سادية الحب 🔥

حقائق

كرونيك سادية الحب 🔥🔥.
بقلمي انا..👹👹 #bibaline 🌚🌚

لحق لدار الجبل ...خلا كلش في طونوبيل ...و خرج يجري ...خرج المفتاح من جيبو ...و حل الباب بزربة ...حوس عليها فليتاج تحتاني بلاصة بلاصة لقاهاش ...راح يجري لفوق يحوس عليها ....دخل لاشومبر وين خلاها خطرة لخرا ....ملقاهاش ...بدا يتقلق...حوس عليها فليشومبر مالقاهاش .....راح لادوش حط يدو على لباص ....جا يحلو تبلوكا ...عرف بلي راهي لتم ....تنهد ...

اية غير سمعت صوت هداك كرشها دارت ...حسبت كاش ما واحد دخل عليها ....كانت غير كيما خلصت الوضوء تاعا و تمسح بسربيتة ....يبست بلاصتها و تستنا واش حا يصرا ....و تشوف لطاقة خايفة كون كاشما واحد دخل تهرب .....تشجعت و هدرت بصوت متلبك و متوتر

اية :ش ..ش ..شكون ؟
كانت تستنى الإجابة بخلعة كبيرة  و ترجف من الخوف....
سمعلها اسلام لي كان مسند على الحيط ....تشجع و رجعلها الهدرة ...

اسلام بصوت هادئ يخبي القلقة تاعو :انا
تنهدت و في نفس الوقت تفكرت واش صرا تصدمت ...و بقات ساكتة ....مخصها غير هو ....
بقات نستنا يروح والو ...5 دقائق 10 والو ....كانت حابة تسمع صوت الباب تغلق باش تخرج ...بصح والو ...حطت سربيتة في بلاصتها ...جبدت نفس بالقاوي ....باش تتشجع ...حطت يدها على مقبض الباب ...و جات دور المفتاح ترددت ...تشجعت كثر و حلات الباب ...شافت لقدامها مكان حتى واحد ....طمنت روحها ...غير خرجت غلقت الباب ...لقاتو عند الحيط لي بحذاها مسند روحو ...مربع يديه ....و راسو كان مهبطو غير سمعها خرجت رفع عينيه يشوف فيها ....

دارت روحها كي شغل مشافتوش و ما تاثرتش ...و كملت طريقها و هي العكس رجليها كانت تحس بيهم حا يتلواو و طيح قدامو ....

تبعها اسلام ...و شدها من ذراعها ...غير حط يدو بعداتو عليه ....

اية :غير كيما توضيت نروح نصلي تخلينيش نفقد وضوءي ...بسلامة كي تروح أقفل الباب مليح ...
اسلام :اصبري نهدر معاك عندي هدرة معاك ...
اية :كي تستعقل ارواح نهدرو ووكي تولي راجل ميرفعش يدو على مرا ...يجي نهار تبان الحقيقة و تندم ...

اسلام :عرفتها و ندمت غير حبسي نهدر معاك .....
خلاتو هكاك ما فهمت والو ...و راحت لشمبرة وين كانت خدات قش تاع صلاة لي دبرتهم من خزانة لي تم ...و بقات تصلي و طول و في كل سجدة تدعي لربي سبحانو ...

خلصت بقات قاعدة فوق مطرح ...تخمم في واش جابو و حلفت متخرجش حتى يخرج ....غير سمعت صوت الباب تاع دار تغلق ....خرجت تكركر في رجلها لي تلوى باش تزرب تشوف ادا صح خرج ....لحقت لايتاج تحتاني ملقاتوش ...

اية :اووووف مشي كنتي حابة يروح واش صرالك دوك ؟ياا ربي ني حابة نعرف علاه جا 😑😑واش جابو ....

دخلت الكوزينة تحوس على واش ناكل مكان حتى حاجة ...فطور و مفطرتش
اية:ماكلة و مجابليش يا ربي و يديني جدي في اقرب وقت نجمع قشي و نكري دار وحدي ...منيش متشردة باش نعيش  حياة كيما هدي منزيد حتى دقيقة عندهم ...