سراديب الهوى

البارت الاول

سراديب_الهوى

للكاتبة بان الأعرجي

البارت الأول..

الحب....مشاعر تاخذك لعالم خيالي وانته وحضك لو تصنع منك اجمل ملاك لو ترسمك شيطان بأبشع صورة..الحب مرات يكون نعمة ومرات يكون اكبر نقمة بحياتك..رب العالمين خلق العشق وجعله مقدس واي مشاعر محرمة ما تسمى بالحب ابداً... هيه بالأصح نزوة شيطانية....

على صوت الصباح المشرق فتحت شباك غرفتي واني اتنفس الهوى المنعش بكل سعادة وراحة..تعالو ادخلكم حياتي واعرفكم على زوايا قصتي...اليوم انتو راح تقرون قصتي بقلم الكاتبة بان الأعرجي ويمكن الدور القادم الك او الج تكتب قصتك و تشاركونا كل الأحداث العشتوها..اليوم احجيلكم قصتي حتى تاخذون منها العبرة وتعيشيون وياي كل لحظة حلوة ومرة...اهلا وسهلا بيكم بقصتي...

اسمي ونس عمري 27 سنة...معاني وجهي قريبه جدا للممثله إيناس طالب 😊..متزوجه على حب بعد قصة مليانه وجع ودموع...
لان الحب جان من طرف واحد..الحب جان فقط من طرفي اني چنت احب ابن عمتي. واني بنت ال13 سنة...
ماجد: زوجي وحبيبي..
ماجد جان كولش حلو ملامحه الرجولية تجذب اي بنت وصاحب شخصية من جان طفل الى ان كبر وصار شاب جان ثكيل وميباوع على وحدة ولا يحچي ويه ابنية حتى احنه بنات خاله وخالاته ميختلط بينه على گد السلام وبس..بديت انعجب بي اول مراحل المراهقة ابعمري يعني مثل ميكولون ماجد جان اول فتحت عيني...وعيت واني ما اشوف غيرة ويوم عن يوم يزيد اعجابي بي..جنت لمن اسمع اسمة يفز گلبي وارجف..ولمن اسمع اخوتي او بابا يجيبون اسمة بالطاري او يذكروه ابسالفة اترك البيدي واگعد يمهم واتربع بس حتى اسمع شلون ايمدحون بي ويسولفون بأفعالة الترفع الراس...

كبر حبي لماجد وصار فارس احلامي..وصرت يوميه ادعي ربي ايزوجني ماجد ويكون من نصيبي

جنت خجولة كولش لمن اشوفه يجي لبيتنه اشرد وبعدين اروح اقدملة ماي واسويله شاي😅
وهو ولا مرة باوعلي لو حچه وياي كلمة بس السلام
كبرت وكبرت مشاعري...خلصت الثالث متوسط..
وصار عمري 16سنة وبدت الخطابة اتدك بابنه ويطلبوني..وجان كلما يتقدملي واحد ارفضه بدون حتى ما اعرف منو وشنو شكلة وهالموضوع سببلي اهواي مشاكل ويه امي..

_ضلي على گلبي معنسة البكدج هسه متزوجه وعدها طفل..
_ماما كتلج ما اريد اتزوج ليش اضغطين عليه
_ولج عوبه هذا ضابط وخوش قسمة واذا رفضتي بعد لو تموتين ميجيج واحد مثله وكولي كالتها امي..
_مشكورة ما اريد لا ضابط ولا دكتور
_جا اشتردين انعال
_لا اريد اكمل دراستي
_يبووو اليسمعج ايكول امكطعه الكتب من الدراسة لو درجاتج كلها اميايه همزين طلعتي من المتوسطة بالدفرات لوما يشيلوج قرار جان حثلتي بالمتوسطة
_ماما كتلج لا يعني لا لو تردين اوصلها لبابا؟
_هو منو طيح حضج غير ابوج ودلاله امدااج ابقي هنا يالعانس..
عافتني وطلعت وهيه ادردم...