#كسرة قلب
البارت 5
مشيت شويه صارت كبالي مدرسه اعداديه مال بنات هستوهم ديحلوون
جنت واكف وباوعت اتجاه المدرسه
صارت عيني على بنيه تمشي هيه وصديقتهه ناعمه حليوه وهي لسه بعيده ورفعت راسهه شوي ضاجت من الحر والشمس يمكن ، شمس الله ضربت بوجهه وعيونهه من بعيد تجدح لامعه وجبيره وجهه يبرج الخشم الحلك مابيهه عيب ولوله سبحان الله شخالق ومبدع بخلقه
رجعت دنكت ومشت من يمي بس بعيده عليه واني اشوفهه ما رفعت عينهه وباوعتلي راح تسودني هالبنيه او بلأصح سودنتني من اول ما باوعت طولهه
رجعت للبيت وبالي مشغول بهالبنيه يالله تطلع بعمرر جوري بـ 16 تقريباً مو جبيره جان شهر الرابع نهايته
التحقت بذاك اليوم بليل ووصلت وطول العشر ايام بالي يمهه وتفكيري بيهه
نزلت اجازه بحثت على موعد امتحانات اخر السنه للسادس وللمراحل الغير منتهيه
كلت اجرب حضي واروح بلامتحانات بلكن اعرف بيا مرحله دراسيه هيه
صادفت الامتحانات كبل التحاقي بـ 3 ايام
رحت اول يوم امتحانات وصلت كبال المدرسه حوالي 9:30 الصبح عيني بساعتي شوكت تطلع.
صارت الساعه 10 طلعت هم هيه وصديقتهه اخذت نفس براحه عرفت هيه مو سادس مبينه لو رابع لو خامس
ثاني يوم هم نفس الشي طلعت وصارت كبالي بس مدنكه من تمشي صارت كدامي وطلعت مره جبيره من المدرسه صاحتهه
"' ڤياان بنيتي اوكفي عندي حجايات شوي وياج '"
و عرفت اسمهه ڤيان برنسس ڤيان
استغربت من الاسم مسامع بي بالنجف هيج اسم تسائلت بيني وبين نفسي يمكن اعجمي او كردي ما اتصور عربي مسامع بي بلنجف قبل او كول اصلاً مشايف هيج خلقه من قبل
من سمعت هيه وكفت وصدت للمره
حجت وسمعت صوتهه ناعم كأنه موسيقى هيج تحسسته مسامعي
"' ها عميمه فخريه صحتيني "'
فخريه "' شلونج بلامتحان بنيتي سألت البنيات كالن اسئله الرابع صعبه اليوم بلاحياء دور خفت عليج لنج ما جاوبتي "'
ابتسمت ومن هاللحظه الشفت بيهه ابتسامتهه اخذت كلبي هلبنيه ما سمعت بعد شردت شحجت بس الهمني حبيتهه مو بس لجمالهه لأخلاقهه هم طول هالايام ما ترفع عينهه وتمشي بدربهه مدنكه ثكيله ورزنه بمشيتهه
وطلع صدك احساسي بكد جوري رابع بس صغيره عليك هالبنت يحياان
منو يكول ترضه اذا اتقدملهه خلهه تكبر تصيرر سادس واتقدملهه
رجعت للبيت واضطريت اداوم ثاني يوم وما رحت شفتهه عدت ايام الدوام
ومن رجعت للبيت تلكتني شغلة احمد انقهرت عليه يحبهه وبكل قوته وجان يكلي انو يحب وحده بس ما يحجي بحالتهه ووضعهه بس يحجي بيهه وبحبه الهه اول مره اول بصمه اول تذكار شين جان هذا بحياته حبه وخيانتهه اله اللي كلبته كلب
