إلى أين تصل

4

هذا التجمع مال الناس نفسه ، ركضت عليه و حاولت أوصل حتى اشوف الي يصلي

چان على نفس حالته و بنفس مكانه
جسمه كله طعنات
و حواليه اكو مثل السجلات و كل سجل عليه صورة انسان

سجد و بعد سجوده توضحت صورة الطرف الثاني من الطريق
الي چان يصلي هو الفاصل بينا و بين الناس بذاك الطرف

چانو أهل ذاك الطرف يراقبون الساجد بألم

بينهم ولد شاب اسمر عنده لحية خفيفة
عينه چانت على الي يصلي بعدين رفعها و باوعلي مثل الي انتبه لوجودي

باوعلي بنظرة عجيبة ، و كأنه متأمل مني و من الموجودين نعالج جروح الساجد

سمعت ـ اگعدي سكينة ، خوية اگعدي لا تحرگين گلبي مو آنه الكاتل اخته اگعدي لا تخليني أموت يمچ

فتحت عيوني و اني گوة أجر النفس
بعدني بسيارة اخوية و هو واگف يم راسي 
نزلن دموعي و شهگت من شفت جرح راسه

خلة وحدة من اديه ورة ظهري و بايده الثانية لزم ايدي اليمنى
نزلني گعدني على الرصيف و عافني

جاية سيارة شرطة و الرجال الصدمنا سيارته مقهور و يصيح على مجتبى

اجتي سيارات ثانية و سحبو سيارات الحادث لواحد من الفروع

خليت ايدي على راسي الشمس كلش اذتني
شفت بطل مي ينمدلي رفعت راسي چان ظافر

صكيت سنوني و گمت ، أبوية إجة و صار بيننا
دفع محمد و أخذ ايدي مشة وياية لسيارته و هو يسألني ـ بيچ شي؟

خليت راسي على صدره و اني اتنفس بسرعة

حسني خايفة فكلش قربني منه و هو يگلي ـ هاي هية الحمد لله من طلعتو سلامات ، دفع الله ماكان أعظم

خلاني بسيارته و وگف يم الباب يسألني ـ بوية آخذچ للمستشفى؟

هزيت راسي بلا ، راح صاح واحد من ولد عمي يسوق السيارة و يوصلني لبيتنا

إجة ابن عمي "زين العابدين" حاول يسولف وياية و يهديني بس ما رديت عليه و لا تجاوبت وياه 
شسويت اني؟ لو صاير شي لأخوية؟

من زمان اني و اخوية "مجتبى" نتعارك
يمكن اغار منه لان شمايسوي مجتبى ما يتحاسب و احنا على كلشي نسمع حچاية و رزالة

و المشكلة بس آني من خواتي اتعارك وياه وكلما ارادده يصيح و تصير مشكلة شكبرها

من تزوج طلعت جَبهة ثانية و صرت اتعارك وية مرته

صح مجتبى يتعارك وياية بس و لا مرة تعارك بسبب مرته
أبد ما يكسرني علمودها و اني الغبية ماخذته عدو

اصلاً شنو قيمتي بهالدنيا؟ اتمرض و اسوي مشاكل؟ المن موجودة؟

صف ابن عمي سيارة ابوية بباب البيت و نزل ركض گدامي دگ الباب