#فيرو 15
محمد : غيبوبة 😳😳😳😳
الطاهر : قالو ضربة قوية ع راسه 😥
محمد : كيف بيصير؟؟
الطاهر : يستنوه لين يفيق... بس قالو ان حالته كويسة ماعنداش لا نزيف ولا شي
محمد : تنهد... الحمد لله..... و قام تلفونه
هالة : هاتي ياميمتي تو نرد اني.... امها كانت شادة تركينة و تبكي 💔
محمد : خالتي
هالة : اهلين محمد
محمد : ابتسم.... كيف حالكم هالة؟
هالة : الحمد لله.... طمني ع حمزة
محمد : بوك روح؟
هالة : لا قال طيارته تأجلت! محمد حمزة شن فيه
محمد : حالته كويسة بس الضربة كانت قوية ع راسه
هالة : باااه 😰😰 شن صارله
محمد : خش ف غيبوبة
هالة : غيبوبة 😳😳😳😳😭.... امها تلفتت... غيبوبة 😱😱 ياحييي عليااا وليديييي 😭😭.... محمد كان يسمع فيها
محمد : قولها توسع بالها مداما حاله كويس ان شاء الله ح يفيق منها
هالة : تبكي... بالله كيف بنشوفوه بيقعد غادي 😭
محمد : اييي قال دكتور لين يفيق.... اني قاعد معاه لين يفيق ما تخافوش... و بالله تبو اي شي طول تكلميني عندكم رقمي
هالة : تنهدت... حاضر ان شاء الله 💔💔 و سكرت
هالة : تعالي هاجر... جتها هاجر و كان حالهم يقطع ع خوهم و بوهم ل برا البلاد 💔
هاجر : شن في!
هالة : عارفة مش وقته بس مش ملاحظة شي غريب ع بوك
هاجر : قعمزت جنبها... كيف 😰
هالة : معاش يقعد ف الحوش بكل بدات بعد ما روح حمزة للبلاد... و لاحظي من يوم مشينا ل زوارة و روحنا بوك سافر و كل مرة يقول طيارة تأجلت... حتي امك ما يكلمش فيها
هاجر : حطت يدها ع راسها... اسمعيني مش قادرة نفكر اني توا فوتي الموضوع معاش تركزي
هالة : ان شاء الله ل في بالي ما يطلعش صح...
هاجر :تلفتتلها... شن قصدك 😥 تعرفي شي و داسة عليا؟
هالة : شبحتلها و سكتت
هاجر : لالا مستحييييل 😱😱
__________
روح خوها و مرته... و امها طول ركبت دارها و ماقالت معاها ولا كلمة... حست ان كل شي يزيد يتعقد... قعدت تفكر و حاطة تتفرج و مافاقتش بالوقت.... الا لين نفتح الباب
فراس : خيرك مقعمزة زي العساس شن فيي؟؟.... قامت راسها شبحت للوقت 😱😱
فيروز : فراس ساعة 12 و بوي ما روحش 😱
فراس : علاش شن في
فيروز : صارت مشكلة بكري و امي تعارك فيا ع خاطر رفضت خالد و بوي دخل و ضرب امي كف
فراس : صحة للتريس 😂😂😂
فيروز : ب عصبية... مش وقت بصارة ره 😑
فراس : بوك مش صغير تو يروح ولا تلقيه ف المزرعة قاعد
فيروز : مش مرتاحة اني 💔💔... قرب منها... حط يده ع كتفها... " مكتوب علينا الشقاء يا وخيتي" 💔
و ركب كل حد فيهم ل داره و مافيش حد جاه النوم 💔..لين جي الصبح و فاقت ان بوها روح بش ارتاحت
__________
17/2/2011
كيف كيف.. ثورة 😱.... بنموتو ولا شن... ضحك 😂 تو احني بنموتو علاش ترا
فراس : غبية اختي صبعي اكبر من دماغها 😂
فيروز :😑😑😑...
قعدو يراقبو ف الوضع و كل شي يصير... و فاضل من اليوم هذا معاش سمعو عليه ايي خبر 💔
اما حمزة قاعد ف غيبوبة 💔 و محمد ما فارقاش طول الوقت معاه ❤️ جت امه و خواته زيارة مرة وحدة بس ❤️
___________.
هالة : امي وين بوي معقولة لتوا ما روحش؟؟؟ و عارف ان خوي ف غيبوبة و ماعندنا حدد.. يقعد محمد بدل لا يقعد مع خوي... لاا يقعد ماشي جاي يجيبلنا شن ناقص ولا يجي حد من خوالي 💔 بدل لا بوي يكون معانا
زهرة : فكي عليا من سيرة هادي
هالة : امي راه مش صغيرة اني نبي نفهم.
زهرة : ب عياط... نوضي من علياااا مش ناقصاتك... جت هاجر ع صوت عياط امها... خيركم خيركم 😰
زهرة : اهو جيتي و جابك ربي... تعالي قعمزي انتي وياها... يشبحو ل بعض و قعمزو
زهرة : بكل برود... بوكم تزوج ... هما الزوز... نعممم 😱😱😱
زهرة : هذا ل صار و تمت... مالا سفراته هادو كلهم بالفاضي كنت حاسة و عارفة و مطنشة لين كلمني قالي تزوجت بكل صحة وجه... و قالي انسوني معاش تخممو فيا 💔
هالة : تلفتت ل هاجرر... قتلك 😩
هاجر : لا حول ولا قوة الا بالله كيف هكي يا امي
زهرة : الراجل ما يملا عينه شي يا بنتي 💔 رضيت بيه بوكم و هوا حاله منتف و خدمت معاه و عمري و جهدي كله ضاع معاه... شوفي صحتي 💔... من الشقاء و الهم... كنتو انتو كل شي بالنسبة ليا و فرحت بيكم كبرتو و كل حد فيكم ناجح ف حياته... يوم بوكم دار فلوس نسي كل شي درته معاه 💔 اني والله مش واجعني الا حالي و صحتي و انتو بس 💔.... حضنو امهم و قعدو يبكو 💔😭
" حرفياً معظم الرجالة وقت يكون حاله ع قده و توقفي معاه يوم يدير قرشين يلوحك وراه" 💔
________
الطاهر : يا راجل وين بوهم باهي؟؟
محمد : مش عارف كل ما نكلمها تقولي مزال ما روحش
الطاهر : معقولة يشوف ف الوضع هكي و يهونو عليه هوا بعيد عليهم
محمد : والله ما عارف يا صاحبي
الطاهر : حرك راسه يمين و يسار و يردد لا حول ولا قوة الا بالله 💔
طلع محمد من المستشفي و اتصل ب هالة....
محمد : اهلين هالة
هالة : بصوت مخنوق... نعم محمد
محمد : حس بيها... شن في خيركم
هالة : بوي تزوج 😭😭😭
محمد : نعمممم 😳😳😳😳 شن صاررر... و قعدت تحكيله و هيا تبكي 💔
سكر منها و حط يديه ع راسه و هوا يفكر شن يدير ولا شن يتصرف....
" محمد كان مش صاحب خوهم بس لااا... كان جارهم و خوهم... حياته كلها مع حمزة... كان يشوف فيهم عيلته التانية "
__________
و فاتو الايام زي بعض... لين...
رن عليه رقم غريب... كان يسوق... رد عليه
فراس : ايوااا
ناريمان : معاي فراس؟
فراس : ب استغراب... ايي تفضلي وخيتي
ناريمان : اني ناريمان يا فراس كان تزبطني
فراس : ناريمان 😰 وطول جيي ف باله خوه... شن فيي
ناريمان : سامحيني ع الاتصال بس سمعت سي ع فاضل ؟
فراس : والله من يوم 17 معاش سمعت عليه شي نتصل بيه مقفل و حتي مشيت ل حوشه مافي حد
ناريمان : حييي كان ما دارها 😭
فراس : شن هيااا 😳😳😳
" نعمممم بنغازي 😳😳😳 "
YOU ARE READING
فيرو 💙
Romanceلقد كان فِراقاً عادياً يزول أثره مع الوقت، لكن السؤال الذي دائماً أحاول أن أطرِدهُ من رأسي ولا يذهب، كُنت دائما أضيئك، كيف أستَطعت إطفائِي؟."💙
