الفصل السابع
..................
تاني يوم ...
نزلت بسمه من البيت بعد ما لقت ان غصون سابتها ونزلت .. اتنهدت بسمه ب ضيق من اللي بيحصل ده .. راحت لـ غصون في الورشه اللي هي واقفه فيها واتكلمت : غصون!
لفت ليها غصون بابتسامه جامده قبل ما تتكلم : صباح الخير يا بسمه .
بسمه بود : صباح النور .. مقولتيش ليه انك نازله وصحتيني انزل معاكي؟
اتكلمت غصون بعدم اهتمام وهي بتتابع اللي بيحصل : عادي محبتش اقلقك خصوصا اليوم امبارح مكنش مريح .. ع العموم النهارده انتي رايحه مش كده؟
بصتلها بسمه بعدم فهم لـ ثواني قبل ما تفتكر وهزت راسها واتكلمت : ايوه رايحه .. قولت اعدي عليكي الاول عشان تعرفي .
حركت غصون راسها وهي بتتكلم وماشيه لـ مكان تاني : تمام .. روحي بس متتأخريش مش ناقصين كلام من حد زباله
بسمه بضيق : قطعت شارع معفن اصلا .. يلا انا ماشيه سلام !
ردت غصون عليها ببرود : سلام.
مشيت بسمه من المكان وابتسمت غصون ببطء شديد وهي بتتكلم بنبره غامضه: اسفه يا بسمه بس مبقاش ينفع !
رجعت بصت للرجاله اللي بيشتغلوا واتكلمت بصوت عالي : يلا يا اسطا انت وهو خلونا نشهل في الشغل مش هنفضل نتلكع كتير.
.................................................
فضلت بسمه تمشي في الطريق من غير ما تقف وبتخبط برجلها الحصي اللي مرمي في الارض بشرود .. وقفت فجأه لم اعترضها جسم شاب وهو بيبصلها واتكلم بوقاحه : ازيك يا بسمتي.
رفعت بسمه شفتها بضيق وهي بتتكلم : ياخويا كك تتقطع بسمتك للأبد .. ابعد عن طريقي يا عوضين .
قرب منها عوضين وهي واقفه ثابته بتبصله بس جواها توتر كبير واتكلم بخبث : وابعد ليه .. ده انا عايز اقرب واقرب واقرب كمان .
رجعت هي ورا بتوتر قبل ما تتكلم بنبره غضب : تقرب من اي يا عنيا .. انا واحده مخطوبه يعني ملكش عندي ديه غير الشبشب فاكر الشبشب ولا نسيته .
بصلها عوضين بغيظ وهو بيفتكر لما حاول يقرب منها وهي صرخت واتلم عليه الناس اللي في المنطقه وضربته بالشبشب بتاعها جامد وهي بتصرخ فيه: فاكرني لقمه سايغه يا زباااله والله لاطلع عليك غلبي كله !
قرب منها عوضين وعلي فجأه مسك ايدها وهو بيتكلم بصوت اقرب لـ صوت الافاعي : بس المره دي انتي بعيد عن المنطقه يا بسمه وبعيد اوي كمان فكراني هقرب منك جمب المنطقه تاني.
بصت بسمه حواليها واكتشفت انها فعلا بعدت كتير اوي عن المكان ورجعت بصت لـ عوضين برعب وكل طاقتها راحت صرخت بصوت عالي بس هو حط ايده علي بوقها بسرعه وهو بيمسك ايدها الاثنين بإيده التانيه وصرخ فيها : فكراني هسيبك .. المره دي مش هرحمك .. وابقي روحي بقي لـ خطيبك يا حلوه قوليله اني حبيت ادوق!
بصتله بسمه بغيظ شديد ممزوج بالرعب ومش عارفه هتعمل اي كل اللي هي عارفاه ان اعصابها كلها اتخدرت ومش قادره تعمل حاجه !
في الناحيه التانيه كان يحيي بيتمشي في الشارع وماسك شمسيه في ايده احتياطي من المطر وعمال يبص حواليها واتكلم بضيق : الله يحرقك يا شجر.. محسسني انك ابني وانا نازل ادور عليك والله لما الاقيك وتطلع سليم لـ هعمل معاك اللي مينفعش يتعمل بس الاقيك
فضل يمشي لحد ما وقف في مكانه للحظه وهو بيسمع صرخه غريبه بس صوتها بعيد .. وقف وهو مستني يسمع الصوت تاني بس مفيش حاجه .. اتحرك بقلق لـ مكان الصوت وهو بيحاول يعرف هو فين بالظبط وسب شجر في سره اللي خلاه يقع في الورطه دي .. اتكلم بغيظ : يعني لازم اهلي يعلموني المبادئ اوي .. ما اتنيل امشي ومليش دعوه بحاجه !
بس هو كمل طريقه وهو حاسس بحاجه تانيه مستنياه .. وقف للحظه وهو بيشوف واحد بيسحب واحده جامد ومثبتها بإيده .. اتكلم يحيي بهمس غاضب : لو طلعت من العركه دي سليم هشوه وشك يا شجر لما الاقيك.
جري بسرعه ناحيتهم والراجل بيبصله بدهشه وقبل ما يلحق يعمل اي رد فعل كان يحيي ضربه بالبوكس في وشه وهو بيبعده عن البنت دي .. بعدت بسرعه عنه ولقته بيحدف الشمسيه عليها بسرعه وهو بيضرب وبيتضرب من الراجل ...
أخدت الشمسيه بسرعه وهي بتفوق للي بيحصل ونزلت بيها علي دماغ الراجل واتكلمت بغضب : بقي انت يا زباله فاكر انك هتقرب مني .. اهو ربنا بعتلي اللي ينجدني منك يا كلب .. بس محدش بقي هينجدك مني.
برق يحيي بصدمه من الصوت اللي سمعه .. هو عارف الصوت ده كويس ده صوتها .. رفع راسه بسرعه وهو بيبصلها بصدمه من وجودها قصاده .. هي بجد قصاده مش مجرد خيال !
همس اسمها بصدمه وصل ليها : بسمه !
ثبتت بسمه للحظه بصدمه وهي بتسمع اسمها منه .. ده صوته للي عمرها ما تغلط فيه ابدا ... رفعت راسها ببطء شديد وهي بتتمني ان احساسها يكون غلط بس طلع هو .. بصتله بصدمه شديده قبل ما تسيب عوضين من ايدها وتقف بسرعه .. جري عوضين بسرعه بعيد عنهم لانه عارف انهم لو فاقوا مش هيرحموه .
جريت بسمه بسرعه بعيد عنه قبل ما يفوق بس هو فاق بسرعه وجري وراها بسرعه ومسكها .. ثبتها قصاده وهي بتتحرك جامد وبتتكلم بسرعه ووجع : سبني سبني سبني.
اتكلم يحيي بسرعه وصدمه وهو بيحضنها : بسمه اهدي ده انا يحيي .. اهدي .
فضلت تحاول تزق فيه تبعده عنها الا انه كان ماسك فيها جامد لحد ما هي تعبت فـ سكتت .. غمضت عينها بوجع كبير وهي في حضنه .. انتفست جامد وهي بتحارب انها متعيطش مش عايزه تبان ضعيفه قصاده تاني هي مش ضعيفه ...
اتكلم يحيي بفرحه ومش منتبه لـ حالتها : وحشتيني اوي يا بسمه .. اخيرا رجعتي .. انا ع طول كنت بدور عليكي بس مكنتش بلاقيكي.
غمضت عينها اكتر بألم وهي للأسف مقدرتش تتحكم في دموعها وعيطت .. حس بيها ومن انتفاض جسمها فـ بعدها عنه وهو بيبصلها بصدمه واتكلم : بسمه انتي بتعيطي.
عيطت اكتر من نبرته ديه وهو بيبصلها بوجع واتكلم : انتي بتعيطي عشان شوفتيني يا بسمه ؟
بصتله بصدمه من كلامه وبعدين مسحت دموعها بقوه قبل ما تبصله وتتكلم بثبات : عايز اي يا يحيي؟
بصلها يحيي بزهول قبل ما يتكلم بصدق : عايزك يا بسمه .
ضحكت بسمه بسخريه قبل ما تتكلم : عايزني .. ده بجد!؟
رفع يحيي حاجبه قبل ما يتكلم بهدوء : تعالي نقعد في مكان غير الشارع .
اتكلمت بسمه باعتراض وهي بترفع ايدها في وشه: انا مش هروح معاك في حته .. اللي انت عايز تقوله قوله هنا عشان امشي.
لاحظ يحيي الخاتم اللي في ايدها واتكلم بتوجس : اي ده ؟
بصت بسمه علي الخاتم بتوتر قبل ما تتكلم بثقه مش موجوده : خاتم خطوبتي!
اتكلم يحيي بصوت عالي : نعم ياختي .. خطوبة مين يا حلوه ؟
عضت بسمه علي شفتها بتوتر من حالته واتكلمت : خطوبتي .. اصلي اتخطبت.
جز يحيي علي سنانه وهو بيتكلم بغيظ : وبالنسبه لـ كيس الجوافه اللي الهانم متجوزاه ؟
بصتله بسمه بزهول قبل ما تتكلم : متجوزاه ؟؟ لهو انت مطلقتنيش ؟
ربع يحيي ايده وهو بيبصلها واتكلم بسخريه : لا مطلقتكيش تخيلي.
كانت هتبتسم بسعاده علي الخبر ده الا انها رفعت راسها واتكلمت بغرور وتحدي : يبقي انت كده محتاج تطلقني .. لأن اكيد اكيد مينفعش اتجوز وانا متجوزه.
قرب منها يحيي وهو بيبصلها بغضب خلاها تتمني انها تسحب الجمله اللي قالتها واتكلم بهمس خطير: انا مبطلقش حد .. وانتي مش هتبقي لحد غير ليا؟
بصتله بغيظ من جملته دي واتكلمت باعتراض : ليه ان شاء الله مكتوبه باسمك.
هز راسه بتأكيد وهو بيتكلم بحده : اه يا بسمه مكتوبه بأسمي ومينفعش تشيلي اسم غير اسمي اصلا .
سكتت وهي بتبصله بصمت وهو كمان بيبصلها بضيق قبل ما تتكلم بهدوء مزيف وهي بتبص علي الارض : بس انا مينفعش اشيل اسمك يا يحيي .
بصلها يحيي بعدم فهم قبل ما ترفع راسها وتبصله بنظره مش هينسها واتكلمت بنبره واضح فيها الالم : اصل انا لسه مبطلتش شغل المتشردين ولسه عايشه فيه .
غمض يحيي عينه بوجع وهو بيفتكر الجمله اللي قالها .. اتكلم بهدوء : بسمه انا مكنش قصدي اي حاجه قولتها .. انا قولتها بس من الموقف مش اكتر .. تخيلي انتي تدخلي تلاقي بنت عمتك في الارض وحد بيضربها
صرخت بسمه فيه بغضب : انت مسألتنيش عن السبب .. انت وجعتني وبس .. مسألتنيش انا عملت كده ليه .. انا عملت كده بسببك .. كنت بضربها بسببك .
بصلها يحيي بصدمه وهو بيتكلم بعدم فهم : بسببي.
ضحكت بسمه بسخريه وهي بتتكلم : اه بسببك .. كانت عايزه تخليني اكرهك .. كانت عايزه تعرفني اني مش اكتر من واحده
سكتت بسمه بألم وهو فهم معني كلامها وبصلها بصدمه .. اتكلمت بسمه بحزن: قالتلي ان بوسه اللي انت بتقولها ليا ده بتاعها وانا عارفه انه مش ليها .. كانت عايزه تحسسني اني رخيصه بالنسبالك .. انت سبب اللي حصل ده .. غلطتي اني كنت واثقه فيك في الوقت اللي بنت عمتك اللي بتتكلم عنها كانت عايزه تطلعك ليا بصوره شيطان .
قرب منها يحيي وهو بيمسك ايدها وهي بتبص ع الارض مش عايزه تبصله .. اتكلم يحيي بأسف حقيقي : انا مكنتش اعرف حاجه صدقيني.
بعدت بسمه عنه وهي بتتكلم بنبره ساخره : انت مدتش نفسكك فرصه تعرف يا يحيي .. انت بس حكمت علي بسمه تربيه الشوارع انها هي اللي زباله .
حرك يحيي راسه بنفي قبل ما يتكلم : انتي مش زباله يا بسمه ولا رخيصه .. انتي احسن من كده بكتير اوي.
ابتسمت ابتسامه باهته وهي بتتكلم : مكنش ده كلامك .. انا عايزه اتطلق يا يحيي!
بصلها يحيي بصدمه اتحول لـ غضب وهو بيبص علي ايديها واتكلم بغضب : عايزه تطلقي عشان تروحي تتجوزيه ؟
بصتله لـ ثواني بعد فهم قبل ما تفهم انه قصده علي الخاتم فـ اتكلمت بتحدي : اه عشان اتجوزه يا يحيي.
اتشنج وشه في حركه خلتها بصتله بتوتر وكل الشجاعه اللي جواها راحت .. قرب منها ببطء وهي بترجع لورا واتكلم : مش هطلقك يا بسمه.
ردت عليه بقوه زايفه : هتطلقني .
رد عليها بنفي وهو لسه بيقرب منها : انتي بتاعتي انا .. مش هطلقك .
كانت هترد عليه بس اتكعبلت في الرصيف اللي وراها وقبل ما تقع كان هو ماسكها .. بصتله جامد قبل ما تتكلم : بس انا مش عيزاك .
بصلها واتكلم برقه وهو بيبص في عينها : بس انا عايزك في حياتي يا بوسه.
بصتله جامد وقبل ما ترد عليه خبطها براسه في راسها جامد ووقعت مغمي عليها علي ايده .. اتكلم بنبره مرحه : اسف بقي يا بوسه بس لو فضلنا واقفين كده هنتاخد انا وانتي فعل فاضح في الطريق العام.
وطي وهو بيحط ايده تحت ركبتها ورفعها وعدل راسها علي صدره وهو بيبصلها بابتسامه وقرب منها وهمس جمب ودانها : مش هسمحلك تبعدي تاني ابدا يا بوسه ابدا !
ومشي بيها بسرعه واخد اول تاكسي قابله واللي خاف من هيئتها علي ايده للحظات قبل ما يقنعه يحيي انها مراته واخدها ومشي علي بيته من تاني!
.............................................
وقف قصاد باب الشقه بتاعته بعد وقت طويل مدخلهاش .. وقبل ما يطلع المفاتيح لقي باب الشقه بيتفتح وظهر من وراه شجر اللي اتكلم بسرعه : كويس انك جي.. اي ده ؟
بص علي بسمه اللي نايمه باستغراب قبل ما يجمع ملامحها دي اللي كانت مع غصون !! بص لـ يحيي وكان هيتكلم بس يحيي اتخطاه ودخل الاوضه بتاعته نزل بسمه بهدوء علي السرير وطبع بوسه هاديه علي جبينها وغطاها وطلع وقفل الباب وراه ...
طلع برا و اتخطي شجر اللي بيبصله بعدم فهم واتكلم : مين دي؟؟
اتكلم يحيي بهدوء : بسمه .
سكت شجر ثواني قبل ما يتكلم بدهشه : بسمه مراتك!!
حرك يحيي راسه بإيجاب اتكلم شجر بعدم فهم : بس ازاي .. دي كانت مع غصون .
رفع يحيي حاجبه باستغراب قبل ما يتكلم : غصون ايه ؟ مال بسمه بـ غصون؟
اتكلم شجر بتوضيح : دي بسمه اللي كانت واقفه مع غصون امبارح انا حته شبهت عليها بس مكنتش متذذكرها اوي ؟
اتكلم يحيي بسرعه : لا ده انت تحكيلي كل حاجه من الاول تاني كده وبالتفاصيل اني شارع وامتي وفين بالتفاصيل .
قعد يحيي علي الكرسي وقعد شجر قصاده وبدأ يحكيله كل حاجه من الاول تاني بالتفاصيل زي ما طلب منه يحيي ويحيي بيسمعه باهتمام كبير قبل ما يتكلم بزهول : عايز تفهمني ان غصون وبسمه يعرفوا بعض لا وكان الفرق بينا وبينهم مجرد كام شارع!!
حرك شجر راسه بإيجاب ويحيي مش مستوعب اللي بيحصل واتكلم : يعني دلوقتي انا بسمه تعرف غصون مش كده؟
حرك شجر راسه تاني فـ اتكلم يحيي بفرح : طب ده شئ كويس جدا .. انت كده هتعرف كل حاجه عن غصون او بمعني تاني انا هعرفلك من بسمه كل حاجه عن غصون لاني لحد الان مش واثق انها فعلا اتجوزت وبسمه هي اللي هتساعدنا.
اتكلم شجر بسعاده مماثله : بجد .. يعني انت شايف كده!
لوي يحيي شفته بتهكم منه واتكلم : يابني اللي زي غصون دي مش بالسهل تتجوز ده لو زي ما انت حكيتلي عنها فـ انا هتصرف لـ كل حاجه .
ابتسم شجر بشكر لـ يحيي ويحيي طلع تليفونه اللي كان فيه اكتر من مكالمه بس لمح رساله غريبه مكتوب فيها التالي " مراتك هتلاقيها في دار ايتام (....) النهارده الساعه 12 ارجعلها" ...
رفع يحيي حاجبه بدهشه من الرساله دي .. معني كده انها كانت رايحه لـ دار الايتام ده النهارده ! .. بصله شجر باستغراب واتكلم : فيه ايه؟
شاورله يحيي بالرساله وقرأها شجر واتكلم بدهشه : مين اللي بعت الرساله دي؟
حرك يحيي كتفه بعدم معرفه وبعدين بص لـ شجر وكأنه فاق لـ حاجه : انت كنت فين ؟
حرك شجر ايده في شعره وهو بيتكلم : كنت بلف في الشوارع مع المطر لحد ما نشفت ولما رجعت ملاقتكش ورحت الشغل ملقتكش قولت يبقي انت اكيد هتيجي هنا .
حرك يحيي راسه بتفهم قبل ما يقوم يقف ومشي خطوتين ناحيه شجر اللي بيبصله بتوجس وبدون انذار خبطه يحيي بالبوكس جامد في وشه وقع شجر بالكرسي علي الارض قصاده وهو بيبص لـ يحيي بعدم تصديق للموقف .. رفع يحيي كتفه وهو بيتكلم ببراءه شديده : اصله كان ندر عليا !
..............................................
..... يتبع
#Nemo
أنت تقرأ
اختطفني عشقاً
عاطفيةأوقعتيني في حُبك أختطفتي قلبي وعقلي وروحي "واختطفتيني شخصياً" كان جنونك مُحبب الي قلبي، قلبك الناقي كان يجعل روحي اكثر نقاءً، أبتسامتك لم تفشل يوماً في تغير مزاجيتي.
