*صلاة الإستخارة 💜🌻*
"احنا بنصليها لما بنكون محتارين فى حاجة فى حياتنا زي الزواج أو السفر..الخ"
ولازم قبل اما تصليها تنوي انك هتصلي صلاة الاستخارة وزي ما احنا عارفين ان النية بتكون بالقلب مش باللسان
وهي عبارة عن ركعتين وبنصليها كإننا بنصلي الفجر بالظبط وملهاش سور معينة "يعني بتقرأي فيها الفاتحة وأي سورة تختاريها"
وعادي بتصليها فى أي وقت
هي ملهاش وقت معين بس ابعدي عن الاوقات اللي مكروه فيها الصلاة "اللي هي بعد الفجر لحد الشروق وبعد العصر لحد الغروب وفي خلال الربع ساعة اللي قبل صلاة الظهر"
أي وقت غير دول عادي بقى صليها..يعني لو عايزة مثلا تصليها بعد صلاة العشاء أو قبل صلاة الفجر براحتك
وملحوظة مهمة : "مش لازم الاشارة تيجي فى حلم..عادي جدا ممكن تيجي فى حياتك الواقعية عن طريق مثلا ان قلبك يرتاح ناحية الحاجة اللي محيراكي أو عن طريق آية من القرآن ربنا بيدلك بيها على الصح أو عن طريق انك فجأة ماشية فى الشارع فبصيتي ولقيتي جملة معينة مكتوبة فيها الإجابة على سؤالك وهكذا بقى
"وبلاش تصليها مرة واحدة بس..
يعني مثلا لو محتارة بخصوص زواج فصليها كل فترة لحد اما تحسي ان فعلا الحمدلله قلبك مرتاح وربنا مسهل كل امورك مع الشخص دا"
وصلاة الإستخارة ليها دعاء بنقوله بعد اما نسلم من الصلاة "يعني هتقولي التشهد وتسلمي وبعدين تقولي الدعاء ولو مش حافظاه..عادي اقرأيه من على الفون مثلا"
دعاء الإستخارة👇🏻💜
"اللهم إني أستخيرك بعلمك وأستقدرك بقدرتك وأسألك من فضلك العظيم فإنك تقدر ولا أقدر وتعلم ولا أعلم وأنت علام الغيوب، اللهم إن كنت تعلم أن هذا الأمر ويسميه [بعينه من زواج أو سفر أو غيرهما] خير لي في ديني ومعاشي وعاقبة أمري فاقدره لي ويسره لي ثم بارك لي فيه وإن كنت تعلم أن هذا الأمر شر لي في ديني ومعاشي وعاقبة أمري فاصرفه عني واصرفني عنه واقدر لي الخير حيث كان ثم ارضني به"
*نصيحة👇🏻💜*
"عودي نفسك دايما متاخديش قرار فى أي حاجة خاصة بحياتك إلا لما تستخيري ربنا علشان تبقي مرتاحة..
وبلاش تتسرعي وتمشي ورا قلبك ومشاعرك وخلاص..
لا اوزني الامور كدة بشويش وصارحي نفسك بالعيوب والمميزات وقرري على مهلك واعرفي انك طالما لجأتي لربنا فبإذن الله عمرك ما هتخسري..وربنا يدلك على الصح دايما يا رب✨🤲🏻
