رواية " لم يكن مجرد حلم " لــ زينب سمير

.. الثاني عشر ..

لم يكن مجرد حلم :-

_ الفصل الثاني عشر _
_ العــروس المــاكـرة ! _

كان نور الدين يجلس علي مقعده المعتاد علي طاولة الطعام بالصباح ، يتناول طعامه ، معه كذلك جلست نيرمين ، هبط سراج من الاعلي وتوجه لهم ، وقف امام الطاولة وراح يضع لقيمات سريعة بفمه ، يضع ويرتشف العصير لم يترك حتي فرصة لـ النفس ، اكل نور الدين قطعة من الخبز المحمص وهو يقول:-
_براحة ياسراج ، هانيا مش هطير يعني
تناول اخيرا رشفة عصير ثم نظر له قائلا بتريث:-
_انا مش هقابل هانيا دلوقتي ، انا هقابل الشباب علشان رايحين نشوف الشقة اللي هتجوز فيها
وقفت اللقمة بمنتصف حلق نور الدين ، اخذ يسعل بقوة وهو يحاول ان يبلعها انتفضت نيرمين تمنحه الماء اخذ اخيه يربت علي ظهره بقوة ، تناول الماء واخيرا هدأ سعاله
نظر له سائلا بتحفز:-
_شقة اية ! انت مش هتعيش معايا هنا
اؤما بالنفي هاتفا:-
_لا طبعا يانور هعيش في بيت منفصل
احمرت عيني نور الدين اثر الضيق الذي اصاب قلبه ، أبدأت تسرقه منه من الان ؟! ستسحبه لشطها ، ليترك شطه هو فارغا دون اخيه
اكمل سراج:-
_كدا هيكون افضل للكل ، هانيا مش عايزة تعيش معاك في نفس البيت علشان متحسش بالاحراج وتبقي دايما مش مرتاح
سائله بنزق:-
_طيب وانت رايك اية ؟
بحماس اجاب:-
_اي مكان هانيا فيه ، انا هبقي مرتاح فيه

تطلع له بقهر ولم يرد ، تركهم الاخير وغادر ، بقيت نيرمين تنظر له بقلة حيلة ، هي الوحيدة التي تعلم بجنون نور الدين بأخيه ، حبه له وشعوره بالتملك نحوه ، هو من اعتبره ابنه منذ زمن ، كان يهتم به اكثر من اهتمام والدتهم به ايضا ، لا ينام الا اذا نام ، يأخذ من فمه الطعام ليمنحه اياه ، فكرة انه سيعيش بدونه ستجننه بلا شــك..!!

هتف ماجد مشيرا لاحدي الجدران:-
_اية رأيك نخلي لون الحيطة دي اخضر فاتح ؟!
تخيل كرم المنظر فوجده سيكون في غاية البشاعة فنطق بقرف:-
_يخربيت زوقك ، اخضر لعرسان جداد ! لية عايز تعميهم !
قال بضيق:-
_طيب والله اللون حلو
معتز متدخلا:-
_ماجد متتكلمش خالص .. ممكن !
وضع يده علي فمه هاتفا بنزق:-
_سكت اهو يارب ترتاحوا
خرج سراج من إحدي الغرف قائلا ببسمة:-
_انا خلاص قررت الالوان هتبقي...
قاطعه ماجد بأندفاع:-
_اصفر وبرتقاني صح ؟ هيكونوا الوان متناسقة وفظيعة
كرم مكملا:-
_من كتر فظعانها هيكتبوا تاني يوم الفرح في الجرايد مصرع عروسين بسبب الوان جدران منزلهم
معتز بحدة مصطنعة:-
_ماجد .. انا مش قلت اسكت
زفر بضيق بينما اكمل سراج:-
_انا هخلي الالوان مزج بين البيج والكافية والبينك الباهت
قالوا معا بصوت واحد:-
_دا مش رأيك ، دا رأي هانيا
اؤما بنعم بأحراج ، فتلك الالوان هو لا يعرف شكلها حتي ، هي من اختارتها وبعثت له صورا لها ، فنالت علي اعجابه
لانها ببساطة تعجبها....!!
                                 ****
_برضوا نفذتي اللي في دماغك

قالتها ملك بغضب وهي تجلس امام الاخري التي هتفت:-
_اها نفذت ياملك ، ومفيش حاجة هتغير رأيي ابدا ، عيلة عدنان نهايتها علي ايدي وهتشوفي
ملك بضيق:-
_حرام عليكي هو اصلا مكنش في وعيه الليلة دي
هانيا بقسوة:-
_وانتي مفكرة اني كدا هعفو عنه ! بالعكس كدا هيزيد الكره مني ناحيته اكتر ، لانه بسبب راحته ومزاجه ضيعلي اخر حد كان قريب مني
ملك بتحذير غاضب وهي تنهض عن مكانها:-
_هانيا فوقي ، الانتقام نهايته وحشة ، سراج دلوقتي اخر حد بيتحبيه وبيحبك في الدنيا
_انتي متوقعة اني ممكن اقدر اعيش مع واحد انا عارفة ان ايده ملوثة بدم اخويا ! اخويا اللي ملوش ذنب بقذارة التاني اللي ميعرفش ربنا ياملك ، اللي بيسكر وبيعرف بنات وبيعمل كل حاجة سيئة ، هو طيب ماشي بس مش اطيب ولا احن من اخويا ، ولا دمه اغلي من دم اخويا