سراديب الهوى

البارت السادس

#سراديب_الهوى

للكاتبة بان الأعرجي

البارت السادس..

جنة..
استغربت سؤال ونس عن سراج وبنفس الوقت صار عندي فضول قوي اريد اعرف نظرتها لسراج شنو..كتلها..
_اشبي؟؟
_ لا مو قصدي بس اني اذكر قبل لا افقد الوعي شفته اجاني يركض اريد اعرف هذا الشي صحيح لو اني متوهمة ..
_لا ما متوهمة. ونس لوما سراج جان احتركتي انتي وابنج..
_اشسوة..
_كولي شنو ما سوة..اتخيلي سراج طفر على بيتج وطلع دبة الغاز وهي مشعولة نار شالها على جتفة وشمرها بالشارع وجان بيا لحظة تنفجر علينه..واخذناج ركض للمستشفى..

جنة تسولف واني اتخيل كل موقف تحجي إلية وهالشي خلق بداخلي اهواي افكار وتساؤلات..
ليش اني بالذات..
وليش هيج مهتم لامري بحيث طب ابنص الموت علمود ينقذني ويخلصني..وما اهتم وجان بيا ساعه يموت وتنتهي حياته..
ليش مستعد يموت كدامي؟
شنو معناهه؟؟

اعوذ بالله من الشيطان الرجيم..

اتعوذت من ابليس ومصايدة..وكتلها

_الله يحفظة لشبابة ويخلي لمرته وجهالة. لو ما متزوج..وابتسمت
_لا خية منفصل..
_معقولة ليش؟؟
_خالتي خطبتها وكتلت نفسها عليها وسراج ما كلها لا
زواجهم كله سنه وكم شهر طول هاي المدة وهمة عايشين ابجحيم يومية مشاكل وعركات على اتفه الاسباب وهيه اتريد سراج يمشي على مايهه كون شتكله يكلها امرج..و سراج النعرفه وين تمشي ويا هاي السوالف جان يشبعها كتل و اخر مرة ضربها وشك راسها وسبع خياطات واجو اخوتها وعمامها هدادة على بيت سراج..

_يا عززة

_جا اشعبالج سراج يسكتلهم اول ما وصلو باب بيتهم..وجان يطلعلهم بالرشاشه وخرطهم خلص الشاجور عليهم وصار طفارهم ماله والي ناس تربد بناس كلها شردت وبقت بس نعالاتهم بالشارع
_ههههه والله ابن خالتج ماعندة تفاهم
_ يبووو سراج ابد ميتفاهم وعصبي كلش بس شنو ماكو مثل طيبة كلبة وحنيته لو تلفين الدنيا كلها .
_الله يخلي الكم وشلون انفصلو..

_خالتي بقت اتلح على سراج حتى يرجعها وهو جان ايطفر ويتخبل من واحد يحجي ويا بهذا الموضوع يكسر البيت عليهم جان رافض رجعتها نهائياً الى ان بيوم من الايام اجه وكال طلكتها وانطاهه كلشي مهرها وذهبها حتى غرفتها ما خلالها اثر بحياته..

_يا خطية
_باع هاي يا خطية..يمعودة لو شايفتها فد وحدة مغرورة وشايله خشمها ومتكبرة خو اني اتموت مني لن اضحك واشاقه وي سراج وتردين الصدك والله من طلكها يلا ارتاح وكام يطلع ويسولف ويضحك بس خالتي الله يسلمها اتحبها لذيج ودوم تمدح بيها

_الله يهديهم..وان شاء الله رب العالمين ايعوضة بالاحسن منها
_ان شاء الله يارب العالمين (بس كون مو انتي حجيتها بداخلي)
_والله ما اعرف شلون اجازيكم انتو خلصتوني من الموت..
_لا لتكولين هيج انتي منا وبينا جا غير انتي اخيتي وصديقتي
_ اي الله الشاهد.. اكلج سراج بعدة ابيتكم؟
_صفنت ومستغربة..لا راح التحق بدوامة ليش؟
_فشلة اريد اتشكر منه الي سواه اليه مو قليل..
_لا جا انتي غريبه حالج من حالي وهذا سراج معروف بمواقفة وكلها تشهدله..
_والنعم منه..شنو يعني هو بالجيش
_اي منتسب(بغير محافظة )
_ها..يرجعلكم بالسلامة ان شاء الله..
_الله يسلمج عيوني يلا خية اني اروح دوختج انتي هم تردين اتنامين بس والله بالي يمج ومن سمعت صوتج ما اتحملت واجيت اشوفج
_بعد كلبي ام امير متقصرين واني اشكرج اهواي على وكفتج وياي لوما انتو جان الله اليعلم شصار بحالي..
_يا على بختج بيج خير وتدللين عندج العافية مع السلامة
_الله يسلمج كل الهلا بيج..