قمت من الصينيه زاتو نفسي اتسدت عملت لي شاي احمر وجيت قعدت جمبهم " الكلب بدور خناقو 😹" أبوي قال لي أها يا سحر أن شاء الله لقيتي شغل نط عمر قال ليهو شُغل شنو عليك الله يا أبوي حايمه كُل يوم زي كلبه الحر 😹 أبوي قال ليهو أنت أسكت النشوف عمارك هدي أمتحاناتك قربت علي الاقل هي قرت وانجزت😒 أنا قت ليهو لسه يا أبوي والله لكن قاعده أفتش قال لي يابت أنتي الناقصك شنو عشان تشتغلي ؟"أجي ياحاج كمان بتقول لي الناقصك شنو 🐸 بدور ابقي كيكه انا يخوانا افهموني الودك دا خلاص جسمي لسلس منو حسو بي شويه🐸" قت ليهو ما عايزه أقعد في البيت لا شغله ولا مشغله وبعدين أنا قاريه ثماانيه سنه اساس وثلاثه سنه ثانوي غير الجامعه عشان اقعد في البيت 🙂 قال لي غايتو الله يوفقك لكين انا كايس راحتك،" ياحاج انت ماعارف أنا كان قعدت في البيت حيتغير أسمي من سحر لي تريزا الشغاله والله كان ابيع مويه في السوق العربي ما اقعد في البيت 🐸" أمي قالت لي يابت هااا سرحانه وين قت ليها ولا حاجه يا امي اكلو ولميت العده سامعه الباب بدق مشين فتحتو لقيتها جارتنا اسمها علويه يخ دي كمان مره شمشاااره شمشره الخبر اول زول بصلها هي، ما بتخلي زول في حالو أصلي ما بريدا، ياهو غزو ولدها طالع ليها اكتر اتنين بتاعين تشغيلات في الحي😒 سلمت علي والبوسات يا يمه بي جاي وبي جاي قالت لي اهاا مافي حاجه جاي ولا جاي "قصدها عريس" قت ليها لالا لسه الله يهون قالت لي هي هو زاتو أنتي صغيره لسسه اسي ماشايفاني انا هدي عرست صغييره عمري تسعتااشر سنه لكين بيني وبينك ندمانه وسافه التراب المسؤوليه حاره والله، قربت اقول ليها هو شن العرس مش ياهو ابجيقه راجلك دا 🐸 وعزوز ولدك الحايم في الحله زي غنم الاشلاك 🐸 لكين عصرت علي روحي ليمونه وسكتت، قالت اي هييي امك قاعده؟ عشان مستعجله عاد الصادق راجيني عندنا مشوار قت ليها دا حالتك مستعجله 🐸 قالت لي هاااا قت ليها قت ليك امي قاااعده خشي ليها..
ياا اووووومي اوووومي علويه جاتك ودخلت وانا غضبانه منها مره حشريه خلاص 😒 يعني انا العريس دا اشتريهو مثلا 😪 مشيت مسكت تلفوني ودخلت الفيس فتحت قروب كراشك عندنا عاد مافي غير الجكس النظيف بخفف لي وجعي 🐸 زعلانه لكين نفسي مفتوحه يخوانا مالكم 😹💔 قعدت قريب ساعتين عاد ما خليت صوره ما علقت عليها واشيل واتفرج وامنشن في ريان وننبرش سوا يخ ناس التقول مستحميين بي لبن نيدو 🐸 ماشه كدا عيني تقع لي في واحد ووووبعلي بس انا اتدردقت عديييل كدا 😹 عاد جنس سماحه هي يخ لابس ليهو بنطلون رمادي وقميص كووحلي وشاكي بي حزام بني واللحيه واللون ما عرفت زاتو انبرش في شنو واخلي شنو قت كدي النشوف التعليقات عاملين خمسه الف وحاجه وتعليقات البنات كلها انبراشات البتقول ليك ولد زي طلقه العقد وشي ما بعرف أسمو زياد مهندس معماري واخر تعليق قريتو انو منزوج بقيت بتكلم مع الصوره بقول لا كيفن يعني متزوج 🙂 حدثني كيفن يعني هااا؟ تاني قت يا سحر كدي بالله هو كان ما متزوج حيعاين ليك انتي مثلا 🐸 بعدين أنتي من بتيين بتنبرشي 😑 متصندده ليك اررربعه وعشرررين سنه جايه تفصلي اسي🐸 و همست بي صوت واطي لن تنالي فجاه جات سمر ناطه من وين ما بعرفا قالت لي شنو هو اللن تنالي قت ليها ولا شي بتكلم براي قالت مشششششم وجات ماشهوقفتها قت ليها اسمعيني بكره دايره تيشيرتيك الزيتي عندي مقابله شغل مهمه قالت لي لا طبعا مووووستحيل 😒قت ليها عليك الله يا سمر باااليز والله اغسل ليك واعمل ليك اي حاجه اسمعيني ممكن أخدمك لي مده اسبوع 😭 عليك الله يخ، بعدين انتي لي بتذليني كدا أنتي ناسيه انو انا اووختك الكبيره، قالت لي ماهو دا الماغصني كبيره ومقطعه 🐸 قت ليها اسي حتديني والله يفتح الله؟ قالت لي امممممممم بديك بي شرط قت ليها اها؟ قالت لي بووكره عندنا أخر امتحان وبعدو عايزين نعمل طلعه ظريفه عايزاك تمكيجيني زابط قت ليها زابط " ما تستغربو يخواني انا صح لا امت للانوثه بصله بس برضو بزبط الميكب لمن الزول يتحير ما عارفه زاتو اتعلمتو كيف" المووهم شلت التيشيرت وجهزت لي اسكيرت اسود وطرحه موووشكله واسبورت اسود ختيتهم في طرف الدولاب وجيت تاني رجعت لي تلفوني 🐸عاد عااطله لا شغله لا مشغله 😹 وقعت عيني علي قروب نونا عاد دخلت وياريتني ما دخلت أستغفر الله بس سماااحااات سماحااات سمااااحااات يخ اشكال تشرق من السماحه اسييي عليييك النبي ديل بنات وانا بت 🐸 ولا العجب الهدووم حاجات كدا مشخلعه وحاجات واقعه وحجات كم واحد في والتاني ماف انا غايتو عندي دلاقين في دولابي 🙂 الليل داك كلو قضيتو من قروب لي قروب في النهايه زي الساعه اتنااشر كدا تفعيلي خلص عاد منشطه سوداني لا محدود حق الناس المقطعين،🐸"ناس سوداني كيفتمام" قت الننشط تاني لقيت رصيدي جنيهين والتنشيط بي ثلاثه جنيه بتيين أعرس واشيل من راجلي حق الرصيد 😪 قبلت جااي قبلت جااي مافي موضوع وسمر نايمه زي البقره مشيت وانا ما نعساانه طلعت اتلبد زي الحراميه اتوضيت وجيت بقيت اصلي وادعي ربنا يوفقني في يوم بكره عاد جزمي اتقطعت من الكواسه 🐸💔 المصبرني بس عدم قعاد البيت لاني عارفه كان قعدت حأتحول من سحر للشغاله سحر ومن غير مرتب كمان 🙂دعيت زييين ومشيت علي سريري انخمدت نمت
يتبع...
