سادية الحب 🔥

خرجة مع هيثم ⁦❣️⁩...

كرونيك سادية الحب 🔥🔥.

هبطت لتحت ...البنات غير شافوها عيطو من الفرحة ...اما سيرين راحت عنقتها ...

الين : اية ديريش على هدرتو ...

ترغيد : ايه صح و الله انا خطرة ضربني و ليوم مزال نشفى عليها اما مكانش واش نديرو

رهف:نستعرف بيك بردتيلي قلبي شحححح
اية :ههه صاي دوك انساو...

ترغيد :أيا نخرجو كنا نستناو فيك تخرجي معانا ....راهم بداو يشويو ....

...._اسلام :

كنت نعاون رجال نشويو ....لعبولي على المورال تاعي علاه نقول هكاك ...أصلا تستاحق ...بصح مشي قلت بنت عمي لازم القدر يبقى بيني و
بينها ...بصح !!ديجا اصلا كي  مدرتلهاش حاجة و قدرت نتحكم في روحي سافا ...تعرف واش معنتها اسلام كي يشوف واحد يتحداه واش يولي !!!!!نتقلب كامل ....من وقتاه تجرا واحد تحداني...كون تكمل هكا ...تندلع الحرب بيناتنا ...كون تشد فمها كيما العيباد لخرين خير ....هكاك نخمم حتى شفتها جاية مع البنات تضحك معاهم .....

تسما هدي مشي بنادم و لا ...و انا مصبح نخمم ادا تبكي ....هفففف .....
........

خرجت لقات الطابلة وجدوها البنات برا ....
اية :ياااي شحال يهبل الجو هكا ...

كانت ريحة الشوا تضرب ...و ريحة الشجور تضرب..
قعدو جماعة البنات يتصورو ...كل بلاصة صورو فيها ....

حسن :اية ااية ارواحي ....

شافت اية في حسن لقاتو بحذا اسلام بالضبط ملتاصقين ...

تشجعت و هدرت :وااااش حسن ....

حسن :ارواحي نهدر معاك ...

اية :اهدر مناك ....

اسلام قال لحسن :خليها بلاك راهي خايفة مني ...
اية غير شافتو همسلو ....ناضت من بلاصتها ...رفعت سروالها لفوق ههه ...و طارت تجري كي دراري صغار لحسن ...مصطنعة الشجاعة ....مخبية بلي هدرتو تاع مقبيل وجعاتها ....

لحقت عندهم ...اسلام كان داير لجيهة اخرى ...و يشم في ريحتها لي غير لحقت ليهم ضربتهم ...
حسن :راكي سافا عمري ...(يهدر معاها هكاك برك )
سمع اسلام كلمة عمري شاف فيه بنص عين ....
اية بابتسامة: ههههه سافا تقوليش عيطتلي باش تقولي ادا سافا نقتلك ...

قرب ليها حسن لوذنها ...و اسلام يشوف فيهم بنص عين ...و هي تضحك ...

حسن:شوفي راهي في دار خالها لازم نعيطلها دوك نسقسي عليها صينو تخلا عليا ...هاكي كملي خدمتي نرجع نكمل ربي يخليك ...غير نتي لي صارحتك هدوك مصايب محبيتش نقوللهم ...عاونيني...
و جبد روحو عليها ...و لخر نار شاعلة فيه ...
اية :مصلاحجي 😑😑هههه صحا هات نكمل ...و ارجع رابيد ...دوك نريح كامل بريحة النار ....
حسن :مواااح ربي يخليك ليا كبداتي ....هاكي ...
شدت واش كان يشوي ....و هو راح ...بقات قدامو ..في زوج واقفين ...ريحتو تضربها ...شادة روحها ...لداخل ديخانة بصح لازم....البنات كامل يشوفو فيهم ...يتمناو كون هوما تاني يكونو كيفها ...واش قاللها كامل راهي واقفة قدامو بينهم نص ميترة برك ...و تتصرف عادي ...