يحدث بالقرب منا

البارت الثاني

#ارجوان

آية : ماشي ..غسلت وطلعنا لگيناهم ملتمين على السفرة بس بابا وعمو عدنان وانعام مموجودين استغربت .. التفتت على رعد .. بابا وين ؟؟
رعد : راحوا يوصلون المحاصيل هو وابوي
آية : هاا ..حاجيته بهمس ..وانعام وينها ؟
رعد : مدري ما شفتها ..الظاهر امتانيه ابوج حتى تسوي مشكله بس لا تخافين انا حجيت ﻷمي كلشي من يجي ابوي تفهمه
آية : خوش .. كملنا اكل وانطلقنا نلعب كالعادة ...

غدير : يلا انا امجن وانتن نظفن السطح
تماضر : ليش بلا انتي امنه انا اكبر منج انا امجن
غدير : شوو دولي لمي واذا اكبر مني انا امجن يعني انا امجن
تماضر : والله ولا تصيرين انتي امنه شنو هي كل يوم
غدير : انا ما اصير مو ؟؟
تماضر : اي ما تصيرين هسه دوري انا
آية : ما اشوف غير غدير هجمت عليها مطلتها وهي فوكاها شبعتها كتل ..احنه نفك وماكو تدفعنا وترجع عليها .. فززنا صوت فرقد من دخل
فرقد : هيييي ولج كومي منها
آية : فرقد يحجي ويجر بيها وهي ولا كأنما ترجع مرة ثانيه تكتلها .. اخر شي لزمها وصاح بتماضر
فرقد : نزلي بسرعه
غدير : ولك ليش تشردها انا الها اليوم
فرقد : ولج كااافي ما مليتي كل يوم عركه
غدير : جا اخليها تتأمر علي والله هذا الناقص
فرقد : شو امشي ولي وبعد لا تعيدينها ترى بالعباس اكول ﻷبوي عليج
غدير : يهددني ابو حلگ يلا امشي منا نريد نلعب واذا اجت هاي تلعب ويانه افطسها تفطس
آية : راح فرقد وهو يهز بأيده المشكله محد يكدر على لسان غدير ...
فرقد : نزلت ولكيتها على الدرج .. ولج شمتانيه ما تنزلين
تماضر : جا بعد ويامن العب
فرقد : ولج انتي شمالج غير اكبر منها كتليها
تماضر : شكتلها انت ما شفتها شلون هجمت علي حتى ما اطتني مفكه .. خلي اروح اراضيها اذا زاعلتني ويامن العب بعد
فرقد : خبال كون والله تستاهلين الكتل دروحي روحي هو انا صوجي فكيتج منها
تماضر : صعدت لكيتهن يلعبن .. اريد العب وياجن
غدير : ما نلعبج بعد زاعلناج
تماضر : لا عليج الله خلني العب
غدير : خوش بس ابقى انا امجن دوم
تماضر : قابله ميخالف
غدير : يلا جا تعالن لمن الهوسه هاي انتي وسكينه ورقيه
تماضر : جا وآية
غدير : مالج علاقة بيها هاي وياي
آية : كعدن البنات يلمن الملاعيب والهوسه السويناها وانا وغدير نباوع من السياج مال السطح على الناس ..شوي واجه ميثاق
ميثاق : غدير اريد احجي وياج
غدير : خير يا طير شكو
ميثاق : جدتي اليوم كالت تماضر لفرقد وغدير لميثاق ..يعني انتي من نكبر تصيرين مرتي فبعد لا تباوعين من السياج ..يحجي وهو مستحي
غدير : صفگت ايد بأيد ..شنوو انا اتزوجك ..انت شوف روحك عبالك طير مهلس شآخذ منك دولي منا
وبعد لا تعيد هاي الحجايه
ميثاق : بعصبية .. ولج انا زلمه لا تحاجيني هيج لا أكل لجدتي عليج
غدير : ياهو الزلمه.. انت؟؟ !!.. لزمته من فانيلته ..تروح لجدتي تكلها انا ما اريدها لا اشوه وجهك وعلي يلا روح من گدامي يلا
ميثاق : اصطبريلي اذا ما أكل لجدتي
غدير : خفت كلش ..تهي بهي روح روح لا اكتلك انت واختك هنا
تماضر : انا شدخلني
غدير : بالعباس تحرگون الاعصاب ولا تكعدون راحه
آية : شفت ميثاق نزل ..التفتت على غدير ..ليش هيج تحاجينه خطيه
غدير : يولي يحجي سوالف مال كبار وانا استحي
آية : رفعت حواجبي بتعجب ..انتي تستحين؟؟
غدير : اي شبيج ما مبين علي
آية : لا مبين مبين .. شوي وسمعنا صوت صياح عالي .. شكو شصاير
غدير : شمدريني خلي ننزل نشوف شكو
آية : حطت طرف دشداشتها بحلگها وركضت جوه واحنه وراها ....
انعام : هاي انا اكلك لو انا لو هي بزعت من وراها كل يوم طلابه
عماد : سدي حلگج وطبي جوه
انعام : لا اطب ولا اسد حلگي لحدما تشوفلي حل
عدنان : ام حسين هدي وكلشي ينحل بالتفاهم
انعام : يا تفاهم ابو رعد يا تفاهم هذا صارلنا شهرين على هالرنه كلما احجي عليها لو اشتكي يطلعني غلطانه هي بته ما تنرد وانا ما اكدرلها هذاك اليوم رادت تموت الفرخ وتخنگه بالكاروك واليوم مسبحه سكينه بالتراب وعاميتها عمي
آية : هي تحجي وانا فاتحه حلگي عليها ليش تجذب انا ما مسوية شي
غدير : عمه ليش تجذبين جنه نلعب وكلنا اتربنه
فهيمة : انلصمي ام السان اذا حجوا الكبار انتي سكتي
غدير : جا انتم ما تردون الحجي الصدگي
رعد : من رخصتكم بس حجي غدير صح هنه جانن يلعبن سكينه وآية اثنينهن متربات
انعام : شوف حتى هذول ما الهم رداد .. ما شفتوا اليوم شغلط وحجه علي وحتى راد يمد ايده علي
رعد : بعصبية.. عيب عليج شكبرج وتجذبين لا غلطت ولا سويت شي بس كتلج لا تكتلينها ﻷن لگيتها مشبعتها كتل
عماد : بصياح.. صدك هذااااا الحجي
انعام : لا جذاب
عدنان : لا لهنا وحدج ابني ما يجذب
عماد : وولج انتي منووو وتمدين ايدج عليها .. يلا لمي هديماتج وروحي ﻷهلج يلا وبعد ما اريد اشوف رگعه وجهج
فهيمة : شجاك يمه تطرد مرتك علمود هالفرخه
عماد : يمه رحمه لوالديج مو زين مني ليهسه ما كاتلها بالعباس طلعت روحي منها كل يوم نفس الحجي ..يلا مو تردين تولين ﻷهلج ولي منا
انعام : هيج صار الحجي .. خوش جا نشوف اذا ما اخليك تبوس ايديني حتى ارجعلك
عماد : اي خوش عود نشوف منهو
منهو الي يبوس الايادي .. يلا بوية سكينه تعاي
أنعام : بعصبية.. شني وين ماخذها ؟؟
عماد : كفيلج العباس لوما حسين يرضع جا هم خذيته
فهيمه : يمه شمالك شصابك ما تگلي
عماد : بعصبيه .. الي عندي كلته مو تريد تولي خلي تولي ما اررريدهاااا بعد ما اريددددها بزعت يا عالم
آية : استمر الصياح بينهم هواي بابا و انعام راكبين راسهم عمي عدنان يهدي بيهم وماكو وبيبي صافه وي انعام والبقيه متفرجين ..الي ان اخر شي عمي عدنان اخذ انعام لبيتهم ..بس الصياح بقى مستمر بين بابا وبيبي ...بالليل اجو اهل انعام حتى يتفاهمون وي عمامي ...
اقبال : يا ربي سترك ..انعام ما تعديها اذا ما تسويها سالفه شكبرها
هناء : اي والله هسه دكعدي واستجني الا تكومين اهلج علينا
اقبال : يا ربي عديها على خير .. غدير ..ولج غدير
غدير : ها يمه
اقبال : روحي حسبي كم واحد بالديوان حتى اصب الجاي
غدير : خوش .. رحت يم الباب مال الديوان احسب بالنعوله..واحد ..اثنين ..ثلاثة ... فززني صوت ابوي من صاح بصوت ناصي
عدنان : ولج شتسوين هنا
غدير : احسب كم انعال جاي حتى نصبلهم چاي
عدنان : همس بعصبيه ..كومي كومي تعاي وراي
غدير : طب للمطبخ و دخلت وراه
عدنان : بعصبية.. هاي منو موديها للديوان
اقبال : انا انا وديتها ليش شمسويه
عدنان : اكلها شتسوين تكول احسب كم انعال جاي عليج الحسين شسوي اذا سامعها واحد غير الطلابه تكبر ما تصغر
اقبال : دهر صابج كون ..توكل انت ابو رعد وانا اعلمها
عدنان : حسبي الله ونعم الوكيل يمته تخلص هالطلايب ما ادري
غدير : ابوي طلع وعافنه .. هسه شسويت وهيج عصب علي
اقبال : ما تنردين ولج ليمته اظل اعلم انا ..هذاك فرقد من اودي يروح يحسب ويأشر عليهم وفوكاها من يسألون شبيك تأشر يكلهم غير اصبلكم جاي وهاي تكله نعوله منين الكاها يا ربي
غدير : هسه غير اعرف شمسوية
اقبال : روحي يمه روحي مو وكتها هسه
غدير : بكيفج
آية : استمر هالوضع اكثر من اسبوع ناس طابه ناس طالعة وبابا كل شوي متعارك وي واحد حتى ظل ما يرجع للبيت عمه حميده كلما تشوفني تحجي علي هذا غير بيبي الي توصل بيها حتى تضربني من تصير عصبيه احتاريت ليش هيج يعاملوني ..الى ان بيوم صارت عركه جبيرة بين بابا وبيبي ما نسمع بس صياح عالي بوكتها عمه اقبال مخلتنه نطلع من الغرفة..اخر شي بيبي تخربطت كلهم راحو يركضون بيها للمستشفى ..كلنا عشنا هالليله برعب وخوف ﻷن ما نعرف شنو صار وياهم
عمه حميدة بس تبجي وهناء تسكت بيها اما عمه اقبال راحت وياهم واحنه ريحانه جمعتنه كلنا بغرفة وحدة ..جانت هوسة وهذا اليكمز وهذا اليسولف بس انا جان گلبي يأذيني رغم جنت صغيرة بس جنت اعرف الايام الجايه مراح تمر على خير ﻷن المشاكل الي جاي تصير سببها انا ... لليل تقريبا ب 10 دخلوا عمامي و وياهم بيبيتي اول ما سمعنا صوتهم طلعنا من الغرفة والبنات كلهن ركضن على بيبي يبوسن بيها بس انا ضليت واكفه بباب الغرفة خايفة اقترب .. بهاللحظه اجت عيني بعين بابا ..ما ادري حسيت بنظرته خايف او متردد  ..كام من يمهم واجه بأتجاهي دخلني للغرفة سد الباب وحضني بكل قوته حسيت اعظامي راح يتكسرن من وراه ..ستوني جاي اكله بابا جاي تأذيني سمعت صوته وهو يبجي ..أسئله بوكتها جانت تدور براسي بس حتى ما اعرف شلون اسأله .. ما عرفت شسوي صعب طفله صغيرة تشوف ابوها بهالحاله..ظليت امسد على ظهره بأيدي .. كافي بابا انا يمك لا تبجي ..هنا صار صوت البجي مالته اقوى لا اراديا من سمعته يبجي ضليت ابجي وياه.. من شافني هيج وگف على حيله وطلع بره الغرفة وانا مستمرة بالبجي ..فززني صوت رعد من دخل
رعد : بخوف .. شكو شبيج تبجين وعمي ليش طلع وهو يبجي
آية : ما ادري..شهگت .. ما اعرف شبي .. اجه بأتجاهي وحضني
رعد : بتنهيدة .. لا تبجين ما بي شي ..ان شاءالله ماكو شي
آية : بيومها نمت والدمعه بعيني الموقف ميروح من بالي ..كعدت الصبح على وكت ..شفت غدير تحوس يم الباب .. وانا افرك بعيوني من النعاس ..غدير شبيج ؟؟
غدير : منتظرة ريحانه تكعد
آية : ليش ؟
غدير : تعاي يمي اكلج
آية : تقربت منها كلش جانت تحجي وياي بصوت ناصي
غدير : البارحه سمعت امي تكول لعمه هناء ..ان جدتي كايله لعمي عماد اذا ما ترجع آية لأمها اتبرأ منك
آية : شنو يعني اتبرأ منك ؟
غدير : يالفهيمه جا انا ليش متانيه ريحانه تكعد غير حتى تفهمني شنو اتبرأ منك
آية : غير انتي تعرفين كلشي ما فهمتي شنو معناها
غدير : لا والله ما سامعه بيها بس جنها شي جبير ﻷن هناء من سمعت لطمت على صدرها
آية : يعني شنو راح يودوني ﻷمي
غدير : لا لا ان شاءالله لا .. آية انا ما اريدج ترحين انا احبج والله
آية : برطمت .. وانا احبكم كلكم ما اريد اعوفكم .. جاي نحجي ودخلت عمه حميدة بأيدها جنطه جبيرة ..التفتت الي
حميدة : هاي غراضج واذا عندج شي بهالغرفة هم اخذي
غدير : ليش تلمين غراضها
حميدة : راح يودونها للبصرة بعد ما ترجع هنا