يحدث بالقرب منا

البارت التاسع

#يحدث_بالقرب_منا

نور : المحطه مالت الكهرباء صار بيها انفجار ويگولون احمد موجود بداخلها
ريحانه : بخوف.. نور شجاي تحجين انفجار شنو ..احمد ..احمد بي شي فدوة احجي
نور : ما ادري گالوا موجود من صار الانفجار ..
ريحانه : بعدها ممكلمه شمرت التلفون و ركضت اصرخ للصاله ..يمممممه ..يمممممه
غدير : جنه كاعدين نسولف على التحضيرات مالت العرس ودخلت علينه ريحانه تصرخ وترجف شكلها يخوف كلنا گمنا على صوتها
اقبال :ركضت عليها.. يمه اسم الله شبيج شكو
ريحانه : يمه احمد .. احمد
اقبال : ولج شبي احجي
غدير : بعدها ما حاجيه وطاحت من طولها ..كلنا ركضنا عليها
اقبال : بعياط.. اسم الرحمن يمممه ريحااانه كووومي ....
ريحانه : فتحت عيوني بالمستشفى ..امي وابوي ورعد يمي.. صحت بصوت كوة يطلع .. يمه احمد ..احمد وينه ؟ ..شفتها غطت وجهها بعباتها وكامت تبجي ..حجيت بصوت يرجف ..يمه شبيج احمد بي شي حبابه كولي شي ..بس لا ..بس لا مات عفيه كولوا لا
عدنان : لا بويه ما مات
ريحانه : عفيه بابا لا تجذب عليه فدوة
عدنان : بويه انا يمته مجذب عليج والله ما مات بس...
ريحانه : بس شنو بابا ليش سكتت
عدنان : محترگ جسمه كله من الانفجار
ريحانه : سمعت هيج وشهگت شهگه احسها زرفت گلبي .. لا بابا لا حباب كول غيرها ..بجيت ..حباب شلون يعني شنو  محترگ فدوة كول غير شي
عدنان : بويه نسبه الحرگ 40 % كالوا نسبه شفائة عاليه انتي بس ادعيله
ريحانه : هو حجه هيج وانا ظليت ابجي واشهگ بخنگه علي .. عفيه ودوني اله الله يخليكم
رعد : هو بغير مستشفى مو هنا
ريحانه : ميخالف رعد حباب اخذوني يمه اريد اشوفه
عدنان : لا اله الا الله.. بس خلي يجي الدكتور نشوف التحاليل والاشعه مالتج ونروح
ريحانه : بجيت ..ما بيه شي والله بس ودوني يمه
عدنان : بعصبيه ..شني ما بيج شي وانتي صارلج 4 ساعات فاقده ضلينا واحد يردم بالثاني ما نندل راسنا من رجلينا
ريحانه : ضليت ابجي بس اريد اروح يمه كلشي ما اريد حتى روحي ما اريدها .. شوي واجه الدكتور
الدكتور : شلونج بنيتي ان شاءالله احسن
ريحانه : الحمد لله زينه
الدكتور : الحمد لله ..بابا انتي هم تحسين بوجع بگلبج
ريحانه : مرات احس بنغزات بس
الدكتور : هز راسه بأسف وظل يباوع للتحاليل.. بتكم عدها ضعف بالقلب وصارله فترة طويله عدها
عدنان : دكتور شجاي تحجي عمرها كله ما اشتكت من شي
الدكتور : يا اخي انا ما جايب هالحجي من جيبي التحايل والاشعه هي تثبت هالشي ..انا كتبتلها ادويه تستمر عليها بس اهم شي ما تتعب نفسها
سواء نفسيا او جسديا ...التفت على اهلي ..عدها العافيه
ريحانه : طلع الدكتور وامي انهدت بالبجي
اقبال : اااه يا يمه شنو شفتي من حياتج وكل هذا يصير بيج
عدنان : استهدي بالرحمن كلشي ما بيها البت ان شاءالله تكوم وتصير احسن
ريحانه : بابا يمته نروح نشوف احمد
عدنان : بعد ابوج الدكتور كال مو زين عليج واخاف تشوفينه وتتخربطين
ريحانه : لا بابا والله ما اتخربط اقوي روحي بس اخذني الله يخليك
عدنان : لا اله الا الله.. ام رعد ساعديها حتى تكوم ..ومن هسه اكلج تشوفينه شوي ونرجع
ريحانه : ميخالف ميخالف بس اخذوني
رعد : اخذت ابوي على جهة .. بويه صدگ راح تاخذها هاي تموت علينا هناك والله
عدنان : جا ما تشوفها راح تموت روحها ..خلي ناخذها بلكت يرتاح كلبها وتسكت
رعد : والله ما اظن تسكت
ريحانه : خلصت وطلعنا بالسيارة ..وانا گلبي يوجعني علي خايفة اشوفة .. وصلنا للقسم البي هو واشوف اهله كلهم واصدقائه ..رعد لزمني وخلاني وراه
رعد : من يرحون العالم شوفي
ريحانه : لا حباب اريد هسه
رعد : خزرتها بعصبية.. ولج وين تشوفينه ما تشوفين العالم الموجودة هو لو موجود جا خلاج ادخلين بنص الناس ؟
ريحانه : برطمت ونزلت راسي ..لا
رعد : جا ظلي هنا لحدما تخف العالم
ريحانه : ضلينا كاعدين انا ورعد بعيد عنهم اما امي وابوي راحوا سلموا عليهم ..اشوف امه شلون منهارة وتصرخ ..يتوسلون بيها تعوف المكان بس ما تقبل ..وره اكثر من ساعه يلا خفت الناس ظلوا بس اهله
رعد : يلا كومي
ريحانه :من حجه هيج احس رجلي ثگلت ..گوة مشيت ..رحت شفته بس من الباب وبي جامه صغيرة نباوع منها ما يقبلون ندخل حتى لا يتلوث المكان .. اباوعله متمدد وجسمه كله ملفلف بس شفته احس نفسي ضاگ هذا ابو طول الحلو هيج متمدد دموعي ظلت تجري وحدها حطيت ايدي على حلگي وكمت اصرخ بصوت مكتوم
ام احمد : اااخ يا يمه ادعيله فدوة حبيبه ادعيله بلكت الله يفرجها علي وعلينا
اقبال : ان شاء الله يكوم بالسلامه وتشوفينه عريس بحق الحبيب المصطفى
ام احمد : الله يسمع منج .. الله شاهد شكد جان يحبها وروحه بيها ويتاني يوم عرسه يوم يوم ..التفتت على ريحانه ..لا تنسينه من الدعاء بداعه اعزاز كلبج
ريحانه : هي حجت هيج وانا كعدت بالگاع ابجي بحرگة
عدنان : بويه ما يصير هيج تسوين الولد بعده عايش ومحتاج دعائج قوي روحج علموده
رعد : يلا كومي وياي نرجع
ريحانه : لا حباب خليني هنا اخاف يكعد وما يلگاني
رعد : صك على سنونه بعصبية ..ريحاانه وين تبقين
اذا گعد يگلونه واجيبج والله بس بقائج هنا ما اله داعي
عدنان : حجي اخوج صحيح ..كومي بعد ابوج
ريحانه : كمت وياهم غصب عني وعيني على الباب مالت الغرفة .. الطريق كله خلصتها بجي رجعت مسكورة للبيت  ما بيه حيل حتى روحي...
آية : من سمعنا بالخبر كلنا انقهرنا علي ما يستاهل الي صار بي ..انقهرت اكثر شي على ريحانه شلون حالها هسه .. لليل محد حط بحلگه لگمه كلها منتظرة خبر ..شوي وطبوا ووياهم ريحانه لازمها رعد من كدما باجيه ومكسورة ما باوعت حتى بوجوهنه ..گبل ودوها لغرفتها ..
فهيمه : ها شصار بالولد
عدنان : بتنهيدة.. والله وضعه يصعب على الكافر محترگ كل جسمه بس كالوا احتمال جبير يتشافه وبعد بقت يم ربج
فهيمة : انا من البدايه كلتلكم ما رايده هالزواج بس كلها اعترضت
عدنان : يمه مو وكته هالحجي البنيه وضعها كلش تعبان وعدها ضعف بالگلب رحمه لموتاج يمه لا تحجين هالحجي كدامها ما ناقصها وروح ابوي
آية : حجه هالحجي دمعت عيونه وكعد على القنفة
عماد : خوية استهدي بالرحمن اذا انت هيج حالك جا ياهو اليوكف وي بتك
عدنان : خايف الولد يصير بي شي وهاي ما تتحمل والله
علاء : ان شاءالله يگوم بالسلامة ادعوله ليش تفاولون علي
عدنان : ان شاءالله ان شاءالله يصير احسن...
غدير : استمر هالوضع اربع ايام ريحانه مخلصتها بجي كل يوم افز بالليل الگاها على السجادة تدعي وتبجي والله گلبي انكسر عليها لا اكل لا نوم مثل العالم تتوسل بالولد حتى ياخذونها اله وهو ماكو اي تحسن بحالته...
ريحانه : جنت كاعده بالمستشفى ويمي ابوي تمنيت بس يحجي ولو كلمه ماكو اسمع بس ونينه وابجي وياه .. الغرفه محد يدخللها بس الدكاترة والممرضين امه شكد توسلت بيهم بس مرة وحده خلوها وانا ابد ولا مرة بس من هالشباك الصغير اشوفه يتحرك
ابو احمد : حاجيت واحد من ربعي بأيران كال جيبوا هناك ابن اخته هم نفس الحاله وعالجوا
ريحانه : يعني شنو ما يكدرون يعالجونه هنا
ابو احمد : والله يا عمي ما اجذب عليج هالصارله 4 ايام وماكو شي ترى الحرگ ماله 40% يعني المثل حالته يحجي وحتى مشي هم يمشونه شو ابني كلشي ماكو ما اخلي بعد لحدما تنتكس حالته
عدنان : انا من رايك ابو احمد انا شايف هواي وادم راحت هناك وتعالجت
ريحانه : عمو يعني شوكت تاخذونه
ابو احمد : والله من اليوم راح نجهز للسفر ونحاجي الدكتور ونتفق على الموعد بعد نشوف شوكت نتيسر
ريحانه : اهاا ..ان شاءالله يتعالج ويصير احسن من قبل .. احجي وگلبي يأذيني علي صدك راح ياخذونه بس معناها بعد ما اشوفه واكيد اهلي
ما يقبلون اروح وياه .. بيومها رجعت ميته تعب وقهر گبل رحت للفراش ..احس جسمي ما بي قوة بعد .. للمغرب كعدتني امي
اقبال : بنيتي كومي ما يصلح تنامين المغرب
ريحانه : گايمه يمه .. گمت غسلت وتوضيت صليت وشكد دعيتله الله يگومه بالسلامه ..ستوني طبگت السجادة وسمعت صرخه امي ..ركض طلعت من الغرفة الهم ...
عدنان : حسج لا تسمعج
اقبال : يا حظج المصخم يريحانه ..اااه يا يمه اااه هاي البت ولا عدها حظ بهالدنيا
ريحانه : دخلت عليهم ..بصوت يرجف.. شكو شصاير احمد بي شي ؟؟
عدنان : بويه تعاي كعدي هنا
ريحانه : لزمني من كتفي وكعدني على القنفة .. باوعت بعيونه ..بابا شكو
عدنان : بويه الموت علينا حق واحمد ...
ريحانه : سديت اذاناتي ..لا بابا فدوة لا تكمل لا تكول احمد مات الله يخليك .. اباوع لأمي ضلت تبجي
رعد : خويه لازم تصيرين قويه وادعيله الله يرحمه
ريحانه : صرخت بأعلى صوت عندي ..لاااااااا ..احممممممد لااااااا تعوووفني احمممممد .. بعدها صارت ظلمه ما حسيت بالدنيا كلها
عدنان : فرررقد ولك فرررقد
فرقد : هاا بويه
عدنان : روح صيح للمضمده بسرعه خلي تضربها هالابرة لا يصير بيها شي..
غدير : جنت يم البنات من سمعنا الصريخ كلنا ركضنا ..شفت رعد يشيل بريحانه وفرقد راح ركض وامي تبجي وابوي كاعد وحاط ايدي على راسه .. عرفت من المنظر هذا احمد مات ..كعدت بالگاع ابجي علي وعلى اختي من بعده
تماضر : خطيه والله ما يستاهل
آية : البنات كلهن كعدن يبجن ..جان اكثر شي قاهرنه حال ريحانه ..اجه فرقد ووياه المضمده اليمنه ضربتها الابرة وراحت ..بقت لنص الليل وفزت تصرخ وتلطم على وجهها وره وين يلا تعبت وسكتت اول يوم خلصتها بواجي حتى الفاتحه ما راحت ..ثاني يوم والثالث راحت بس ترجع منتهيه من البجي.. الي فهمناه بيومها صاير عنده مضاعفات ومتخربط بسرعه بسرعه ميت ... هالفترة هاي جانت مثل الغيمه السودة وصايرة فوگ روسنا الكل جان مكتئب وحال ريحانه من سيء الى اسوء ..كل ساعه راكضين بيها للمستشفى.. اختنكت من البيت كله رغم بلال وسوايته بعدها تدگ بگلبي بس حاله ريحانه اثرت بيه كلش حبهم جان حقيقي بس للاسف ما كمل ..لبس عبايه وطلعت للبستان احس ارتاح اذا كعدت بي .. ضليت افتر تقريبا وصلت لنصه وكعدت بين الاشجار .. من الضيقة الي بصدري والي صار ويانه كمت ابجي ..اااه بعد شنو ضامتلنه الايام ليش احنه بعدنه عايشين ليش ما نموت ونخلص .. استغفر الله يا ربي كلشي الك بي حكمه بس تعبت يا ربي والله تعبت من هالدنيا ..
وانا على هالحال فززني صوته وهو يصيح
رعد : شتسوووين هنااا
آيه : كمزت من مكاني ومسحت دموعي بردن العبايه .. اجيت اشم هوا
رعد : عقد حواجبه.. وبالبيت ماكو هوا بس هنا
آية : لا مو هيج بس هنا احسن
رعد : حجايه بعد ما اعيدها كعده بالبستان لوحدج بعد ماكو يلا امشي طبي
آية : ليش ماكو انا ما مسويه شي كاعده وساكته
رعد : كلت ماكو يعني ماكو لا كل شوي اعيد نفس القوانه يلا طبي
آية : هسه اطب بس اريد احجي وياك بشي
رعد : بتنهيدة.. خيررر
آية : بلعت ريگي.. اريد ارجع للمدرسه
رعد : غمض عيونه بعصبية.. قطنه وشيليها من اذنج مدرسه بعد ماكو
آية : برطمت .. ليش حباب خليني ارجع ؟
رعد : بعصبية.. انتي الدمرتي نفسج بسوايتج تتذكرينها لو لا ..ما خليتي مجال للثقة ابد ويلا هسه طبي للبيت بسرعه يلا
آية : ركضت للبيت وانا ابجي اخاف جنت مخنوگه هسه صارت الخنگة اكثر .. كلما اريد انسى يجي واحد يذكرني ..بعدني ما داخله للغرفة وصاحت انعام
انعام : هيي انتي غسلي المواعين ورتبي البيت يلا بسرعه
آية : اي هسه .. ذبيت العبايه وغسلت وجهي وبلشت بالشغل ...
غدير : مر شهر على وفاة احمد وريحانه مخلصتها يا بجي يا نوم كلش تعبنا وياها
اقبال : يمه كومي اكليلج لگمة مثل العالم
ريحانه : يمه ما مشتهيه
اقبال : يا يمه والله راح تموتيني لا اكل مثل العالم لا نشوفج لا شي كاعدة بهالغرفة وحابسه روحج حتى الله ما يرضى الي جاي تسوينه
غدير : والله صح حجي امي انتي بنيه تخافين الله والي تسوينه اعتراض على حكم رب العالمين انا وياج هو جان خوش ولد ويحبج بس مو هيج تسوين بدل هالبجي الي ما يجيب فايده صليله ادعيله اقريله قرآن سويله ثواب والله هيج ترتاحين اكثر حتى شغلج عايفته احنه كلنا ندري شكد تحبين الشغل وشكد جنتي تتمنين تتعينين اذا ضاعت هالفرصه منج بعد شنو يعوضج تضلين طول عمرج كاعده بالبيت كومي شوفي الناس شوفي العالم قوي روحج عبالج احمد من يشوفج هيج يفرح بالعكس لازم ترجعين قوية وينها ريحانه مالت قبل الي ناخذ القوة منها الي ضحكتها ما تفاركها ..شو كومي كووومي اريد اشوف منو بعد تنام والله اذا شفتج متمددة بعد اطردج من الغرفه كلها يلا كوومي
اقبال : وين ماخذتها خلي تاكل حتى تاخذ دواها
غدير : اول شي خلي تسبح تصحصح يلا تاكل جنها سكرانه بس تجي منا ومنا
ريحانه : ابتسمت على حجايتها ..انا سكرانه
غدير : اي هيج ولج اروح فدوة لهالسنون .. سبحتها
واخذت الاكل من امي وكعدت آكل انا وياها ..من خلصت رادت ترجع تنام .. هاا وين نايمه كومي اليوم عطله والبستان محد بي
ريحانه : والله ما الي خلگ
غدير : كومي كال ما الها خلگ ..يلا هاج عباتج وخلي نروح ..كوة اخذتها للبستان جانت تمشي وهي ساكته وانا ما بطلت حجي ..اكلج تكدرين ترجعين للشغل لو ما يقبلون بعد
ريحانه : ما ادري والله
غدير : انا احاجي ابوي باجر اخلي يستفسر ويكلج شرايج
ريحانه : ماشي
غدير : ما رجعنا لحدما تعبنا كلش .. من هاليوم بدأت ريحانه تكعد ويانه على الاكل صح مو نفس قبل سوالفها وضحكتها بس احسن ..بابا ثاني يوم راح للشركه واستفسر ..المسؤول عنها جان عاذرها ﻷن كلها تعرف الصار بأحمد وهي قبلها جانت طالبه اجازة مالت الزواج فالغياب انحسبلها اسبوعين بس ...
ريحانه : وره يومين داومت صدك ما الي خلگ بس حجي غدير صح احس كعدت البيت تدمرني زيادة .. اول ما دخلت تفاجئن البنات
نور : رريحااانه
ريحانه : اجت بأتجاهي وحضنتني
نور : حبيبتي والله مشتاقيلج والبقيه بحياتج
ريحانه : حياتج الباقيه حبيبتي
كوثر : نور المكتب ..شعجب رجعتي لحگتي تنسين
نور : بعصبية.. كوووثررر
كوثر : على كيفج شحجينه ..على العموم اخر الاحزان حبي
ريحانه : تسلمين
نور : يلا تعاي هنا والله المكتب بدونج ميسوه وهسه اجيبلج شكو شغل حتى تشتغلين مو حسبالج ترتاحين
ريحانه : ابتسمتلها.. لا هاي هيه ماكو راحه بعد
نور : ههههه اي ابد تعوضين غيابج كله .....
غدير : جنت كاعدة يم آية بالغرفه وادرس ..يبووو مليت والله.. اكلج آية خلي نروح نفتر بالبستان
آية : ما اريد هسه يطلعلي اخوج ويصيح بوجهي
غدير : شحده وانا موجودة
آية : شحال لوما تصيرين جنج بزونه بس تشوفينه
غدير : هو صح يخوف بس يصيح ..بس لا تخافين اكله انا طلعتها وياي ..يلا عفيه والله ضايجه
آية : ماشي
غدير : وانتي سكينه تعاي ويانه هم
سكينه : لا عندي هدوم اريد اغسلهن
غدير : براحتج
آية : طلعنا انا وياها نتمشى بي ..اكثر شي احبه من اجيت لحد هسه هو البستان بس تمشي بي عبالك همومك تطير تحس براحه جبيرة ..جاي نمشي والمح فرقد وتماضر بنص الاشجار ..يبوو هذول شيسوون هنا ..صحت لغدير قبل لا تنتبه الهم ..غدير.. غدير
غدير : هاا
آية : بأرتباك.. خلي نروح من هذيج الجهه ..جنت احجي وكل ساعه ملتفته عليهم بلكت يحسون ويرحون
غدير : ضيگت عيوني بشك .. آية شبيج؟
آية : ما بيه شي بس نروح احسن ..لزمتها من ايدها اسحبها
غدير : خير خير وين ساحبتني ..وخرت ايدي منها وباوعت على الجهه الي تباوع عليها ..
شكو هناك ليش تباوعين
آية : بأرتباك.. لا لا ماكو شي
غدير : لا واضح ماكو شي دفعتها واباوع على نفس الجهه ..هذاك مو فرقد
آية : ما ادري ..يلا خلينا نروح
غدير : اوكفي اوكفي ..هاي ياهي يمه
آية : شدخلنا تعاي نروح
غدير : انتي شبيج خلي افهم شكو .. هاي جنها تماضر اي والله تماضر مبينه من شالها الاخضر
آية : يجوز عدهم موضوع يحجون بي ..عفيه خلي نروح
غدير : ولج انا الگه هيج فرصه واروح هذول الاثنين شاكه بيهم من زمان بس ما لازمه دليل ..تعاي ولج خلي نشوف خاتلين هنا شيسوون
آية : عوفيهم احنه شكو
غدير : خب دروحي اعوفهم كال اعوفهم
آية : راحت تتسحب شوي شوي حتى لا يحسون بيها .. رحت وراها بلكت اكدر ارجعها بس ماكو ضلت لازكه بالمكان تتسمع ....
فرقد : ولج انتي شبيج صارلج 3 اشهر كلما اريد احاجيج تشردين شكو شصاير
تماضر : ما بيه شي بس روح منا اريد ارجع للبيت
فرقد : لا بلا ما اروح لحدما افهم شصاير جاي اكلج كلت ﻷبوي حتى اخطبج رسمي وانتي تكليلي ما اريدك بعد ما جنتي تلحين علي 24 ساعه
تماضر : اي خوية ما اريدك بعد
فرقد : بأستغراب ..خوية !!. . هاي من يمته صرت اخوج
تماضر : من هسه يلا وخر عن طريقي اريد اروح
فرقد : لا والله ما ترحين لحدما اعرف شبيج تسودنتي لو شكو
تماضر : لا تسودنت ولا بطيخ بس خلي صاحباتك يفيدنك انا متحمله رزايل ميثاق وامي وانت كاعد تراسل هاي وهذيج
فرقد : وانتي شمدريج انا اراسل بنات
تماضر : وانت هذا الهامك بس شلون عرفت وگلبي تدوس علي وتمشي
فرقد : بتنهيدة.. ترى هذن كلهن زميلات بگروبات مالات المعهد ويدخلن علي خاص يسأل عن المواد والدراسه
تماضر : ايباااخ وانت من يمته هيج ذكي وشاطر والبنات يسألنك
فرقد : شو جنه ما عاجبج ترى انا الاول على الدفعة
تماضر : اكلك اكو احد كلك انا غبيه ما افهم ولك لوما شايفه نتيجتك بعيني ناقص بس يكتبون عليها ..واخيرا خلصنا منك
فرقد : يابه بالعباس بس انتي احبج
تماضر : العباس شالك ورگعك كون
فرقد : ولج شمالج والله انتي كاعده بنص گلبي
تماضر : وبقيه زمالاتك مقبلات لو شني
فرقد : هههه ولج مقبلات منين تعرفينها
تماضر : اعرف اعرف عبالك بس انت مسوي روحك مثقف براسي ..روح حبيب خليهن يفيدنك ما يسوه كاعده اتانيك صارلي كم سنه ..هذيج خالتي ميته علي تريدني بس اوافق على ابنها ..بس انا ما افهم من الاول كون موافقه على ابن خالتي احسن ..بس تجي بعد اكللها موافقه واشوف دربي
فرقد : بالعباس اذا صارت صدك واجه بس لباب البيت اعلگج من گصايبج بهالنخله هاي
تماضر : نشوف يا ابن عمي نشوف ...
آية : عافته وراحت وهذا شوي وينفجر والله تماضر ما مبين عليها هالقوة .. اكلج بس لا صدگ تتزوج ابن خالتها
غدير : ههههه والله ضحكتيني يا ابن خالتها انتي شايفة شكد يجونها خطابه بس جدتي من الباب ترفضهم على اساس محجوزة ﻷبن عمها
آية : اهاا ..وهسه تعاركوا شلون
غدير : انا الغاثني ستوني يلا عرفت بعلاقتهم .. التفتت على آية.. اكلج انتي تدرين بيهم واحد يحب الثاني
آية :بأرتباك. . لا لا منين اعرف
غدير : آية اكو واحد قبل كلج انتي ما تعرفين تجذبين.. ولج مبينه هذيج انتي جذابه .. من يمته تدرين وما كايله يا جذابه
آية :بلعت ريگي.. من اول ما اجيت لهنا عرفت
غدير : يبووو ولج وما حاجيتلي بسيطه آية بعد ولا احجيلج شي
آية : لا عفيه والله كلت هي اذا تريد تحجيلنا بس ما حجت
غدير : هم صح بس انا الها اذا ما الزمها واخليها تكت الاولي والتالي
آية : لا خطيه لا تحرجينها يجوز ما تحب احد يعرف وهسه اصلا علاقتهم خربانه يجوز تخرب بالزايد من وراج
غدير : والله انتي صايره تحجين حجي عدل.. بس تدرين همزين ما كالتله انا الفاتحه تلفونه والله جا علگني انا بالنخله
آية : هههههه اي والله ...
مرت الايام كلها نفس الشي ..ريحانه الشغل شوي خلاها تلتهي ونفسيتها شوي احسن .. غدير جانت 24 ساعه تدرس خاصه بالامتحانات البكلوريا  كلش تعبت مرات حتى نوم ما تنام خلصت يلا ارتاحت ..بس انا جنت احس بخنگه من البيت ما متعودة ابقى هيج لا دراسه ولا شي صح ما جنت كلش شاطرة بس جنت التهي بيها على الاقل اشوف صديقات بالمدرسه اشوف ناس اطلع هسه حتى الشارع ما اكدر اطلعله كلما اريد اروح للسوگ لو العرس وي البنات رعد يوگفني و ما يخليني اروح بابا مجان يدري بهالوضع وما اكدر اكله اخاف رعد يحجيله الصار ..مرات التهي وي تماضر بالمطبخ تعلمني شوي او اطلع وي البنات للبستان جان هذا ملجأي الوحيد من العالم لحدما يوم طلعت روحي كلش فحاجيت ابوي ..
آية : بابا اريد منك شي
عماد : تدللي بوية
آية : اريد اروح ازور امي عفيه لا ترفض
عماد : لا بويه ليش ارفض اشوفلي يوم ونروح
آية : بفرح .. صدك والله
عماد : اي والله
آية : كمزت علي حضنته وبسته من خده ..الله يخليك الي يا احلى اب بالدنيا
عماد : بتنهيدة.. ويخليج الي .. بس ها ما اريد احد يدري اخاف انعام تلزك ويانه والله حتى امج ما تخلينه نزورها  لو جدتج تسمعج حجايه وشعدكم رايحين وهالسوالف التعبانه
آية : لا لا ابد ولا احجي بس لغدير عفيه بابا
عماد : ولج هاي ام السان تفضحنا
آية : ههههه لا اكلها ما تكول ﻷن والله اذا عرفت بعدين تلعب بيه لعب
عماد : هههههه ولج بوية شمالج تخافين منها
آية : اخاف تزعل وبعد شيراضيها
عماد : ههههه ميخالف كليلها هاي صدك اذا زعلت تگلبها علينه ...
آية : وره 3 ايام اجه ابوي كال حضري روحج باجر الفجر احنه طالعين نبات ليله وحده ونرجع احس روحي طايرة واخيرا راح اشوف امي وهم اطلع من هالبيت..حضرت جنطه صغيرونه خليت بيها الاحتاجه بس .. شافتني سكينه وانا احضر
سكينه : بأستغراب.. وين رايحه
آية : بلعت ريگي.. لنجف ازور امي
سكينه : اهاا عبالي رايحه للبصرة
آية :لا ..بس حبابه لا تكولين ﻷمج اخاف ..
سكينه : ماكو داعي تكملين فهمت قصدج لا تخافين مراح اكللها ..بس ها تجيبلي صوغه وياج
آية : بأبتسامه.. تدللين جنج على صوغه .. الفجر اندكت باب الغرفة ودخل بابا ..ها بنيتي جاهزة
آية : اي اي جاهزة ومنتظرتك
عماد : جا يلا بعد ابوج امشينا
آية : لبست العبايه وطلعت وراه .. جان عمي عدنان گاعد بره
عدنان : ها ماشين
عماد : اي والله
عدنان : ترحون وترجعون بالسلامه ولا تنسونه من الدعاء
عماد : ان شاءالله..الله وياك
عدنان : الله وياكم ..التفت على آية ..وانتي ديربالج على ابوج
آية : بأبتسامه.. ان شاءالله عمو
عماد : يلا بويه صعدي
آية : صعدت السيارة وانا ما مصدكة صارلي شكد مطالعه والله حتى نسيت شكل الشارع شلون صاير
عماد : بويه يرادلج تلفون بدل الضاع اريد اخابرج ماكو ..كلت اخاف ادخل عليهن وتكعد سكينه
آية : بس جاب طاري التلفون ضليت ابلعم .. لا اصلا سكينه شافتني البارحة وكلتلها
عماد : خوما زعلت ﻷن ما اخذتها
آية : لا بس كالت جيبيلي صوغه وياج
عماد : سهله اذا على الصوغه
آية : وصلنا للنجف ارتاحينا شوي وبعدين زرنا الامام ورحنا للمقابر ..من شفت كبر امي شكد بجيت عليها كلما اشوفه عبالك ستوها ماتت..ابوي كعد على جهه مغطي وجهه بالجفيه مالته واشوف بس اكتافه تهتز .. قرينا قرآن الها ورجعنا للفندق ..انا من التعب غفيت بس تلفون ابوي ما بطل كل شوي ودك ياخذ التلفون ويرد بره ويرجع للغرفة صاير اعصاب ..شكو بابا صاير شي
عماد : لا تهتمين ماكو شي .. لمي غراضج بويه حتى نروح لكربلا ومناك نرجع لبيتنا
آية : ماشي ..لميت كل غراضنا وطلعنا لكربلا هم زرنا جان يوم جمعه وازدحام ..رجعنا تقريبا ب12 الظهر ..اول ما وصلنا دخلنا للاستقبال جانوا عمامي موجودين وبيبي ورعد ..بيبي مبين عليها العصبيه ورعد الجكارة
بأيده وعيونه يطلع منها الشرار مبين هم كلش عصبي..استغربت شكو شصاير معقولة ﻷن ما كلنالهم رايحين للزيارة ..بس لا رعد كال لبيبي على الصار بيه ومنتظرين بابا يكلوله ..الف فكرة وفكرة جانت ابالي
عماد : السلام عليكم
فهيمه : هلا بأبني الزين هلا بأبني الصغير العزيز
آية :استغربت شلون حجتها بنترة..هاي شبيها ..بابا اشرلي اطلع ..اخذت جنطتي ورحت يم البنات ..جانن كاعدات بالمطبخ .. سلام انا اجيت
غدير : هلا والله الزيارة مقبولة
آية : قبل اعمالج زرت واندعيتلجن كلجن..جانت ريحانه وغدير وتماضر وسكينه وعمه هناء موجودات سلمت عليهن كلهن ..طلعت الصوغات ووزعتهن عليهن ..عود البقيه من يجن يسلمن انطيهن
تماضر : يا بذاته جا شمالج ما كلتي انا رايحه
آية : صارت بساع بساع جنت مشتاقه ﻷمي وكلت لبابا خلي نروح
تماضر : الله يرحمها اهم شي شفتيها ..عاد تونستي هناك لا
آية : اي والله كلش
هناء : عليج بالعافيه حبيبه
آية : مشكورة عمه .. بهالاثناء سمعنا صايح واصوات عاليه جايه من الاستقبال
هناء : دخيلك ربي هاي اصوات زلمنا شكو شصاير
غدير : راح اكوم افهم شكو
آية : كامت غدير واحنه وراها ..جان باب الاستقبال مفتوح كلنا التمينا يمه ...
فهيمه : من رايح انت وياها بحدكم وبايت هناك شيسمووونها هااااي هاا
عماد : بعصبية.. يمممه كااافي سدي هالمووضوع رحمه لأهلج
فهيمة : هووو انت بكيفك كااافي من تخزينه بين الوووادم شنگول
عماد : بصياح ..يمه رررحمه لله بشننني اخزيكم شوو صايرين مدري شلون تحجون
عدنان : يمه كافي هاي اجو وبعد ما يروحون وحدهم اخذيها من هالحجايه
فهيمه : ولك هووو ما خربنه غيرك انت تردي بي رايح وما حجيت
علاء : يمه شسالفه ماخذ بته ورايح يزور شبيها يعني قابل مسوي جريمه
فهيمه : خااب انت اسكت بته منين صارت بته
علاء : بأستغراب.. شني منين صارت بته شبيج يمه
عماد : بعصبية.. بتتتي غصبا على اليرضى والما يرضى واروح وياها وين ما اروح محد اله حجايه وياي
فهيمه : بعصبية.. وللللك انت مصدك روحك هاي بتك لو ما هي بت حرررام مدري منين ما منين ابوها
آية : من سمعت احس روحي انضربت على راسي بجاكوج كلشي ما كمت اسمع بس اخر حجايه كالتها كامت ترن بأذني
غدير : من وره السمعته فكيت عيوني على وسعهن وشهگت شهگه من صوتها كل بالاستقبال التفتوا علينا !!!!!
..يتبع
#ارجوان