دعيت زييين ومشيت علي سريري انخمدت نمت، صحيت تاني يوم من الدغش عاد دا اليوم المنتظر يا شغلوني يا رجعت الف زي كلبه الحر تاني 🐸 أستحميت ومكيجت سمر مكياج زااابط وجيت لبست سريع سريع شربت شاييني وشلت لي قريشات من ابوي قبل يمرق وبقيت مارقه، لاقيت ليك عمر أخوي وعبد العزيز في وشي مارقين من بيت ناس عبد العزيز قت في سري فتاااح ياعليم بالله الشافع طوالي استلمني قت ليكم فقري 😒 ما ردحت ليهو لانو كنت مستعجله وقفت في الزلط لمن عصبة رجلي أنشمطت مافي مواصلات والبتجي كوولها مليانه اتمنيت اني اكون ولد عشان اركب شماعه 😑 بعد قريب نص ساعه كدا والناس المستنيه المواصلات ماشه زايده لمن بقينا كم نفر بنات واولاد واقفين، جاء بتاع بكسي دبل القبين رفعنا الأولاد ركبو في الصندوق وانحنا اتوزعنا جزء قدام وجزء ورا أنا قعدت ورا وماسكه تلفوني بطبز فيهو م تفرحو هاا مافي زول مووعبرني داخله الفيس من قروب لي قروب زي العرب الرحل 😹 دا الشي الوحيد المووصبرني في ظل الظروف الانا فيها🐸 رفعت راسي بي صوت بتاع البكس بتكلم بالتلفون وبقول للطرف التاني ااي العُمال ديل أصرفهم خلاص باقي نجيب لينا كهربجي بس عشان أزبط الباقي شكلو مهندس عاد سمح سماحه ونظيف نظافه استغفر بس 🚶♀️❤️ خلص من التلفون ورجع وصلو تاني كان مشغل قرآن 💛 عاد انا تاني البرجعني لي تلفوني شنو بقيت مركزه معاهو لحدما حصلنا حله كوكو، نزلنا وأعتذر قال أنو عندو مواعيد وكدا، عاد أنت الزيك بعتذر؟ كفايه علينا أصطبحنا بي وشك السمح دا 😹💛 بعد كنت غضبانه من عبدالعزيز من الصباح مزاجي راق 😹طبيت شنطتي وبقيت وااقفه راجيه مواصلات العربي شويه كدا وجات الحافله أرررربي اااااربي ستاااد مارررق والناس بقت مكدسه كلها جمب الباب رجال علي نسوان اتوكل ومشيت أدافس في نصهم بعد مشاكل ومعافره حتي راكبت قعدت فييي الكرسي الجمب الشباك الحافله اتحركت وانا بديت تعليقاتي المعتاده 🐸💔 كان ما علقت بمووت عديل الشوارع كانت زحمه مبالغه عاينت للساعه لقيتها سبعه ونص وانا تمنيه مفروض أكون وصلت، أحلني الحلا بله عاد دي فرصتي الاخيره كان اتاخرت بمووت بعد 45 دقيقه من الجرجره والعولاق قطعنا الكبري شويه كدا وطقطقت للكمساري ونزلت أخيرا شركه في مبني كبير ولافته معلقه مكتوب فيها أسم الشركه، "علي فكره يخوانا اسمها لافته ما يافطه عشان تلفتك ما تيفطك 🐸💔" قت بسم الله ودخلت بي رجلي اليمين 😹 وحات النبي بنات نضيفات نضاافه الوحده عامله زي باربي 🐸💔 انا الوحيده الجعفر فيهم 🐸 والعجب الاولاد التقول معزلنهم عزيل 🙂🚶♀️دخلت مشيت علي السكرتيره قت ليها كان جيت قبل فتره وانتو اتصلتو علي قتو لي انو اتعينت، قالت لي انتي سحر عبد المنعم علي قت ليهاأيوه قالت لي تعالي معاي ودتني طاوله كدا مختوت عليها كمبيوتر ومفصوله من الطاوله جارتي بي شي زي شبك كدا،طوالي أتصلت لي أمي وريتها أنو أشتغلت، وووبعلي أخيرا نلت 😭💛 لافه سته شهور وعامله لي خمسميه كورس لازم انال في النهايه، قعدت واتبسم براي بعدها جابت لي ملفات وطلبت مني اشتغل عليهم فضلت شغاله لي ساعه الفطور طلعتا فطرت وفي ست شاي كدا عاد الجماعه قاعدين عندها اتنين اتنين غايتو صبرت نفسي ومشيت عليهم شربت لي كبايه شاي ورجعت اشتغل تاني لحددد الساعه ثلاثه ظهر حتي مرقت، كان معاي زي 250 جنيه قت خلاص أمشي سوق بحري أشتري لي تيشيرتيين من الجرد 🐸💔 ااي حأشتري من دنقر شيل مالكم 😒، اها كل مره اقعد البس هدوم سمر وتزلني ما بتجي ركبت لي حافله ونزلت في بحري وطوالي علي تربيزه الجرد جذبني الراجل بغني " شغله ما شغلتنا الدنيا بس جبرتنا" 😹😹 غايتو ناس الجرد ديل عندهم اغاني كدا استغفرالله بس أتفاجأت ليك بي أنو التيشيرت بقي بي 150 يخواني الزول اليوم اليقرر أشتري تخلعوهو كدا 🐸 غايتو اتوكلت شلت لي تيشرت ظرييف كدا وخمسين جنيه شلت بيها جرسلين بالوران "قت ليكم بدور أبقي كيكه 😹🚶♀️💔" وكان باقي لي خمسين قت أتوصل بيها، شلت حاجاتي وموقف الحاج يوسف كالعاده زحمممه لمن عواره 🙂الله يديني عربيه يخ ان شاء الله زوبه المهم ارحم نفسي من المرمطه والقطيع دا، غايتو اتوكلت ومشيت وانا عاصره علي روحي وبطنطن براي أنا زاتي الجابني شنو 😑💔هئه قال دايره ابقي كيكه قال يخ بلا كيكه بلا ويكه 😹طبعا عطاله السوق اشاغلو فيني يمين وشمال لمن حسيت بالسعاده 😹 ما قصرو عاد رفعو لي معنوياتي 🐸 الللمهم وقفت مساااافه بعدها جاء بص الواالي "التحيه خااااسه خاااسه لي بصات الوالي يخوانا ماشين معانا دروب لاممكنه لابقدرو عليها 🐸" ركبت بعد دفسسسه وعولاق ووصلت بيتنا بعد ساعه ونص، نزلت وماشه اتكاوش قت كدي النغشي دكان ابجيقه دا اجيب لي اندومي نفسي فيها وطوالي انعطفت عن مسار البيت 🐸"انعطفت ااي مالكم 😹💔🚶♀️" مشيت وعيني لي ابجيقه مطلع عنقريبو ومتكل فيهو قت ليهو بله هاك جيب اندومي وأديني رصيد سوداني وهو عاد الابتسامه دايره تشق خشمو، قال لي وين انتي موختفيه كدا؟ "عان دا كمان داير يصاحبني 😒 والله ما باقي لي الا انت" قت ليهو لالا اشتغلت عشان كدا قال لي اااي الخبر زي الطقش اضااني ورتني علويه "علويه العله التمسكها المره دي الفوله ما بتتبلي في خشمها" قال لي قتي شي قت ليهو هه لالا مدا لي الاندومي واتاكدت انو الرصيد جا ومشيت علي البيت
يتبع...
