في يوم كنت رايحة كافيتريا الجامعة ولقيته قاعد مع بنت وماسك ايديها وبيتكلم معاها .. اتصدمت واستنيت بعد ما مشيت وجيت سألته مين دي صدمني برده جدا ...
منير : بنت عمي
وبنت عمك بتعمل ايه هنا ؟!
منير : بتدرس
متستعبطش .. في الكافتيريا وماسك ايديها يبقى ايه ؟!
منير : وايه المشكلة ؟!
المشكلة يا استاذ انك بتحب واحدة وهتتجوزها .. مينفعش تبقى كدة راعيني يا اخي
منير : طب اهدي .. انا مفيش بيني وبينها حاجة صدقيني
يا سلام
منير : اه .. حتى اسأليها
هاخد على كلامك المرة دي
منير : طب ايه .. مش ناوية تحني ونخرج ؟!
قولتلك يا منير خروج برا الجامعة قبل ارتباط رسمي لا
منير : و انا قطع علاقتي بصحباتي البنات قبل الارتباط الرسمي لا
انت هتهزر ؟!
منير : اومال اعمل ايه ؟!
يعني انت مش غلطان ؟!
منير : عشان قاعد مع بنت عمي .. خدي بالك انتي بقيتي تغيري والبنت اللي بتغير مش واثقة في نفسها
سلام ..
منير : استني رايحة فين ؟!
ومنير شد ايدي بعدها بس انا زقيته و اديته انطباع ان اللي حصل مش هيعدي بالساهل .. ومشيت شوية ولقيت "بسمة"و"ماجي" واقفين بيتكلموا سوا و"ماجي" ندهت عليا وبصراحة كنت مكسوفة من "بسمة" واننا مبنكلمش بعض وكدة بس رحتلهم ....
ماجي : ايه اللي واخد عقلك ؟!
لا مفيش تعبانة شوية .. المهم انتي عاملة ايه ؟!
ماجي : الحمد لله .. ذاكرتي ؟!
ذاكرت ايه؟!
ماجي : يابت مش الدكتور عامل Exam النهاردة
اووف .. انا نسيته دة
ماجي : متخافيش انا هظبطك
وانتي ازيك يا بسمة
بسمة : اهلا .. عن اذنك يا ماجي عندي محاضرة *سابتنا ومشيت من غير ما تبص عليا حتى*
ماجي : هي مالها ؟!
ملهاش .. تلاقيها تعبانة من الشمس
ماجي : لا دي كانت بتهزر ومفرفشة معايا من دقيقة
معرفش بقى
ماجي : في حاجة بينكو اقدر اصلحها ؟!
لا مفيش طبعا
أنت تقرأ
شمسٌ في اخر طريق مظلم ♥🌇
General Fiction"لا يوجد شيء في الحياة افضل من تحقيق الاحلام.. فمن عاش لتحقيق حلمه فسيبقى عالٍ وذو مكانة .. ومن عاش بلا هدف أو كرير فهو ميت "♥
