| يا تعبي العشگته | ' باللهجة العراقية '

| البارت العاشر |

#يا تعبي العشگته
#بقلم الراوية
#البارت العاشر

بسم الله الرحمن الرحيم

| صلوا على النبي ⁦♥️⁩ |

.

لين..

گاعده على الكرسي و بصـفي عماد الساكت و هو حاط ايدو على شـفتو يدحـگ بالفراغ
و گدامنا ضـرغام المنزل رأسو و هو محـاوطو بيدي الإثنين

و يمو امو..و بصفها امي التبچي..و مرت عـمي تسكت بيها..

صارلنا فوگ الـنص ساعة من دخلنا للمسـتشفى
و لگيـنا ضرغام و امو مـوجودين..و طيبة جـوه بغرفة العمليات يخيطـون رأسها

ما افتـهمنا السالفة و شصـار غير انو ضرغام اتصل علـى امي بگوللها طـيبة وگعت من الدرج

كلنا حفـزنا على طولنا من انفتت باب العمليات و طلعوا طيبة على السـدية بين الصاحية و النايمة
امي كمشـت ايدها و گعدت تبچي

عماد راح صوبها و هو يحچي وي الدكتور
و أني رحـت ناحيتها
دحگـتلها چان رأسها ملفوف و ايـدها مكسورة
دنگت عليها و بستها و أني اگول

- عمري أنتي قوية..لا تخافين

- ماما

حچتها بوهن و امي تبچي و تمسح على ايدها السليمة
ضرغام جا نايحتها همين ادحگ عليه شلون خايف و قلقان عليها و امو نفس الحال

لحظات حسيت وگعت طيبة مو حـادث عادي
خصوصاً ضرغام و امو متوترين..حلفت اذا الهم يد بالموضوع والله إلا اشوي مشكلة الها اول ما الـها تالي

اخذوهـا للغـرفة و عماد و ضرغام حطوها على السرير
و امـي و مرت عمي گعدن يمها..دحگت لـ ضرغام الچان واگف على جهه يحچي وي عـماد

وگفت يمهم و گلت

- شلون وگعت طيبة

جر ضرغام حسرة و گال

- وگعـت..

- اي صدگت.. ضرغام طيبة شلون وگعت ؟

حچاها عماد و ضرغام مسح على گصـتو و هو يگول

- ليش ما تصدگون والله وگعـت !!

هزيت رأسي بـ اي و گلت بشك

- خوش..بس أخاف يختـلف الحچي بعدين

عگد حواجبو و أني رجـعت يـمها..
چانت تنام و تگعد..و إذا صحت تگوم تبچي من وجـع رأسها و ايـديها

ظلينا للـمغرب و كتبلونا خروج
طيبة گامت تبچي و گالت اجي وياكم لـبيتنا
حاول ضرغام يخليها تتراجع بس هي صـاحت و گالت ما ارجع ويـاك..

من طلعنا و يم بـاب المستشفى طبـگت تكسي
ما درت بال بس انتبهت مرت عمي من گالت

- هاي مو ام سلـطان