شمسٌ في اخر طريق مظلم ♥🌇

Part 6

                                           

سألت "عمر" عن السبب اللي خلاه مهتم بمشكلتي اوي كدة ووقفته معايا في القسم والمحاضر رد عليا ..

عمر : ببساطة كدة معرفش

دة اللي هو ازاي ؟!

عمر : والله بجد .. انا فجأة لما سمعتك حسيت اني قلقان على غير العادة .. انا عمري ما قلقت على حد ولا شغلت بالي بحد طول عمري عايش لنفسي بس

طب كويس انك اتغيرت

عمر : دة كويس اني قابلتك اصلا

وقطع كلامنا صوت مهندس التصوير وهو بينده علينا عشان هيصوروا خلاص .. حضرت التصوير وكنت مشغولة ب "عمر" وكلامه .. يقصد ايه باللي هو قاله دة ؟! .. مش حب ولا حاجة انا عايزة بس اعرف نيته .. خلص التصوير و جالي تليفون من "ماجي" وعرفت اني نجحت .. دلوقتي انا في رابعة .. مش هتتخيلوا انا كنت فرحانة ازاي يعني خلاص كلها كام شهر وهتخرج ..

وبعد يومين بالظبط من نتيجتي كان معاد مقابلتي مع بابا في القسم ..كنت متوترة ومش عارفة اعمل ايه بس "عمر" مسابنيش كالعادة ورحنا سوا وبابا مضى على التعهد وطلب من الظابط يسيبنا شوية سوا ....

بابا : خلاص بقت دي اخرتها

هو يحيى مجاش ليه .. ايه خايف ؟!

بابا: يحيى مات من يومين ..

مات .. ازاي؟!

بابا: مراته جت بتصحيه لقيته ميت .. ارتاحتي يا ريم ؟!

ارتاح بموت اخويا ؟!

بابا : اه .. مانتي سيبتي البيت وحطيتي راسنا في الأرض مش هيصعب عليكي موت يحيى يعني

انا مسيبتش البيت .. انت اللي طردتني ومشيتني في نص الليل وسط كلاب السكك .. خوفت عليا ؟!

بابا : ايوة خوفت

اتحدى .. انت مكانش هاين عليك تبص عليا من الشباك حتى .. كل اللي كان همك اني اطلع وحشة عشان تثبتلي اني انا والبنات اللي زيي ملناش لازمة و اللي يخلف بنت عمره قصير .. مش دي كلمتك ؟!

بابا : انا مكنتش اتخيل انك تقفي قدامي كدة .. اتغيرتي اوي

قصدك كبرت .. وفهمت كل حاجة وعرفت قد ايه بتكرهني

بابا : انا مكرهش بنتي

بنتي؟! .. دلوقتي بقيت بنتك اخيرا .. فين ايام الضرب والشتيمة والإهانة .. فين ايام ما كنت عاوز تحرمني من تعليمي .. حتى الحاجة اللي شاطرة فيها برضو حرمتني منها

بابا : يا ريم انا كنت بحميكي

لا يا بابا مكنتش بتحميني .. انت بتكرهني بس انا لا عشان في الاول والاخر انت ابويا ومينفعش أكره ابويا ..

ومشيت وانا مستغربة .. عمري ما شوفت بابا في الحالة دي .. نسيت اقولكم بابا اتهد خالص وشكله اتغير تماما .. بابا اللي كنت متأكدة انه هيضربني طلقتين لما يشوفي بيتكلم بهدوء وتفاهم عمري ما شوفتهم قبل كدة .. روحت البيت منهارة وحكيت للبنات على كل حاجة ...