#سراديب_الهوى
للكاتبة بان الأعرجي
البارت الرابع
يبس الدم بعروگي وكمت اطك سن ابسن من الخوف خرب يومك ولك اشجابك عليه...
يمة ليشوف المراسلة واحد من عيالي شكول وشحجي صخام ابوجهج ونس....
ايدي ترجف والموبايل بيدي واني بهاي الحالة دخلت عليه عمتي...
_ها يمة بشري خابرج ماجد..
_عبالك شفت ملك الموت مو عمتي.. بقيت صافنه ابوجها بلعت ريگي وكتلها..
_لا مو هو قصدي لا ما خابرني هاي امي..امي تسأل عليه..
_ها ...اووف منك ماجد ليش هيج اتسوي بينه متكول اهلي يخافون عليه خلى اطمنهم عني..استغفر الله
_عمتي تحجي واني اباوع بجهازي ما اعرفت افكر بهذيج اللحظة ما كو كدامي حل غير امسح التطبيق(الانستغرام)..مسحته وسديت موبايلي وكعدت يم عمتي تسولف واني رايحه ابغير دنيا هذا اشجابه عليه منين عرف حسابي وليش ديحجي وياي وهو يعرف بيه مرة متزوجه وعندي طفل.. وقبلها تصرفاته الوقحة..بهاي اللحظات صرت بركان ويريد يثور وانفجر على جنة وهذا السافل ابن خالتها بسيطة خلي ارجع لبيتي لا افضحهم فضيحة حتى لحسام اريد اوصلها...
سراج وهو يسحب نفس الجكارة..وعيونه تترقب جهازة وهو يتمنى حرف ينكتبله من ونس...لكن؟؟
جنه..
بقيت اتصل بسراج واراسله ميرد عليه ولا يشوفهن اصلا..
_اشبي هذا زعل..واني شكو ..اووف كعدت افكر بكلام سراج...معقولة ايحبها؟
صحيح ونس حلوة وشخصيتها بعد احلى ثكيله ورزنه وتنحب بس مو هسه...هيه مرة متزوجه اشلون يحبها سراج ويدخلها بدماغه...صرت اتخيل اذا واحد عرف بالسالفه...يمة سراج ينكتل مستحيل ماجد يخلي عدل..وموقف ونس مبهم لحد الان ما اعرف اذا عرفت بهذا الخبال شنو راح يكون موقفها بس اكيد مراح تسكت لن ادري بيها وبأخلاقها والاهم هيه اتحب رجلها بجنون...سراج طول عمرك تمشي اعوج اووف...
قطع افكاري صوت حسام...
_جنه...جنه....وهو يحرك ايدة مقابيل وجهي...
_بأنتباه..ها..حسام اشوكت اجيت
_ خوش ضاربتلج صفنه هاي اشبيج خير
_لا ماكو شي..سرحت اشويه خير شو راجع من وكت
_اي سديت الشركة الوضع مخربط برة
_يا ستار شكو..
_مظاهرات والدنيا محتركة
_يا صدوك عبالي يطلعون كم يوم ويرجعون يعني استمروا
_اي والله هالمرة تختلف مو مثل كل مرة حتى الاعداد اهواية والناس مصممة عالتغيير
_ ههه والله اذا كدروا يغيرون شي اگص ايدي..
_ما قاهرني غير هاي الشباب الطالعه وهمه ازغار كلشي ميعرفون ماخذين الموضوع لعبة بوبجي عبالهم اليموت يرجع حسبي الله ونعم الوكيل..
_لبنان هم مظاهرات
_اي
_وماجد شيكول
_ماجد مو يم المظاهرات كال راح ارجع كلشي ما افتهمت من السفرة..الطرق مقطوعه وباقين بالفندق
_ومرته خابرها..
_ما ادري اني كتله مرتك كالبه الدنيا عليك خابرهه وكال هسه راح اخابرهم..
_ينطي جوز للماعندة أسنون حمد لله والشكر..
_سراج وينة نايم
_اتهربت بعيوني وكتله لا راح لبيتهم..وكمت افرغ الماعين وارتب المطبخ..
_اشعجب بعدة مصار وكت التحاقه حتى يروح لبيتهم..
_خلي هناك احسن للكل
_ما فهمت
_حسام مالي خلك اعيد الكلام حباب روح يم الجهال بين ما اكمل شغلي..
_يله ماشي اني هم تعبان راح انام
_براحتك
_محتاجة شي حبيبي
_ابتسمت لا عمري تصبح على خير
_باسني بالهوى وراح 😘 لغرفتة
أنت تقرأ
سراديب الهوى
Romanceمن سلسلة الحب الحرام نبعت خطيئتي انا في عين المجتمع خائنة وفي عين نفسي عاشقة ...لا تلوم قلبي فلا سلطان لي عليه اقرء قصتي واستمع الى روايتي ...ولا تعجب من ما ستقرأ...
