يوميات جيران 💓.

الحلقة 11

- روايَـة : يوميات جَيران.
- عَائشة أحمد المنصّوري.
- الحَلقة :  الحَاديــــة عشّر " 11 " .

في الحَلقة السابـــقة 10 :-

الساعة 1:00 في الليل.

جيهان ادير في نسكافيه وتحكي مع جنى ع التليفون : قصدك عُمر ولى لِ مواله القديم؟
جنى : هوا عُمر نساه اصلا نين يوليله 24 ساعة عركة مع بابا ع قصة مُرشد سياحي وبلا بلا توا كيف سكتو بس شوي هايبدو مرة ثانية.
جيهان تخلط في النسكافيه : بس عُمر معه حق هادا حلمه مفروض عُمو مصباح يدعمه
جنى : شن تقولي عاد مفروض
جيهان : عارفة شني يكسب لما يولي مُرشد سياحي؟ ملاييين ي بنتي هادا غير سفراته من مكان لِ مكان والاجانب يلي هايقابلهم فرصة بجد
جنى : حتى انا خاطري يقعد مُرشد سياحي لانه حلمه من هوا صغير خش هندسة غصبن عنه عارفة انه مأخر كل حاجة حتى الزواج عشان الموضوع هذا
جيهان : ربي يوفقه ويحنن قلب عُمو مُصباح عليه.
جنى : يااارب قوليلي عاد وين غاطسة؟
جيهان تنهدت : مشاكل ي جنو
جنى : شن فيا احكيلي ضروري نجيك ونقولك احكيلي ماتحكيش بروحك يعني؟
جيهان : غدوة هانجيك وندويلك كل شي غير خايفة ماما تسمعني واني ندوي وهيا من غير شي قارشة ملحتي الفترة هادي
جنى : تمام نرجاك
جيهان : هي تصبحي ع خير
جنى : تلاقي الخير وراكي تنسي بكرا ضروري تجيني استحاشتك
جيهان ضحكت : حتى اني استحاشتك هلبا اكيد بنجي ...باي
جنى : باي وسكرت.
جيهان لفت وهي ماسكة مق النسكافيه وتسكر في تتليفونه انفجعت وصرخت لدرجة انه المق طاح منها.

جلال قرب مَنها : خيرك عيطتي بسم الله !!
جيهان شافت لِ المق المتكسر وبعدين شافتله ودفاته :  انتَ يلي خيرك وشن جابك هنايا ؟
جلال : حوش عمي هادا
جيهان : حوش عمك تدخله زي يلي جاي يخنب؟🤨
جلال : تِ اني جاي ليا هلبا وحتى سلمت ع مرت عمي نادية غير انتي حاشية ودنك في التليفون وماتسمعيش شي
جيهان ماعدلتش عليا وطبست تلم في المق المتكسر.
جلال حط يديه في جيوبه : مش مفروض تقوليلي الحمدلله عَ السلام يا بنت عمي بلا العياط يلي درتيه؟
جيهان رفعت راسها فيه : الحَمدلله ع السلامة😒
جلال : حقا قوليلي
جيهان وهي تلم : شني؟ 
جلال : عُمر جاركم هوا نفسه يلي تدوي عليه بيولي مُرشد سياحي؟
جيهان صبت شافتله : جلال اذا رجعت ناوي مشاكل من تاني مع عُمر نحي الفكرة من دماغك
جلال : لأ مش ناوي مشاكل اطمني
جيهان : امالا علاش تسئل؟
جلال : بِ تجمعنا مصلحة اني وياه
جيهان : مش مطمنة اني
جلال : تِ خيرك تعاملي فيا مُعاملة المجرمين هدي اعصابك واطمني
عَ خشة نادية : خيرها اصواتكم طالعة؟
جيهان شافتلها وخذت تليفونها وطلعت
جلال اتكى ع البال وخذا تفاحة من الطاولة : بنتك هادي نفسية.
نادية قربت منه : انت جاي هنايا عشان تشتغل الهى بِ شغلك
جلال ياكل : حاضر ي مرت عمي
نادية : 😒...وطلعت من المطبخ
جلال ياكل : عيلة نفسية كلها المهم اني لازم ندوي مع يلي اسمه عُمر هادا بس كيف هاندوي معه ونحن اخر مرة تعاركنا !! ربي يسهل .
عَائشة أحمد المنصّوري.