يحدث بالقرب منا

البارت الاول

#ارجوان 2011 الشهر الثاني... طريق بصرة_ العمارة
آية : فتحت جامه السيارة.. اباوع على المنظر شكد حلو كله زرع وخضار
عماد : بويه سدي الجامه لا تبردين
آية : لا بابا الهوا حلو مو بارد كلش
عماد : براحتج انا علمودج اخاف تتمرضين
آية : شوي واسدها بس يتغير هوا السيارة.. ميلت راسي على مقعد السيارة اباوع لبابا يفتح بالدكم الفوك للدشداشه ويمسح العرگ عن كصته رغم الجو بارد.. يا ترى ليش هيج متوتر.. بابا
عماد : ها بويه آمري
آية : ليش صارلك سنة ما جاي حتى من توفت ماما ما اجيت
عماد : بأرتباك.. بويه جنت مشغول
آيه : انتظرتك هواي تجي ما اجيت بس عمو عدنان اجه حتى من ادك عليك تطول يلا ترد
عماد : حگج علي بويه وهاي انا اجيتج هسه وراح تعيشين وياي
آية : بأبتسامه.. اي الحمد لله بس بعد لا تعوفني اريد ابقى وياك
عماد : بأستغراب.. ليش خالج مأذيج
آية : لا ابد اصلا كلش زين وياي بس وضعه المادي مو زين واحس نفسي مثگله علي وهو عنده كومه بنات
عماد : بهاي عندج حگ.. وهسه نامي ترى بعد ساعه يلا نوصل
آيه : لا ما انام جانت ماما من نروح للزيارة تكول لا تناومون ضلوا احجوا حتى خالوا ما ينام ونسوي حادث
عماد : هههههه معدله على امج الله يرحمها
آية : الله يرحمها ... هواي اسأله عندي ما كدرت اسأله لبابا احسه متوتر واسألتي توتره زيادة.. وصلنا مكان بأطراف العمارة كلها بساتين جنت اباوع على المنظر يخبل.. فزيت على صوت بابا
عماد : بويه اخاف جدتج تسمعج حجي  تحملي لا تردين عليها
آية : جريت حسرة.. هي بعدها تكرهني ؟؟
عماد : لا بوية ما تكرهج هي وي الكل هيج حتى احنه ما سالمين منها
آية : تمام راح اسوي مثل متريد.. وصلنا للبيت .. متغير كلش صاير اكبر وحتى البستان مكبرينه .. بابا هواي مغيرين بالبيت
عماد : اي جا غير كثرنا لازم نكبر البيت حتى يلمنا كلنا
آية : يعني بعدهم كلهم بالبيت
عماد : اي كلنا بعدنا بي
آية : بفرح .. حتى بابا رعد
عماد : ضحك ضحكة بصوت عالي ..خرب بليسج بعدج تتذكرين
آية : ليش تضحك ترى ازعل
عماد : هههه لا كلشي ولا زعلج
آية : بابا جان ينزل بالجنط وبهالاثناء طلع عمي من الباب ..ركضت بأتجاهه وحضنته
عدنان : هلا بسورها ونورها ..نورت العمارة والله
آيه : هههه منورة بأهلها .. تقدم بابا سلم على عمي وكال
عماد : امي عرفت لو بعدها
عدنان : لا ما كلت لأحد ..كلت من تجون وتشوفكم احسن
عماد : الله يستر
آية : جنت اسمع ومستغربة كلامهم ..الله يستر من شنو ؟؟
عدنان : يلا تعالوا دخلوا
آية : دخل عمو وانا وبابا وراه ..اباوع للبيت من جوة كلش متغير وتصميمه حلو .. بعدني جاي امشي وصافنه على البيت وسمعت صوت عالي
فهيمة "ام عدنان" : ولكم هاي منهو وياكم
آية : التفت شفت بيبي كاعدة على كرسي وبأيدها عوجيتها "عكازة" ..عمو وبابا وجههم صار اصفر و واحد يباوع للثاني
فهيمة : ضربت عوجيتها بالگاع.. شبيكم انلصمتم ما تحجون
عدنان : يمه هاي بت عماد آية
فهيمة : بعصبية.. شنهو ياهو الكالكم جيبوها انا مو كلت ما تعتب للبيت شو انتم ما تحشمون احد بكيفكم تلعبون
آية : خفت من حجيها ادري هي ما تحبني من دون احفادها كلهم بس مو هيج ..بابا ضل يفتح ويسد أيده بعصبيه گوة لازم نفسه وعمي يهدي بيها .......
سنة 2000
آية : گعدت من النوم العصر ..گوة افتح بعيني كدما نعسانه شفت ماما انعام  ترضع اخوي الجديد .. ماما جوعانه
انعام : بعصبيه.. روحي منا لا اركع راسج بالحايط
آية : بس جوعانة وين اروح
انعام : وين ما تردين ولي هذيج عمتج وجدتج يبتلن بيج واذا رجعتي هنا اكتلج
آية : طلعت من الغرفة ودمعتي بعيني ..جوعانه شسوي ..رحت للمطبخ لكيت عمه حميدة جاي تشرب چاي .. عمه سويلي اكل جوعانه
حميدة : خااب امداني بت دلال تتأمر علي
آية : ضليت صافنه عليها ليش ما تسويلي اكل ..بهالاثناء هي كامت وانا جنت يم الباب دفعتني وطلعت وهي تدردم علي ..كعدت يم الكاونتر وضليت ابجي ﻷن جوعانه نمت قبل الغده وما ماكله شي من الريوگ
رعد : هاا ام دميعة ليش تبجين
آية : وانا امسح بدموعي .. جوعانة
رعد : ههههه وهاي الدموع كلها ﻷن جوعانه.. تعاي اسويلج اكل
آية : تقدم بأتجاهي وشالني على الكرسي الموجود بالمطبخ ..بدأ يطلع مواعين ويحط بيها اكل ..كمل وحط الصينيه يمي
رعد : وهذا تمن ومرگ
آية : ابتسمت بوجهه وبديت آكل بنهم .. باوعلي ابتسم ورجع لزم كتابه يقرأ بي .. وانا حلگي متروس اكل .. انت هسه يا صف
رعد : صف الثالث متوسط ..ليش تسألين؟؟
آية : من اكبر اريد اصير بنفس صفك
رعد : ههههه بعون الله تصيرين بصفي واكثر من صفي
آية : بعد شكد واروح للمدرسه ؟؟
رعد : بعد خمس اشهر
آية : يحجي ويأشر بأيده..بفرح .. هااا والله يعني بقى شوية
رعد : بأبتسامه.. اي
آية : دنكت على الصحن آكل وانا فرحانه ..شوي ودخلوا العصابه البقية