حج يووسف حج يووسف حجيوووسف الردميه ميرد ميرد" ميرد "
دا كان صوت الكمساري بكورك الحاج يوسف الردميه الساعه أربعه ظهر والشمس تحلف تقول ماسحنها بي طايوق 🐸حاره زي صاج العُواسه 🐸 والسوق العربي تقول جبل عرفات من الناس ماشين وين ولا جايين من وين ما تعرف وأنا واقفه وقافله معاي لابسه سماعاتي البشوفني يقول البرادو حقتي شويه و حتجي تقيف وأي مواصلات او هايس تجي الأولاد يجرو يملوها 😒 فقريين خلاص أنتو سؤال الواحد فيكم اهلو صعبين ولا حاجه؟ 🐸 لمن شفت الوقفه طالت ومافي أمل طلعت سماعاتي وشلت تلفوني دخلتو الشنطه وطبيتا علي قووي عاد كان انسرقت ممكن عادي يجيني شلل رباعي🐸 كفيت ليك اكمام عبايتي وقت الليله إلا أركب يا أنا ياهم بس واقفين كدا جاء بص الوالي الاخضر الطويل داك والكمساري بقي يكورك هااا حجيووسف حجيووسف ميرد ميرد ميرد بالله قبل مايتم كلامو كويس الناس جات نابله كيف ما تعرف أنا كنت واقفه قصاد الباب قبل ما أدافر كويس لقيت روحي جوه وقاعده في كوورسي كمان 😹 اتكيفت لمن بقيت اتبسم براي المهم الناس ركبو الكراسي اتملت والبقيه بقو واقفين شماعه بالله وتعال شوف ناس عفصتني وعفصتك وشنطتك مضايقاني نزلا 😹 واقفه جمبي وحده ياخ أنا دخت عديل من ريحت العرق 😒 "أنتو ما بتستحمو لي؟" المهم قت يا سحر كلها ساعه ونص بالكتير وتصلي، بقيت مركزه مع الشباك بعد الصداع الجاني من ريحه العرق شق راسي وبقيت بعمل حركتي المعتاده وبعلق علي الناس بيني وبين نفسي، وب علي أنت مالك حلو كدا، والله الزيك دا حرام زاتو يمشي كداري في الشمس دي حقو يدوك عربيه بي نضافتك دي ،والله أنتي وهميه ومضيقه الاسكيرتي كدا مالك يختي😏 كان سمحه كان عملتي شنو يعني🐸 ،عان دي كمان عشان سايقه عربيه دايره تفتري فينا، و جادعه الطرحه كدا مالك يختي دايره تورينا شعرك يعني 🐸هئه كمان ما فضل لينا الا الوهميين ديل ماسكها كدا خايفها تروح منك😒 ولا عان ليها هي متعولقه كيف ما سمحه زاتو مششششششم أن شاء الله أبوك أشوفك كان جزو من التعليقات بتاعتي الاتقطع بي صوت الكمساري وهو بطقطق فتحت شنطتي أديتو ثلاثه جنيه عاين لي كدااا وقال لي يا بتنا النفر خمسه جنيه 😒 قت ليهم خمسه جنيه الخمسها ليكم منو؟ قال لي مش شايفه أنو مافي مواصلات؟ قت ليهو دي ما مشكلتي، كمان راكبه بص والي وادفع خمسه والله خمسه دي تشمها قدحه ما عندي غير الثلاثه جنيه دي دايرها شيلها ما دايرها جيبها أنا زاتي بحتاج ليها، قال لي يابتنا أتكلمي بي أسلوب ما عندك قولي ما عندي 😒 قت ليهو عندي وما بديك 😏 قال للسواق اقيف يخ نزلها الزوله دي لسانها طويل وحتقفلا معاي باقي اليوم دا السواق راجل كبيير قال ليهو يا مجاهد روق عليك الله خلاص خليها حمر لي ومشاورجعت لي شباكي تاني اعلق علي الماشي والغاشي سيد الحمار ما بسلم مني 😹 شويه كدا ووصلنا حله كوكو سيد البص يشيل ويدفس في الناس لمن بقا كان وقعت أبره ما بتحصل الواطه لمن الناس أتشاكلت معاهو "سواقين البصات أنتو لي بتعملو كدا 😑" دور البص ومشا بعد مسااافه وصلت محطتي طقطقت للكمساري لمن شاف أنو دي أنا عمل رايح ابا يوقف السواق لمن كوركت لي السواق عشان يقيف.. جيت نازله عاينت ليهو من فوق لي تحت وقت ليهو موووتخلف ومشيت😹 لمن روحي عجبتني، ماشه كدا تلفوني ضرب" أصلا لمن يضرب يا مصيبه يا مصيبه يا مُرسال" عاينت للشاشه لقيتها أمي رديت ليها بي "أميمه بت علي 🐸 قالت لي بطلي قله ادبك دي وانتي راجعه اغشي الدكان جيبي معاك فول للعشاء 😒 أجي يا العشاء المن الساعه سته 🐸 قت ليها أجييي ولدك وينو كمان دايراني امشي لي بله العبيط دا عشان يتلايق فيني ااي صح انا بايره واي شي بس ما لدرجه بله، قالت لي أبلك في مويه مطره 🐸 ما تجي لوما جبتي الفول وقفلت الخط في وشي 😹بقيت انضم براي أجي يخوانا الليله الحجه مالا موونفسنه ياربي يكون ابوي ما اداها حق الصندوق 😹 بونس في روحي لحدما وصلت دكان بله وجاني ليك ياخ عندو جلحات تشوف فيها المستقبل 🐸💔 ولونو بوووني محرووق كدا ويدينو ملانه السواد حق الفحم داك
لابس ليهو عراقي عفا عنه الزمن نفسي اشوفو يوم غيرو، أنا بيني وبين نفسي "الله يحلك من ابجيقه دا الليله يا سحر" اول ما شافني قعد اتبسم قال لي اووو سحووره ازيك، قت لي تمام جيب فول 🙂 قال لي مالك قالبه لي خلقتك كدا 😒 قت ليهو جايه من الشغل مرهقه بس اديني الفول سريع بالله قال لي هيي بالله أشتغلتي؟ قت ليهو لسه يخ بفتش الله يهون 😑 قعد اتظارف حبه واداني فولي شلتو ومشيت، عندنا ولد جيرانا كدا أسمو عبد العزيز شافع مسلط خلاص كلما يشوفني يقول لي سحر البايره، أنا ماشه وهو جايي علي قت كدي النتظارف معاهو عشان ما يستلمني قت ليهو عزو ازيك،؟ قال لي سحر البايره 🐸،قت ليهو يا شافع انت بتجيب الكلام دا من وين لافي في الحله كدا زي غنم الاشلاك 😒 قال لي البوره حرقتك أنتي قولي أصبري ما باقي لي كتير بخلص من ثامن دي وبجي بعرسك ،عاينت ليهو كدا 😒 ومشيت خليتو، قال لي أسمعيني نادي لي معاك عمر، قت ليهو ابيت وصلت البيت وانا زعلانه، بالله من الباب سامعه سمر بتردح....
يتبع
