الفصل الخامس
....................
_وبعدين يا استاذ هتفضل قاعدلي كده ؟؟
قالها يحيي لـ شجر اللي قاعد قصاده من غير كلام وهو بيقعد جنبه .. ضحك شجر بسخريه وهو بيتكلم : شوف مين بيتكلم ابو الكسل كله اليومين دول !
حرك يحيي عينه بطريقه دائريه وهو بيتكلم : عادي الانسان ساعات بيجي عليه فتره كسل .. لكن انت ما شاء الله كنت مختفي اسبوعين ورجعت باشا بتروح الشغل يوم وتغيب يوم .
حرك شجر راسه بلامبالاه وهو بيبص علي الناس من البلكونه بعدم اهتمام .. ميعرفش ليه حياته اتشقلبت 180 درجه من اول ما رجع .. لسه فاكر وجع قلبها اللي حسته بس اللي استغربه ان قلبه هو كمان وجعه .. هرب منها لأنه عارف انه لو كان فضل كان هتحصل حاجات كتير .. فكر يروحلها بس هو ميعرفش هي فين ولا منين حتي .. الدنيا بتعاقبه علي انه كسر قلبها !
بص يحيي علي شجر اللي مش حاسس بأي حاجه وسرحان في شئ هو لحد دلوقتي ميعرفوش ..هما الاثنين ولاد خاله بعدوا عن بعض فتره بسبب مشاكل في العيله بس صداقتهم فضلت مستمره .. ولما العلاقات رجعت صداقتهم بقت اقوي بكتير .. للحظه افتكر بسمه ولو كانت موجوده هنا كان غصبا عن شجر كان ضحك بسبب عفويتها .. بس هي فين ؟؟ .. افتكر لما راح المستشفي بيها والجرح مكنش عميق اوي بس طلبوا انها تفضل يومين في المستشفي .. مغبش عنها غير 10 دقايق بس 10 دقايق كانوا كافيين انها تمشي وتسيبه .. من غير حتي ما تديله فرصه انه يعتذر عن اللي قاله !
بصله شجر وبعدين ابتسم وهو بيتكلم : شوف مين اللي سرحان دلوقتي؟
انتبه يحيي عليه وبصله وابتسم ابتسامه باهته قبل ما يتكلم : تفتكر انها ممكن تظهر في حياتي تاني ؟
اتعدل شجر في قعدته وبصله بتركيز واتكلم بجديه : بص يا يحيي .. صدقني هي هتظهر بس مش دلوقتي .. انت حكيتلي قبل كده وانا سمعتك ومعلقتش لان لا انا كنت قادر اتكلم ولا انت كنت قادر تسمع بس دلوقتي لازم اقولك انك جرحتها اوي .. واحرجتها جامد قدام عيلتك يا يحيي بالكلام المتخلف اللي انت قولته .. انا وانت عارفين طبع نورا بنت عمتك .. معرفش انت كنت بتحب حربايه زي دي ازاي .. انت لسه بتحبها ؟
جاوبه يحيي بسرعه : لا طبعا !
ابتسم شجر علي سرعه اجابته وكمل كلامه : لأن بسمه عرفت تخليك تشوف الناس صح يا يحيي .. بس انت متخلف وحمار ومتبصليش كده .. كان يحيي بيبصله بغضب من كلامه .. انت فعلا كده ومش هزوق الكلام ومستنتش تسمع منها مع ان اكيد معها سبب للي هي عملته ده .. بسمه هتظهر بس امتي وفين ده اللي لا انا ولا انت هنكون عارفينه .
حرك يحيي راسه وهو مش عايز اي حاجه من كلامه غير حاجه واحده بس .. انها ترجع ساعتها كل حاجه هتتغير بس هي ترجع تظهر تاني في حياته ...
اتكلم يحيي بتساؤل : شوف بقي انا سايبك بقالي اسبوعين اقول الواد هيجي يقولي كان مختفي فين الاسبوعين اللي فاتوا بس البعيد مش عايز ينطق .. اتفضل قولي.
بصله شجر وابتسم : اتخطفت !
برق يحيي عينه بصدمه وهو بيتكلم : نعم اتخطفت ؟؟
حرك شجر راسه بإيجاب اتكلم يحيي بغضب : مين اللي اتجرأ يعمل كده اصلا وخطفك علي ايه ؟
ضحك شجر وهو بيتكلم : مش خطفك .. قولي خطفتني !
برق يحيي تاني وهو بيبصله واتكلم بشك : قصدك ايه ؟
قرب شجر من يحيي وهو بيتكلم بابتسامه غريبه : اقصد اللي خطفني ست مش راجل .
بصله يحيي بدهشه وبعدين ضحك جامد بصله شجر بدون كلام لحد ما يحيي خلص ضحك واتكلم بعدم استيعاب : ومالك بتقولها وكأنها ادتك شيكولاته .. ست تخطفك!!
رجع شجر ضهره تاني علي الكرسي وهو بيتكلم : ده اللي حصل .. انا كنت كده زيك في الاول مش مستوعب اي حاجه .
بصله يحيي وضحك بسخريه قبل ما يتكلم : وهي خطفتك ليه بقي يا سبع الرجاله ؟
اتجاهل شجر سخريته واتكلم : عشان تخليني احبها !
بصله يحيي بعدم فهم وكأنه بيقول كلام مش مفهوم مهو طبيعي ميبقاش مفهوم .. اتكلم بفضول : لا ده انت تفهمني كل حاجه كده بالراحه حاكم انت باين قصتك انيل من قصتي وواضح ان اللي خطفتك سبب حالتك دي .
بصله شجر بشرود قبل ما يبدأ يحكي كل حاجه .. حكاله ازاي خطفته زي ما هي قالتله وردة فعله لما فاق .. حكاله عن الايام اللي قضوها مع بعض خلال الاسبوعين دول .. حكاله عن محاولاتها المستميته في انها تخليه يحبها .. وفي الاخر حكاله ازاي كسر قلبها وحالتها كانت عامله ازاي ساعتها ...
خلص كلامه ويحيي بيبصله بعدم تصديق واتكلم : ثانيه ثانيه .. يعني واحده خطفتك وقالتلك انها بتحبك واجبرتك تقعد معها في غابه لوحدكم وادتك مهله اسبوعين عشان تحبه .. وانت مضعفتش مثلا مع واحده لوحدكم في الغابه اللي انا مش مصدقه اصلا .. وقولتلها انك بتحبها وبعدين لما رجعت قولتلها انها متتحبش اصلا .
اتكلم شجر باندفاع : انا مقولتش انها متتحبش .
صرخ يحيي في وشه : نعم يا روح امك .. ده انت مكنش فاضل غير انك تقولها انها مينفعش تعيش اصلا وتوأد نفسها ارحم .. ده انت مش كسرت قلبها ده انت دمرتها يا شجر.. ليه تعمل فيها كده وانت مبتحبهاش مكنش لازم تقولها .. كانت هتتوجع شويه بس مكنش هيبقي بنفس مقدار الوجع اللي انت عملته ليها .. انت دمرتها !
بصله شجر بضيق قبل ما يتكلم بتبرير : انا عملت كده عشان ميكونش عندها امل ولو بسيط انها ترجع تاني تظهر في حياتي .
حرك يحيي كتفه بدهشه من كلامه واتكلم : انت بجد مصدق اللي انت بتقوله يا شجر انت بجد مصدق .. انت محسسني انك دوست علي صباع رجلها وقولتلها لو حيتي ناحيه اكلي تاني هكسرلك رجلك كلها .. انت كسرت قلبها بـ الحاله اللي انت بتقول انها كانت فيها دي معناها انها كانت فعلا بتحبك يا شجر .. انا مش عارف بجد عقلك كان فين وانت بتعمل كده .. مكنش له اي تلاتين لازمه انك تقوله انك بتحبها حتي لو عشان ايه !
بص شجر تاني من البلكونه وهو بيهرب من كلام يحيي .. رجع يحيي ضهره علي الكرسي بقله حيله وبعدين اتكلم بانتباه : ثانيه .. لما انت مبتحبهاش ومش عايزها وانت واثق انها كده بعدت عنك وكرهتك ليه حالك كده يا شجر ؟ ليه شايفك تايه وموجوع ؟ ليه وانت بتحكيلي عن المواقف اللي كانت بينكم كانت بتتكلم بابتسامه مميزه مشوفتهاش منك قبل كده .. كنت بتتكلم كأنك بتحكي انجاز عظيم .. ولما حكيت عن اللي عملته فيها حسيت كأنك بتحارب حاجه بتحارب وجعك بتحارب ايه ؟ انت متأكد انك مبتحبهاش يا شجر!؟
بصله شجر جامد وهو مش عارف يجاوب عليه يقوله ايه ؟ هو معندوش اجابه .. او حتي لو عنده مبقاش هيفيد حاجه .. هي مشيت وخلاص وهو هيتخطاها كانت مرحله وخلصت خلاص لازم يبص لـ حياته بقي .. اكتفي بالصمت وهو بيراقب الناس وعقله فيه الف حاجه بس هو بيحاول ينهي عليهم كلهم !
........................................................
_بصي بقي انا خلقي بقي ف مناخيري فـ احسنلك اتقي شري انتي فاهمه !!
قالتها بسمه بغضب وهي ماسكه هدوم واحده في ايدها .. زقتها بعيد عنها والتانيه بتحرك راسها بخوف وهربت من قدامها .. اتحركت بسمه وراحت ناحيه غصون اللي قاعده بتتابع الموقف وعلي وشها ابتسامه بارده .. اتكلمت غصون : هتطلعي غلبك علي البت !
اتكلمت بسمه بضيق وهي بتقعد جنبها : دي حاجه تخنق .. خدامه وبتتأمر.
بصتله غصون وهي بتتكلم بخسريه : علي اساس اننا اللي ولاد وزرا مااحنا كمان خدامين بس علي درجه ارقي شويه .
ضحكت بسمه بسخريه وهي بتتكلم : واحده هتتجوز المعلم وهتبقي ملكه والتانيه هتقعد داده لابن المعلم من مراته التانيه .
اتكلمت غصون بنبره بارده : احسن ما كنا نبات في الشارع يا بسمه .
بصت بسمه لنقطه بعيده وهي بتتكلم بنفس النبره : وايه اللي هيكون اتغير مااحنا طول عمرنا في الشارع .. الفرق بس اننا مكناش بننزل نشحت كنا بنخدم في البيوت وبعيدن نترمي زي الكلاب في الشارع ننام فيه .. من امتي يعني نمنا علي حرير ؟!
بصتلها غصون واتكلمت بنبره ذات مغزي : بس اللي اتعود علي نومه السرير ميقدرش يسيبه.
ضحكت بسمه جامد وبصت لـ غصون : انتي فاكره اني كنت بنام علي السرير .. انا كنت بنام علي الارض تقدري تقولي كنت بشوف السرير ده حاجه مش حقي مش بتاعتي فـ كنت بنام علي الارض ومحدش عارف حاجه لاني في اوضه لوحدي.
رفعت غصون راسها في السما واتنهدت بقوه : محدش مرتاح .
حركت بسمه راسها بدون كلام وكل واحده منهم سارحه في اللي حصلها .. افتكرت بسمه لما فاقت في المستشفي .. شالت كل حاجه من ايدها وقامت مشيت .. مستحملتش انها تشوفه لانها عارفه انها لو كانت شافته كانت هتعيط وهي عيطت مره وده مش في قوانينها .. الدنيا علمتها ان محدش يستحق الدموع بس هو شاف دموعها هو خلاها تكسر قاعدتها دي ومكنتش هتقدر تكسرها تاني فـ هربت .. افتكرت لما رجعت لـ المعلم عطوه وبعد تدخل من غصون اللي اتفاجأت انها رجعت تاني قبل انه يخليها داده لابنه اللي هيجي باعتبار انها محل ثقه .. افتكرت طلب غصون انها تقعد معاها في الشقه اللي قاعده فيها لحد ما مراته تولد وهو بعد تفكير وافق ...
رفعت غصون ايدها وهي بتحطها علي قلبها لسه قلبها مبردش ولا نارها هديت ابدا .. لسه السكينه اللي حطها في قلبها موجوده وكل ما تقرر تطلعها بتكتشف انها بتدوس عليها اكتر والجرح بيزيد .. لسه لحد دلوقتي بتحاول توصل انه ليه كسرها .. هي مطلبتش منه غير الحب بس الحب .. مطلبتش منه غير انها تكون زيها زي غيرها مش مجرد بنت شوارع .. لسه بتحاول تشوفله مبرر بس ولا مبرر راضي يريح قلبها .. افتكرت لما قالت لـ المعلم عطوه انها وافقت علي الجواز وعن السعاده اللي شافتها في عينه .. كان نفسها تشوف السعاده دي في عينه هو مش في عين واحد متجوز اتنين وهي هتكون التالته .. افتكرت لما طلبت شقه تقعد فيها الشهر ونص بتوع قبل الفرح وبعد اعتراضه وافق لانه ميقدرش يزعل العروسه ...
غمضت عينها بألم هي عمرها ماكانت عايزه شقه ولا بيت وكانت راضيه بحالها .. هي المره الوحيده اللي اتمنت فيها كان هو بس .. هو كسرها .. عمل اللي كتير مقدرش يعمله .. عرف ازاي يدمرها .. سمعت كتير ان الضربه من حد بتحبه بتوجع اكتر من اي حاجه بس عمرها ما فكرت انها هتجربها لانها ببساطه ملهاش حد .. بس هو كان خير شخص يخليها تجرب الاحساس ده .. مش هتسامحه علي وجع قلبها ده ابدا .. مش هتغفرله الندبه اللي عملها في روحها ومش هتقدر تعالجها .. مش هتسامح في انه لعب بيها وبقلبها .. افتكرت انه كان بيرفض يلمسها يمكن كل الكلام اللي قاله ده بس كان بيختلق مبرر انه ميلمسهاش لانه زي ما قال مش دي اللي تدخل دماغه !
فاقت علي صوت خناقه في الشارع اللي خلاها تسبهم بغيظ سمعت ضحكت بسمه اللي اتكلمت : عفريتك الاسود .. تعالي نشوف ايه الخناقه .
حركت راسها بلامبالاه من غير ما تقوم وهي بتتكلم : مش مهم يكش يولعوا في بعض كلهم مش قادره اقوم لحد
قعدت بسمه تاني علي الكرسي بعد ما كانت وقفت ورجعت سكتت .. راقبتها غصون بصمت لحد ما زهقت : حبتيه ليه يا بسمه لما عارفه انك هتتعبي !
بصت بسمه ناحيتها بسرعه وهي بتتكلم بنبره حزينه : عمر الحب ما كان في ايدنا يا غصون .. مكنش في ايدي احبه او اكرهه .. غصب عني حبيته .. حبيت طريقه تعامله مع عيلته مع الغريب حتي معايا .. حبيت فيه كل حاجه .. ايوه اسبوعين مده قليله بس انا فعلا حبيته .
حركت غصون راسها برفض لـ كلامها : مكنش المفروض تحبيه .
بصتله بسمه وهي بتتكلم ببرود : وانتي مكنش المفروض تحبي واحد ميعرفكيش حتي .
اتحولت نظرات غصون للغضب وزعقت : بسمه انا غيرك تمام .. اوعي تغلطي اوعي !
لوت بسمه شفتها بعدم اهتمام قبل ما تكلم بشرود : كان جوزي .. حتي لو بشكل صوري بس كان جوزي .. محبتش حد غريب ده كان جوزي ومازال جوزي .. عارفه انا هربت ليه .. لأني كنت خايفه من مواجهته .. كنت خايفه انه يطلقني .. عايزه اشيل اسمه لحد اخر يوم في عمري .. مش هزعجه ولا هتعرضله بس الحاجه الوحيده اللي انا عايزها هي اسمه .. عشان كده مشيت !
ابتسمت غصون علي حبها ده .. هي عارفه ان بسمه مش من الناس اللي بتقع في الحب لأنها يعتبر هي اللي مربياها .. هي جت هنا وهي اربع سنين وكانت غصون ساعتها سبع سنين واهتمت بيها جدا واعتبرتها اختها .. سألتها باهتمام : تفتكري انه هو كمان حبك يا بسمه ؟
بصتلها بسمه جامد قبل ما تتكلم : اللي بيحب مبيجرحش .
رددت غصون الجمله بخفوت : صح .. اللي بيحب مبيجرحش.
انتبهت بسمه علي نبره غصون اللي اتغيرت فـ سألتها بفضول : لسه بتفكري في الواد ده ؟
ضحكت غصون شبه ضحكه بطريقه ساخره : اعتقد انه ساب علامه فيا مقدرش انساه بسببها حتي لو انا عايزه كده .
بصتلها بسمه بحزن علي حالها واتكلمت : لسه مصممه علي جوازك من المعلم ؟؟
حركت غصون راسها واتكلمت بنبره بارده : تقدري تقولي ده عذابي اللي انا فرضته علي نفسي .. بعذب نفسي .
ضحكت بسمه وهي بتتكلم : وانتي ناقصه عذاب؟
ضحكت غصون هي كمان واتكلمت : اهو واحد زائد واحد اتنين مش هخسر حاجه .. اهو هعيش مرتاحه .
لوت بسمه شفتها : من شاب لـ واحد عنده عيلين قدك فين الراحه ؟
غصون : مفيش .. وانا عارفه انه مفيش .. بس اهي جمله بتتقال نعترض ؟!
قامت بسمه من علي كرسيها وراحت علي الكنبه اللي قاعده عليها غصون وقعدت جنبها ونامت في حنضها وغصون حضنتها .. اتكلمت بسمه بصوت ممزوج ببحة الم : مكتوب علينا التعاسه يا اخت غصون.
ضمت غصون شفتها بتهكم قبل ما تتكلم : ولازم نتقبلها بصدر رحب يا اخت بسمه !
ضحكت بسمه وضمتها اكتر وابتسمت غصون وهي بتضمها وكل واحده فيهم سكتت وبتفكر الدنيا هتعمل فيهم ايه اكتر من كده بس اللي واثقين منه انهم لازم يتقبلوا اي حاجه هتحصل بصدر رحب !
....................................................
..... يتبع
#Nemo
أنت تقرأ
اختطفني عشقاً
Romansaأوقعتيني في حُبك أختطفتي قلبي وعقلي وروحي "واختطفتيني شخصياً" كان جنونك مُحبب الي قلبي، قلبك الناقي كان يجعل روحي اكثر نقاءً، أبتسامتك لم تفشل يوماً في تغير مزاجيتي.
