كن لإبنك معلماً وهو طفل، وصديقاً حين يكبر.
::::::::::::::::::::::::::::::::::::::::::::::::::::::::::::::::
صحيت وانا حاسة راسي حينفجر من الوجع ،، كنت في المستشفى،، خالتو هيلدا كانت قاعدة جمبي ،،،، جات علي وقالت :نازلي انتي كويسة حبيتي
قلت ليها وانا ما قادرة اتكلم كويس : ايفا وين ؟؟؟ما لقيتوها ؟
حضنتني وقالت لي :حنلقاها حبيبتي بنلقاها انشاءالله
قعدت جمبي وانا في حضنها وبقت تمشي يدها في شعري ،،،، شوية كدة وجا فهد داخل ،،،رفعت راسي من خالتو وقلت ليهو بسرعة :ما لقيتوها يا فهد
فهد :بفتشو فيها لسه
رجعت لي ورا وبقيت ابكي ،،،،وخالتو هيلدا بتهدي فيني ،،، فهد طلع برة بعد ما جاهو تلفون ،،، وانا بقيت بس ببكي في حضن خالتو .....
::::::::::::::::::::::::::::::::::::::
انا ما كنت عايز اعمل كدة ولا كنت عايز ااذيها بس انا حذرتها وهي ما سمعت كلامي ،،تتحمل خلاص ...
:::::::::::::::::::::::::::::::::::::
اما انا كنت اصحى واقعد ابكي بهستيريا وهم يدوني مهدئ وانوم واصحى واقعد تاني ابكي وهم يدوني مهدئ وفضلنا كدة لغاية ما مرو يومين ولسة ما لقيناها ..
كنت قاعدة براي في الغرفة ،،خالتو هيلدا نزلت تحت تصلي ،،، تلفوني رن ،،شلتو ولقيتو عمو حسن ،،، ما كنت عايزة اقول ليهو ف ما رديت ،، لغاية ما قفل ،،، جاتني رسالة مكتوب فيها :
( حذرتك كم مرة بس ما كنت بتسمعيني ،، ) و (وما تخافي بنتك قاعدة في الحفظ والصون لو عايزاها اطلعي من الشركة الانتي متعاقدة معاها )
اتذكرت لما كان بتجيني رسايل مكتوب فيها ما تتعاملي مع شركة فهد واطلعي منها وغيرها كتييييير .. معقولة يكون فهد هو الخطفها مافي غيرو ،،، طيب دة معناها عرفني ،،،لالا ما عرفني لو كان عرفني ما كان بيتعامل معاي كدة وكان واجهني ،،،، طيب دة منو ،،،،اخخخخخ يارب رد لي بتي يارب ما لي غيرها ..
بلييل زي الساعة 8 كنت قاعدة نفس قعدتي ،،،خالتو هيلدا كانت نايمة في الكنبة الي في الغرفة ،،، جاتني رسالة في تلفوني ،،، شلتو ولقيتو من رقم غريب وكاتب :
(تعالي اخدي بتك من ............. ، واطلعي من الدوامة الداخلة فيها دي لانو المرة الجاية حتجيك بتك وهي ميتة )
نزلت من السريير براحة ،، وانا شايلة تلفوني وطلعت برة الغرفة ،،، لقيت فهد وقاعد في الكرسي ،،، عاين لي وقام جاني ،،،،
فهد :مالك ،عايزة حاجة ؟؟
قلت ليهو : م م ماشة اج اجيب ايفا
مسكني من كتفي وقعدني :بفتشو فيها والله يا نازلي اقعدي انتي
قلت ليهو :ا انا ع عارفة مكانها
قالي بإستغراب :عارفة مكانها كيف ؟؟؟
قلت ليهو وانا بقوم :انا عارفة قلت ليك
قال لي:طيب ارح انا بوديك
مشينا وركبنا السيارة وبقيت اوصف ليهو على حسب العنوان الاترسل لي في التلفون ،،، وطبعا فهد زي الكأنو ما مصدقني وبساير فيني بس ،،،لما وصلنا المكان مهجور وضلام ،،، بقيت انادي بأعلى صوتي على ايفا ،،،وفهد من وراي بعاين فيني بإستغراب ،،، سمعنا صوت بكي بقينا ماشين على اتجاه الصوت وفاتحين النور من التلفون ،،،بقيت انادي وبنقرب على الصوت ،،،لغاية ما سمعنا صوت بقول ماما ماما ،،،قربنا اكتر ولقيناها ايفا ،،،جريت عليها ونزلت على الارض وحضنتها ،،، وفهد ورانا ومصدوووم ،،،بقيت حاضناها وببوس فيها زي الكأني ما مصدقة ،،،، فضلت حاضناها وبنبكي كتييييير ،،، لغاية ما تلفون فهد رن ومشا بعيد مننا شوية ،،،، بقيت اسألها :كنت وين حبيبتي ها معليش تاني ما بخليك تمشي مكان من دوني تمااام
قالت لي :ماما مشيتي وين لي ما جيتي ،،،انتظرتك كتيييير وما جيتيني
انا :اهو جيت حبيبتي ،،،،جانا فهد وقال لينا :ارحكم هسة امي اتصلت بتسأل منكم يا نازلي ،،،قمت من الارض وفهد شال ايفا ،،،مشينا ركبنا السيارة ،،ركبت ورا مع ايفا وانا حاضناها ،،، مشينا لبيت فهد،،، دخلنا ولقينا خالتو هيلدا منتظرانا ،،، اول ما شافتنا جات وحضنت ايفا وبقت تسأل فيني ،،،،لقيتوها وين يا نازلي ،،،بقيت تبوس فيها وبعدها مشت وطلعتها فوق ،،، مشيت وقعدت في الهول ،،، جاني فهد وقعد جمبي ،،عاينت ليهو
قال لي :نازلي انتي عرفتي كيف انو ايفا هناك ،ولو انتي من الاول عارفة لي ما اتكلمتي
قلت ليهو وانا بتمتم :اا ان انا م ....... وقبل ما اتم كلامي جات نازلة خالتو هيلدا وقعدت قدامي :اها ما قلتو لقيتوها وين
بقيت ماعارفة اقول ليهم شنو واتوترت : ا انا ك كنت متسلفة قروش من واحد ايطالي ل لانو ..لانو كنت محتاجاها ،ولما م ما رجعتها ليهو خطفها
فهد عاين لي بعدم تصديق :طيب كيف رجعها ليك من دون ما تقابليهو وتديهو قروشو
انا :ماهو انا رسلت ليهو القروش في حسابو ،،، رسل لي رقم الحساب حقو وانا رسلت ليهو القروش ،، عاينت ليهم ،،،جات خالتو هيندا وقعدت جمبي وحضنتني :حبيبتي انتي لو محتاجة قروش كان تكلميني
عاينت لي فهد لقيتو بعاين لي وزي كأنو ما مصدق ،، نزلت عيني منو وقلت لي خالتو هيندا :ااا خالتو ايفا وين
خالتو هيندا :تعالي اوديك الغرفة الي هي فيها ،،،، طلعنا فوق ودخلتني في الغرفة لقيت ايفا نايمة في السرير ،،، ادتني بجامة وطلعت ،، دخلت الحمام واخدت شاور طوييييييييل واتوضيت وطلعت صليت وانا بشكر ربنا على اني لقيتها ورجعوها لي ،،، قمت من مكاني ومشيت رقدت جمب ايفا وحضنتها ونمت وانا مرتاحة ....
يتبع ..
