طلعت من البيت و أني اسمع صوت روان تصيحلي رغم صوت الموسيقى العالي
مع ما طلعت و صرت بالحوش نزلت دموعي الي چنت كاتمتهن طول الوكت طببت شعري جوه شالي و اني احس گلبي يريد يطلع من مكانو..
احس بغصة خانگتني ما ادري شلون دست على اعصابي و ظليت ساكته و ما حچيت و لا صحت و اني اگول..هو مو الها..هو ليه احس رجليه ترجف و أني اباوع للكعب الي لابسته..احسو يهتز جوايه شعور صعب..حيل صعب و اني اشوفو يلبسها الحلقة و يبوسها من رأسها..و الضحكه مرسومه على وجهو و هي ادحگ علينا..و كانها تگول اخذتو و غصباً عنكم
توجهت لباب الحوش اريد افتحو تا اطلع راجعه لبيتنا بس تيبست بمكاني من حسيت بيد تكمش زندي صديت بسرعة و صرت وجه بوجه وياه فتح حلگو تا يحچي و كالعادة يذب سمومو بس سكت و حواجبو عگدهن من شاف وجهي و دموعي الي استقرت على خدي
بلعت ريگي و نصيت راسي و أني اگول بنبرة ترجف
- عوفني اريد اروح
- ما اعوفچ إذا ما حچيتي شنو معنى تصرفچ الجوه ؟
ضحكت من بين دموعي و رفعت رأسي عليه و اني اسحب ايدي من ايدو حسيت نفسي رجعت نفس قبل و أني اگول بضحكه
- شبيك سلطان غير ارگص بخطوبتك
رفع حاجبو و أني حكيت طرف حنچي و گلت بابتسامة مستهزه
- ارجع سلطان جوه لأن وگفتك وياي تجيب الشبهه و تطلع العروسه زعلانه..خطية يصير وضعها يقهر
دحگ بطرف عينو لباب الكيلديور و شاف روان واگفه يمكن تمنع احد يطلع لو گاعد تلهي بأحد
تقرب خطوة ناحيتي و هو يصر على سنونو و يگول
- كل ما اگول يا سلطان على كيفك وياها اتندم وراها لأن تستاهلين الجاي يصيرلچ..و حل بيچ حسبالچ انقهر عليچ ؟ هه لا والله بالعكس اضحك عليچ و على عقلچ الصغير
سكتت و هزبت راسي بـ اي و انداريت على روان و أني اگول بصوت شبه عالي
- روان خالوو عماد يصيحلي ما اگدر اظل
حچيتها و أني اندار على سلطان الي ما أنكر انو كلامو كسر شي بداخلي بس مثل كل مرة اضحك و اني اجاوبو
- هاا صدگ ما عزلت لـ عماد كيكة من هالكيكة الطيبه عود خلي روان ادزها بيد طيبة..لأن تعرف هو يحب الكيك
ابتسم باستهزاء و هو يرجع خطوة ليورا و يگول
- احرگي گلبچ اكثر..احرگيه
و فات جوه و أني ظليت ادحگ لخيالو الا ان دخل رجعت دحگت لـ روان الي تقدمت خطوات و گالت من صارت يمي
- لين..ترا اني ما عليه
ابتسمت و گلت بسخرية
- ادري انتي ما عليچ.. بس سوايتچ ما حبيتها ظامه عليه الخبر عبالچ اخرب عليه
بلعت ريگها و هي تريد تجمع كم كلمة گبل لا تگول
- هو..هو گال لا تنطون خبر صدگيني علمودچ حتى ما تنقهرين لو تسوين شي
هزيت رأسي بـ اي و اني ادحگ عليها گبل لا اتقرب عليه و اگول بصوت ناصي
- گولي لـ سلطان..مو اني الي راح اخرب هالزيجه المحترمه من بنت الحچي الزاهد الفاضل گوليلو انت الي راح تخربها و يجي هاليوم الي راح يگول بي ايي والله لين..صدگتي بكلامچ
ختمت كلامي و طلعت..و أني اعدل بحجابي على رأسي طلعت من بيتهم و شفت الشارع بي چم شخص بس ما درت بال طبيت لبيتنا و بالحوش لگيت خالي عماد گاعد يدخن نرگيلة جيت افوت جوه بس وگفني من گال و هو ما يدحگ بوجهي
- هاا برد گلبچ ؟ لو بعدو محروگ
ابتسمت و گلت باستهزاء
- لا تخاف عماد..مو أني الي ابچي على زلمه
اندار عليه و گال و هو يذب القمچي
- تعرفين صوجچ..ليش ما حچيتي الصار چان اليوم مو خطوبتو.. أصلاً چان طلع من حياتو شي اسمو لمار
هزيت رأسي بـ لا و گلت بهدوء
- خلي شگد حذروا و ما سمع..الاخ طامس بحبها يجي اليوم الي يعض اصابيعو ندم من وراها..
.
السلام عليكم 🥺
احم رجعنا 🌚💔
شلونكم 🥺
طبعاً قصة جديده و ابطال جدد
القصة حقيقية مئة بالمئة..و الأبطال متابعين ويانا 🌚
بصراحة ما چنت أريد انزلها..بس لأن اعرف نفسي اذا ما نزلت مشهد ما راح يصير عندي واهس انزل حرف واحد وراها 🤣💔 و يمكن انساها فـ تحفيز الي نشرت المشهد و ها شنو رايكم بي 😬 و شنو توقعاتكم ؟
و شنو رايكم بالغلاف اعرف اني انسانه فاشلة و بجدارة بالتصميم بس شنسوي غلسوا 😭💔
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
فـ من هسا ما اعرف شوكت راح انشرها..يمكن اسبوع يمكن شهر لأن لحد هسا احداث گاعد توصلني 🌚💔 فـ من احس نفسي جاهزه للكتابة و النشر ابدي بتنزليها ❤️ لأن بيها أكثر من قصة و اكثر من شخصية و ناس مترابطه بناس و قصة متشابكه وي قصة 😬 فـ اظن راح تكون اطول رواياتي 😂✌️
