إلى أين تصل

5

اجو الجماعة علينا گمنا اني و هدى و بعدهن اللفات بإدينا باوعلهن " عباس" يلا حچة ـ السلام عليكم ، ما آخذ هواية من وكتچ ، اريد دفتر ابن عمي

خلة ايده على چتف استاذ علاء و گال ـ دزيه باچر وية علاء

سألته ـ منو گلك الدفتر عندي؟

دنگ و رد ـ صاحبي يشتغل دكتور بالمستشفى سأل الممرضات و وحدة منهن گالت انطتچ الدفتر

قطبت حواجبي و سألته ـ شدراك بمكاني؟

رد ـ امچ من سلمت على مرأت عمي گالت انتِ علوم حياة ، الدفتر چان كلش عزيز على گلبه و أريد اضمه يمي

گتله ـ ما انطي

انصدم عباس و التفت لاستاذ علاء ، ردت امشي صار الاستاذ گدامنا فهُدى جرت ايدي حتى اوگف

حاچاني الاستاذ ـ گولي يا الله سكينة ، عباس صاحبي و علاوي الله يرحمه ابن عمه اكيد الدفتر يرجعله

رديت على الاستاذ ـ اني قريت بي ما كاتب هالدفتر لعباس بالعكس يسولف عن عباس بي ، و الله ما انطي لأحد
اصلاً اخوية تعارك وياية وصار ويانا حادث و ما انطيتهيا

رفع الاستاذ اصبعه بوجهي و عيونه حومرن بس ما حچة شي
انوب سحب اصبعه و جر نفس يردد ـ استغفر الله

عباس گال ـ اني اعرف شنو هالدفتر و احتاجه و الله

رديت عليه ـ و اني احتاجه أكثر منك

اخذت هدى و مشيت بسرعة ، طبيت للقسم گعدنا بالقاعة
هدى گعدت يمي و گالت ـ ولچ ليش تبلين نفسچ بشغلة لا الج و لا عليچ ، شنو من دفتر؟ مو گلتيلي ما افتهمت منه إنطي للولد و اخلصي

خليت الأكل على الستول و رديت - ما علية اريد الدفتر اتعاركت وية مجتبى علموده، اني حاسة بي شي الي ، ولچ يحچي شغلات صارت وياية بالحلم !

گالت ـ و الله انتِ خبلة

دنگت افتح العصير و اني ارد ـ اي اني خبلة

بديت آكل و هي عينها على الباب ، كل شوية تگوم تباوع خاف يجي استاذ علاء

بس خلصنا اكل اطلعنا اسألنا الممثل إذا اكو محاضرة گال ماكو و البنات الي بالخط حدهن للثنتين
فرحنا اني و هدى لحدائق الانگليزي

لگينا قسم من بنات مرحلتنا هناك ياخذن صور، اخذنا وياهن كم صورة و گعدنا عشر بنات كرزات و جبس و سوالف للـ2 يلا طلعنا من الجامعة

من نزلت هدى من الخط حسيت احساس بنقص مو عادي ؛ مثل الي عليه مسؤولية و مامرتاح لأن مامسويها

اختنگت كلش ماجاي افهم نفسي
گبل چنت اممشية اموري حالي حال اي أحد ، بس هسة احس كلشي تخربط

وصلنا البيت نزلت و دگيت الباب فتحتلي اختي ، صوت صياح ابوية واصل للباب
نزعت حذائي بباب المطبخ و فتت للصالة