عصب الروح

البارت 12

كان جالس يكلم زوجته : كلمت لؤي بيجي مع زوجته اشتي تعاملينها تمام سمعتي مشتيش تفك الولد ابدا
ام لؤي: تمام
ابو لؤي: انا ماصدقت انه تزوج مشتيش البنت تطير او يطيرها بتصرفاته
ام لؤي: تمام بنعاملها تمام وكانهي في بيتها
ابو لؤي : الولد هذا تعبني معه سع اخوته كلهم
..........
الصباح قام على صياحهن بالمطبخ
دخل بضبح: ايش في عتخليني انام ؟؟؟ حتى يوم الجمعه هدره من الصبح
ام بهاء : زوجتك ما ترضى تعمل شي ولو عملت حاجه تدخل تصيح وتنتقد ولابه لكلامي قيمه
ميسون : بهاء ما قلت شي امك مدري مالها علي
بهاء بعصبيه وهو بيشوف ل امه: انتي ولا عجبتك واحده كلهن بيتليقفين وكلهن تافهات انا تعبت الصدق
ابوه سمع صياحهه ودخل : بهاء مالك على امك
شاف ل ابوه : مالكم انتو ماخليتو لي حالي
الاوله صياح واصل كرهتوني عيشتي
والثانيه صياح واصل وحتى وهي حامل امي بتشغلها
ام بهاء بقهر: ما بين اشغلها والله مابين اقل لها شي
بهاء بصياح: بسك كذب بالاوله كنتي تقلي نفس الكلام يعني معقوله الثنتين كذابات
ابوه بعصبيه: بهاء كلم امك باحترام وهدوء
التفتت له بضبح: ما بتكلمش بهدوء قد تكلمت ومافهمت
ابوه ب انفعال : باقي شويه وتمد يدك
بهاء : ضبحت منكم ضبحت تفهم ليتنا ماكنت ابنكم ليت وما خلفتموني
ابوه بقهر: ولا تندم ولاشي خذ اغراضك واخرج
رد هو ب انفعال : ولا بقول لك لا ،جاءت منكم ولاعاد بتشوفوني
ابوه : ولاكانه خلفنا
ام بهاء : لا ي ولدي مش من جدك
مشي وميسون بعده ،، وهي بتلحقه وهو مسك بيدها: خليه ماعاد نشتيه ! خلينا نبرد من الصياح ع الاقل
شافت له بقهر: ماقدرش ولدي الوحيد
ابو بهاء: ماعاد بش منه فايده بنت اختك لعبه بعقله خلاص لو جلس مابنخرجش لطريق وماشفتي كيف ماصدق قلت له اطلع

دخل ب انفعال وميسون بعده : جمعي اغراضنا وانا بشوف شقه الان واستجارها
شافت له بحزن وفرح مخفي: حاضر
..........
وصل هناك مع فرح اللي كانت مرتبكه وكانه بتروح مكان غريب او بتعيش مع ناس مختلفين لاول مره
دخل معها وهم بالصاله
امه وقفت ورحبت بها وهي مبتسمه
ارزاق وصلت امامها: فرح
لؤي شاف لها : ارزاق طلعيها غرفتي
وشاف ل ابوه وجلس جنبه: مالك وجههك مقلوب
ابو لؤي: اختك خرجت مع زوجها من البيت
لؤي بغرابه: وليش
ام لؤي جلست: تصايحت مع خالتك وبهاء انفعل معها وابوه طرده
لؤي رفع حواجبه: ي ساتر وليش هذا كله على ايش تصايحو
ابو لؤي: اختك قالت على شغل البيت بس انا صيحت فوقها وقلت تقل له يرجع ويتسامح من امه وابوه مابش معهم غيره
امه: اتصلت اكلم خالتك ماعاد جاوبت علي
لؤي : ماتوقعت ابدا انه بيطلعو من البيت
ابوي لؤي: ماعاد عرفنا كيف واصلا حتى زوجته الاوله قديه بيت اهلها وقالت انه خالتك بتفعل مشاكل معهن ولا سبرت مع واحده
لؤي ساكت

فرح طلعت مع ارزاق فتحت الغرفه وهي دخلت : ذي غرفه لؤي
فرح تشوف لها وبها صور كثير وصوره من هو صغير
ازواق: لؤي الوحيد الذي معه صور من وهو طفل كانو مهتمين به
فرحح ضحكت وجلست: شكلك تغاري منه
ارزاق: احبه واغار منه كلهن
فرح بعده البالطو وارزاق تشوف لها : ليش لابسه كذا
فرح بتردد : اصلا انا
ارزاق : رجعتي تفعلي بنفسك كذا
جلست جنبها:  معي فستان زهري قد ضاق علي شوي بيجي عليك تماماً يجنننن
واليوم بيجين نسوان وكذا عشان ابتهال  زوجه اخي سليمان ماريك اديه تلبسيه بتطلعي به تجنني
فرح بسرعه': لا لا اصلا
قاطعتها : ولا اصلا ولا شي بتشوفي كيف بيجي عليك بروح اديه وارجع
خرجت ولؤي دخل وهي شافت له على طول: يعني انا بكون انام هنا
لؤي: ايوه
فتح الشبابك حق الغرفه
فرح بتردد: وانت ؟
لؤي التفتت لها: وانا هنا فين بروح مثلا
اقتربت منه: لا مستحيل
لؤي: خلاص بنزل انام مع امي وابي ؟!
مارايش ! ابي محاصرنا اصلا مطر انام هنا
فرح تشوف له وارزاق دخلت على طول ورجعت شافن له وبتوتر: اسفه فكرتك تحت
لؤي شاف لها: ادخلي بس باخذ لي جاكت واطلع
دخلت وهي بتوريها ابسري الفستان وهي تشوف بتوتر للؤي ولؤي يشوف لها
فرح: انا
ارزاق قاطعتها: البسيه طيب نشوف
لؤي ماريك قلت لها تجرب فستاني
لؤي شاف لفرح وهو يضحك: هههههه روعه بيطلع عليها يجنن
وهي تشوف له بقهر وبمعنى * بوريك *
لؤي شاف لدولاب وضحك واخذ جاكت وطلع
وهي تشوف لها فرح استسلمت: طيب بجربه
..........
خرج من غرفته وهي بالصاله تبكي : خلاص ارحمي نفسك هو مش عارف فين انتي وانتي تبكي عليه
ام بهاء: ماقدرش هذا ابني الوحيد
ابو بهاء: شوفي كيف اثير كانت صابره سبع سنين ولا قالت كلمه وهذا ماصبر عليش شهر
ام بهاء تبكي بس
ابو بهاء: والان اصبحنا لحالنا ولا كانه معنا ولد
شافت له بقهر: ما بنهونش عليه بيرجع
ابو بهاء: حرام ماعادوه راجع
. ........
كان متضايق بس يكابر وهو جالس في الغرفه وهي بالمطبخ * معرفش ايش عملت بس شكل حزني بعد اثير فعل موجهه غضب داخلي على امي وابي ، امي ماعجبها العجب ، كلهن باطلات ، وابي مستحيل ارجع بعد ماطردني ،، بيقولو الواحد يرتاح عند اهله لكن انا ماحصلت يوم سوا ، اثير مش قادره تطللع من راسي رغم عيوبها اصبحت اكرهها واحبها اشتاق وابغضها ،، مدريت مفعل ! وماعاد اقدرش ارجعها تعبت صياح وهرم ولاقادر اطلقها ماقدرش افرط بها ، وهي ساكته ومخليه الكره في ملعبي ، تعبت *
........
كانت ارزاق تشوف لها: ووووواااووو ي فرح لو تشوفي ما اجملك
كانت هي ساكته
ارزاق مسكت بيدها امام المرايا : شوفي شوووفي ما اجملك كذا طلع عليك يجنن
كانت ساكته لكن عندما قالت : مدريش ايش بيقل لؤي اخي لما يشوفك
مدري كيف حست نبضات قلبها تزيد ولونها تحول للاحمر مافهمت
رجعت للخلف وارزاق تشوف لها: مالك ؟ او عادك تستحي منه
كانت ساكته
ازواق: بس والله طلع عليك يجنن وانتي تجنني
شافت لها : لو بس تهتمي بنفسك شوي
ورجعت جلست على السرير: شوي وننزل نجلس تحت بس بسالك كيف تزوجتي اخي
فرح ساكته
ارزاق: مالك ؟
فرح بصوت هادى: قابلته صدفه
ارزاق فتحت عيونها : يووووه لايكون عن حب .. حبك اخي وتزوجك معقوله لؤي اخي حب
فرح شافت لها : حب !
ارزاق: ايوه حبك وتزوجكك
فرح جلست : حبني !
ارزاق بغرابه: مالك !؟ احيانا اشوفك غريبه وتصرفاتك غريبه
فرح : ههه ولاشي
وفي نفسها كلام ارزاق يعيد نفسه * حبك وتزوجكك *
وتكلم نفسها * حبني *
...............
كانت بغداد تكلمها: تخيلي تخيلي فلتهم لحالهم
اثير ساكته
بغداد: ليش ساكته مفروض تفرحي الله انتقم لش
اثير بحزن: وليش افرح ! عشان ميسون بتمشي بهاء على كيفه !؟ والا افرح بخالي اللي فلته ابنه وهو الوحيد الذي ربيني وكان لي اب في طفولتي
وخالتي رغم اخطاءها معي بعد ما تزوجت بهاء بس ما نكرش انها ربتني وكبرتني وكانت تعاملني كاني بنتها الخامسه
بغداد : خواته زاعلات قوي وقاطعينه والمشكله كلهن بعيد
اثير : غبنه على الفاضي وقهر
.........
المساء رجع وهي كانت بغرفتها بتفكر بحاجات كثير
دخل وهي واقفه امام المرايا ونقزت
لؤي: مالش هذا انا
كانت تششوف لنفسها ورجعت للخلف
لؤي: ليش خفتي ارجعي شوفي نفسك
وهي واقفه بدون كلام
لؤي : شوفي نفسك ما احلاك هكذا وكيف رؤيتك مريحه للعين
كانت ساكته وتشوف له
جلس ع السرير وهو يشوف لها ورجعت هي جنبه : دكتور !
شاف لها
فرح بدون مقدمات : ايش يعني الحب !
لؤي ضحك : كيف ايش يعني ؟ انتي ايش مفهومك ؟
فرح : ماعرفش انا معرفش اللي اعرفه انك تقل لحد احبك عشان مثلا يفعل لك اللي تشتيه
لؤي ضحك : هههههههه
فرح : بس ماعرفش كيف يعني ماعرفش ايش هو بالضبط
لؤي شاف لها بهدوء وهي تغير لونها بتحس شي بتوتر فيهاا وهي تشوف له بدون اي حركه تحس بحراره ونبضات قلب عاليه
وقال هو : الحب تفاعل يبدا بالدماغ ويفز لكامل الجسم الا انه بيغير نبضات القلب ويخليه ينبض اقوى واسرع يسبب تللبك وسرحان وصمت
وتبدا احاسيس جديده تمنو داخلك
مسك ب اصباعه السبابه بجانب راسها : يبدا من هنا
الا انه يتحكم في قلبك
نزل يده الى يدها : ويكون شخصك مثل وريدك ذا
سحبت يدها بسرعه وهو يشوف لها  : مالك
وقفت : ولاشي
وشافت له : اشتي ابعد الفستان لو سمحت ممكن تخرج
وقف هو: تمام
ورجع شاف لها : على فكره مثل ما قالت ارزاق طلع عليك يجنن
خرج وهي تشوف بعده وكلامه في راسها * طلع عليك يجتن *
مسكت ايدها اللي كان ماسك بها : ايش بيحصل معي ليش اصبحت افكر به قوي ليش اتلبك واسرح لما اشوفه وليش نبضات قلبي تزيد كيف يعني هل انا احبه كيف احبه وليش احبه !!!!
نزل هو تحت وارازق بالمطبخ دخل : ارزاق
شافت له لؤي: وين جلست فرح ؟
ارزاق بغرابه: معنا جلسنا كلنا تحت
ورجعت تكمل: اول مره كانت منزعجه شويه وبعدين بدات تندمج الا انه شكلها انطوائيه وكانه ماكنت تجلس مع الناس وجلست ساكته الا لو ابتسمت او قالت كلمه كلمه
كانت ساكت وهي تشوف له: تعرف يا لؤي البنت هذي غريبه شوي؟
لؤي : كيف يعني
ارزاق: احسسها بريئه قووووي كانه طفله مش فاهمه ولاشي بالحياه ذي وكل شي تشتي نعلمها من جديد واحسها طيبه قووي
سكت
ورجعت تشوف له بغرابه: كيف لوما تزوجتها
لؤي : مش شغلك
ارزاق: ايوه انت تاخذ مني وانا ماشي
مشي من جنبها جلس بالصاله شوي وطلع فتح وقد نامت
دخل غلق شباببيك الغرفه وبيكلم نفسه: نامت بدون ماتغلق حتى الشبابيك
اقترب منها وهو بيشوف لها : مثل ماقالت ارزاق البنت ذي بريئه قوي ومثل الطفله يقدر اي حد يستغلها بسهووله بمجرد ما يسايرها ، كنت مفكر جلسات العلاج بتطول معها اكثر الا انه اكتشفت انها لينه قووي، مش عارفه من الحياه شي اعلم الله كيف كانت عايشه ، شكلها كانت وحيده قوي وانظلمت قوي ، مش عارف كيف بتكون حياتها مع الشخص ذاك ماهان علي ، لكن  مافعل ، والله ان قد الله بلاني بها بلاء عظيم.