الاهداف💡
سلسلة صاحب الزمان وحياتي 💕
الجزء الاول /صحتي
زينب : اكلج نور اريد اسئلج سؤال
نور : اتفضلي حبيبتي ان شاء الله اكدر اجاوبج
زينب: انتي متغيرة وشكلج يوحي بالنشاط والحيوية شنو السبب؟
نور : صحيح كلامج هذا الشي بسبب الصحة الجيدة
زينب: ها يعني معتنية بصحتج زين شنو السبب وشلون سويتي هيج لان تعرفيني اني ٢٤ ساعة دايخة ومالي خلك اسوي شي مخلصة وقتي ع النت ومواقع التواصل مابيه حيل اسوي شي
نور : بداية انتي الحمد لله معترفة ان هذا الشي خطا وان احنه لازم نعتني بصحتنا حتى نكون اشخاص نشيطين وفعالين، اما سؤالج ليش سويت هيج فكل شخص اله نية بكل عمل🌻
زينب : شلون يعني مافهمت؟! شنو دخل النية بالمحافظة على صحتنا 😕
نور: باعي حبيبتي زينب احنه نكدر نخلي كل خطوة بحياتنا عبارة عن عبادة، من خلال النية مثلا اني قبل تعرفيني جنت مهملة لصحتي وكل اكلي عبارة ببسي ونوتيلا وجبس وحلا وغيرها من الشغلات المضرة بالصحة وشفتي صحتي شلون صارت، ضعفت طاقتي البدنية ودائما خاملة ومتكاسلة
زينب : اي صحيح انتي جنت هيج بس ماكلتيلي شنو لغيرج؟
نور : لغيرني صاحب الزمان
زينب: شنووو! تقصدين الامام المهدي عجل الله فرجه؟ وضحيلي مافهمت عليج😳
نور: حبيبتي زينب ليحب صاحب الزمان يعتني بصحته وياكل اشياء مفيدة تقوي بدنه حتى يكتسب طاقة ومن خلالها يكدر يخلص واجباته وكذلك يساعد الغير ويحقق اهدافه خلال اليوم ويخلي دماغه يشتغل بالافكار الجيدة
وضيفي طاقة الحب هم لان الانسان ليحب صاحب الزمان يكون يمتلك طاقة الحب من خلالها يكدر يتحرك حتى يخدم بيها امام زمانه صاحب الزمان 🌿
زينب : اني انصدمت ما جنت اعرف ان ممكن نخلي الاكل عبادة اذا خلينه نيتنه ان نكتسب طاقة حتى نعبد الله عزوجل وان نخدم صاحب الزمان بهاي الطاقة
نور : حبيبتي زينب لا تنصدمين لان حتى النظافة الشخصية ممكن نخليها عبادة
زينب : صدك تحجين!؟ شنو هاي انصدمت! زين شلون احجيلي
نور : ان شاء الله الأربعاء القادم نلتقي ونحجي شلون يصير هالشي،وهسه خلي نروح راح نتأخر بكعدتنه❤️
#سنغدوا_رفاتا_ويبقى_الاثر
أنت تقرأ
سنغدوا رفاتا ويبقى الاثر~
Fiction générale#سنغدوا_رفاتا_ويبقى_الاثر #سنبقى_رفاقا_ويبقى_الاثر - تجدون أهدافنا المهدوية التي نمهد بها ونبني سويا جيشا مهدوي نستعد به لظهور القائم عج 💡💛
