يحدث بالقرب منا

البارت السادس

#يحدث_بالقرب_منا
غدير : اجو ناس على ريحانه
رقيه : حلفي
غدير : والعباس .. يلا بنات حضرن ملابسجن ورانه عرس
آية : ههههه على كيفج خلي نعرف شنو السالفه بالبدايه .. اباوع بالمطبخ عمه اقبال وهناء وريحانه يحجون ويتناقشون بينهن.. غدير ..غدير
غدير : هاا شكو
آية : ولج شوفي شنو جاي يحجون بالمطبخ
غدير : صدك هذن شكلهن ما يطمن تعاي خلي نشوف شكو
آية : رحنا ركض للمطبخ ..
اقبال : ولج دخلي شبيج النسوان يردن يشوفنج
ريحانه : يمه فدوة ما اريد
اقبال : شلون بيه انا ولج بس قدمي العصير وطلعي
غدير : يمه تستحي ما تشوفينها شلون صارت حمرة
اقبال : انتي بس سكتي وهي تعمر .. ولج يمه يلا لا تشلعين گلبي
ريحانه : يمه خلي وحدة غيري من البنات تدخل
اقبال : ولج هن جايات عليج بعد شنو اطلع غيرج يلا
غدير : اخذت صينيه العصير وحطيتها بأيدها ..يلا خاتون روحي نريد نفرح صارلنا شكد محضرنه اعراس
ريحانه : غدير فدوة مناقصتج
غدير : وانا ادفع بيها ..دروحي هسه روحي .. وصلتها لباب الاستقبال وهي بعدها ترجف ..ولج شمالج قوي روحج شوي هي شيرادلها بس دخلي قدميلهن وتعاي
اقبال : اي مثل ما كالت اختج ..ما يرادلها شي
ريحانه : دخلت وانا ارجف حتى العصير يتجبجب بالصينيه ....
غدير : ضلينه منتظرين بالمطبخ نريد واحد يجي يبشرنه ماكو .. اكلجن تماضر وينها
رقية : شفتها صعدت فوگ احتمال عدها شغل
غدير : حرامات فاتتها ..هسه غير تطلعنه وحده نعرف شصار ما صار .. شوي وطلعت ريحانه ..وهجمنه كلنا عليها ..ها ولج شصار
رقيه : شسمه وامه حلوة لا
سكينه : راونج صورة اله شي
آية : شيشتغل ؟
ريحانه : ولجن صبر شبيجن ..خلي اكعد اخذ نفس
غدير : عوجت حلگي.. عود يابه انخطبت وما ضلت تتحاجه
ريحانه : الحمد لله والشكر ربي بس كلتلجن صبر صرت ما اتحاجه
رقية : هسه عوفيها واحجيلنا منين هو
ريحانه : وياي بالشركه
غدير : حركت حواجبي ..هلا هلا اي وبعد
ريحانه :هههه الي يشوف حركاتج يكول مصاحبته
غدير : حتى لو مصاحبته هم ميخالف بس  كملي عفيه
ريحانه : اي اسمه احمد وبس ما اعرف عنه اي شي ثاني ..هسه امي وبيبي جاي يحققن وياهن عود اخذن بقيه التفاصيل منها
رقيه : ريحانه عليج الله هو حلو لا
ريحانه : اي يابه شكله حلو
رقيه : عليج الله وافقي مدام حلو
آية : هههههه والاخلاق وين صارت
رقيه : تولي اهم شي حلو
آية : وره تقريبا نص ساعه طلعن النسوان ودخلت عمتي اقبال شكلها فرحانه
هناء : ها شصار بشري
اقبال : والله مبينين خوش ناس
وطارن بريحانه طير كل ساعه يمدحن بيها
غدير : يا الله يعني نحضر بدلاتنه
اقبال : على كيفج غير ناخذ رأيي ابوج واخوانج ونسأل على الولد
غدير : يبووو هاي سالفه شكبرها
آية : بهالاثناء طبت بيبي للمطبخ وشكلها ما عاجبها الصار ..التفتت على عمه
فهيمه : بس يجي عدنان تعاي انتي وياه للغرفة
اقبال : ان شاء الله عمه
غدير : اباوع لبيبي من طلعت من المطبخ .. هاي شبيها جنها ما عاجبها
اقبال : ما ادري والله النسوان شكلهن مرتب ومبينات بنات عالم وناس مدري شنو زاعج الحجيه
غدير : الله يستر شكلها راح تخرب الفرحه علينه
رقيه :لا خيه ان شاءالله ما تخربها
غدير : انتظرن وشوفن هاي فهيمه انا عاجنتها وخابزتها اعرف شكلها من تريد تسوي بلوه
آية : هي حجت هيج واجتها ضربه على راسها من عمه
اقبال : ولج السانج ضبي لا انتي  تجيبنه بلوة
غدير : اااخ يمه .. حطيت ايدي على حلگي..هممم سكتنا
آية : اجه بابا وعمامي وكت الغده بس خلصوا بيبي صاحت على عمي.. وعمتي اقبال اخذت رعد ودخلوا وراهم للغرفة ..اما غدير حطت اذنها على الباب حتى تسمع رغم شكد جرتها ريحانه بس ماكو جلبت بالباب ما تقبل تعوفه الا تسمع ..
فهيمه : دريت اليوم جاين لريحانه خطابه
عدنان : بأستغراب.. لا يمه ما ادري
فهيمة : اي وهسه دريت والولد وياها بالدوام
عدنان : خوش نسأل علي ونشوف
فهيمة : بعصبية.. شتسأل علي روح شوف بتك شمصخمه بالشركات ما صارلها شهرين واجه واحد خطبها
رعد : حجيه شهالحجي واذا خطبها واحد من الدوام شني اول لو اخر وحده ..شنو الغريب اذا ولد شاف بنية مؤدبة وياه بالدوام وخطبها
فهيمة : انا عبالكم غشيمه لو ما اعرف شيصير ما يصير هناك كله ولد وبنات ومضحكه
عدنان : الظاهر يا يمه المسلسلات مأثره بيج
فهيمه : ياااا هاي تاليتي فوك ما انبهك على بتك بدل ما تجيبلنه مصيبه فوك روسنا
عدنان : بعصبية .. يمممه صدك جذذذب تحجين عليمن انتي على ريحانه ترى لو كل الدنيا تغلط هي ما اصدك بيها تغلط احجي على غدير رعد فرقد بس ريحانه لا .. شني لازمه عليها لزمه وانا ما ادري
فهيمة : لا لزمتيش بس غير ننتبه على بزريتنا
عدنان : بتنهيدة.. انا لو ما اعرفها عدل ما اخليها لا تدرس ولا تداوم بس اعرف تربيه ايدي شنو وريحانه كلها تشهد بأخلاقها لو نسيتي شكد اجوها من الكليه بس ﻷن جانت محجوزة ﻷبن عمتها رفضنا .. التفت على اقبال ..سألتي البنيه موافقة لو لا
اقبال : اي كالت الي تشوفونه
عدنان : خوش جا بويه رعد باجر تسأل عن الولد وتشوفه منين ما منين
فهيمه : بعصبية.. شو انتم تلعبون بكيفكم انا كلتلكم مرايدته الها
عدنان : جا شرايده يا يمه شرايده
فهيمة : احنه ما نطي بناتنه لغربة
عدنان : بأستغراب.. يعني تردينها المن ؟؟
فهيمة : لكرار
رعد : عقد حواجبه بعصبية.. يا كرار تقصدين حجية ؟
عدنان : اووكف اووكف بس خلي افهم ..كرار ابن سهير قصدج ؟
فهيمة : اي شبي ابن عمتها اولى من الغريب
عدنان : بالعباس يمه انتي بيج شي ..ياااا كررررار هذا الابوه لعب علينه وخذه گاعنه لو غيررره اناا احط ايدي بعد بيده مسودن شمالني
رعد : بوية هسه عوف ابوه الولد تزوج وراح لحال سبيله
فهيمه : شمالكم گبيتوا عليه فرد گبه واذا متزوج اول لو اخر واحد ياخذ نسوان اثنين
عدنان : وبتي شناقصها حتى تاخذ واحد متزوج
فهيمة : يمه ابن عمتها اولى من الغريب والولد شاريها وقبل لا يتزوج كال انا رايدها بس ابوي سدها بوجهي
عدنان : يمه انا اعرف تردين تسوين هذا كله علمود تتصلح علاقتج برجل بتج ويخليها تزورج ..بس لو امووت ما اصلح علاقتي بهالحرامي وبتي طلعيها من السالفه كلها
فهيمة : وانت شمدريك يجوز بتك رايده ابن عمتها
عدنان : اللهم صبرج يا روح.. ريحاااانه ..ريحااانه
آية : احنه كاعدين كلنا بالمطبخ وغرفة بيبي صايرة كبالنه وغدير الوحيدة يم باب الغرفة تتسمع ..وكل شوي يا لاطمه على خدها يا تسوي حركه بحلگها لو بأيدها خلتنا نتوتر ومن نصيحلها تسويلنه حركه الصبر بأيدها ..لحدما صاح عمي على ريحانه اجت طايرة تركض ..ريحانه ابوي يصيحلج
ريحانه : ليش ؟؟
غدير : روحي روحي تستقبلج البلاوي جوه
ريحانه : دخيلك يا ربي لا تخوفيني
غدير : درروحي هسه روحي
آية : لزمنه غدير حتى تحجيلنه .. ولج احجي شكو شصاير
غدير : من اكلجن فهيمة ما وراها بس المشاكل ما تصدكن ....
ريحانه : دخلت عليهم اباوع بالوجوه امي ما عوزها بس تبجي وابوي مبين علي عصبي .. هاا بابا صحتلي
عدنان : بويه انتي رايده ابن عمتج ؟
ريحانه : بأستغراب.. يا ابن عمتي؟
عدنان : كرار
ريحانه : لا
فهيمة: يعني انتي ما رايدته هسه ولا گبل
ريحانه :انتوا من گلتوا كرار لريحانه قبل جنت صغيره ومحد اخذ رأيي اصلا وافقت احتراما لكلمتكم وكلت ابن عمتي اولى من الغريب وانا الله شاهد ما شايفة علي شي مو زين ..بس وره السواه ابوه اصلا خفت اصير جنتهم يعني اب مثل هذا لا همه بته ولا ابنه راح اهمه انا
شلون راح اعيش وياهم
عدنان : سمعتي جوابها هي ما رايدته
فهيمة : بس الولد رايدها
عدنان : بعصبية.. واحنه شعلينه بي واحد ما عنده كلمه ابوه زوجه غصبا عنه شلون راح يداري بتي
فهيمه : واذا هذا الاجاها سمع بيها جانت محجوزة ﻷبن عمتها وفركشت ما راح يكول شنهي الصار عبالكم يقتنع بسالفه الگاع راح يحجون هو واهله اشكال والوان عليها عبالكم تتهنى وابن عمتها نفسه بيها
عدنان : رحمه ﻷهلج يمه كافي احنه نكول للولد عجبه عجبه ما عجبه الله وياه
فهيمه : انا اكول اطوها لكرار احسن وحتى بيت بحدها لا ابوه ولا مرته
ريحانه : بيبي هو متزوج اروح اخرب على مرته ليش
فهيمة : كولي انتي مصاحبه الولد الاجاج وما ترضين اله هو
عدنان : بعصبية. . يممممه لا تحجييين هيج حجي وانا واگف
فهيمه : اي طمطم الها لحدما تشوف بعينك بعدين
عدنان : ششوووف يمه رحمه لله ششوف
ريحانه : تحجي والحجاية تدگ بگلبي اذا بيبيتي تحجي هيج الله العالم الناس شتكول ..ابوي من جهه وهي من جهه صاير صايح اله اول ما اله تالي .. طكت روحي اتمنيت لا احد اجه ولا خطبوا اخر شي كلت انهي هالنقاش احسن .. بيبي هاي هيه انا ما موافقة على الولد والله ما بينا شي وهاي كدامج وكدام ابوي انا ما اريده وبالنسبة لكرار لو يبقى اخر واحد ما اقبل بي .. خليتهم وطلعت على غرفتي گبل ...
غدير : شفنه ريحانه من طلعت وشكلها ما يطمن ابد .. يبووو شكلها علگت
آية : خطية ولج روحي وراها شوفيها
غدير : تعاي وياي نشوفها انا بهيج مواقف ما اعرف شسوي
آية : يلا تعاي.. دخلنا للغرفة لكيناها لازمه اللابتوب وتشتغل بي
غدير : ريحانه شنو صار
ريحانه : مصار شي بس رفضت الولد هاي هيه
غدير : ليش ؟
ريحانه : غدير حبابه روحي منا عندي شغل
آية : باوعت على غدير اشرلتلها حتى نطلع .. بهالاثناء دخلت عمتي اقبال باوعتلنه وبعدين حجت
اقبال : يمه ريحانه ابوج يكول راح نسأل عن الولد ما الج علاقة بحجي بيبيتج
ريحانه : لا يمه ما اريده بعد
اقبال : يمه خوش قسمه ليش تضيعينها من ايدج
ريحانه : تعبت يمه والله تعبت اذا صدك عرف بسالفه كرار شراح يكول والمشكله الاكبر اذا كرار عرف انا انخطبت حسب حجي بيبي مراح يسكت هم يسويله مشكله لو يحجي للولد غير شي
اقبال : ونبقى طول عمرنه خايفين من هالسالفه
ريحانه : يمه انا هيج مرتاحه حبابه لا تضغطين علي
اقبال : لا اله الا الله.. براحتج يمه
آية : طلعت عمتي وانا وغدير وحدة صافنه بوجه الثانيه ..اباوع على ريحانه ممهتمه او تمثل انها ممهتمه ..اول ما طلعنا من غرفة
غدير حجت
غدير : الله لا يوفقج يا فهيمه
آية : حطيت ايدي على حلگها ..ولج لا يسمعج احد
غدير : وخرت ايدها ..خلي يسمعون ..ولج هاي عمتج بارت ومحد گلبها من سوالف فهيمه هذا ما نريده وهذاك ما يناسبنه وهذا ما نعرفه والقريب اولى وهسه عمرها طك بال50 بعد ياهو اليجي عليها وهسه حولت على ريحانه
آية : افففف هسه شلون والله كسرت خاطري مسوية روحها ممهتمه
غدير : هي هيج تضم بگلبها دوم ما يبين عليها .....
آية : وره الصار ..صعدت فوك لكيت شكد رسائل من بلال ..يبوو اليوم ما اتصلت ..رمشت علي شوي ودك
بلال : وين صرتي شكد انتظرج
آية : اعذرني حبيبي والله انشغلت جوة وي البنات
بلال : اهاا انشغلتي ونسيتيني مو جا روحيلهم يفيدنج اكثر مني
آية : شهالحجي بلال عفيه والله ما كدرت اصعد
بلال : ماشي هالمرة سماح بس اذا نعادت صدكي مراح اسامحج
آية : ههههه اوعدك مراح تنعاد
بلال : اي كليلي حبيتي العطر
آية : اي كلش حلو كلما احط منه اتذكرك
بلال : ههههه هو المطلوب ...
ريحانه : ثاني يوم رجعوا الرفض للنسوان بس انا يومين مرحت للدوام نور وكوثر شكد دكن علي بس ما جنت ارد حتى فكرت اعوف الدوام كله .. بس قويت روحي ما تسوه اعوف شغلي علمود هيج سالفة رحت ثالث يوم ..دخلت للمكتب جانن البنات موجودات ..صباح الخير
نور : هلا والله صباح النور ولج وين صرتي ظل بالنه عليج
ريحانه : هيج شوي تعبانه
كوثر : تعبانه عيني ليش متردين على تلفوناتنه
ريحانه : ما انتبهت التلفون مجان يمي
نور : على العموم الحمد لله على السلامه استاذ توفيق كل ساعة يسأل عليج
ريحانه : هسه اكمل الاوراق واروحله ..جنت اشتغل ومندمجه فززني صوته من صاح بأسمي
أحمد : ريحانه !!
ريحانه : بلعت ريگي.. اهلا احمد ..جاوبته ونزلت راسي اكمل
احمد : ممكن من وقتج كم دقيقة على انفراد؟
ريحانه : عندي شغل ما اكدر ..حجه بصيغة امر
احمد : ريحانه رجاءا
ريحانه : باوعتله شكله عصبي .. رجاءا انت عندي شغل لا تعطلني
احمد : جر حسرة بقوة .. نور كوثر ممكن شوي تعوفنه 5 دقايق بس
ريحانه : رفعت راسي اباوعلهن بتوسل ما يطلعن ..بس نور ما اهتمت طلعت وسحبت كوثر وياها ..بس طلعن سد الباب وانا اباوع على كل حركه يسويها بخوف خفت لا يسويلي شي ..اجه سحب كرسي وكعد دار الكرسي مالتي علي صرنا واحد مقابيل الثاني ميفصل بينا شي
احمد : احجيلي ليش رفضتي بيه شي سألتوا عني وكالولكم شي
ريحانه : هزيت راسي ب لا وانا مدنگه ما كدرت ارفع راسي
احمد : لعد ليش ها مو اجيت من الباب
ومطلبت اي شي منج ولا تعرضتلج ولا سويت شي ليش اريد سبب يريح گلبي
ريحانه : حجيت بصوت يرجف .. السبب مو منك مني انا
احمد : بأستغراب.. شبيج انتي ؟
ريحانه : سكتت ما حجيت شي
احمد : غير تحجين شنو السبب يجوز انا ارضى بي ما يصير تعوفيني هيج .. ريحانه لا تسكتين رجاءا لا تسكتين
ريحانه : ضليت افرك بأيدي من الخوف ..اريد كلمه تطلع ماكو ..من شافني هيج ضرب على المكتب بعصبية
احمد : ااااحجي ليييش سااااكته
ريحانه : كمزت كمزة اباوعله حتى عيونه حمر خفت منه كلش
احمد : احجي لا تمرمرين گلبي
ريحانه : بأرتباك.. انا جنت مخطوبة يعني مو مخطوبة بس محجوزة ﻷبن عمتي
احمد : اي كملي
ريحانه : بلعت ريگي وكملت .. صارت مشاكل بين العائلتين وتفركشت الخطوبة كلها قبل عقدنه بيوم
احمد : اي كملي
ريحانه : هاي هيه خلصت
احمد : بأستغراب.. علمود هيج رفضتي
ريحانه : اي كلت من تعرف اكيد راح تكول ليش انخطبت وتفركشت وغير هذا خفت ابن عمتي يسوي مشاكل من انخطب
احمد : يعني قصدج هو بعده لحد هسه رايدج
ريحانه : ما ادري هو تزوج بس قبل لا يتزوج هو كايل لبيبي انا رايدها ..رفعت راسي .. اكول لو تاخذ وحدة ما وراها مشاكل احسن ما تدوخ راسك من وراي
احمد : يجوز انا احب المشاكل ..انتي تتصرفين من راسج وترفضين ليش
ريحانه : بتنهيدة.. محد يحب المشاكل.. ظل يباوعلي بعدين گام وطلع .. شوي وطبن نور وكوثر ما حجن شي بس يباوعن ..رجعت اكمل شغلي بس ايدي ترجف كوة الزم الاوراق .. كملت ورجعت للبيت بعدها ما شفت احمد ابد ..وره يومين اجه فرقد لبابا يركض
فرقد : بويه اكو زلم 3 جايين ووياهم كرار
عدنان : بأستغراب.. كرار شيريد
فرقد : ما ادري
عدنان : صيح لعمامك علما اطلعلهم
فرقد : ماشي
ريحانه : طلع وانا ايدي على گلبي كرار شجابه وشيريد ..طلعت للصاله الجبيرة لگيت النسوان والبنات كلهن مجتمعات كعدت يم امي .. يمه شكو شصاير
اقبال : يمه حالي حالج منتظرين ابوج يجي يفهمنه
تماضر : لا تخافن غدير راحت تشوف شكو
اقبال : دهر صابها راحت للديوان منين تسمع
تماضر: من الشباك الخارجي عمه
اقبال : هسه من يلزمونها شحجي شكول
تماضر : عمه خليها تسمع احسن ما نظل ناكل بروحنه هنا
ريحانه : شوي واجت غدير بس شنو الضحكه شاكه حلگها والطريق كله خلصته تهز جتف ..ركضلها البنات بسرعه
تماضر : هاا ولج شنو صار احجي
غدير : اوكفن شوي خلي ارتاح
ريحانه : بعصبية.. احجي مو گلبي انبط يلا
غدير : ههههه والعباس شكلج يضحك وانتي عصبية
ريحانه : احجي ولج
غدير: خيه الي جايين نفسه الولد الخطبج وابوه وعمه
ريحانه : بأستغراب.. قصدج احمد
غدير : اي عفيه احمد
ريحانه : وكرار شيسوي جاي وياهم
غدير : جايتج بالحجي حبيبه .. خيه هو رايح لكرار كايله انا اريد اخطب بت خالك وانا اعرف جنتوا محجوزين بس مصارت وانا سألت البنيه اخاف بعدها تريدك كالت ما اريده وانت هم متزوج ما اعتقد بعد تريدها ..كايله لا حقها تتزوج مثل ما انا تزوجت وشفت حياتي ..فأحمد طالب منه يجي وياه ويحجي هالحجي كدام ابوي وعمامي حتى ما يبقى اي احد عده اعتراض
ريحانه : اي وشصار بعدين
غدير : ما ادري خيه اجيت حتى احجيلجن
اقبال : هالولد لوما يحبج ما سوه كل هذا حتى نوافق
ريحانه : استحيت من حجي امي .. خليتهم ورحت لغرفتي
غدير : يا ربي اليوم الالي واذبح طلي
اقبال : استحي عيب هالحجي شمالج
غدير : ادري مو دوم تكولون ان شاءالله تعرسين ونفتك منج ومن اكول ان شاءالله اعرس تكولون استحي ناس عجيبه ما عدكم حجاية ثابت
اقبال : هو انا اكدر على السانج شو كومي منا كومي
غدير : گايمين ...
آية : وره ما طلعوا اجوا عمامي وابوي وشكد مدحوا بيه وبأهله بيبي ضلت ساكته ما حجت شي خاصه بعد ما سمعت بجيه كرار بس مبين الوضع معاجبها .. عمي كال العمتي تسأل ريحانه حتى نسأل علي ونرد الموافقة وهي وافقت بوقتها ..وره اسبوع بالضبط رجعوا الموافقة الهم اجت امه وعماته وحددن موعد العقد ..بوكتها انخبصنه خبص بالتحضيرات وتنظيف البيت .. بيوم الخطوبة جان عندي انا وغدير امتحان انكليزي حاولنا ناخذ اجازة بس المديرة ما قبلت كالت امتحنن وروحن ..رحنه نمتحن والدرس الثاني اجه رعد علينا ياخذنه والطريق كله خلصته غدير تغلط على المديرة ومدرسه الانكليزي .. كملنا بقيه الترتيبات وحضرنه روحنه ..ب3 اجت ريحانه من الصالون جانت طالعه تخبل هي منا حلوة ومنا مكياج وتسريحه .. شوي واجو اهل العريس وبدأت الهوسات والركص وغدير وياهن تسحبها عمتي وترجع تركص .. عقدوا وصاحوا ﻷحمد يلبسها الذهب ..اباوعله يباوعلها وطاير بيها طير وهي مستحيه ولا رفعت راسها كل شوي مشاورها ويضحك ..خلصوا تلبيس وطلع العريس واهله ..وبقينه بس احنه لعبنا لعب بالركص وكل شوي نگوم ريحانه تركص ..تعبنا وكعدنا نرتاح انا وغدير تقدمت بأتجاهنا وحدة ما اعرفها مبينه اكبر مني بسنتين او اكثر
مها : هلا غدير شلونج
غدير : هلا بيج الحمد لله انتي شلونج
مها : زينه ..اكلج انتي آية ؟؟
آية : بأستغراب.. اي انا آية ..ضلت تباوعلي من بطرف عينها معاجبها
مها : شدعوة سمينه هلكد حبي سوي رجيم شي
آية : بعدني اريد ارد عليها استلمتها غدير
غدير : ليش زاعجج سمنها ماكله من صحن الخلفج حبيبتي واحنه مندري .. على الاقل هي سمينه بس جسمها متناسق الا انتي جسمج مفصص تفصص بكل جهه عندج كرش شدعوة هيج سوي كص شحوم شي خطيه هذا اليتزوجج ياخذج كلج تعرجات سهول وجبال ..التفتت على آية ..يلا عيني كومي نركص ونتونس
آية : لزمت ايدي وجرتني وياها ..ليش رديتي عليها تولي عوفيها
غدير : هيج نماذج لازم نرد عليهن حتى يعرفن حدودهن هسه لو حلوة لو جسمها حلو ميخالف ما نگول شي بس جنها هايشه وتقلد والله يا الله ..وبعدين انتي تعرفين هاي ياهي
آية : لا منين اعرفها
غدير : هاي اخت انعام الصغيرة
آية : اهااا هنا رباط السالفه
غدير : اي عيني .. يلا عوفيها وخلي نتونس قابل كل يوم عدنه عرس
آية : بيومها صدك تنونسنه والبنات كلهن ويانه كملنا الحفلة ورجعنا انظف البيت من الهوسه ..لليل شمرت روحي على الجربايه من التعب رحت بسابع نومه.. ثاني يوم رحت للمدرسه وانا كلشي مادارسه لاگيت بلال بالطريق مثل كل يوم اول ما شفته ابستمت بس هو دار وجهه بعصبية استغربت تصرفه.. هذا شبي ..دخلت للمدرسه وانا عقلي يمه بس شفت رفاه ..حاجيتها ..اكلج شبي اخوج
رفاه : شبي ؟
آية : ما ادري شكله عصبي مو مثل كل يوم
رفاه : شمدريني
آية : بقيت بحيرة اليوم كله من طلعنه نفس الحاله حتى مباوع بوجهي .. رجعت للبيت قبل لا ابدل لزمت تلفوني هواي مرمش علي البارحه وهواي رسائل منه .. يووو بس لا ﻷن ما رديت علي البارحه ..رمشت علي ..ما دك ..رجعت دكيت علي مرة مرتين الثالثه يلا رد ..الو بلال وينك
بلال : شتردين روحي كملي حياتج وبعدين عود ذكري بلال شوفي البارحه شكد داك عليج
آية : شنو هالحجي بلال الله يخليك والله البارحه من التعب نمت بسرعه حتى ما شفت التلفون
بلال : ومن رجعتي من المدرسه ما كلفتي روحج حتى تفتحين التلفون
آية : جان اكو ناس وخطار هواي ما كدرت والله
بلال : ورعد شعندج وياه
آية : بأستغراب.. شعندي وياه كلشي ماعندي
بلال : بعصبية..و ليشششش يوصلج
آية : جان عندي امتحان وما قبلوا يطلعوني الا واحد من اهلي وبعدين مو لوحدي وياي غدير شبيك بس لا تغار منه
بلال : شنو اغار منه ؟.. هو منو واغار منه
آية : اي بعد شبيك
بلال : ما اريد اي احد يجي يمج لا رعد ولا غيره
آية : ان شاء الله بعد تريد شي
بلال : شو جنه معاجبج
آية : لا عاجبني والله.. ماكو داعي تسوي
مشاكل على اي شي
بلال : وبعد تدكين علي حتى لو جنتي مشغوله
آية : ان شاءالله بعد
بلال : بعد احبج
آية : عضيت شفتي بقوة ..وانا همين
بلال : اروح فدوة انا ..يلا احجيلي شنو  سويتي امس ....
ريحانه : ثاني يوم اجه احمد علي ورحنه سوه للشركه ..كل مكان نمر منه يجون يباركون .. اخر شي وصلنا لمكتبي
احمد : سلااام
نور : هلا والله مبرووك يا عرسان
ريحانه : الله يبارك بيج حبيبتي
كوثر : مبرروك
ريحانه : الله يبارك بيج يا عمري
احمد : يلا انا رايح لا انطرد من وراج
ريحانه : ههههه ماشي الله وياك ..ضل يباوع بوجهي مستغرب ..شكو شبيك
احمد : شوكت نتزوج
ريحانه : ياا روح روح لا تنطرد
احمد : هههههه باي
ريحانه : باي .. كعدت بالمكتب اشتغل ونور كل شوي تباركلي وتمدح بأحمد ..لحدما طلبها استاذ توفيق ..بس طلعت اجت كوثر يمي
كوثر : بالعافيه عليج عرفتي شلون تفرين راسه
ريحانه : بأستغراب.. شنو هالحجي الي يسمعج يكول جنت افتر وراه كدامج هو جان يحاول وانا جنت اصده بعد شنو افر راسه.. ابتسمت بأستهزاء وراحت لمكتبها .. استغربت حجيها  هاي شبيها مخبله لو شنو ....
آية : مرت الايام وخلصنا امتحانات نهايه السنه وراها بكم يوم رحنه للزيارة كلنا ما عدا ابوي وعمي علاء ورعد بقوا علمود البستان والمحلات ما يكدرون يعوفونها حتى ميثاق وفرقد عطلوا واجوا ويانه رغم امتحاناتهم جانت بعدها مباديه .. اول شي رحنا للنجف زرنا ورجعنا للمقابر شفتهم شلون زاروا گبر جدي كلهم ..شفت عمي على جهه ..عمو اريدك بشي
عدنان : تدللي بعد عمج
آية : اريد ازور گبر امي
عدنان : تآمرين بس خلي ادك على خالج ﻷن ما اندل گبرها وين
آية : ماشي ..دك على خالي واندل المكان عافهم يقرون قرآن لجدي واخذني ﻷمي بس شفت الگبر طحت علي وبس ابجي بقيت شكد فرغت الي بداخلي كله اريد احجي اكلها على بلال وعلى حياتي بس ما كدرت عمي منا
عدنان : بنيتي هاج هذا القرآن اقريلها شي واذا تردين انا اقرالها
آية : لا انا اقرأ ..بديت اقرأ وابجي لحدما دكوا على عمي صدقت وكمت وياه .. شكرا عموا
عدنان : بويه ما سويت شي
آية : رحنا لكربله ..اجرنا بيت حتى يكفيلنا ما رحنا للفنادق ﻷن بيبي لا بيها تصعد درج ولا تنزل البيت جان اريحلنا كلنا ..من التعب كلها شمرت روحها بالفراش ..كعدت من النوم اباوع للبنات بعدهن نايمات ..طلعت من الغرفة للحمامات ..سمعت اصوات جايه من المطبخ ..تقربت من الباب حتى اسمع ..
ميثاق : وحق الله يا تماضر هذا اخر تحذير الج
تماضر : شبيك ترى ما مسويه شي انا
ميثاق : عيونج اشلعهن الج بعد اذا شفتج تباوعيله
تماضر : ما باوعت عن قصد هيج صدفه صارت
ميثاق : بعصبية.. ولج شنو شايفتني اثول ما افهم ترى الطير الطاير اعرفه وين يباوع فاهمه لو لا واكثر من مرة الگفج بعد مرة ثانيه العب بيج طوبة خوش
تماضر : خوش
ميثاق : شو جنه معاجبج
تماضر : اكلك انت شنو تدور على عركه لو شنو كتلك خوش شكلت انا هاي هيه بعد ما اباوع
ميثاق : هالمرة حجيت المرة الجايه ﻷبوي گبل هو يتصرف وياج
تماضر : نزلت راسي.. ماشي
آية : بعدني جاي اسمع وانفتح الباب صار ميثاق بوجهي
ميثاق : بأستغراب.. آية !!..شتسوين هنا
آية : بأرتباك.. اجيت اشرب ماي
ميثاق : اهاا
آية : دخلت للمطبخ وانا اغم بروحي كله من غدير علمتني على هالعادة ..اباوع لتماضر دموعها بعينها خطيه هاي صار كم مرة يلگفها ميثاق .. وره ساعه طلعنا نزور ..زرنا وتعشينه ورجعنا للبيت .. ثاني يوم هم بقينه بكربله زرنا ورحنه نتسوگ اشتريت هدايه لبلال سبحه ولرفاه ساعة
غدير : هاي السبحه المن
آية : بأرتباك.. هاا ﻷبوي
غدير : عبالي مصاحبه وتشترين هديه لصاحبج هههههه
آية : فكيت عيوني وضليت صافنه بوجهها
غدير : خايبه شبيج صفنتي اتشاقة وياج
آية : ابتسمتلها وانا ميته خوف عبالك صدك كشفتني حتى ايدي كامت ترجف.. واحنه جاي نشري جانت اكو مريه جبيرة بالعمر هم تشتري من ابو المحل كل ساعه تباوع على ريحانه تنزل راسها وترجع تباوعلها..ريحانه مجانت منتبه تفتر بالمحل هي وغدير وانا وعمه واكفين يم المرة.. المرة تقربت من عمتي اقبال وسألتها
المرة : هاي بتج ؟؟
آية : جانت تحجي وتأشر على ريحانه ..عمتي جاوبتها بأي
المرة : الله يحفظها الج .. ديربالج عليها هاي گلبها يتلوع لحدما يگول بس ..ديربالج عليها! !!...يتبع
#ارجوان