زوجى الحبيب قررت تعذيبك (مكتمله)

٢/بدايه التحريات ✍️

افاقت كاميليا من افكارها البعيده على صوت سحر التى نظرت لصديقتها بشفقه

سحر : ها يا كوكى ايه رايك فى حازم

كاميليا : شكله مغرور قوى بس واثق جدا من نفسه

سحر ضاحكه : ونسيتى تقولى انه وسيم جدا جدا

كاميليا بضيق : انتى عارفه ان الموضوع دا مش مهم بالنسبه لى خالص

سحر : مش يمكن هى ديه مشكلتك يا كوكى انتى مثلا عمرك ما وقعتى فى الحب ابدا

وانا واثقه ان لو ثبتت خيانه ايهاب انتى مش حتبقى موجوعه علشان بتحبييه

لا علشان هو خانك وهد العش الامن اللى انتى عايشه فيه

كاميليا بسخريه : خساره انك درستى تجاره يا سحر المفروض كنتى درستى طب نفسى

سحر بابتسامه لطيفه : انا مش محتاجه انى اكون دكتوره يا كوكى علشان احلل شخصيتك

انتى ناسيه اننا نعرف بعض من ايام الابتدائى وعارف كمان فتره المراهقه اللى كلنا حبينا فيها الا انتى يا كاميليا

ودائما كان كل همك المذاكره والنجاح بس حتى ايهاب انتى اتجوزتيه علشان ترضى اهلك بس مش علشان بتحبيبه

كاميليا بغضب : بس عمرى ماقصرت معاه فى حاجه دا انا لحد دلوقتى مقولتش لاونكل احمد او انطى زينب مين السبب فى عدم الانجاب علشان مجرحوش قدامهم

سحر باستغراب : بس قلتى لحازم الكلام دا مش غريبه ديه شويه

كاميليا بضيق : اه يا سحر مش عارفه قولتله الكلام دا ليه وانا مضايقه من ساعتها

واضافت فى حيره : بس فى حاجه ‏ ‏مستغربه منها و كنت عايزه افهم حاجه ازاى مقدم وفاتح مكتب للخدمات الامنيه زى ما فهمت منك

سحر بشرح : بصى يا ستى اصل حازم دا كان مقدم فى الشرطه بس وهو بيطارد واحد حرامى وقع من على سور عالى تسبب فى كسر عميق فى ساقه والاصابه تسببت فى فصله من الخدمه

بس هو فتح المكتب دا مع واحد صاحبه محامى وبيقدموا خدمات خاصه نظير مبلغ مالى متفق عليه من قبل كده

وانا استعنت به فاكره لما الولد اللى صلح شاشه التليفون بتاعى سرق صورى وابتزنى بيهم

واميره قالتلى على المكتب دا وقابلت حازم اللى فى ظرف اسبوع كان حل المشكله وسلم الولد للشرطه

وكمان بمساعده حازم قدرت الشرطه تعرف ان الولد كان بيبتز بنات وستات كتير بنفس الطريقه وبفضل حازم كلهم شهدوا عليه واخد حكم ودخل السجن

كاميليا بخوف : تفتكرى حيقدر يساعدنى

واضافت فى الم : معقول ايهاب يكون بيخونى فعلا بعد كل اللى عملته علشانه