يحدث بالقرب منا

البارت الخامس

#ارجوان
#يحدث_بالقرب_منا

بلال: انا بلال اخو رفاه
آية : يمه من گال هيج خفت خوفة .. سديت التلفون بسرعه .. بساعتها كمت ارجف ما اعرف شسوي.. خرب شلون جاب رقمي ..اكيد من رفاه ..عضيت اصبع ايدي بقوة..اااخ شسوي هسه ..بهالاثناء دك مرة ثانيه رفضته وغلقت التلفون كله والخوف ماكلني اكل احس على شوي ويحسون بيه ..فززتني سكينه من طبت للغرفة
سكينه : بأستغراب.. شبيج ؟
آية : لا ما بيه شي .. تمددت على الجربايه والف فكرة اجت براسي من وره هالاتصال .. ثاني يوم اول ما دخلت للصف خزرت رفاه
رفاه : شكو شبيج هيج تباوعين
آية : اخوج منين جاب رقمي
رفاه : فتحت عيونها.. دك عليج
آية : اي
رفاه : يجوز ماخذه من تلفوني
آية : شوفي ماخذه انتي منطيته المهم بعد لا يدگ علي
رفاه : انتي والله غبيه اكو وحده تضيع هيج فرصه من ايدها ..شوفي بنات الصف كلهن عدهن كبلات ولج وين تحصلين واحد ينسيج الدنيا كلها بكلام الحب
آية : بعصبية.. لا اريد كلام حب ولا غيره ما اريده افتهمتي وفهمي ﻷخوج هالحجي
رفاه : على كيفج شبيج فوگ ما انصحج
آية : لا اريد تنصحيني ولا غيرها.. شلت جنطتي وكعدت بالاخير ..اعصابي تلفانه وارجف .. خلص الدوام وانا ما مفتهمه ولا درس من وره رفاه واخوها .. من طلعنا من المدرسه شفته واكف بنفس المكان اول ما رفعت عيني  بأتجاها ابتسم وانا رديتها اله بخزره ..استغفر الله
غدير : شبيج اليوم مو على بعضج صاير وياج شي
آية : بعصبيه.. لااا
غدير : رفعت حواجبي.. مبين لااا ولج آية الهاديه تعصب علي شصاير بالدنيا
آية : اعتذر والله بس اليوم ما جاوبت بالامتحان لذلك نفسيتي زفت
غدير : ولا يهمج نرجع للبيت وانسيج ابو الامتحان
آية : جريت حسرة.. وابتسمتلها
غدير : بنات مدام باجر عطله اليوم نسهر على فلم
رقيه : اي والله خوش فكرة
غدير : ماشي جا اليوم تجن لبيتنا بالليل
رقية : لا بيتنا احسن ميثاق وما موجود باجر يجي اما بيتكم اخاف يطب علينا رعد لو فرقد واحنه داخلين بالجو
غدير : هم صحيح والله طلعتي ذكية
رقيه : اي شعبالج بس مو تنسن جيبن حلويات حب هالسوالف
غدير : لا ما ننسى .. آية مو تنامين من وكت اليوم ننتظرج تجين همين
آية : ان شاء الله .. لليل واجتمعنا تماضر مسويتلنا جو ومشغله الفلم رتبنا الاكل وكعدنا نتفرج .. الفلم جان رومانسي بكل مشهد احس يحرك بيه شي ..انا ابد مجنت اتأثر بالافلام او المسلسلات بس اليوم ما اعرف ليش أحاسيسي كلها تخربطت بس شفت الفلم .. اكو بنيه بالفلم
حجت جمله ضلت ترن براسي ..كالت" كل بنت في هذا الكون يحق لها بأن تحب وتنحب " .. عدتها الف مرة براسي ..يعني انا الي حق احب الحب مو حرام ولا عيب .. حركت راسي كأنما انفض هالافكار من راسي .. استغفر الله  آية شبيج صدك جذب .. اباوع لتماضر مندمجه على الآخر وهي على هالحال ضربتها غدير على راسها
غدير : طاح حظج على هالفلم ما بي حظ مثل وجهج
تماضر : شبي حلو والله شوفي شلون يحبها
غدير : هو يحبها انا شداخل بجيبي ولج اريد فلم بي حماس شي  هذا نعست من وراه ماكو اكشن رعب شي بدل طيحان الحظ هذا
تماضر : والله ما عندج ذوق
غدير : خليت الذوق الج ام الذوق والله اذا بعد لكيتج حاطتلنا هيج افلام ولا اسهر وياج
تماضر : اي عود غير مره انتي اختاري نشوف ذوقج
غدير : اي الاسبوع الجاي عليه انا واشوفن اذا كدرتن تتحركن من كدما الفلم حلو
سكينه : اووك نعتمد عليج
غدير : افا عليج اعتمدي خيه اعتمدي ..يلا بنات متت من النعاس تصبحن على خير
آية : وانتي من اهله ..نزلت غدير واحنه كملنا الفلم وكلمن راحت لغرفتها ..ضليت الليل كله اتگلب ما كدرت انام لحدما اذن ..كمت صليت رجعت للغرفة نفس الحاله ما غمضت عيني .. فكرت اليوم جمعه والبستان ما بي لا فلاليح ولا عمال خلي اروح اكعد بي ..لبست شالي وطلعت بره الجو بي بروده والشمس ستوها جاي تطلع .. ستوني ببدايه البستان ولمحت واحد كاعد يم الشجر .. تقربت بأستغراب منو كاعد هنا يا ترى ..بالاخير انتبهت علي هذا بابا ..بابا
عماد : بأستغراب.. ها بويه اكو شي شمكعدج
آية : ههههه لا بابا بس كلت افتر شوي ما اجاني نوم
عماد : تعاي كعدي هنا
آية : اشر على المكان اليمه ..كعدت بصفه
عماد : كلبج على كلب ابوج هم ما جايني نوم انا
آية : احسن حتى نكعد وحدنا هنا ههههه
عماد : ههههه اي بدون ما واحد يزعجنا
آية : بقينا ساكتين بس نباوع للمكان اسمعه كل ساعه ذابله حسرة ..ميلت راسي على كتفه وهو حضني بأيده بقينا هيج لحدما حسيت روحي غفيت ..فززني صوت رعد من صاح
رعد : بعصبية.. شتسووون هنااا
آية : كمزت كمزة عبالك شايفله اثنين عشاق شحال لو ما كاعدة وي ابوي ..بقه عاقد حاجبه ويباوع بعصبيه
رعد : طبي جوة
عماد : ترى انا ابوها مو انت حتى تتأمر عليها
رعد : رفع تك حاجب.. اريد احجي وياك اذا تريد احجي كدامها ما عندي مانع
عماد : بويه آية روحي للبيت
آية : ضليت متبسمرة بمكاني اباوعلهم اثنينهم ليش ما يحجون كدامي ..التفتلي رعد وصاح
رعد : مو كلنا طببببي
عماد : بعصبية.. لا تصيح عليها وانا واكف
آية : التفت عليه ابوي واشر براسه بمعنى روحي.. رحت للبيت بس قبل لا اطب التفتت عليهم اريد اشوف شنو جاي يسوون ..انتبهت الهم يحجون بأعصاب ما يوصل الصوت بس من حركاتهم وتعابير وجههم يبين النقاش بينهم كلش حاد ..اخر شي بابا دفع رعد من صدره بس رعد ما سكت لزم ايد بابا ودفعه ..صخام هذولي راح يتعاركون ..رحت ركض بأتجاهم بهالاثناء رعد عاف المكان وراح ضليت واكفه بالنص لا انا رايحه لبابا ولا راجعه ..شفت بابا فتح الدكم الفوك مالت الدشداشه ورجع لنفس الكعده ما كدرت اروح يمه شكله مبين كلش عصبي .. رجعت للبيت والتفكير كتلني اذا ابقى بهالبيت اخري اتخبل شنو جاي يصير ما اعرف ..دخلت للغرفة سكينه بعدها نايمه تمددت بفراشي وما حسيت غير رحت بسابع نومه.. ما كعدت الا على صوت انعام
انعام : كووومي كوومي الساعة ب12 وبعدج نايمه .. شرايج نكرب بمكانج وانتي ضلي نايمه ..خدم للخلفتج احنه وانا ما ادري يلا كوومي
آية : مو السان عبالك رشاشه ما انطتني مفكه ..هسه اكوم
انعام : اي رتبي البيت وبعدين نزلي فاهمه خاتون
آية : اي فاهمه
انعام : جنها برميل ونايمه ولج بعد تصيرين شكدج ..بس اريد اعرف ياهو الياخذج سوي رجيم بطيخ ترى محد يگلبج
آية : ما رديت عليها ﻷن ما الي خلكها ولا كد السانها انا ..كملت ونزلت على الغده خلصت وصعدت حتى البنات محجيت وياهن شي .. رجعت للفراش مخنوگه من الي جاي يصير وياي ..رعد وتصرفاته انعام ولسانها ..حجي رفاه عن العلاقات وعادي كل البنات عدهم علاقات ..والحب ينسيج الدنيا ..وحجي البنيه الي بالفلم .. تربعت على الجربايه ..صدك ليش ما اجرب الحب انا من حقي احب شنو اختلافي عنهن ومو انعام تكول محد يگلبج خلي تشوف بعينها هذا شلون ميت بس يريد يحجي وياي ..طلعت التلفون من المجر جنت قافلته من يوم ما دك علي ..فتحته شوي واجت رسائل شكد هو دازلي وﻷن داك علي هم اجت رسائل برقمه وميساء بت خالي هم داكه علي .. خمس دقائق مرت ودك نفس الرقم ..ركضت للباب قفلتها وفتحت الخط بدون ما احجي ولا شي
بلال : الووو.. آية وينج صارلي شكد ادك عليج وما احصلج ..ليش مجاي تردين
آية : ضليت ساكته بس خايفة بنفس الوقت
بلال : ههههه صوت نفسج كلش عالي شنو بس لا خايفه مني
آية : عضيت شفتي قوي ..فكرت اغلق الخط بوجهه بس صار عندي فضول شنو يحجي
بلال : لو تدرين شكد احبج مجان خفتي مني ابد .. مراح تحجين شي ؟؟.. تمام لا تحجين انا راح احجي اليوم
آية انا من اول يوم شفتج بي احس كلبي طلع من مكانه والله ..ضليت انتظر شوكت تجين وشوكت تطلعين حتى اكحل عيني بشوفتج.. نوم ما انام من وره التفكير بيج صرت اسأل رفاه كل يوم عنج وكلما تجيبلي معلومه عنج احبج اكثر..توسلت بيها تنطيني رقمج ما قبلت لحدما بعد ما اتحملت واخذت الرقم بلا ما تدري .. آية لا تظلين ساكته احجي فدوة سمعيني صوتج ولو مرة
آية : كلبي احس صار عنده جناحات وضل يرفرف..بقيت ساكته وايدي على حلگي اخاف يطلع صوتي
بلال : اكو احد يمج ؟
آية : بأرتباك.. لا
بلال : بووويه اررروح فدووة لهالصوت
آية : ابتسمت ابتسامة عريضة ..بسرعه حطيت ايدي على حلگي من الخجل ..بهالاثناء اندكت الباب ..بسرعه سديت الخط وغلقت التلفون ورجعته للجرار ..فتحت الباب وانا ارجف
سكينه : بأستغرب ..شبيج جنتي نايمه ؟؟
آية : هاا  اي غفيت شوي
سكينه : البنات كل شوي ويسألن عليج
آية : هسه نازلتلهن .. نزلت يمهن يحجن ويحششن بس انا وين عقلي مو وياهن اصلا كلمتين منه نستني حياتي كلها بلحظه گلب حالي جان شعور كلش حلو .. لليل ردت افتح التلفون بس خفت وخاصه سكينه موجودة بالغرفة عفته ونمت بس شنو من نومه فد مرتاحه واحس اي هموم ما عندي .. كعدت الصبح بنشاط ..تريكت وكملت شغلي ورجعت للغرفة ..فتحت التلفون ..هم اجتني رسائل ..وينج منتظرج ..صار شي ليش تلفونج مغلق ..ابتسمت على كلامه ..انتظرت نص ساعه اريده يدك ما دك .. اففف اخاف نايم ..رجعت غلقت التلفون خفت يرن وواحد يجاوب ..وطلعت اساعدهم بالغده بس بالي يمه ..صرت مثل الثولة يحاجوني مرتين 3 يلا انتبه ..كملت الغده وغسلت المواعين وياهم بساع بساع ارد الحگ اشوف التلفون ..ركضت على الدرج وصاحت وراي غدير
غدير : تعاي ويانه راح نكعد بالبستان
آية : هاا ..انا وراي واجبات اريد احلها
ريحانه : تمام روحي حليها واذا خلصتي تعاي ورانه
آية : ماشي .. اول ما دخلت رحت للتلفون فتحته ..بهالاثناء دخل حسين للغرفة يمه بوكتها كلبي طاح بين رجليه
حسين : سكينه وين
آية : بال هذا شسمه ..بالبستان
حسين : بأستغراب.. ماشي
آية : بس طلع قفلت الباب وراه وانتظرته يدك .. فكرت ادك على رفاه بحجه اسألها على الواجبات بلكت هو يمها ..بعدني ما داكه ودك هو فتحته بلهفة
بلال : وين صرتي رحمه للحمزة البارحه شكد دكيت ما حصلتج وقبل شوي همين دكيت مغلق شنو سالفتج
آية : بأرتباك.. انا اغلق التلفون اخاف تدك و احد غيري يفتحه
بلال : ياا يمه مو صوت يدخل الگلب گبل
آية : حباب لا تحجي هيج
بلال : هههههه فدوة اروح لليخجل انا
آية : بقينا نسولف ..حجالي عن نفسه وشغله وانا هم سولفت هواي ما حسيت بالوقت ابد لحدما انتبهت الساعة ب4 ونص العصر .. صخام راح الوقت تأخرت
بلال : هههههه والله ما حسيت بالوقت
آية : يلا باي
بلال : باي بس مو تغلقين التلفون خلي مفتوح ومن انتي موجودة رمشي عليه وانا ادك
آية : ماشي .. سديته منه ونزلت ركض حتى الحگ على البنات ..ستوني جاي افتح الباب وهن دخلن
غدير : بعد وكت خيه كل هذا دراسه
آية : هاا اي عندي واجبات هواي
غدير : مراح يطير الواجب اذا اجيتي يمنه ساعه
ريحانه : ما الج علاقة بيها اهم شي تكملين دروسج واذا محتاجة شي او ما عرفتي تحلين تعالي انا اعلمج
آية : ابتسمت بوجهها ..ماشي .. استمرينا انا وبلال على هالوضع كلما سكينه بالمدرسه ادك علي بس ما نطول ﻷن انعام كل شوي داكه علي الباب حتى اشتغل بالبيت جنت ساعات اتحجج بالدراسه وساعات لا والله يصير الشغل اجباري .. اما بالمدرسه بالروحه والرجعه هو موجود دائما ومرات يودي هدايه بأيد رفاه ..هالشي جان يخليني اتعلق بي اكثر واكثر احس واحد مهتملي دائما يحسسني انو انا اهم شي عنده .....