- روايَـة : يوميات جَيران.
- عَائشة أحمد المنصّوري.
- الحَلقة : الثــــالثة عشّر " 13 " .
-----------------------------------في الحَلقة السابـــقة 12 :-
بلال مقعمز جنب مُصباح وهو يحكي ع اصراره بالسفر تعصب بلال وتوتر وحس انه بتضيع منه جنى لو مادرش خطوة اقل شي ، صبى وهو ممُقرر يحكي مع مُعاوية يكون عنده علم اقل شي.
صبى أستئذن منهم وحط كراعه ع عتبة الباب وكيف يبي يدق انفتح الباب بقوة وطلعت جنى تجري
بلال انخلع مش فاهم نادلها : وين ماااااشية؟
جنى تجري اشرتله ب يدها : عندكم.بلال قرر يلحقها وقفه صوت.
سعاد : خير ي بلال خش
بلال شافلها : اهلي عمتي سعاد كيف الحال
سعاد : الحمدلله تفضل
بلال خش ويسلح في كندرته
سعاد تسكر في الباب : اكيد رعشاتك هالمكلوبة مدرعنها كنها
بلال ضحك : لا الامور تمام وين مُعاوية !
سعاد : خشله في المُربوعة كيف وعا
بلال شاف ل المربوعة : تمام توا نخشله
سعاد : عليما درتلكم قهوة .....وخشت ل المطبخ.خش بلال ل المربوعة لقا مُعاوية مقعمزة قعمز جنبه وسلم عليه وبدو يحكو ع الاحوال والجو هذا.
بلال يفرك في يديه في بعضهن : ولله شن نقولك يَ مُعاوية باتك مُصّر ع رايه.
مُعاوية تنهد : باتي ونعرفه لما يحط حاجة في دماغه خلاص
بلال : المهم هذا مش موضوعنا انا قاصدك في حاجة اخرى ونتمنى ماتردني.
مُعاوية رفع حاجبه ب إستغراب : شنو؟
بلال : انتَ ي مُعاوية مش بس جاري لا خوي ومتربي معاي ويعلم الله انكم اعز من هلي
مُعاوية ضحك : باهي بالجودة ي سيدي
بلال ضحك : انا عارف ماحد يقدر يساعدني في المُوضوع هذا غيرك نتمنى انك تفكر فيه وتصبي معاي
مُعاوية مستغرب : دوختني معاك ي راجل احكي شن تبي؟
بلال : انا نبي نطلب اختك جنى وعارف ماحد يقدر يصبي معاي خيرك لانك خوي قبل خوها
مُعاوية انصدم بعدين ضحك : بصارة هذي صح !
بلال : مافيش بصارة في المواضيع هذينا انا جد طالب اختك
مُعاوية : قصدك مش بصارة؟😨😨
بلال : اها
مُعاوية بعصبية : شن تقول ي بلال من جدك؟
بلال : تهيالي قتلك مافيش بصارة في المواضيع هذينا
مُعاوية : جنى اختك ي بلال !!!!
بلال بعصبية : مش اختي وانا جاي نطلب فيها
مُعاوية مزال مش مستوعب : وفرق السن يلي بينكم جنى طفلة راه !!
بلال : قتلك نبي نجوزها توا؟ لا نراجيها نين تكمل قرايتها
مُعاوية : مزال مش خاش راسي الموضوع
بلال : انا جيتك لأنك اكثر حد عاقل وعارفك مش متهور فكر في الموضوع من نظرة ثانية.
مُعاوية سكت شوي : حتى لو انا وافقت وصبيت معاك هلي مستحييييل يرضو وبذات جنى .
بلال : الاهم انتَ بس والباقي ساهل وجنى تحبك وتسمع في كلامك هاتوافق
مٌعاوية : تبيني نجوز اختي لك بالغصب؟؟
بلال : تِ مش هكِ ي راجل انا والله نبيها البنت
مُعاوية : مصدوم فيك انت تقول هك !!!!!! كلنا نحسابو جنى اختك وانتَ مربيها
بلال تعصب : يرا معش تقول اختي مربيها صح وكنت عركة معاها صح بس متوقعتش يجي يوم ون.....وسكت.
مُعاوية قعد يتلمس نين حط يده ع كتف بلال : عارف كان انتَ مش بلال وكنت حد اخرى راه زمطتك سنونك ع كلامك وطلبك هذا بس حظك جيت جاري وخوي
بلال : يعني ماتبيش تصبي معاي !!
مُعاوية تنهد : شن تبي مني بالضبط؟
بلال : مش انتَ خوها صبي معاي نين ناخذها الله يربحك ي مُعاوية
مُعاوية سكت.
بلال : عارف اني عصبي وطبعي واعر ومُبالغ ع قولتكم بس وللهِ ثم ولله ثم ولله نحط اختك في عيوني وتقعد فرحانة ديما كان وافقت هي بنتي اصلا مانرضى فيها شي.
مُعاوية ساكت ويفكر " لا هلي هايرضو ولا جنى تفكر فيه اصلاً كيف يصير توا " .
بلال : مُعاوية الله يربحك صبي معاي راني خوك !!
مُعاوية ناش من سرحته : استغفر الله العلي العظيم ساهلة توا خليني نفكر
بلال فرح : يعني مُوافق؟
مُعاوية : قتلك سااهلة تبي وقت
بلال : وانا نراجي....وصبى : نمشي انا
مُعاوية سكت وماعزمش عليه.
بلال عرف انه المُعاملة هاتتغير بعد طلبه بس قال كله فدا جنى ....طلع من دون إي كلمة ومُعاوية قعد يفكر.
YOU ARE READING
يوميات جيران 💓.
General Fiction- رواية يَوميات جيران ; رواية من الخيال عائلية اجتماعية تطرح عدة مواضيع بعيدة كُل البعد عن بعض ، تحكي ع 4 بيوت كل بيت هانحكو عَ جميع إفراده يلي عايشين فيه ، هانشوفو فيه ألفة الجيران وحبهم ل بعض وكيف يعتبرو نفسهم اهل مش جيران 💓. لِـ عَائشـة احمد ال...