يحدث بالقرب منا

البارت السابع

#يحدث_بالقرب_منا

آية : حجت هالحجايتين وطلعت من المحل ضليت صافنه شنو قصدها .. عمتي ضلت تباوعلي .. عمه هاي المرة ليش حجت هيج ؟
اقبال : اندري يا عمه والله گلبي انبهت من حجت عليها ..دخيلك يا ربي بس لا هالزواج مو زين الها
آية : ليش عمه اصلا مبين علي خوش ولد ويحبها شفتي بالخطوبة طاير بيها ومن يجيلنا يظل بس يباوع عليها
اقبال : اي والله يا عمه الولد ذهب.. بجاه الحسين يا ربي ريح گلبها ولا تشوفها شي مو زين
آية : ان شاء الله ماكو شي بعدين هي المرة ما تعرفها شمدريها شراح يصير قابل تعلم الغيب
اقبال : مدري ان شاءالله ما يطلع حجيها صدگ
آية : بيومها العصر طلعنه للعمارة .. وعمتي كل شوي تباوع على ريحانه وتجر حسرة .. اباوع لريحانه شايله جمال طفولي يخبل بحيث تبين اصغر منه والصراحه هي احلى وحدة بالحفيدات كلهن بس ابتسامتها كافي تشرح الگلب وتساعد اي احد بدون تردد وشكد ما يحجون عليها ما ترد انا ملاحظه ابوي وعمامي شكد يحترمونها ويحبونها .. زين ليش يتلوع گلبها هي ما مأذيه احد اكيد هالمرة تحجي من وحدها ..وصلنا الوقت متأخر كلش اول ما وصلنا للفراش گبل .. مرت الايام كلها عاديه انا وبلال بعدنه نحجي سوه اما احمد كل يومين عدنه رغم يتشافون بالدوام بس دائما يجي.. فرقد تخرج وحضروا الحفله امه وابوه ورعد قدم على شكد شركات وماكو لحد هسه اي خبر منهن بس ظل يشتغل وي رعد لحدما يطلع تعينه ..قبل العيد بيوم جنه كاعدين انظف وعمتي حميدة واقبال وهناء وانعام جاي يسون كليجه ..
غدير : يابوية انكسر ظهري بالعباس
تماضر : والله خبصتينه اشتغلي وانتي ساكته
غدير : اي مخليات الشغل عليه وتكولن سكتي
ريحانه : مو كلنا جاي نشتغل بعد شنو مخلين الشغل عليج
غدير : انا اصعب شي هذا الجام انظفه وماكو مجاي يتنظف
ريحانه : لا تنظفينه بالوصله جيبي جرايد احسن
غدير : جا توج تحجين بعد ما انكسر ظهري
فرقد : خطية الله يساعدجن تنظفن ومن اول يوم يجون زعاطيط المنطقة يخربون كل هذا
غدير : انت بس وخر مخلصها طلعات وطبات وجاي يمنه كلشي ما مستفادين منك ...ربي لو خالقني ولد ولا هالتنظيف هذا
فرقد : ترى احنه هم نتعب نجيب الكرزات والجكليت
ميثاق : والعصاير نسيتها
فرقد : اي عفية والعصاير
غدير : عااا مكلفين روحكم والله شكد تعبون خطيه ..خلي اجيب جرايد احسن الي من الحجي وياكم...
آية : ثاني يوم كعدنه من الصبح تريگنا وبدلنا ونزلنا كلنا .. عايدنا بيبي وعماتي وبعدين اجه بابا وعمامي عايدناهم وكل واحد نعايده ينطينه عيديه .. اخر شي وصل الدور الرعد ..
انا الفترة المرت كلها محاجيه وياه من يوم الترك
غدير : كل عام وانت بخير رعد ان شاءالله السنه الجايه عريس وحجي وكلشي تتمناه .. اشرتله بأيدي معناه اريد فلوس
رعد : وانتي بخير ..الحمد لله حتى الدعوة مالتج مو بلاش
غدير : ماكو شي بالدنيا ابلاش بعد ...يلا عيديه بعد اختك
آية : انطاها عيدية والبنات وحدة وره الثانيه عايدته ..استحيت اغلس بس وصلي الدور عايدته وانا مدنگة ..كل عام وانت بخير
رعد : وانتي بخير
آية : بس رد گبل درت اريد اروح صاح وراي
رعد : آية
آية : التفتت مستغربة ..هاا
رعد : عيديتج
آية : تقدمت اخذتها ورحت ..يمه يخوف احسه على ساعه يموتني .. شوي ودخلوا فرقد وميثاق يطالبون بعيديه والجهال تضحك عليهم
عدنان : بلا ما تستحون كل واحد شكده وتردون عيديه
فرقد : حقنه هذا غير عيد
علاء : هاي بدل ما انتم تنطون عيديات جاي تطالبون بعيديه
ميثاق : اهووو فرقد تعال تعال اذا بقينا نحصل محاضرة شطولها
فرقد : انا ما اتنازل عن عيديتي
آية : حجه هيج ورعد شمر المخده علي
رعد : روح منا مو حتى الفروخ يضحكون عليك
فرقد : تعال ميثاق النه الله
آية : طلعوا والكل يضحك عليهم .. باوعت على رعد اشوفه شلون يضحك يجوز هاي اول مرة اشوفه يضحك من اجيت لحد هسه .. وانا مركزة بي التفتت ناحيتي شافني اباوعله اختفت ابتسامته وعقد حواجبه وانا ياگاع انشگي وبلعيني على هالموقف نزلت راسي بسرعه ..ادري شبيه شجاني وباوعت امداني اي والله هسه شيكول ... بدأ الدوام وانا وغدير هالسنه سادس .. غدير شادة حيلها وانا كل همي اشوف بلال من اروح وارجع من المدرسه خاصة بعد عطله طويله بعيده عن شوفته .. بهالفترة دخلت التلفونات اللمس للعراق واغلبها اشترت منه ..رعد وفرقد وميثاق اشتروا منه وريحانه احمد اشترالها همين ..جان فد شي حلو كل ساعه لازمين تلفون ريحانه ونلعب بي ....
ريحانه : احمد جان كل يوم يثبتلي ان موافقتي علي جان احسن قرار اخذته بحياتي جانت حياتنه ماشيه تمام لحدما  مرة جان عدنه استراحه .. رحت للكافتريا جبت لفتين وعصير ورحت للمحطة مالت الكهرباء ﻷن ادري بأحمد اذا اشتغل ينسى روحه ما ياكل .. مشيت بأتجاه مكتبه ستوني وصلت وانفتح الباب وطلعت كوثر ..عقدت حواجبي بأستغراب ..هاي شجابها هنا ..اول ما شافتني ابتسمت بحقارة وراحت ..گلبي بهاللحظه حسيته راح يوگف من الخوف والغيرة ..گوة دخلت للمكتب ..ما انتبه من دخلت اباوعله حاط راسه بين ايدي وشكله عصبي ..احم احم
احمد : بأستغراب.. ريحانه!!.. اكو شي
ريحانه : بلعت ريگي.. لا كلت اكيد مماكل جبت لفات حتى ناكل سوه ..
من حجيت هيج ابتسم وگام من المكتب راح بأتجاه الباب قفلها واجه بسرعه يمي حضني بكل قوته ..بوكتها خفت مسوي مكسورة لو شي وخايف اكشفه ..احمد بيك شي
احمد : اشششش ما اريد اسمع اي شي بس  حضنيني
ريحانه : حضنته بقوة بس داخلي كله يرجف اخاف اعرف شي واضطر اعوفه.. بقينا على هالوضع تقريبا ربع ساعه لحدما هو وخر
احمد : اي وينها اللفات ترى ميت جوع
ريحانه : رفعت العلاگة ..هاي هيه ..راح فتح القفل وابتسم
احمد : حتى لا يفهمون غلط
ريحانه : ابتسمت بوجهه .. فتحت العلاگة اخذ لفته والعصير وبدأ ياكل ويحجي بلهفة وانا وين الف سؤال براسي وما اكدر اسأل اخاف من الاجابة .. كملت ورجعت للمكتب ..اباوع لكوثر تحجي عادي ولا كأنما مسويه شي .. مرت فترة احمد تصرفاته عاديه بس كوثر تشمر حجي وتتصرف تصرفات مستفزة خاصه من يجي احمد ..فمرة جنت بمكتب استاذ توفيق اول ما رجعت للمكتب شفت احمد وكوثر واگفين سوه هو رافع اصبعه بتهديد ويحجي بهمس ..وهو بهالحاله التفت على الباب وشافني ..احس وجهه انخطف واتغير 180 درجه ..انا بلعت ريگ ودخلت للمكتب عادي
احمد : ريحانه
ريحانه : جاوبت بلا ما ارفع راسي ..هممم ..كعد بجهة المكتب مالتي
احمد : ريحانه باوعيلي
ريحانه : باوعتله وعيوني مليانه دموع احس اكو شي صاير بينهم والخوف كاتلني..اول ما شافني هيج عقد حواجبه وگام
احمد : تعاي وياي
ريحانه : برطمت ما كدرت احجي شي ولا حتى اكوم
احمد : بهمس ..ريحانه حبيبتي كومي عفية
ريحانه : سحب ايدي حتى اكوم .. اخذت جنطتي وكمت وياه طلعني بره الشركه وانا ساكته ..صعد بالسيارة وصعدت انا والطريق كله هدوء محجينه شي بس هو كل شوي ملتفت الي .. وگف يم مطعم .. شنسوي جايين هنا
احمد : بأبتسامه.. نتغده
ريحانه : استغربت تصرفه بس نزلت وانا ساكته .. كعدنه على طاوله بمكان معزول شوي ..وطلب اكل ..كل هذا هو يحجي وانا ساكته
احمد : ريحانة گلبي شبيج صاير وياج شي
ريحانه : رفعت راسي اباوعله .. شنو بينك وبين كوثر ؟؟
احمد : بتنهيدة.. ما بينا شي
ريحانه : احمد انا لا غبية ولا ثوله اذا بينكم اي شي كول من هسه ترى والله ما اتحمل اذا عرفت بعدين ..انا كملت وطگيتها بجي ما تحملت ..خليت ايدي على وجهي وكمت اشهگ
احمد : بخوف .. ريحانه ..ريحانه شبيج صدك جذب
ريحانه : كام وكعد بالكرسي الي بصفي لزم ايدي سحبتها ودفعته .. احمد حباب احجي الله يخليك لا تخليني هيج معلگة
احمد : تمام ماشي احجيلج بس اهدي شوي والله ما مستاهله كل هالبجي
ريحانه : مسحت دموعي
واخذت نفس ..يلا احجي
احمد : شوفي قبل كلشي لازم تعرفين انا ما گتلج ﻷن كلت ما يسوه اقهرها على شي تافه مثل هذا
ريحانه :حجيت بصوت يرجف .. كمل
احمد : انا قبل ما جنت اجي للمكتب مالتكم هواي بس كلما اجي جنت اشوف كوثر تذب ميانه هواي كلت عادي يجوز حالي حال بقيه الزملاء بس من ضليت اجي علمودج جنت الاحظها من تتقرب مني وحتى اكثر من مرة حجت عليج بس جنت اغلس شو من خطبتج زادت حركاتها وحتى كامت تدك علي بين فترة والثانيه بحجه محتاجه مساعده والصراحه ما جنت اردها بس جنت اجاوب على الگد استحيت انطيها بلوك او ارفض مهما كان تعتبر زميله بالشغل بس بالفترة الاخيرة ظلت تراسل هواي وحتى تدز صورها وتحجي عليج جنت اردها هواي وحتى انطيتها بلوك وطلعتلي من غير رقم ورجعت انطيتها بلوك  جانت تجي على المكتب مالتي وتكول انا احبك ومن هالسوالف ..شكد رديتها وصيحت عليها بس ماكو فايده وهاي اليوم هم نفس الشي وهددتها اكول ﻷهلها اذا ما بطلت هالسوالف وهاي هيه
ريحانه : نزلت راسي وبجيت ..حسبالي تخوني وياها
احمد : ههههههه بلا اكو واحد يعوف هالكيك علمود هيج وحدة ..يلا گومي غسلي وجهج صرتي طماطه من البجي.. حتى ناكل ترى متت جوع
ريحانه : هزيت راسي ..كمت غسلت وجهي ورجعت
احمد : هاا شلون صرتي
ريحانه : ابتسمت.. احسن
احمد : مو حلو عليج الزعل ابد بعد لا تعيديها
ريحانه : هزيت راسي بأي .. بس بعد لا تضم علي شي حتى لو تافه
احمد : ههههه ماشي اخر مرة وداعتج ...
آية : بيوم جانت عطلة وكاعدين كلنا ..اجت غدير تركض من المطبخ تأشر علينا .. شكو هاي شبيها
تماضر : شمدريني ..تعاي نشوف اكيد عدها مصيبه لو خبر
آية : رحنا انا وتماضر ورقيه وسكينه بأتجاها ..طلعت من المطبخ للترك وره ..ولج شبيج تجرجرين بينا .. كعدت بالگاع وبأيدها شال لافه بي شي كامت تفتح بالشال وطلعتلنا 3 تلفونات
تماضر : صخام الصخمج منين بگتيهن هذن
غدير : اششش ولا كلمه لا احد يسمعج منين بايگتهن هذن مالات الولد
رقيه : وشتسوين جايبتهن هنا
غدير : لگيتهن على الشحن بالديوان كلت خلي افتشهن شكو بيهن ما بيهن
آية : غدير رجعيهن حبابه اذا عرفوا يسولنا مصيبه والله
غدير : دروحي شكد جبانه ..الي تريد تشوف تبقى والخايفة تتوكل الله وياها
آية : باوعتلهن ولا وحدة تحركت كلهن بقن ..بقيت وياهن على الواهس
غدير : يلا بلا خنشوف اول تلفون ..هذا مال رعد ..فتحته ما بي رمز ..هلا والله ما يحتاج نتعب علي هذا ..فتشنا بي
ما لگينا شي مهم كله شغل والعمال وهالسوالف. .يبووو شهالملل ..خلي ننتقل للثاني ..هذا مال فرقد.. فتحته جان اكو رمز "نمط" .. مصيبه فوك راسك حاط رمز الاثول
تماضر : ما تكدرين تفتحينه
غدير : حركت حواجبي.. ماكو شي يصعب علي شوفن وتعلمن ..طفيته ..شوفن الاثر مالت الاصبع مالته شنو الشكل الي تشوفنه
رقية : جنه مربع
غدير : يعني الرمز مالته هيج ..فتحته ما انفتح .. او ناخذ المربع من الجهة الثانيه هيج ..انفتح ..هههههه خرررب والله وسويتها عمي انا ذكيه ذكيه
تماضر : هسه خلي نشوف شبي ما بي
غدير : اي صبر .. دخلنا على البرامج ..شفنا شكد بنات مراسلهن ..البنات الي يحجي وياهن اكثر من شعر راسي خررب حظك يا فرقد ما مخلي بنيه بالعراق ما محاجيها
تماضر : بعصبية ..سدي سدي كااافي
غدير : بأستغراب.. شبيج ليش اسده غير نشوف شكو بعد
تماضر : اهووو شوفن انتن انا رايحه
آية : خطيه انقهرت عليها ماشي كدرت تحجي شي كدامهن
غدير : هاي شبيها
رقيه : مدري
غدير : اذا ما وراها سالفه انا مو غدير بعدين افرغلها هسه مشغولة
سكينه : يلا خلي نشوف تلفون ميثاق
غدير : اي اي .. فتحته حاطله رمز "رقم" ..يااا هذا شلون افتحه هسه
رقيه : ههههه فديت اخوي والله يعرف اكو ناس تدور وراه
غدير : لو ما عنده بلاوي ما يحط رمز وهنوب رقم يا ربي .. غدير فكري فكري شلون افتحه هذا .. اجتلي فكرة ولجن ..كتبت سنه ولادته وانفتح ..هههههه على مين يا بابا على غدير ولجن انا مكاني مو هنا ودوني لغير مكان يستفادون من عقلي الخرافي هذا
آية : ههههه اي عود نوديج بس خلي نشوف شكو بتلفونه
غدير : دورت دورت اخر شي لكيت رسائل بينا وبين بنيه مبينه زميلته ببغداد كله عن المحاضرات وكلام حب واشعار ..هلا هلا وينك يا چاسب شوف احفادك شلاعبين ..بهالاثناء دك تلفون رعد ..يمممه
آية : ولج رجعيهن بسرعه
رقيه : راح نروح بيها وعلي
غدير : سكتن ولجن وترتني.. يبووو هسه شلون انت اسكت اسكت ..بس خلصت المكالمه گبل ركضت للديوان شمرتهن واجيت حتى ما حطيتهن على الشحن مثل ما جانن
آية : ها ولج
غدير : سويتلها علامه الاوكي .. لا من شاف ولا من دره
آية : الحمد لله... مرت الايام واجت امتحانات نصف السنه جنت جاي ادرس للامتحان الثاني ودك تلفوني ..الو هلا حبيبي
بلال : هلا بيج شنو وين غاطه ماكو لا مكالمه لا رساله
آية : حبيبي جاي ادرس
بلال : اهاا ..آية اريد اشوفج تعبت
آية : بأستغراب ..مو كل يوم نتشاوف؟
بلال: لا اريد اشوفج واحجي وياج وجها لوجه صار شكد
على علاقتنه ولا مرة متحاجين بلا تلفون
آية : شلون نتشاوف تدري البنات وياي ما اكدر اعوفهن واجي احجي وياك
بلال : لا تكدرين.. شوفي خلصي امتحانج على وكت وطلعي من المدرسه ونلتقي بالفرع الي يم المدرسه
آية : لا لا بلال والله اخاف
بلال : اهووو ولج منين تخافين محد يشوفنه
آية : والبنات اذا طلعن
بلال : طلعي قبلهن وهن بس 5 دقايق احجي وياج واخلي رفاه تراقب الوضع اذا طلعت وحدة من البنات تجي تگلنا بعد شتردين
آية : ما ادري والله الشغله تخوف
بلال : لو بس هالخوف يروح جا احنه بخير ..هسه تجين لو لا
آية : ماشي ماشي بس حاجي رفاه همين
بلال : لا تخافين احاجيها .. اكلج صدگ ليش ما تشترين تلفون لمس حتى نتراسل بي
آية : ما اكدر اطلب من بابا يشتريلي وبقية البنات اصلا ما عدهن بس ادخل للكليه اشتري واحد
بلال : براحتج ..يلا هسه باي ومو تنسين باجر
آية : لا لا ما انسى..ثاني يوم رحت للمدرسه وابالي الخطه بس گلبي احسه راح يطلع من الخوف
غدير : آية بيج شي
آية : بأرتباك.. لا ما بيه
غدير : ما ادري احسج مو على بعضج
آية : شوي خايفه من الامتحان
غدير : ههههه وانا عبالي اكو شي .. ان شاءالله تجي الأسئلة سهله وتخلصين من هالخوف
آية : ان شاء الله .. دخلت للقاعه حليت شلون ما كان وطلعت ..انتظرت رفاه تطلع ﻷن خفت اطلع لوحدي ..شوي ولمحتها جايه ..يلا يلا تأخرتي
رفاه : على كيفج حتى مجاوبت عدل بسببكم
آية : انا شلي علاقه هذاك اخوج حاجي
رفاه : يلا عيني خلي نروح اخاف هذن يطلعن
آية : ماشي .. لبست جبتي وطلعت بره انا وياها.. الحارس جان موجود سويت نفسي اروح للبيت التفتت للفرع شفت بلال موجود ركضت بسرعه قبل ما يلاحظ الحارس
بلال : ههههههه شكلج يضحك وانتي تركضين
آية : وانا اتنفس بسرعه ..اي غير من وراك بلال هاي اول واخر مرة والله الشغله تخوف
بلال : ههههه ماشي هسه عوفينا من الدنيا كلها ..شلونج
آية : ابتسمت.. الحمد لله انت شلونك
بلال : ههههه زين .. ولج عن قرب شكلج احلى وصوتج احلى وكلشي بيج حلو
آية : اووو بلال كم كتلك لا تحجي هيج
بلال : يا يابه شوف شلون تخجل .. ادفع عمري كله علمود هاللحظه وتكليلي بعد ما اسويها بعد كل يوم تخلصين امتحان ونلتقي هنا
آية : لا لا والله ما اكدر
بلال : ولج شكد خوافه انتي الحب يحتاجله قوة شبيج
آية : بهالاثناء جاي نحجي وسمعت صوت وراي صاح بعلو صوته
رعد : آيييييية
آية : التفتت واحس روحي طلعت من مكانها
الخوفة الحسيتها بوكتها ما تنوصف صرت اختض مثل السعفة ..بلال بس سمع صوته ركض لسيارته ..احنه جنه ببدايه الفرع من جهة المدرسه ورعد بنهايه الفرع من الجهه الثانيه ..اول ما ركض بلال ركض وراه رعد بس ما لحگه هذاك ساق بسرعه وفلت بقيت انا من الخوف ما كدرت اتحرك ضليت بمكاني ..رجع عليه وعيونه تجدح نار من العصبيه ..لزمني من زندي ودخلني للسيارة بعصبية ..اول ما دخلت طگيتها بجي من الخوف
رعد : بعصبية.. اشششش ولا صوت لاحگه على البجي ليش مستعجله
آية : جان يحجي بنبرة تهديد .. اباوع ﻷيدي لازم الستيرن بقوة ..انا شفته هيج حطيت ايدي على حلگي وزدت بالبجي حتى صوت شهگاتي تنسمع
رعد : وهو يصك على سنونه ..كلللللت كااااافي
آية : حاولت اكتم صوتي ماكو اريد اسكت ابطل ضليت مستمرة وهو كل شوي يصيح ..لحدما وصلنا للبيت بس ما وگف السيارة بالكراج عبر على البستان ..وگف نزل من السيارة ودار لجهتي سحبني من زندي وظل يجرجر بيه لحدما وصلنا للكوخ نفسه مال الفلاليح ..انا هنا انتهيت كلت هذا راح يكتلني ومحد يدري بيه ..دفعني جوه باوع منا ومنا طب وسد الباب ..انا شفته تقدم بأتجاهي كمت ازحف للوره لحدما انحصرت بالزاويه
رعد : هذا منين وشعندج وياه
آية : ما حجيت شي جنت بس ابجي ..لحدما صاح بعصبية
رعد : ااااحجيييي هذذذا منيييين تعررررفينه
آية : حجيت بصوت متگطع ..اخو ..اخو صاحبتي
رعد : عقد حواجبه.. اي وشعندج وياه هااا شعندج خاتله وياه وره المدرسه
آية : استحيت وخفت اكله شنو بينا ضليت بس ابجي
رعد : بعصبية.. تلفووونج وين ؟؟
آية : بالبدايه استغربت سؤاله وبعدين فهمت يريد يعرف اذا اكو شي بينا وانا الغبيه ماكو شي حاذفته من التلفون
رعد : بعصبية ..ااااحجي
آية : بغرفتي ..شهگت .. بالجرار اليم الجربايه .. بس حجيت طلع من الكوخ وسداه وراه بالسرگي .. من طلع كمت الطم على رجليه وابجي ..صخااام الصخمني انا ليش رحت ليش وافقت اروح صخااام الصخمني كون ..وانا على هالحاله دخل وبأيده التلفون .. جان اكو شلون الطبله كعد عليها وظل يگلب بالتلفون وعيوني تراقبه بتوسل شوي وگام بعصبيه
رعد : وووولج شمصخمه انتي شمصخمه وياااااه ..ووولج اكو وحدة بت نااااس تررراسل بالولد
آية : يصيح بعصبيه لحدما فقد اعصابه فلش الطبله الجان كاعد عليها واكو كم شغله بالگاع هم كسرهن ضل يكسر بالغراض الموجودة لحدما اجه بأتجاهي وضربني راجدي فر راسي فر ..كمت ابجي بحرگة
رعد: اششششششش لا والخلقج اروح اكول ﻷبوج وهو يتصرف
وياج
آية : حطيت ايدي على حلگي حتى صوتي ما ينسمع وهو يفتر بالمكان اخر شي فرك وجهه وكعد بتعب .. وحجه بهدوء
رعد : صارلج شكد تعرفينه
آية : گوة طلع صوتي من بين شهگاتي ..راح يصير سنه
رعد : شتسوين طالعه وياه ..جنتوا تردون ترحون لمكان ؟
آية : لا لا والله..بجيت ..هو جان يريد يشوفني وطلعت
رعد : جم مرة سويتيها
آية : بأستغراب.. شنو السويته
رعد : بعصبية.. جم مرررررو طللللعتي ويااااه
آية : والله هاي اول مرة والله
رعد : شنو اسمه الكامل
آية : سكتت ما حجيت بس ضليت ابجي
رعد : شوفي اخر مرة اسألج وحق الله اروح ﻷبوج وهو يتصرف بعد ما الي علاقة بيج
آية : لا حباب لا تگله شي ..مسحت دموعي وتقربت علي ..شوف هو الولد رايدني والله كال بس تخلصين سادس اجي اخطبج والله .. قرب وجهه يمي وضرب على راسي بأصبعة
رعد : حجه من بين سنونه ..يا غبيه لو رايدج ما فلت اول ماشافني جان وگف مثل الزلم و واجهني
آية : خاف منك والله هو يحبني ورايدني ..ستوني كملت الجمله واجاني راجدي
رعد : بعصبية... ووولج انتي ما تستحين ماااا تخجلين كدامي وتكولين يحبني
آية : نزلت راسي لازمه خدي وابجي بشهگة
رعد : احجي شنو اسمه ؟
آية : گوة كدرت احجي.. انطيته اسمه الكامل ظل كاعد لازم راسه ..شوي وگام
رعد : گومي اوديج للبيت تلفونج راح يظل وياي واي احد يسألج كليلهم تخربطت بالمدرسه ودكوا على رعد اجه اخذني ..خوش
آية : هزيت راسي بأي.. عدلت ملابسي وكمت وياه طبينا من الترك مو من الباب رئيسي اشرلي اصعد محد موجود بالمطبخ.. رحت ركض اول ما فتحت باب الشقة صارت انعام بوجهي
انعام : خير شبيج وجهج مگلوب گلاب
آية : عفتها ومشيت للغرفة
انعام : هو مو صوجج صوج اليسألج والله
آية : اول ما طبيت للغرفة.. دخلت جوة البطانيه وشكو بجي بجيته ..شهالحظ الي عندي منين طلع رعد وبهاليوم شسوي اذا كال ﻷبوي ..ضليت ابجي لحدما مليت .. شوي وطبت سكينه بدلت وطلعت للامتحان ﻷن هي عكس دوامنا .. وره نص ساعه انفتح الباب
غدير : آية ..آية
رقيه : ولج عوفيها يجوز نايمه
غدير : خطية يجوز من وره الامتحان طاحت الصبح شفتها شلون خايفة
رقيه : اي عوفيها من تكعد نشوفها
آية :طلعن وانا دموعي ما بطلت ..كله مني لو ما طالعه من المدرسه احسن .. للعصر كمت من الفراش بدلت وغسلت وجهي ورجعت للغرفة ..لزمت الكتاب حتى ادرس امتحان باجر بس ما كدرت احفظ ولا كلمه ..كلما اتذكر اظل ابجي وهنوب انطيته اسمه بس لا يسويله شي يا ربي...
شوي ودخل بابا
عماد : بخوف ..ها بنيتي شبيج كالو متخربطه بالمدرسه
آية : بس حجه هيج برطمت وضليت ابجي
عماد : بويه صدك جذب ليش هالبجي
آية : حضنته وضليت ابجي ..ما مجاوبه
عماد :بوية يروحلج فدوة الامتحان ..وبعدين هي امتحانات نص السنه مو بكلوريا تتعدل بالنص الثاني
آية : وخرت عنه وهزيت راسي
عماد : تعاي نزلي وياي لا تبقين هنا شوفي وجهج شصاير بي وعيونج رايحه من البجي
آية : لا بابا اريد ابقى هنا ادرس
عماد : براحتج بس لا اتعبين روحج بوية ماكو شي يسوه صحتج عدي
آية : هزيت راسي بأي. .باسني من راسي وطلع .. وره شوي طبن البنات ونفس الحجي نعاد ..قنعتهم ما اريد اطلع اريد ادرس .. بقيت فاتحه الكتاب وما حافظه شي منه بالي اصلا مو يم الدراسه .. بقيت لليل بالغرفة حتى العشا سكينه خطيه جابته اليه رغم اسمع انعام ترزل بيها ﻷن صعدته الي بس هي ضلت ساكته ..اخر شي من التعب والتفكير نمت ...كعدت الصبح على صوت غدير
غدير : يلا كومي راح نتأخر
آية : هزيت براسي وكمت بدلت وطلعت ..استغربت ريحانه جوة ما رايحه للدوام ..
غدير : هاا بعده مجاي
ريحانه : لا كال شوي يتأخر
غدير : ماشي ..التفتت على آية ..اليوم ريحانه تعقد محكمة
آية : اهاا اكول ما رايحه للدوام
غدير : اي .. يلا امشينا
آية : وانا جاي اطلع شفته گبالي جان يحجي وي فرقد بعصبيه اول ما شافني خزرني ..نزلت راسي بسرعه ومشيت وي البنات ..اباوع بالطريق بلال ماكو هو كل يوم واگف هنا ..بس وصلنا دخلنا للقاعات گبل .. اجت الاسئله وكلشي ما عرفت اجاوب منا انا ما دارسه ومنا عقلي يريد ينفجر من التفكير كتبت شلون ما كان وطلعت ..بس طلعت من القاعه صارت بوجهي رفاه
رفاه : ليش طولتي صارلي ساعه منتظرة
آية : بس شفتها ضليت ابجي ..رفاه بلال وينه ليش ما اجه اليوم
رفاه : جاي بس ما شفتي ظل باله يمج البارحه كله ما نايم
آية : والله حسبالي سواله رعد شي ..ﻷن انطيت اسمه لرعد
رفاه : ولج شكد ثوله انتي ليش تنطينه اسمه وبعدين هو البارحه خبصنا بالاتصالات وكل ساعه يهدد اخر شي بلال انطه لرقج حظر و لرقم ابن عمج همين
آية : اي احسن ﻷن تلفوني عنده
رفاه : هسه سمعيني عدل .. هو هسه جاي وگال اريدها تجيني من الباب الثاني مال المدرسه حتى الحارس لا يشوفها
آية : لا حبابه ما اكدر اخاف هم يلزمنا رعد وهالمرة يذبحني والله
رفاه : ولج شكد جبانه انتي .. يريد يحجي وياج بموضوع مهم ويا ريت ترحين بسرعه قبل لا
لا يطلعن بنات عمج من الامتحان
آية : ماشي بس تعاي وياي
رفاه : خوش اجي وياج بس فضيني .. اخذت جنطتي وكتبي وطلعنا انا وياها من الباب الوره مال المدرسه ..شفت سيارته واگفه قريب علينا ..طلع ايده اشرلنا تعالن .. ركضت بسرعه
بلال : صعدي بسرعه
آية : غير تريدني بموضوع احجي بسرعه
بلال : بعصبية .. ووولج صعدي بسررعه لا يجي احد
آية : فتحت الباب وصعدت يمه ..اباوعله اشر لرفاه حتى تروح
آية : بأستغراب.. ليش خليتها تروح خليها تجي
بلال : ولج بس احجي وياج شوية وارجعج
آية : حرك السيارة وانا گلبي بأيدي من الخوف ..بلال وين رايحين ؟
بلال : لبيت اهلي
آية : يحجي بلا ما يلتفت علي ..حجيت بصوت يرجف ..شنسوي ببيت اهلك ليش نروح هناك
بلال : شبيج خايفه اروح احاجي امي حتى اخذها ونروح لبيتكم گبل اخطبج علمود ابن عمج يسد حلگه بعد
آية : من حجه هيج ارتاحيت ..واخيرا راح اصير اله
بلال : احجيلي شسوه بيج البارحه خوما اذآج
آية : ضربني مرتين
بلال : ولا يهمج راح اخذج يمي وبعد فنه اليجي يمج
آية : ابتسمت اله وانا احس اكبر احلامي راح تتحقق .. وصلنا لمكان ما اعرفة ..نزل واشرلي انزل وياه ..نزلت وانا اباوع على المنطقة
بلال : يلا امشي
آية : مشيت وراه ..طلع المفايتح من جيبه فتح الباب دخل ودخلت وراه ..اباوع للبيت هدوء ..استغربت ..اهلك وين
بلال : بأبتسامه.. هسه يجون اخذي راحتج انتي
آية : البيت جان صغيرون كعدت بالصاله ..دخل للمطبخ جاب جگه مالت ماي صب بالگلاص وانطاني .. اخذته منه وشربت ﻷن صدگ ريگي ناشف .. حط الجگه على الميز واجه كعد يمي كلش ..لا اراديا ابتعدت
بلال : شبيج خايفه ؟
آية : شوكت يجون اهلك
بلال : شوي ويجون
آية : حجاها وهو يمد ايده على خدي .. بخوف دفعت ايده ..بلال عفيه بلا هالحركات
بلال : بعصبية.. شبيج انتي غير حبيبتي وراح تصيرين خطيبتي بعد على شنو خايفه
آية : الله يخليك ما احب هالحركات
بلال : وهو يتقرب ..لازم تتعودين حبيبتي
آية : من شفته يتقرب كمت ..بلال رجعني عفيه ..گام بعصبية ولزم ايدي بقوة
بلال : وووين ارجعج يا روح امج انا ما صدكت اجيتي هنا برجليج
آية : وانا احاول افلت ايدي منه .. عووفني بلال شبيك !!!
...يتبع
#ارجوان