يوميات جيران 💓.

الحلقة 35

- روايَـة : يوميات جَيران.
- عَائشة أحمد المنصّوري.
- الحَلقة : الخــــامسة والثلاثون 35 " ماقبل الاخيرة " .

-----------------------------------

في الحلقة السابقة 34 :-

جنى خشت تجري بخوف ل المطبخ لقت جيهان ادير في قهوة : بلال في المربوعة صح سمعت صوته؟
جيهان تحرك في القهوة وحاطة يدها ع بطنها : اي جاي يبي مُعاوية وقابي انه بيدوي معاه في موضوعك.
جنى خبطت ع خدوها وقربت من جيهان : حيعليا ي جيجي
جيهان : خيرك خايفة هكي؟ وين جنى القوية؟
جنى : لو يعرف بلال شن في راسي وليش رافضة المدة هذي كلها هايقيم قيامتي
جيهان : ويمكن يوافق؟
جنى هزت راسها بالنفي : مُستحيل بلال ونعرفه
جيهان : يستر الله وخلاص
جنى : ياااااااارب

مٌعاوية قعمز جنب بلال : نورتنا ي بونسيب
بلال ضحك : بنورك شن الامور
مُعاوية : وللهِ تمام
بلال : سمعت نور الدين في الطريق مبروك
مُعاوية ابتسم : الله يبارك فيك توقعتك تنصدم
بلال : ليش ننصدم؟هذا رزق من ربي غيرك يتمناه وانا الاول احمد ربك راك لك ثلاث سنين تراجي
مُعاوية : الحمدلله انا راضي كُل الرضى.
بلال : المهم نخشلك في الموضوع
مُعاوية : انا عارف الموضوع يلي جاي عليه حتى انا عندي لك موضوع
بلال انشغل : خير ان شاء الله؟
مُعاوية :  مع انه هذا موضوع مفروض تحكيه جنى بينك وبينها بس قلت ندخل انا عشان تفهم مني اكثر
بلال ضحك : فهمني ولله دخت
مُعاوية تنهد : جنى تبي تسافر.
بلال ضحك بصدمة : كيف تبي تسافر؟
مُعاوية : انت عارف انه جنى جامعة توا وطب وهيا مش مقتنعة بِ جامعات ليبيا واجد ف تبي تسافر ل مصر عشان تقرا غادي .
بلاا صبى بصدمة : شن تقول ي مُعاوية😨😨 مُستحييييل مُستحييييل😡
مُعاوية صبى : غير وسع بالك ي راجل شنو يلي مُستحيل .
بلال : كلامك هذا مايخشش دماغ ولا في راجل يرضاها ع روحه.
مُعاوية حط يده ع كتفه : غير قعمز خليني نشرحلك
بلال يشوفله.
مٌعاوية ضغط عليه : قعمز .
بلال قعمز
مُعاوية : صلي على رسول الله
بلال تنهد : عليه افضل الصلاة والسلام
مُعاوية : جنى مُصّرة وتبي تقرا غادي ونحن مانقدروش نمنعوها بالعكس مفروض نشجعوها وانت تشجعها معانا
بلال ضحك بهزوة : نشجعها ع شنو بالضبط؟ ؟
مُعاوية : ع انك توافق ع سفرتها
بلال : انا جاي نقولك نبي نطلع العرس وانت تقولي شجعها ع السفر؟؟؟؟
مُعاوية : باهي وحتى هذا راي طلع العرس وبعدها سافرو زي مادارت خلود
بلال : مستحيل ي مُعاوية جنى في ليبيا ومش متحكم فيها يبال في مصر
مٌعاوية تعصب : بلال لاحظ انه يلي تحكي عليها هذي اختي ....بعدين صبى : توا نجيك.

بلال حط يده ع وجه : من وين طلعتلي القصة هذي ربي يهديك ي جنى.

مُعاوية مشى ل جيهان يلي مصبية قدام الباب خذا منها السفرة : معش تشيلي حاجة ثقيلة كم مرة نبي نقولها لك ؟
جيهان حطت يدها ع بطنها : خيره يعيط؟
مُعاوية : رفض طبعاً....بعدين رفع راسه ل جنى يلي مصبية بعيد : كيف متحملته بس؟...وخش ل المربوعة.