| يا تعبي العشگته | ' باللهجة العراقية '

| البارت السادس |

#يا تعبي العشگته
#بقلم الراوية
#البارت السادس

بسم الله الرحمن الرحيم

| صلوا على النبي ⁦♥️⁩ |

.

لين..

ادحـگ عليها شلون وجهها أصفر
تريد تنطق حرف ما تگـدر.. بلعت ريگـي و گلت و اني امسد على كـتفها

- طيـبة..

بس نطقت اسمها گامت تبچي بحرگة گلب
و قبل لا استوعب شنو تريد تسوي گامت على حيلها
و طلعت مـن الغرفة و هي تصيح امي و عماد

گبل طلعت وراها..لگيتها بالصالة واگفـه گدام عماد
الي گـاعد و حاط رجل على الثانـيه و يدخن و وجهه ما مبين عليه اي ردة فعل

- انـت شلوون توافـق هااا
منـو گالك وافق اني عندي رايي اوافق لو لا

صدت على امي و گالت

- ماما شلون خليتي يوافق ؟
سكتت على ترك دراستي بس مو تروحون تزوجوني بدون حتى ما ادري

كملت حچيها و گعدت بالگاع تبچي و تعتب
نص كلامها مو مفهوم
گبل رحتلها و گعدت يمها احاول ابعد أيديها تا تبطل ضرب نفسها

أمي ارتفع صوتها بالبچـي
وعمـاد باقي قطعة جماد بمكانو

- خلصتي مناحتچ

قطع صوتها عماد..و هي رفعت راسها عليه
دموعها مغرقة وجهها
طفى جگارتو و جا ناحيتها..گعد ركبة و نص و گال
و هو يحط اصبعو على گصتها

- ضرغام خطبچ..و أني وافقـت
و امچ ما اعترضت..على الأقل يعرف بسوالفـچ تا باچر عگبو ما يجي يعاتبنا

- خطبني تا يذلني..موو

حچتها و هو ابتسم و گال

- والله ما ادري يا..بنت اختي
بس الي اعرفو الولد رايدچ..و اني ما اگدر اكسر گلب احد و انطيتو الموافقـه

- عماد حرام عليـك..والله حرام
هو ليش خطبها هسا ؟ بهذا الوكت بالتحديد
أكيد عندو نيه سوده

حچيتها و هو دحگلي و عگد حاجبو و گال بهدوء

- لا تگومين تألفين سوالف الافلام الهنديه
الزلمة بنت عمو و رادها.. وين المشكلة

- والله اذا تزوجتو انتحر و خطيتي برگبتكم

ما ان نطقتها طيبة..حتى خالي ثأر و لطمها براشدي على حلگها
و هي گامت تبچي بكل قوتها..
گبل امي تحركت من مكانها و رفعتها على حيلها و صاحت بيها

- كاافي..كل شوية و گايله انتحر و انتحر
روحي انتحري و تصخمي

- ماما ما اريدوو

صاحت و خالي گام يريد ينقض عليها
بس تلاحگت الوضع بأخر ثانيه
گبل اخذتها و فوتتها للغرفة و أني اسمع عمـاد يهدد و يتوعد بيها