- روايَـة : يوميات جَيران.
- عَائشة أحمد المنصّوري.
- الحَلقة : الثالثة "3".
-----------------------------------
في الحَلقة السابقة 2 :-
صبت جيهان لما حست انه مُعاوية خلاص قرب قعدت تشوفله وهي خايفة ومُعاوية مكمّل في ابتسماته وقربه منها نين وصل فيها هنا جيهان صرخت ودفاته بكل قوتها نين طاح ع الارض مفجوع مش فاهم شي .
جيهان : خيرك هبلت انتَ؟
مُعاوية : بسم الله الرحمن الرحيم شن صاير؟
جيهان : خاش فيا زي الحادث وتقولي شن صاير
مُعاوية مسح ع وجه وتنهد : ي اختي انا مانشوفش
جيهان حطت يدها في نصها : طبعاً ماتشبحش قدامك ماشي تدهس وخلاص خاش فيا مش عارفة هل هادي خفة دم منك ولا قلة ادب كان خفة دم فَ دمك اخي هلبا ولا يعني عشان اني بنت وقاعدة مقعمزة بروحي تجي انت ت.......
قاطع عليها مُعاوية بصوت عالي بككلللل : اعممممممى اعمممممى ي حمارة " يكرم القارئ " كفيف مانشوفش لهدرجة مش باين علييييي ولا حتى انتي ماتشوفيش ههااااااااهههههه؟
جيهان قعدت تشوفله منخلعة ومش فاهمة شي
ومُعاوية قعد يتنهد يحاول يسطر ع غضبه.
جَيهان قربت منه وبدت تحرك في يدها ع وجه بالضبط👋 : كفيف جّد.
مُعاوية سمعها : لا كنت نبصر معاك
جيهان وخرت : أسفه هلبا وللهِ ع كلامي واني خليتك هكي متلقح ع الارض بس اني جد قصدي انت مايبانش عليك كفيف قصدي نشبح فيك جاي ناحيتي وباين عليك بني ادم طبيعي جداً ماهو الاعمى يكون....
مُعاوية : خلاص حصل خير
جيهان : إن شالله ماتكونش زعلان ماهو زي ماقتلك ....
مُعاوية عيط عليها : خلاص قلنا حصل خير
جيهان سكتت
مُعاوية مد يده : ممكن تساعديني نمشي ل حوشي بدون ماتحكي واجد؟
جيهان رفعت حاجبها : كيف عرفت اني واقفة قدامك؟
مُعاوية : الصبر ي الله صوتك جاي من قدامي يعني وين تبي تكوني مصبية بلا غباء
جيهان : معاك حق😅
مُعاوية مزال ماد يده : ها تبي تساعديني ولا نمشي بروحي؟
جيهان مسكت يده : اكيد هانساعدك ....وصباته وقعدت تمشي معه وهي ماسكة فيه نين وصلت قدام حوشهم قعمزاته عَ الكرسي.
مُعاوية : شكراً
جيهان إبتسمت : ولو واسفة عَ وقاحتي مرة ثانية ...ولفت تبي تمشي.
مُعاوية : اسمعي
جيهان لفت شافتله : نعم !
مُعاوية : انتو الجيران الجدد يلي جايين من الغرب صح؟
جيهان إبتسمت : إي صح
مُعاوية : شن اسمك به؟
جيهان : جيهان وانتَ !
مُعاوية إبتسم : مُعاوية
جيهان : تشرفنا إستاذ مُعاوية
مُعاوية : أنا يلي حصل لي الشرف وبعد المرة حاولي معش تحكي واجد خلي افعالك اكثر من كلامك
جيهان ضحكت : هانحط نصيحتك بعين الاعتبار...عن اذنك
مُعاوية ضحك : إذنك معاك
ومشت جيهان وهي تقول : حرام معقول واحد زي هادا يكون كفيف ربي يساعده...وخشت وسكرت باب الحوش
نادية تكنس في الصالة : وين كنتي؟
جَيهان تسلح في وشاحها : برة شفت حد كفيف ساعدتك ووصلته ل حوشه
نادية ضحكت : كفيف؟
جيهام تلم في شعرها : إي عارفة ي ماما شاب صغير مايبانش عليه انه كفيف نهائي كأنه يشوف بس وجعني هلبا حرام
نادية : علاش وجعك؟
جيهان : هكي مايستاهل جنتل وحلو
نادية : بطلي قلة ادب
جيهان ضحكت : نقول في الحق تعالي نخليك تشبحيه.
نادية تكنس : والنبي بعدي عليا انتي وحدة فاضية
جيهان : لا ي ماما ارجوك تعالي اشبحيه وامشي
نادية : هيا
جيهان خذت امها الروشن واشرت عَ مُعاوية : هادا
نادية شافت ل مُعاوية : تبصري متأكدة هادا هو؟
جيهان : إي وللهِ هو
نادية : حرام مش باين عليه ربي يكون في عونه
جيهان سرحت في مُعاوية : ياررب.
عَائشة أحمد المنصّوري.
""""""""""""""""""""""""""""""""
YOU ARE READING
يوميات جيران 💓.
Ficción General- رواية يَوميات جيران ; رواية من الخيال عائلية اجتماعية تطرح عدة مواضيع بعيدة كُل البعد عن بعض ، تحكي ع 4 بيوت كل بيت هانحكو عَ جميع إفراده يلي عايشين فيه ، هانشوفو فيه ألفة الجيران وحبهم ل بعض وكيف يعتبرو نفسهم اهل مش جيران 💓. لِـ عَائشـة احمد ال...
