه تنفعه
محمد: لو بس الاقي حاجه تنفعنى
وسام : لو كنت اعرف انكم متكلبشين كنت جبت حاجه تنفعكم بدل المسدس اللى قلبته من الحارس وطلع من غير فايدة
-بصلها محمد بسرعه
محمد بصدمه: انتى معاكى مسدس
وسام باستغراب: اه... قلبته من الحارس اللى ضربناه
مازن بصدمه اكبر: انتو ضربتوا حارس
نور بثقه: ايوة... وانا اللى ضربته كمان
اسر: هو انتو بنات ولا انا احوليت وبقيت بشوف غلط
دنيا: لا انت احول من يومك يا حبيبي بس ماحبناش نصدمك بالحقيقه المرة
دعاء: هو دا وقته يا دنيا... وبعدين اه ضربنا الحارس... خلاص بقا مش هتفضلو تعيدوا نفس الكلمه... شوفو طريقه الاول تفكوا نفسكم ونخرج من هنا وبعدين كملوا نقاشكم او خناقكم دا براحتكم
ادهم بثقه: مش حبيبتى... اكيد لازم تكون كدا
محمد: ماشي ياخفيف انت.... هاتى المسدس يا وسام
وسام: اهو خد
محمد بتفكير: بتعرفي تستعمليه
وسام: هاا... مين... انا
محمد: امال انا...وسام والنبي ما وقت غباء..بتعرفي تستعمليه.!؟
وسام: هو انا شوفت في الافلام ازاى بيضربو بيه.. بس عمرى ما جربت... بس بسيطه..(وبابتسامه بلهاء).. عايزنى اضرب مين
محمد: صبرنى يااارب.... بصي طيب.... ركزى معايا والنبي... انا عايزك دلواقتى تضربي على الكلابشات اللى لابسها دى
وسام بتوتر وخوف: هااا... اعمل اى
محمد: اضربي الكلابشات عشان تتفك
وسام: بس.. بس افرض غلطت ومجاتش
محمد: متخافيش... ان شاء الله هتيجى.. انا واثق فيكى.. حتى لو كانت اول مرة ليكى..(وبمرح عشان يخفف توترها).. وحتى لو جات غلط.. هو انا اطول لما اخسر دراعى على ايد وسام هانم
وسام: ههههه
محمد: ايوة كدا اضحكى.. ويالا فكيها بسرعه قبل ما حد يجى على الصوت
-وقفت وسام ورا محمد واخدت نفس.. ورفعت ايديها وهى متوترة... وضربت بالنار على السلسه واتفكت
محمد : براڤوا يا روحى... صعبه.!؟
-هزت وسام راسها بلا
محمد: هاتى بقا
-اخد محمد منها المسدس وفك ايد مازن واسر وادهم... مسك كل واحد ايد خطيبته ولسه هايمشوا...دخل عليهم حارس
الحارس بغضب لما شاف البنات: انتو بتعملوا هنا اى...وخرجتوا ازاى
محمد بتوتر: اصل...
-لما مالقيش محمد حاجه يقولهاله قام ضىبه بوكس في وشه خلاه وقع اغمى عليه
وسام بفزع: اااه...ماات.!؟
محمد: يااريت...بس لا عايش.(وبغيرة)..وبعدين انتى خايفه عليه كدا ليه
مازن: عم روميو...مش وقت غيرتك خالص دلواقتى...يالا نمشي قبل ما باقي صحابه يجوا
اسر وهو بيشاور بعنيه بخوف: ياريتك جبت سيرة ربع جنيه مخروم...كان احسن
-بصوا قدامهم لقيوا باقي الحراس واقفه بغضب...كل واحد خبي خطيبته ورا ضهرة...واول ما تقدم الحارس من اسر عشان يسحب دنيا قام هو بحركه سريعه لف ايده لحد ما خرج صوت العضم وهو بيتكسر...ومن هنا بدأت الحرب
-شويه ولقيت البنات ان الحراس اعدادهم كتير وان احبابهم مش هيقدروا عليه
نور بملل: نساعدهم.!؟
دنيا: لا لا...سيبهم شويه...وبالذات الواد اسر دا..انا عايزة اوصي عليه الحراس اكتر..بس يا خصارة كان نفسي في فشار وانا بتفرج
دعاء بيأس: والله هتفضلى طول عمرك مجنونه...يالا بينا نساعدهم
- وبالفعل دخلت البنات تساعدهم...دعاء اخدت الكرسي..وقامت ضرباه على الشخص اللى بيضرب ادهم
ادهم بمرح : اى دا اى دا...من امتى الشقاوة اللى فينا دى
دعاء بغضب: انت في اى ولا في اى...(وبثقه)..وبعدين احنا الشقاوة فينا..بس ربنا هادينا
ادهم: ههههه...يا جامد انت يا هادى...هههه..حاسبي
-ضرب ادهم الشخص اللى كان جاى من ورا دعاء..وكمل ضرب في كل اللى يجى عليه هو وحبيبته
-و وسام مسكت طفايه حريق كانت على جمب وقامت منزلاها على راس الحارس
وسام بحقد: عشان تيجى جمب حبيبي تانى
محمد: حبيبك😉..!؟
وسام واخدت بالها من نفسها: هاا...(وبغضب).. كمل ضرب من سكات يالا
محمد: هههههن..حاضر يا صغنن
-ونور اخدت المسدس اللى كان مرمى على جمب ورفعته على راس الحارس
نور بتوتر وخوف: ابعد
- بعد الحارس براحه عن مازن...قرب مازن من نور واخد منها المسدس وهو لسه متوجهه ناحيه الحارس..وقام ضاربه في رجله...نزل الحارس على ركبته بصريخ والم
نور بصريخ: حرااام عليك...ليه عملت كدا...ما بعد من سكات
مازن ببرود: يستاهل...تعالى
-سحب مازن نور ورا ضهره وهى بتنفخ بغضب ....اما دنيا اخدت عصايه وجات تضرب الحارس اللى كان قاعد على اسر واسر في الارض وبيحاول يضربه...لسه هتضرب الحارس...راح اسر بدل مكانه بمهارة بحيث بقي هو فوق الحارس والحارس تحته..بس من حظه ضربه دنيا جات فيه
-دنيا حطت ايديها على بؤها من الصدمه
اسر بغضب وصراخ: انتى مع مين بالظبط
دنيا بنفس الصراخ: اعملك اى..ما انت اللى بدلت مكانك...ما تثبت في حته
اسر: اصبرى عليا بس
- كمل اسر ضرب الحارس ودنيا لقيت واحد تانى جى عليها...رفعت العصايه تضربه بيها...بس ايده كانت الاسرع لما سحبتها..خافت دنيا في الاول لما شافته بيقرب منها بغضب بس رجعت وابتسمت بخبث بعدها...قامت ضرباه برجلها..راح وقع يتألم على الارض...شويه وحست بحد بيحط ايده على كتفها...قامت لفاله وضربااه بالقلم بكل قوتها بغضب شويه واتحول لصدمه لما لقيته اسر
دنيا بتوتر وخوف: هو انت بتطلع منين بالظبط
اسر بغضب: انتى اللى مع مين...انا شاكك انك متأمرة مع اللى اسمه مراد دا
دنيا: افتكر زى ما تحب..واحب اقولك...انا صح ما قصدتش القلم ...بس انا مش اسفه عليه...لانك دلواقتى او بعدين كنت هتاخده منى...معرفش ليه...بس كنت هتاخده
اسر باصصلها بصدمه: انتى بجد مجنونه
دنيا بابتسامه بلهاء: هههه..جدا
- فضلوا يضربوا الحراس لحد ما خلصوا ووقفوا بتعب
مراد بتصقيف: براااڤو... حلو العمل الجماعى دا
-بصوا لمراد لقيوه واقف قدامهم... وحراس وراه ورافعه اسلحتهم عليهم....
مراد: كنت عارف انكم مش هتيأسو... بس بجد براڤو للبنات... ما كنتش متوقع اللى هيعملوه دا نهائى
محمد: عايز اى يا مراد
مراد ببرود: وسام
محمد بغضب: حتى لو كنت بتحلم.... عمرك ما هتطولها الا على جثتى
مراد ببرود: تمام وانا موافق اخدها على جثتك
- رفع مراد المسدس في وش محمد وسط خوف الجميع عليه وبالذات وسام... اللى اترجت مراد انه يسيبه وهى هتروح معاه... بس محمد رفض ورجعها مكانها..... وجى يضغط مراد على الزناد عشان يصدح صوت الرصاصه في المكان.. وسط صريخ البنات

______________________________________

انا مش هسأل... هسيب السؤال والتوقع ليكم... لان خلاص فاضل بارت والروايه تخلص على خير بإذن الله والبارت الجاى.. معرفش هينزل امتى... السبت ولا الاحد... لان السبت الواقفه كل سنه وانتم طيبين... حاجه حلوة ان روايتى تخلص على اول يوم للعيد😁
وانا بقولكم عشان لو مانزلتش السبت.. ممكن تنزل الاحد.... وكل سنه وانتو طيبين وعيد سعيد عليكم ياارب و ربنا يعدى الازمه اللى احنا فيها دى على خير... وترجع كل حاجه زى ما كانت بقا... بااى هتوخشونى مؤقتا لاخر بارت

************************************
#الصغنن❤