الفصل الثالث
................
_تعالي يا غصن الشجره انتي مش هسيبك!
قالها شجر وهو بيجري ورا غصون اللي قعدت تجري منه .. وقفت ورا شجره ضخمه وهي بتبصله : اعقل يا شجر .. انا معملتش حاجه !
وقف شجر قصدها وهو حاطط ايده في وسطه واتكلم باستنكار : نعم يا ختي معملتيش حاجه .. امال ده ايه ؟؟
شاور علي هدومه اللي كانت كلها عليها طين ورمله بطريقه مقرفه .. ضحكت غصون وهي بتتكلم : الله الحق عليا اني عايزاك تاخد دش بس قولت اجبهالك بطريقه احسن من كده .
شجر بسخط : احسن من كده .. ياريتك كنتي قولتي .. اشيل الزفت اللي علي هدومي ده ازاي ها .. وبعدين ثانيه كده .. قصدك ايه باخد دش .. قصدك اني معفن ؟
خلص جملته وهو بيبصلها بدهشه ضحكت غصون جامد وهي بتبصله واتكلمت : لو الحق فـ ايوه لو ابن عمه فـ لاسمح الله ده انت ابو النضافه !
جري ناحيتها تاني وهو بيصرخ فيها : وكمان بتهزري هزار بوابين .. والله ما انا سايبك يا غصن الشجره انتي !
جريت منه بسرعه بس وقفت فجأه وهي بتشهق برعب واتجمدت مكانها .. قرب منها بسرعه وهو بيبصلها بقلق : غصون مالك ؟
بس هي فضلت باصه قصادها برعب مش قادره تتكلم .. بص في نفس المكان اللي هي بتبص فيه واتفاجئ بـ تعبان وقف قصادهم ولـ لحظه استوعب انهم بعدوا عن الكوخ بتاعهم كتير ...
فاضل باصص لـ التعبان كتير وهو بيحسب الخطوات اللي المفروض يمشوا منها وبعدين بص علي غصون واتكلم بهمس : غصون .. اجري لورا .
حاولت تتكلم كتير لحد ما اتكلمت بنبره مرتعشه : مش قادره اتحرك .
صرخ بصوت هامس : عايزه التعبان يلدغك وتموتي .. بقولك اتحركي .
عيطت بصمت وهي بتتكلم : مش عارفه اتحرك يا شجر مش قادره.
بصلها جامد وهو مش عارف يعمل ايه .. بص تاني للتعبان وبعدين اتحرك ببطء شديد للجنب وهو بيبص علي الصخره اللي محطوطه بس للأسف ان التعبان كان اخد باله منه ...
وقف شجر مكانه وبعدين جري بسرعه ناحيه الصخره وهو بيشيلها جامد والتعبان بيقرب عليه واول ما قرب رمي عليه الصخره جامد بس التعبان اتخطاها .. صرخت غصون برعب : شجر .
في اللحظه دي التعبان وقف ولف ليها واتحرك ناحيتها لعنها شجر في سره وبعدين رجع مسك الصخره تاني بسرعه وهي واقفه بتبص علي التعبان اللي بيقرب عليها بعيون مفتوحه علي اخرهم .. غمضت عينها جامد وهي بانتظار التعبان يلدغها ...
فتحت عينها بدهشه وهي بتسمع صوت اله .. هي عارفه الصوت ده سمعت عنه قبل كده .. ده صوت المزمار المختص بـ رقص الافاعي .. بصت وراها شافت واحد واقف وماسك مزمار وعمال يصدر الاصوات دي وبعدين بصت علي التعبان لقته بيرقص بهدوء شديد وكأنه مكنش عايز يلدغها من شويه ...
قرب شجر بالصخره ببطء شديد وبسرعه شديده حطها علي التعبانه وقرب الراجل منها بسرعه وهو بياخدها من تحت الصخره وبيحطها في العلبه بتاعتها بالعصايه اللي في ايده .. جري شجر علي غصون اللي واقفه بتبص علي كل اللي حصل ده بصدمه وبس ...
اتكلم شجر بقلق عليها : غصون انتي كويسه .. لدغك ؟
اتكلمت بصوت مبحوح : معرفش .
اتكلم الراجل ده وهو ماسك العلبه في ايده : ملحقش .. كان بعيد عنها متخفش عليها .
لف شجر ناحيته بغضب وهو بيتكلم : سايب تعبان عمال يتحرك في الغابه بحريه شديده ومش همَّك الناس .
بصله الراجل باستنكار شديد وهو بيتكلم : ماانت قولت انها غابه يعن المفروض مفهاش مخلوق ودي انسب طبيعه له اصلا .. انتوا اللي بتعملوا اي في الغابه اصلا ؟
سكت شجر عن الكلام وهو مش عارف هيرد عليه يقوله ايه .. معلش اصلها خطفاني هنا لـ فتره مؤقته والمفروض نمشي الصبح !! ولا هيقوله ايه فـ اكتفي بالصمت ...
بصتله غصون بضيق وهي بتتكلم : يعني الغابه مينفعش حد يجي فيها عشان خاطر سي التعبان بتاعك؟
الراجل بزهول : سي التعبان بتاعي !! والله انتوا اصلا في مكان مليان تعابين مجاش علي التعبان الغلبان اللي حلتي .
بصتله غصون برعب وفي ثانيه كانت ماسكه في ايد شجر وهي بتترعش جامد وبتبص حواليها .. اتكلم شجر باستغراب : احنا بقالنا اسبوعين هنا في الكوخ اللي موجود ده ومشوفناش حاجه .
بصله الراجل باستغراب : اني كوخ .. بتاعي ؟
شجر بصدمه : بتاعك !
حرك الراجل راسه بإيجاب .. بصتلهم غصون بتوهان وبدون اي مقدمات اغمي عليها ووقعت علي الارض .. نزل شجر لـ مستواها بسرعه وهو بيرفعها عن الارض ووبيبصلها برعب وحرك ايده علي وشها وهو بيهتف باسمها : غصون .. غصون فوقي !
اتلكم الراجل بسرعه : شيلها وهاتها علي الكوخ تعالي !
مشي الراجل قصاده وهو شالها ومشي ورا الراجل بسرعه .. وصل قدام الكوخ ودخل بسرعه وهو بيحطها علي الارض بهدوء شديد بعد عنها بسرعه وراح جاب المايه ورجع تاني وفضل يرش علي وشها وهو بيفوقها لحد ما فاقت ...
اتعدلت ببطء من علي الارض وربعت رجلها بهدوء شديد وفضلت ساكته .. اتكلم شجر بقلق : غصون انتي كويسه .. حاسه بحاجه ؟
بصتله غصون جامد وبعدين بصت لـ الراجل اللي واقف وبيبصلها اوي .. اتكلمت بهدوء : الحج عطوه بعتك ؟
بصلها شجر باستغراب وبعدين بص للراجل اللي مازال بيبصلها ضحكت بسخريه وهي بتتكلم : اكيد هو اللي بعتك ليا لأن مفيش غيره عارف اني بخاف من التعابين واستخدمك .
ابتسم الراجل بهدوء وقعد علي الارض قصادها واتكلم : انا محدش بعتني .. انا اللي جيتلك بنفسي .
اتكلم شجر بغضب : هو فيه ايه .. حد يفهمني!
بصتله غصون ومتكلمتش .. اتكلم الراجل ده بهدوء : مفيش حاجه عايزه تتفهم بس غصون لازن ترجع لانها غابت كتير اوي .. وكده كده الاسبوعين بتوعها خلاص بح خلصوا يعني لازم ترجع .
وقفت غصون بقوه غريبه استغربها شجر دي مش قوه واحده كان المفروض مغمي عليها .. اتكلمت غصون بغضب : انا مش عبده انت فاهم .. روح للي بعتك قوله غصون هترجع بمزاجها محدش يجبرها !
وقف الراجل هوو كمان في المقابل وشجر وقف بينهم في النص وهو بيبص علي غصون باستغراب كبير من تحولها ده .. اتكلم الراجل بحده : اتلمي يا غصون ومتنسيش ان الحج عطوه سابك بمزاجه .
قربت منه غصون وهي بتتكلم بحده : سابني بمزاجه وانا بقي مش راجعه غير بمزاجي روح بلغه بـ كده يا صاحب الافاعي !
سابته ومشيت من عنده بغضب كبير وشجر بص لـ الراجل بتوهان وهو بيتكلم : انا مش فاهم حاجه هو في ايه ؟؟
بصله الراجل جامد قبل ما يتكلم : انت سبب قلبان غصون علينا .. فـ زي الشاطر كده تعقلها وتبعدها عنك.
بصله شجر بغضب وهو بيهتف : نعم ياخويا .. وانت بقي اللي هتتحكم ابعد ولا افضل .
حرك الراجل راسه بنفي وهو بيتكلم : مش انا اللي هتحكم .. الافاعي اللي بسهوله تدخل بيتك هي اللي هتتحكم .
بصله شجر بصدمه من كلامه واتكلم : تقصد ايه ؟
الراجل: اقصد ان فيه غيري كتير اوي وكلنا متدربين .. فـ يا تبعد عنها بالذوق يا تخسر عيلتك كلها بطريقه جديده وحلوه وبردو هتبعد عنها بالعافيه .. القرار في ايدك وانا مبهزرش ولا الحج عطوه بيهزر .
سابه الراجل ومشي من قصاده لـ برا الكوخ وشجر واقف مش عارف يعمل ايه .. كل مره بيلعن اليوم اللي وقعه في طريق غصون حتي لو بالصدفه .. عيلته كلها بخطر عشانها .. لأول مره هو مش عارف يختار ولا عارف يعمل ايه ...
طلع برا الكوخ وعقله بيحسب كل حاجه .. شافها قاعده في المكان اللي بيقعدوا فيه بالليل فـ قرب منها بهدوء شديد وقعد جنبها من غير كلام محدش فيهم عنده حاجه يقولها ...
اتكلمت غصون بنبره الم : اسفه يا شجر!
بصلها من غير كلام باستغراب .. بصتله وهي بتتكلم : اسفه اني دخلتك حياتي الغريبه دي .. بس انا مكنتش عايزه غير حبك يا شجر .. كلام غريب صح .. انا عارفه .. انت متعرفش حاجه عن حياتي بس انا اعرف كل حاجه عن حياتك يا شجر .. انا من اول ما شوفتك حياتي كانت مقتصره عليك .. مش عايزه اطلب منك غير طلب واحد يا شجر ...
بصلها جامد واتكلم بهدوء : قولي ؟؟
بصت بعيد قبل ما تتكلم بهمس : متوجعنيش !
بصلها شجر بحزن شديد وبعدين رجع بص قصاده بشرود شديد وهي اكتفت بالصمت ده وفردت ضهرها علي الارض وهي بتبص لـ الشمس اللي غابت وبدأت تختفي خالص بعيون مدمعه وغمضت عينها وهي حاسه ان كل حاجه هتروح .. بصلها شجر وهو بيتأمل هيأتها دي وفرد هو كمان جسمه علي الارض وهو بيبص للسما وبيتنفس جامد كأن ده الحاجه الوحيده اللي فاضله وخايف انها تنتهي !
..................................................
تاني يوم الصبح .. اتحركت غصون وهي حاسه بألم في ضهرها جامد من نومت الارض دي بس هي كانت شبه اتعودت عليها .. بصت حواليها باستغراب شديد ازاي نامت هنا وشجر فين !!
قامت بسرعه من علي الارض وهي بتدور عليه بعينها لحد ما شافته واقف وبيلبس هدومه بعد ما غسلها .. قربت منه بابتسامه وهي بتتكلم : صباح الخير .
بصلها شجر بسرعه قبل ما يبتسم : صباح النور .. نمتي كويس ؟
ضحكت غصون بسخريه وهي بتتكلم : دايما المراتب القطن احلي من السوسته فـ المرتبه مكنتش مريحه خالص !
ضحك شجر عليها ومتكلمش وكمل لبس التيشرت بتاعه .. بصتله غصون باستغراب وهي بتتكلم : انت غسلته امتي ؟؟
شجر من غير ما يبصلها : بالليل وانتي نايمه
غصون بصدمه : متقولش انك منمتش .
بصلها وضحك فضربت راسها بغيظ منه وهي بتتكلم : يعني لما حضرتك متنمش كويس هنروح ازاي في سنتنا السودا دي !
برق وهو بيبصلها من كلامها واتكلم بدهشه : انتي عايزه تمشي ؟
بصتله باستغراب شديد قبل ما تتكلم : امال هقضي باقي عمري في الغابه دي ام تعابين .. انا جيت هنا لـ هدف واتحقق والاسبوعين كمان خلصوا فـ افضل ليه؟؟ انت عايز تفضل ؟
اتكلم شجر بسرعه : لا اكيد لا !
قربت منه غصون وحضنته وهي بتتكلم بحب : انا بحبك اوي يا شجر بحبك اوي .
سكت شجر ومتكلمش بس رفع ايده بهدوء وهو بيحضنها في المقابل .. متعرفش ليه حست ببرود شديد في الحضن ده اللي خلاها تبعد عنه بسرعه اكيد هي مش عايزه تحس كده .. بصتله لقيته مبتسم واتكلم بابتسامه هاديه : حيث كده بقي .. هتطلقي سراحي اخيرا !
ضحكت غصون عليه ونسيت اللي كانت حساه ومسكت اعلي التيشرت بتاعه وهي بتتكلم بدلع : ومين قال اني هطلق سراحك .. انت خلاص .. بقيت حق مكتسب يا استاذ ومش هسيبه .
ضحك شجر علي كلامها واتكلم بابتسامه : نرجع بيتنا ونشوف الدنيا ايه طيب حاكم انا قرفان من نفسي بشكل وع الاقل اخد دش عشان اعجب .
ضحكت غصون جامد ومسكت ايده وهي بتتكلم بابتسامه هاديه : انا عايزه اعترفلك بحاجه ؟
بصلها شجر بانتباه واتكلم بفضول : قولي ؟
كانت هتتكلم بس سكتت متعرفش ليه بس سكتت واتكلمت بهدوء : خليها لما نروح .. يلا بينا نمشي !
حرك شجر كتفه باستسلام وهو بيتكلم : امري لله يلا بينا ! استعنا علي الشقا بالله !
واخد ايدها ومشيوا من المكان.. فضلوا يمشوا كتير اوي لـحد ما شافوا اثر لـ عجلات عربيه فضلوا مشيين وراه لحد ما وصلوا اخيرا علي الطريق .. ضحكوا بفرحه انهم طلعوا من المكان ده واتمشوا شويه لحد ما لقوا عربيه نص نقل كلموا الراجل وهو وافق واخدهم معاه ومشيوا من الغابه خالص !
..............................................
بعد تلات ساعات وصلوا اخيرا الي المكان بتاع شجر .. نزلوا الاتنين وشكروا الراجل جدا علي التوصيله دي ووقفوا علي اول مدخل المنطقه .. بص شجر لـ غصون كتير وهي كمان .. اتكلمت غصن بعد صمت : اخيرا رجعت بيتك اهو !
ابتسم شجر بس ابتسامته كانت باهته مفهاش روح .. اتكلم بهدوء حذر : انا عايز اقولك حاجه يا غصون ؟
بصتله غصون بانتباه شديد متعرفش ليه الخوف اتملك منها .. خايفه من اللي هيتقال بس اتكلمت بثبات : قول .. وانا كمان هقولك اللي كنت عايزه اقولهولك!
شجر : طب قولي؟
حركت راسها بنفي شديد واتكلمت : لا .. قول انت ومتناقشنيش لو سمحت قول !
بصتله بتركيز شديد .. بص بعيد وغمض عينه وهو بيحاول يجمع الكلام جواه .. فتح عينه واتكلم بهدوء : انا اسف بس .. انا مش عايزك.
فضلت واقفه بتبصله من غير كلام وكانت علي وشها ابتسامه وهي بتسمعه بدأت تختفي ببطء وهي بتتكلم بتوجس : قصدك ايه؟
اتنفس بعمق قبل ما يبصلها واتكلم ببرود : بصي يا غصون انتي انسانه جميله وروحك حلوه وكل حاجه .. وتتحبي صدقيني بس مش انا .. مش انا اللي احبك .. مش انتي اللي تخيلتها شريكة حياتي في يوم ابدا .. مش الشكل ده ابدا .. شعرك قصير زي شعري يمكن شعري اطول حتي .. لبسك غالب عليه الطابع الشبابي اكتر من اي حاجه .. وانا مش هتجوز واحد زيي ومش هحب واحد زيي يا غصون .. نصيبك مكنش معايا ولا هيكون يا غصون .. اسف بس مش انا .
فضلت بصاله وساكته وهي بتحاول تترجم الكلام في عقلها .. ابتسمت شبه ابتسامه وهي بتمانع الدموع اللي اتجمعت في عينها : انت .. انت بتقول ايه يا شجر ؟؟ هو هددك صح ؟؟ قالك حاجه ؟؟
اتكلم شجر بنفي : ملهاش دعوه اذا كان هدد ولا لا يا غصون .. ده اللي كنت عايز اقوله ليكي اول ما نوصل .. انا منفعكيش ولا انتي تنفعيني .. فيه احسن مني كتير .. بس انا وحبك مش هيحصل يا غصون !
المره دي نزلت دموعها بصمت شديد .. لو كان بس انه اتهدد كانت ممكن تعمل اي حاجه .. بس هو بيقول كلامه بثقه شديده .. اتكلمت بصوت باهت : بس انت حلفت انك بتح.. ثانيه بس .. انت محلفتش .. انت حلفت بحياتي انا .. لأن حياتي مش مهمه اصلا بالنسبالك فـ حلفت بيها .. انا اللي كنت غبيه !
سكتت عن الكلام ودموعها لسه بتنزل وهو بيبص عليها بوجع بس ده كان لازم يحصل حتي من قبل ما الراجل ده يكلمه هو كان هيعمل كده يمكن الراجل ده اداله دافع اكبر وهي عيلته !
مسحت دموعها بضعف وهي بتتكلم بصوت مسكور : انت عارف انا كنت هقولك ايه .. انا كنت هقولك اني كنت خايفه انك تكسر قلبي .. اني مبسوطه انك محققتش كده .. بس .. انت فعلا كسرت قلبي يا شجر .. فتته ميت حته .. انت عملت اللي محدش عمله .. عارف ان الوجع ده اصعب من انك مكنتش قولت انك بتحبني خالص .. ليه قولتها .. ليه قولت انك بتحبني وانت محبتنيش ولا عمرك هتحبني .. ليه علقتني يا شجر .. عشان تمشي من الغابه؟؟ ماانا كنت هخليك تمشي .. والله كنت هخليك تمشي لما الاسبوعين ينتهوا .. ليه كسرت قلبي ؟؟ ليه تبقي انت سبب كسرة قلبي يا شجر!
بص بعيد عنها وهو خايف يبصلها .. قربت منه وهزته بعنف وصرخت في وشه خلت الناس كلها تتجمع حواليهم وبيبصوا عليهم باستغراب : ليــــــــــه تكسر قلبـــــــي ليــــــــــــــه .. كنت بتنتقم مني علي اني اخدتك من وسط اهلك ولا عشان ايه؟؟ كنت بتنتقم مني لأني حبيتك ؟؟ قولي يا شجر ليــــــــــه .. ليه؟
زقته بعيد عنها بشئ من الحده وبصتله بوجع كبير .. بصلها جامد وهمسلها بحزن : اسف !
سابها ومشي بسرعه من مكانه مش عايز يفضل ويشوفها في الحاله دي .. بصت مكان رحيله بصدمه وحطت ايدها علي قلبها بوجع .. وقعت علي الارض وهي لسه ايدها علي قلبها .. عمرها ما حست بالوجع ده غير دلوقتي .. وكان هو سببه .. قربت منها ست كبيره بشفقه وقعدت جنبها وحضنتها واتكلمت : عيطي يا حبيبتي عيطي !
بس هي فضلت ساكته مجرد انها ساكته مش قادره حتي تعيط وفضلت علي الوضع والست بتقرأ قرآن فوق راسها لحد ما اتكلمت الست تاني : اعتبريني زي امك يا حبيبتي واتكلمي !
انتفضت من مكانها علي الجمله دي .. هي معندهاش ام .. هي معندهاش حاجه خالص .. مكنتش عايزه غيره بس هو كمان مشي .. بعد ما وعدها يكون ليها كل حاجه .. خلاها هي ولا حاجه .. قامت من حضن الست دي بتوهان شديد وهي بتتحرك بتوهان شديد .. فضلت ماشيه لحد ما وقفت قدام مبني غريب وكان قاعد قصاده واحد .. اتنفض من علي الكرسي بلهفه اول ما شافها واتكلم : حمدلله علي السلامه يا غصون !
بصتله غصون جامد قبل ما تتكلم بنبره خاليه من المشاعر : انا وعدتك قبل كده .. انه لو محبنيش ساعتها انا هوافق علي طلبك .. وانا جيتلك اهو عشان اقولك .. انا موافقه اتجوزك يا معلم عطوه !
..............................................
..... يتبع
#Nemo
أنت تقرأ
اختطفني عشقاً
Romanceأوقعتيني في حُبك أختطفتي قلبي وعقلي وروحي "واختطفتيني شخصياً" كان جنونك مُحبب الي قلبي، قلبك الناقي كان يجعل روحي اكثر نقاءً، أبتسامتك لم تفشل يوماً في تغير مزاجيتي.
