• لوحة الضياع •
• البارت الثاني •
• زينب علي •
...
ستبقى يتيم 🥀🕊
بعد رحيل من تحب
ولو عانقك العالم بأسره
.
* زهراء
جسمي يرجف بين ايدين عمتي ، صورتهم تخليني ابجي بهستيرية نسيت امير نسيت'' ريام ، كلبي جان حاس ظليت اضرب علي بقوه عمتي ما كدرت تسيطر عليه وعلى انفعالي
بس صحيت من وكعت ريام ركضت يمة اختي راح تروح مني .. حضنتها كبل لينضرب راسها بالكاع ضربت خدها ما كعدت
- ريام فدوه مالي غيرج كعدي ..
تربطت ايديه ورجليه ، اني اليوم المفروض سعيدة بلحظات انكلبت حياتي فوك حدر .. تشتتنا ماحسيت الا ليث شايلها .. هو دكتور اخر سنه اله بالكلية .. وداها للفوك عمتي راحت تسويلها لبن عرفت ضغطها هبط .. كعدت بصفها على الجرباية
سد جهاز الضغط و كال بهدوء: ارتاحي مابيها شي هسه شوي وتكعد
هزيت راسي اجتي عمتي ، فعلاً وره ربع ساعه كعدت حضنتها بقوه واني ابوس وجهها
- معليه تحبيني تكرهيني ما اخليج تروحين لمكان وتعوفيني مالي غيرج بعد
لاول مره ريام تبادلني الحضن بدون عصبية ، لاول مره احس بحنانها عليه .. تذكرت حجايات بابا ورجعت غصيت بالبجي
عمتي : ياا زهوره مو كلنه ترتاح ياعيني عوفيها وامشي نطلع ارتاحي انتي هم
لزمت ايدها : لا عمه انام يم اختي
ماكالت شي خطية حضنتها ووجهي مقابل لوجهها
- ريام شراح يصير
ابتسمت بتعب مسحت على راسي : كل خير زهراء رحمة الله ما تخلص .. اهم شي انتي صيري سندي وعاونيني على الجاي ، على امير على كل شي ..
هزيت راسي : وعد راح احاول كد ما اكدر بس لا تعوفين ايدي بيوم ، تدرين بيه اوكف بنص الطريق ابجي
ريام بتعب : خلي ننام هسه تعبانه ورانه ضيم ، ورانه نوديهم وندفنهم ونودعهم
هزيت راسي ، حضنتها وهي حضنتني ما كعدنه الا على لمسة عمو الدافيه فتحت عيوني ردت هالشي حلم بس ماكو
باوعت ادور على امير كلت : عمو وين اميير ؟
- نايم بغرفة ليث ماقبل ينام وحده هسه يجي
كعدت ريام ، عمو كلش حنون دوم اشبهه ببابا حضني وهو يمسح على راس ريام
خيمة و انقلعت
احس حياتي صارت تراب ومايرجع مثل قبل
انكسرت ؟ لا شي اصعب من كلمة انكسار
الحالة الي شفتها بأهلي تصعب على الكافر
قتل بطريقة بشعة و مؤلمة لهسة احس المنظر كدامي
مهما يمر الوقت ابقه اتذكر هاللحظات
اجه امير جريته لحضني حط راسه على رجليه وكعد يبجي امسح بدموعه تنزل
كعدته مسحت دموعه : اشش حبيبي كافي بجي
أنت تقرأ
لوحة الضياع " باللهجة العراقية "
Romanceفي تلك اللحظة التي كنت اظنُ انني فقدت اغلى ما املك وان الحياة قد انتهت بالنسبة لي ظهر ذلك الفارس في مُخيلتي لينتشلني من الحزن الانثى كائن رقيق لا يُريد سوى الحب و الاهتمام كان كنسمة جميله تداعب روحي و تجعلها هادئة لكن يُقال ان الشقاء لا يزول سريعا...
